A Ben Yepi fu Panya a Leti Go „te na a Moro Farawe Presi fu Grontapu”
DEN ben gebroiki na apostel Paulus fu panya leti na yeye fasi go „te na a moro farawe presi fu grontapu”. A bakapisi ben de taki furu „sma di ben abi a yoisti yeye gi a têgo libi, ben tron bribiman”.—Tori fu den Apostel 13:47, 48; Yesaya 49:6.
A ben de fu si na ini a libi fu William Lloyd Barry di ben gi ensrefi fayafaya èn di ben tan du muiti leki wan Kresten nomonomo, taki a ben angri trutru fu panya leti na yeye fasi. A ben de wan memre fu a Tiri Skin fu Yehovah Kotoigi. Brada Barry dede 2 yuli 1999, ala di a ben abi wan prati na a distrikt kongres na Hawaii.
Lloyd Barry ben gebore na ini Nyun Selanti na tapu 20 december 1916. Fosi a ben gebore, en mama nanga papa ben sori kaba taki den ben abi furu belanstelling gi den Bijbel waarheid di ben de fu feni na ini den buku fu C. T. Russell, di a Watch Tower Bible and Tract Society ben prati. Fu dati ede, brada Barry ben kweki na ini wan fayafaya Kresten osofamiri.
Ala di brada Barry ben abi belanstelling gi sport nanga skoroleri, èn a ben meki en akademia papira gi sabidensi srefi, toku a ben tan poti ala en prakseri na yeye afersi. So bun, na tapu 1 yanuari 1939, a ben bigin nanga a furuten diniwroko, èn a ben tron wan memre fu a Bethelfamiri na a kantoro fu a Genootschap na Australia. Baka di lanti ben tapu a wroko fu a Genootschap na ini 1941, brada Barry ben tan du a wroko fu a kantoro, èn son leisi a ben kisi a wroko fu skrifi wan sani di ben kan gi tra bribiman deki-ati. A ben de wan eksempre tu leki wan sma di ben teki fesi na ini a publiki diniwroko.
Na ini februari 1942, brada Barry ben trow nanga wan tra furuten bedinari. Melba, en lobi wefi, wroko nanga en na wan getrow fasi na ini ala den yari disi, na furu presi na grontapu. Den ben du wan prenspari sani fu go dini na ini dorosei kondre, di den ben go na a di fu 11 klas fu a Waktitoren Bijbelskoro Gilead na Amerkankondre. Den ben seni den go na a presi di furu sma ben o kari ’wan moro farawe presi na grontapu’ — Yapan. Baka di den doro drape na ini november 1949, den ben bigin dini leki zendeling na ini a lanpe foto Kobe. Na a ten dati, soso twarfu sma ben e preiki a bun nyunsu na ini Yapan. Brada Barry ben leri a tongo èn den gwenti fu a nyun tanpresi fu en èn a ben kon leri lobi den sma fu Yapan trutru, sma nanga suma a ben wroko na ini den 25 yari baka dati. A grupu fu Kresten brada na Yapan di ben e kon bigi moro nanga moro, ben si krin taki Brada Barry ben lobi den sma disi di „ben abi a yoisti yeye gi a têgo libi”, èn dati ben yepi en so taki a ben man tiri a bijkantoro na wan bun fasi someni tenti yari langa.
Afupasi fu 1975, di Yapan ben abi so wan 30.000 Kotoigi, den ben meki brada nanga sisa Barry kon na Brooklyn, New York. Den ben aksi brada Barry, di ben de wan Kresten di ben salfu nanga santa yeye, fu tron wan memre fu a Tiri Skin fu Yehovah Kotoigi (Romesma 8:16, 17). A ben kon na krin taki na ondrofeni di a ben abi nanga a skrifi fu tori ben kan gebroiki bun na ini a nyun wroko di a ben kisi na a Skrifi Afdeling. Èn a bigi ondrofeni di a ben abi nanga bijkantoro èn tapu internationaal kontren, ben meki taki a ben de wan bigi yepi leki wan memre fu na Uitgevers Komte fu a Tiri Skin.
Na ini ala den jari, brada Barry ben tan lobi den kondre na Owstusei nanga a pipel fu den. Studenti fu a Gileadskoro, so srefi den memre fu a Bethelfamiri, ben kan de seiker taki ini den lezing èn den komentaar fu en a ben o fruteri moi tori fu den furu sma di ben dini na ini a zendingwroko. A Kownukondre preikiwroko na ’den moro farawe presi fu grontapu’ trutru ben kon na libi te brada Barry ben fruteri en eigi ondrofeni tori nanga furu faya. Son wan fu den ondrofenitori disi kari na ini en eigi tori di ben kon na ini De Wachttoren fu 1 september 1961.
Wi sabi seiker taki leki wan ’kompe-erfgenaam nanga Krestes’, brada Barry sa tan abi belangstelling gi den sma di „ben abi a yoisti yeye gi a têgo libi”. A no de fu taki, dati ala sma di ben sabi en èn ben lobi en, sa misi en leki wan man di ben abi yeye fasi. A ben de wan man tu di ben gi ensrefi dorodoro na Yehovah èn di ben lobi a pipel fu Gado trutru. Ma wi e prisiri taki brada Barry ben horidoro te na a kaba fu en libi na grontapu.—Openbaring 2:10.
[Prenki na tapu bladzijde 16]
Lloyd Barry nanga John Barr di „Insight on the Scriptures” ben kon na doro na ini 1988
[Prenki na tapu bladzijde 16]
Den studenti di ben kaba a di fu 11 klas fu Gilead, e kon makandra na Yapan baka 40 yari