Den Ben Du a Wani fu Yehovah

Wan Friwani Presenti fu Meki a Soifri Anbegi Go na Fesi

DEN Israèlsma ben si a makti di Yehovah abi fu frulusu sma, nanga den eigi ai. Den ben si fa wan wondru ben prati den watra fu a Redi Se na tu, so taki den ben man koti a se abra go na a tra sei na tapu drei gron èn lowe gi a legre fu Egipti. Na a tra sei, na wan presi pe noti no ben man pasa nanga den, den ben si fa den srefi watra disi ben fadon kon na tapu den sma di ben lon kon na den baka, so taki a watra ben masi den. ¡Yehovah ben kibri a libi fu den!—Exodus 14:21-31.

Ma a sari taki son Israèlsma ben si a sani di a Gado fu den ben du, leki wan soso sani. Di Moses ben de na tapu a Bergi Sinai, dan den ben gi Aron den moi gowtu sani fu den èn den ben wani nomonomo taki a ben musu meki wan kruktu gado gi den di den ben kan anbegi. ¡Di Moses ben drai kon baka, dan a ben si fa den trangayesi sma disi ben e nyan, e dringi, e dansi, èn ben e boigi gi wan gowtu pikin kaw! Yehovah ben taigi den fu kiri so wan 3000 fu den — a sori leki den ben de den sma di ben bigin nanga na opruru. A dei dati, a pipel fu Gado ben leri wan prenspari sani, taki a de fanowdu fu anbegi soso Yehovah wawan.—Exodus 32:1-6, 19-29.

No langa baka a sani disi, Moses ben sreka sani fu du san Gado ben komanderi en fu du, taki a ben musu bow wan tabernakel, wan tenti fu anbegi Gado, wan di den ben kan tyari go nanga den. Gi a bow-wroko disi diri bowsani ben o de fanowdu, nanga wrokoman di ben sabi a wroko. Fu pe disi ben musu kon? Èn san wi kan leri fu a tori disi fu Bijbel?

Den Ben Gi Bowsani èn a Bekwaamfasi fu Den Leki Bijdrage

Yehovah ben gebroiki Moses fu komanderi den Israèlsma: „Tyari . . . wan bijdrage kon makandra gi Yehovah. Meki ibri sma di de klariklari na ini en ati, tyari dati kon leki wan bijdrage gi Yehovah.” Sortu bijdrage? Wan tu fu den sani di Moses ben kari ben de gowtu, solfru, kopro, titei, krosi, metibuba, udu nanga diri ston.—Exodus 35:5-9.

Den Israèlsma ben abi moro leki nofo fu kan gi so wan bigi bijdrage. Memre taki di den ben gowe libi Egipti, dan den ben teki sani fu gowtu èn fu solfru nanga den, makandra nanga furu krosi. Iya, „den ben puru sani na den Egiptisma anu” (Exodus 12:35, 36).a Na wan tra ten bifo dati, den Israèlsma ben hari den moimoi gowtu sani fu den puru na den skin nanga den eigi fri wani fu meki wan kruktu gado gi falsi anbegi. ¿Den ben o sori a srefi fasi now fu de klariklari fu gi wan presenti so taki a tru anbegi ben kan go na fesi?

Luku taki Moses no ben taki soifri omeni ibriwan sma ben musu gi, èn a no ben taki sani fu meki den konsensi naki den, noso fu meki den firi syen so taki den ben o gi sani. Na presi fu dati, a ben aksi nomo efu „ibri sma di ben wani na ini en ati”, ben kan gi. A ben de krin taki Moses no ben feni taki a ben musu dwengi a pipel fu Gado. A ben sabi seiker taki ibriwan sma ben o gi ala san a ben man gi.—Teki gersi 2 Korentesma 8:10-12.

Ma moro ben o de fanowdu gi a bow-wroko leki soso wan bijdrage fu bowsani. Yehovah ben taigi den Israèlsma tu: „Meki ala den wan di abi wan koni ati na un mindri kon èn meki den meki ala den sani di Yehovah komanderi.” Iya, bekwaam wrokoman ben de fanowdu gi a bow-wroko disi. Fu tru, „ibri sortu bekwaamfasi fu du anuwroko” — so srefi sma di ben e wroko udu, sma di ben e wroko isri, nanga gowtu smeti — ben o de fanowdu fu klari a wroko disi. A no de fu taki, dati Yehovah ben o tiri den wrokoman di ben o gebroiki den talenti fu den, èn a ben o fiti taki Jehovah ben o kisi a grani taki a wroko ben waka bun.—Exodus 35:10, 30-35; 36:1, 2.

Den Israèlsma ben teki a kari wantewante èn den ben gi den sani di den ben abi èn a bekwaamfasi fu den. Bijbel tori e fruteri: „Baka dati den ben kon, ibriwan sma di en ati ben buweigi en fu du so, èn den ben tyari kon, ibriwan sma di en yeye ben pusu en fu du so, den bijdrage gi Yehovah fu a wroko fu a tenti fu konmakandra èn gi ala a wroko di a e du gi den, èn gi den santa krosi. Èn den ben tan kon, den mansma makandra nanga den umasma, ibriwan sma di ben wani na ini en ati.”—Exodus 35:21, 22.

Wan Sani Di Wi Kan Leri

A bun bigi wroko fu preiki a bun nyunsu fu Gado Kownukondre e du na ini a ten disi nanga yepi fu friwani bijdrage. Nofotron disi na moni. Na tra ten, Kresten brada nanga sisa e gebroiki ala na ondrofeni di den abi fu yepi bow Kownukondre zaal, Kongres hal, nanga bijkantoro. Dan yu abi a wroko di e du na moro leki wan hondro Bethel-oso na heri grontapu, wroko pe furu difrenti sortu bekwaamfasi de fanowdu. ¡Ala den sma di abi wan ati di de klariklari kan de seiker taki Yehovah no sa frigiti a tranga wroko fu den!—Hebrewsma 6:10.

Na so a de tu nanga a prati di ibriwan fu wi abi na a Kresten diniwroko. Wi alamala e kisi tranga fu bai ten so taki wi kan teki prati na a preikiwroko fayafaya (Mateus 24:14; Efeisesma 5:15-17). Son sma e du disi leki furuten evangelie preikiman noso pionier. A situwâsi fu trawan meki taki den no man wroko someni na ini a diniwroko leki pionier. Ma toku Yehovah e prisiri nanga den tu. Neleki fa a ben de nanga den bijdrage gi a tabernakel, na so Yehovah no e taki soifri omeni ibriwan sma musu gi. Ma san a e aksi, na taki ibriwan fu wi e dini en nanga wi heri ati, sili, frustan nanga krakti (Markus 12:30). Efu wi e du dati, dan wi kan de seiker taki a sa pai wi gi den friwani bijdrage di wi e gi fu meki a tru anbegi go na fesi.—Hebrewsma 11:6.

[Futuwortu]