Wan grontapu pe sma abi wan kruktu denki fu getrowfasi

A BEN de wan waran freida neti na ini a foto Tel Aviv, na Israel. Wan yonkuman ben waka go na wan grupu yongusma di ben tanapu e wakti na dorosei fu wan dansi-oso. Wan tu miniti baka dati, wan bom sutu na a presi pe na ipi sma disi ben tanapu.

Agen, wan sma di tai wan bom na en skin, ben teki en eigi libi, èn na a srefi ten a ben teki a libi tu fu 19 tra yongusma. „Yu ben kan si pisipisi skin na ala sei. Den alamala ben de yongusma. Den ben de so yongu ete. Disi na a moro takru sani di mi si na ini mi heri libi”, na so wan sma di e wroko na ati-oso ben fruteri den nyunsuman bakaten.

„Ala sma lobi te sma e sori getrowfasi. Ma a getrowfasi disi . . . , kan meki taki feti e broko moro esi èn taki feti no man tapu so makriki”, na so Thurstan Brewin ben skrifi na ini wan tijdschrift di nen The Lancet. Iya, wi e si taki na ini a heri libisma historia sma kiri makandra fu di den de getrow na wan noso tra sani. Disi ben de so na ini den Kruistocht fu Krestenhèit èn sosrefi na ini Nazi Doisrikondre pe den kiri ipi-ipi sma.

Moro nanga moro sma e pina fu di sma no de getrow

A no de fu taki dati te wan sma de fayafaya pasa marki na ini a fasi fa a e sori getrowfasi, dan dati kan abi takru bakapisi srefisrefi. Ma te wan sma no de getrow, dan dati kan pori a libimakandra tu. A getrow di wan sma de getrow, wani taki dati a sma e horibaka ala ten gi wan sma, noso a e horibaka gi a wroko di wan grupu sma e du fu doro wan spesrutu marki. Boiti dati, a wani taki dati a sma e tanapu kánkan te a e kisi tesi, noso te tra sma e dwengi en fu drai en baka gi wan sani noso gi wan sma. Aladi furu sma e taki dati den lobi a sortu getrowfasi disi, toku kefalek furu sma no e sori getrowfasi pe a de moro prenspari srefi, namku na ini na osofamiri libi. Moro nanga moro sma e brokotrow. Wan fu den sani di e meki taki dati de so, na a kisi di sma e kisi deki-ati fu prakseri densrefi nomo èn fu du nomo san densrefi lobi. Wan tra sani di e meki taki dati de so, na den problema di sma abi na ini na aladei libi, èn sosrefi den bakapisi di e kon te sma no de getrow na a trowpatna fu den. Soleki fa a bom ben kiri soso yongusma na ini Tel Aviv, na so yongusma moro furu e ondrofeni den takru bakapisi fu den sani disi sondro taki den abi fowtu.

„Te problema e opo kon na ini na osofamiri libi fu di a papa nanga mama e brokotrow noso fu di den e prati libi, noso fu di wan papa noso wan mama musu kweki den pikin en wawan, dan wan fu den bakapisi fu dati na taki den pikin no man leri so bun”, na so wan raportu e taki. Soleki fa a sori, dan spesrutu den boi di e libi na ini wan osofamiri pe a mama e kweki den pikin en wawan, kan abi a problema taki den no e leri so bun na skoro, taki den wani kiri densrefi, èn taki den e du ogri na ini den yongu yari. Ibri yari, wan milyun pikin na Amerkankondre e si a papa nanga mama fu den e brokotrow. Na ini iniwan yari, a kan de so taki afu fu ala den pikin na ini a kondre dati di a papa nanga mama fu den de makandra te den gebore, sa si a papa nanga mama fu den brokotrow te den abi 18 yari. Den sma di ondrosuku a tori, kon si taki furu yongusma na tra presi fu grontapu ben kan ondrofeni a srefi sari sani disi na ini na osofamiri libi.

Libisma sa man tan getrow ala ten?

Fu di sma no e sori getrowfasi moro soleki fa den ben e du fosi, meki den wortu fu Kownu David e fiti moro leki oiti bifo: „Grantangi frulusu mi, o Yehovah, fu di nowan getrow sma no de moro; fu di getrow sma lasi gowe na mindri den manpikin fu libisma” (Psalm 12:1). Fu san ede furu sma no de getrow? Roger Rosenblatt, di e skrifi sani na ini a tijdschrift Time, e taki: „Aladi getrowfasi na wan trutru bun fasi, toku sma no kan fruwakti fu swaki libisma taki den sa tan getrow ala ten, bika wi frede tumusi, wi no feni taki wi warti, wi e suku wini gi wisrefi nomo, èn wi e suku biginen gi wisrefi.” Bijbel e sori krin fa sani ben o de na ini a ten pe wi e libi: „Sma sa lobi densrefi nomo, . . . den no sa de [getrow], den no sa abi natuurlijk firi fu lobi.”—2 Timoteyus 3:1-5.

Te wi e luku a bigi krakti di a kan abi tapu a denki nanga a du fu wan sma, fu di a de getrow, noso fu di a no de getrow, dan wi ben sa kan aksi wisrefi: ’Suma na a sma di wi trutru musu de getrow na en?’ Luku san na artikel di e kon now e taki fu na aksi disi.

[Sma di abi a reti fu a prenki na tapu bladzijde 3]

A fowtow na tapusei: © AFP/CORBIS