„Waka na mi baka doronomo”
„Fu taki en leti, fu a sani disi ede den ben kari unu, bika srefi Krestes ben pina fu unu ede, èn ben libi wan eksempre gi unu fu waka soifri na ini den futumarki fu en.”—1 PETRUS 2:21.
1, 2. Fu san ede wi kan taki dati na volmaakti eksempre fu Yesus leki leriman no de so kefalek taki wi no sa man du leki fa en ben du?
A NO de fu taki dati Yesus Krestes ben de a moro bun leriman di oiti ben libi na grontapu. Moro fara, a de so taki a ben de volmaakti, èn taki a heri pisi ten di a ben libi leki wan libisma na grontapu, a noiti no du sondu (1 Petrus 2:22). Ma dati wani taki dati na eksempre fu Yesus de so kefalek taki wi leki libisma di no de volmaakti no sa man du leki fa en ben du? Kwetikweti.
2 Leki fa wi ben si na ini na artikel na fesi, dan lobi na a moro prenspari sani di ben meki taki Yesus ben de wan bun leriman. Te yu luku en bun, dan lobi na wan sani di wi alamala kan kweki. Furu tron a Wortu fu Gado e gi wi deki-ati fu gro èn fu go na fesi na ini a fasi fa wi e sori lobi gi trawan (Filipisma 1:9; Kolosesma 3:14). Yehovah noiti e fruwakti taki den mekisani fu en musu du sani di den no man du. Fu taki en leti, fu di „Gado na lobi” èn fu di a ben meki wi fu abi den srefi fasi leki en, meki wi kan taki dati a meki wi na so wan fasi taki wi man sori lobi (1 Yohanes 4:8; Genesis 1:27). Sobun te wi e leisi den wortu fu na apostel Petrus di skrifi na ini a tekst di de na a bigin fu na artikel disi, dan wi kan abi a frutrow taki wi man du san a e taki. Wi man waka na ini den futumarki fu Krestes. Te yu luku en bun, dan wi man gi yesi na a komando fu Yesus srefi: „Waka na mi baka doronomo” (Lukas 9:23). Meki wi go luku fa wi kan sori a srefi lobi di Krestes ben sori, na a fosi presi gi den tru tori di a ben e leri sma, èn baka dati gi den sma di a ben e gi leri.
Fa fu kweki lobi gi den tru tori di wi e leri
3. Fu san ede son sma e feni taki a tranga fu studeri, ma sortu deki-ati Odo 2:1-5 e gi wi?
3 Fu man lobi den tru tori di wi e leri trawan, dan wisrefi musu de sma di lobi fu leri den tru tori dati. Na ini a grontapu fu a ten disi, sma no e kisi a lobi fu leri sani so makriki. Te sma no kisi nofo skoroleri èn te den kweki takru gwenti na ini den yongu yari, dan furu tron dati e meki taki den e gro kon tron sma di no lobi studeri kwetikweti. Ma a prenspari gi wi fu teki leri fu Yehovah. Odo 2:1-5 e taki: „Mi manpikin, efu yu e teki mi wortu èn e kibri den komando fu mi leki wan gudu na yu, fu yu poti prakseri nanga yu yesi na koni, so taki yu kan beni yu ati go na a koni fu man si sani krin; efu, boiti dati, yu e bari kari fu a frustan srefi èn e opo yu sten srefi fu kisi a koni fu man si sani krin, efu yu e tan suku en leki solfru, èn yu e tan suku en leki gudu di kibri, dan fosi yu sa frustan a frede gi Yehovah, èn yu sa feni a sabi fu Gado srefi.”
4. San a wani taki fu „beni” yu ati, èn sortu fasi fu si sani sa yepi wi fu du dati?
4 Luku taki na ini vers 1 te go miti 4 wi e kisi deki-ati difrenti leisi fu du muiti, no wawan fu „teki” èn fu „kibri” den komando fu Gado, ma sosrefi fu „tan suku” den. Ma san musu gi wi deki-ati fu meki a tranga muiti dati? We, luku a pisi di e taki „beni yu ati go na a koni fu man si sani krin”. Wan buku e taki dati a deki-ati di wi e kisi na ini a tekst disi „a no wan frumane fu poti prakseri na wan sani nomo; ma na wan komando di wi e kisi fu kon abi wan spesrutu fasi fu denki: taki wi musu wani opo wi ati gi den leri di wi e kisi”. San kan meki wi opo wi ati èn de klariklari fu teki den sani di Yehovah e leri wi? We, a fasi fa wi e si sani kan de wan yepi gi wi. Wi musu si „a sabi fu Gado srefi” leki „solfru” èn leki „gudu di kibri”.
5, 6. (a) San kan pasa nanga wi baka wan pisi ten, èn fa wi kan sorgu taki dati no pasa? (b) Fu san ede wi musu tan suku den tru tori na ini Bijbel, di wi kan teki gersi nanga gudu?
5 A no tranga fu kon kisi so wan fasi fu denki. Prakseri taki di yu ben teki a „sabi fu Gado”, dan a no de fu taki dati yu ben leri sosrefi fu a tru tori, taki Yehovah abi na prakseri fu gi den getrow libisma têgo libi na ini wan Paradijs grontapu (Psalm 37:28, 29). Di yu ben leri a tru tori dati fu a fosi leisi, dan a no de fu taki dati yu ben si en trutru leki wan diri gudu, yu ben e si en leki tru tori di ben e furu yu frustan nanga yu ati nanga howpu èn nanga koloku. Ma fa a de nanga yu now? A de so taki yu kon lasi a warderi di yu ben abi fosi gi den warti sani di yu ben leri? We dan, pruberi fu du den tu sani di wi o kari now. Na a fosi presi a bun fu pruberi fu kisi warderi baka, dati wani taki, fu memre yusrefi doronomo baka fu san ede yu e si ibri tru tori di Yehovah leri yu leki wan warti sani. Pruberi sosrefi fu kisi warderi baka gi den tru tori di yu ben leri langa ten pasa.
6 Na a di fu tu presi, yu musu tan meki muiti fu feni moro gudu. Bika, prakseri pikinso. San yu ben o du efu yu ben o diki wan diri ston puru na gron? Yu ben o teki en poti na ini yu saka èn waka gowe fu di yu prisiri kaba nanga a wan ston dati? Noso yu ben o meki muiti fu diki moro fara fu si efu moro fu den diri ston dati de? We, a Wortu fu Gado lai nanga tru tori di de leki diri ston nanga gudu di kibri. A no abi trobi omeni fu den yu feni kaba, bika yu kan feni moro leki dati srefi (Romesma 11:33). Te yu feni wan fu den tumusi warti tru tori disi, dan yu musu aksi yusrefi: ’Fu san ede meki a sani disi na wan diri gudu? A e meki mi kon frustan moro bun suma na Yehovah èn san a abi na prakseri fu du? A e leri mi wan bun sani di kan yepi mi fu waka na ini den futumarki fu Yesus?’ Te yu e denki dipi fu den sortu aksi disi, dan dati sa yepi yu fu kweki lobi gi den tru tori di Yehovah leri yu.
Fa fu sori lobi gi den sani di wi e leri trawan
7, 8. San na wan tu fasi fa wi kan sori trawan taki wi lobi den tru tori di wi leri fu Bijbel? Gi wan eksempre.
7 Fa wi kan sori na ini a fasi fa wi e gi trawan leri, taki wi lobi den tru tori di wi leri fu a Wortu fu Gado? Fu di wi e teki na eksempre fu Yesus, meki wi e wroko furu nanga a Bijbel te wi e preiki èn e gi sma leri. No tumusi langa pasa, dan a pipel fu Gado na heri grontapu ben kisi a deki-ati fu wroko moro furu nanga a Bijbel te den e du a preikiwroko fu den. Te yu e du dati, dan suku difrenti fasi fu sori den ososma taki yusrefi e warderi den sani trutru di yu e sori den na ini Bijbel.—Mateyus 13:52.
8 Prakseri na eksempre disi. Leti na baka a ten di wan tu sma ben du ogri-ati sani fu gens tirimakti na ini a foto New York, wan Kresten sisa ben e taki fu Psalm 46:1, 11 nanga den sma di a ben e miti na ini a preikiwroko. Te a ben e bigin taki nanga den sma, dan a ben e aksi den san den ben du fu pasa a sari sani dati di ben feni presi. Na a momenti dati ensrefi ben e arki nanga ala en prakseri na san den sma ben e piki, èn a ben e sori den taki a e frustan fa den e firi. Baka dati a ben e taki: „Mi kan sori yu wan tekst na ini Bijbel di de wan bigi trowstu gi mi na ini a tranga ten disi?” Wan tu sma nomo no ben wani arki, ma nanga moro furu sma a ben abi tumusi moi takimakandra. Te a srefi sisa disi e taki nanga yongu sma, dan a e taki furu tron: „Feifitenti yari langa kaba mi e gi sma leri nanga yepi fu Bijbel, èn yu sabi san? Noiti mi no miti nanga wán problema srefi di a buku disi no man lusu.” Te wi e taki nanga sma na wan opregti èn na wan fayafaya fasi, dan wi e sori den taki wi e si den sani di wi leri fu a Wortu fu Gado leki warti sani, èn taki wi lobi den.—Psalm 119:97, 105.
9, 10. Fu san ede meki a de prenspari fu wroko nanga a Bijbel te wi e gi piki tapu aksi di abi fu du nanga a bribi fu wi?
9 Te sma e poti aksi gi wi fu kon sabi fu san ede wi e bribi wan sani, dan wi abi wan tumusi moi okasi fu sori den taki wi lobi a Wortu fu Gado. Fu di wi e waka baka na eksempre fu Yesus, meki wi no e taigi den nomo fa wisrefi e denki fu wan tori (Odo 3:5, 6). Na presi fu dati, wi e gebroiki Bijbel fu gi piki tapu aksi di sma e poti gi wi. Yu e frede kande taki wan sma sa poti wan aksi gi yu di yu no sa man piki? We poti prakseri na tu moi sani di yu kan du.
10 Du san yu man fu de srekasreka. Na apostel Petrus ben skrifi: „Santa a Krestes leki Masra na ini un ati, èn de klariklari ala ten fu opo taki gi unsrefi na fesi ibriwan sma di e aksi unu wan reide fu a howpu di de na ini unu, ma du dati na wan safrifasi èn nanga bigi lespeki” (1 Petrus 3:15). Yu de srekasreka fu opo taki gi a bribi fu yu? Prakseri a tori disi, te wan sma e aksi yu fu san ede yu no e hori yusrefi na gwenti di no e kruderi nanga Bijbel, dan a no musu de so taki yu e taigi en nomo: „A bribi fu mi e taki dati a no bun.” So wan piki kan meki sma prakseri taki yu e meki tra sma teki bosroiti gi yu èn taki yu de wan memre fu wan sortu kerki di abi ala sortu fromu denki. A ben sa moro bun fu taki: „A Wortu fu Gado, Bijbel, e taki dati mi no musu du en” noso, „Gado no o feni en bun efu mi du dati”. Baka dati yu kan fruteri a sma fu san ede yu e taki dati.—Romesma 12:1.
11. Sortu yepisani wi abi di kan yepi wi fu de srekasreka fu piki den aksi di abi fu du nanga a Wortu fu Gado?
11 Efu yu feni taki yu no sreka nofo fu piki den aksi dati, dan fu san ede yu no e teki pikinso ten fu studeri a pikin buku Fa foe bigin èn go doro nanga bijbel takimakandra (noso a Redeneren-buku) efu a de na ini a tongo fu yu?a Luku wan tu pisi tori na ini di yu denki taki sma kan tyari kon na fesi èn pruberi fu hori wan tu Bijbel prakseri na ede. Poti a pikin buku dati (noso yu Redeneren-buku) nanga yu Bijbel na wan presi pe yu kan teki den wantewante te dati de fanowdu. No draidrai fu gebroiki den ala tu, aladi yu e taigi na ososma taki yu abi wan buku di yu wani gebroiki fu yepi fu feni den piki tapu aksi di abi fu du nanga Bijbel.
12. San wi kan taki efu wi no sabi a piki tapu wan aksi di abi fu du nanga Bijbel?
12 Pruberi fu no broko yu ede fu soso. Nowan sondu libisma de di sabi ala sani. Sobun te wan sma poti wan aksi gi yu di abi fu du nanga Bijbel ma di yu no man piki, dan yu ben sa kan piki na a fasi disi: „Grantangi, taki yu poti so wan moi aksi. Fu taki en leti, mi no sabi a piki tapu na aksi dati, ma mi sabi taki a Bijbel musu e taki fu a tori dati. Mi lobi ondrosuku sani na ini Bijbel, sobun, mi o suku a piki tapu na aksi fu yu, èn dan mi wani kon baka na yu fu gi yu a piki.” Efu yu e taki krin fa a sani de sondro fu meki bigi, dan dati kan opo na okasi gi yu fu abi moro takimakandra nanga na ososma bakaten.—Odo 11:2.
Wi musu sori lobi gi den sma di wi e gi leri
13. Fu san ede wi wani tan yepi den sma gi suma wi e preiki?
13 Yesus ben e sori lobi gi den sma di a ben e gi leri. Fa wi kan teki na eksempre fu en ini a tori disi? Noiti wi musu de sondro firi gi den sma di e lontu wi. A tru taki dei fu dei a feti fu „a bigi dei fu Gado na Almaktiwan” e kon moro krosibei, èn taki bun furu fu den milyardmilyard sma na grontapu sa kisi pori (Openbaring 16:14; Yeremia 25:33). Toku wi no sabi suma o tan na libi èn suma o dede. A krutu dati musu kon ete èn a sma di Yehovah poti fu krutu sani na Yesus Krestes. Sobun, so langa leki a krutu dati no feni presi, wi e si ibri sma leki wan sma di kan tron wan anbegiman fu Yehovah.—Mateyus 19:24-26; 25:31-33; Tori fu den Apostel 17:31.
14. (a) Fa wi kan ondrosuku wisrefi fu kon sabi efu wi e sori taki wi e frustan fa trawan e firi? (b) Na sortu fasi wi kan sori na ini preikiwroko fu wi taki wi e frustan fa trawan e firi èn taki wi wani yepi den?
14 Fu dati ede wi wani de neleki Yesus fu di wi wani meki muiti fu frustan fa trawan e firi. Wi kan aksi wisrefi: ’A de so taki mi e firi gi trawan te mi e si fa den kerki, den politiek tiriman, nanga den bisnisman fu a grontapu disi, e kori sma nanga den lei di den e fruteri den? San mi e du te mi si taki wan sma e sori wan mi-no-ke fasi gi a boskopu di wi e tyari? A de so taki mi e meki muiti fu kon frustan fu san ede a sma e sori a fasi dati? Mi e hori na prakseri taki wan pisi ten ben de taki misrefi, noso trawan di e dini Yehovah na wan getrow fasi now, ben de so tu? Mi e hori dati na prakseri te mi e preiki gi den sma dati, fu si fa mi kan yepi den? Noso mi no e meki muiti fu yepi den fu di mi e denki taki den sma disi lasi kaba?’ (Openbaring 12:9) Te sma e si taki wi e meki muiti fu frustan fa den e firi, dan dati kan meki taki den wani arki a boskopu fu wi (1 Petrus 3:8). Te wi e meki muiti fu frustan fa trawan e firi, dan dati e gi wi deki-ati tu fu sori taki wi wani yepi den sma di wi e miti na ini a preikiwroko. Kande wi o skrifi gi wisrefi sortu aksi den sma ben abi èn nanga san den ben e broko den ede. Te wi o go baka na den, dan wi kan sori den taki wi ben prakseri den sani di den ben taki a tra leisi di wi ben miti den. Efu den sma abi wan spesrutu nowtu na a momenti di wi miti den, dan a kan taki wi man yepi den srefi.
15. Fu san ede wi musu meki muiti fu si den bun sani di sma e du, èn fa wi kan du dati?
15 Neleki Yesus wi e meki muiti fu si den bun sani di sma e du. Kande yu e si fa wan mama di no abi masra e du tranga muiti fu kweki den pikin fu en na wan bun fasi. A kan sosrefi taki yu e si fa wan man e feti fu sorgu gi en osofamiri. Noso yu miti nanga wan owru sma di e sori taki a lobi fu taki fu sani di abi fu du nanga na anbegi fu Gado. We, a de so taki wi e meki muiti fu si den bun sani disi na ini den sma di wi e miti, èn taki wi e prèise den gi den bun sani di den e du? Te wi e du dati, dan wi e sori taki sani de di wi nanga na ososma e si na a srefi fasi, èn dati kan opo a pasi gi wi fu preiki gi a sma dati fu a Kownukondre.—Tori fu den Apostel 26:2, 3.
Wi musu abi sakafasi fu man sori lobi
16. Fu san ede a prenspari fu tan sori safrifasi nanga bigi lespeki gi den wan gi suma wi e preiki?
16 Lobi gi den sma di wi e gi leri, sa meki taki wi e gi yesi na a koni warskow di Bijbel e gi wi: „Sabi e meki sma kisi heimemre, ma lobi e tranga sma” (1 Korentesma 8:1). Yesus ben abi furu sabi, ma toku a noiti no ben abi heimemre. Sobun yu musu luku bun te yu e preiki gi trawan, taki yu no taki na wan fasi di kan meki a gersi leki na strei yu e strei nanga den, noso taki yu e taki na wan fasi di kan meki den firi taki yu hei moro leki den. A marki fu wi na fu doro na ati fu sma, èn fu hari a prakseri fu den so taki den wani kon sabi den tru tori di wisrefi lobi sote (Kolosesma 4:6). Memre taki di Petrus taigi Kresten taki den musu de klariklari fu opo taki gi a bribi fu den, dan a ben memre wi sosrefi taki wi no musu frigiti fu du dati „na wan safri fasi èn nanga bigi lespeki” (1 Petrus 3:15). Efu wi abi safrifasi èn efu wi e sori bigi lespeki, dan a sa moro makriki fu gi sma deki-ati fu tron wan mati fu a Gado di wi e dini.
17, 18. (a) Fa wi musu du te sma e krutu wi fu di den feni taki wi no koni nofo fu du a preikiwroko? (b) Fu san ede a no de so, taki wan bijbelstudenti musu sabi den fositen tongo nomonomo fu man frustan a Bijbel?
17 A no de fanowdu fu pruberi fu meki ala sma si taki wi abi koni, noso taki wi kisi bun skoro. Efu son sma na ini a kontren fu yu no wani arki sma di no go na heiskoro, dan no meki a fasi fa den e denki meki yu lasi-ati. Yesus no ben arki den sma di ben feni taki a no ben go na wan fu den heiskoro fu den rabi fu a ten dati; Yesus no ben meki a fasi dati fa sma ben e denki, abi krakti na en tapu so taki ensrefi ben bigin meki bigi nanga a bigi koni di a ben abi.—Yohanes 7:15.
18 Awinsi omeni skoroleri wan Kresten kisi, toku sakafasi nanga lobi na sani di moro prenspari leki dati. A Moro Bigi Leriman, Yehovah, e meki taki wi koni nofo fu du a preikiwroko (2 Korentesma 3:5, 6). Awinsi san den kerki tiriman fu Krestenhèit e taki, a no de fanowdu fu leri den fositen tongo di Bijbel ben skrifi na ini, fu tron leriman fu a Wortu fu Gado. Yehovah sorgu taki Bijbel skrifi na wan tumusi krin fasi èn nanga wortu di makriki fu frustan, so taki pikinmoro ala sma kan frustan den prenspari tru tori di de na ini. Den tru tori dati no e lasi gowe, srefi te sma e vertaal den poti na ini hondrohondro tra tongo. Sobun, a no de so taki wan sma musu sabi den fositen tongo nomonomo fu man frustan Bijbel, aladi a kan de wan yepi sontron efu wan sma sabi den. Wan tru Kresten musu de wan sma di de klariklari fu teki leri. Ma te a e firi ensrefi bigi fu di a sabi den tongo di Bijbel ben skrifi na ini, dan a kan tron wan sma di yu no man leri noti fu di a feni taki a sabi ala sani kaba.—1 Timoteyus 6:4.
19. Na sortu fasi wi kan taki dati a Kresten diniwroko fu wi na wan fasi fu dini trawan?
19 A no de fu taki dati wi musu abi sakafasi fu man du wi Kresten diniwroko. Ibritron baka wi e miti nanga frufolgu, mi-no-ke fasi, èn srefi nanga gens (Yohanes 15:20). Ma te wi e du wi diniwroko na wan getrow fasi, dan wi e du wan wroko di prenspari srefisrefi. Efu wi tan dini trawan nanga sakafasi te wi e du a wroko disi, dan wi e sori a srefi lobi di Yesus Krestes ben sori gi tra sma. Hori a sani disi na prakseri: Efu a ben de fanowdu fu preiki gi wán dusun sma di abi mi-no-ke fasi, soso fu kan feni wán reti-ati sma, dan yu no denki taki a ben o bun fu du dati? A no de fu taki! Sobun te wi e tan go doro fu du a wroko disi, sondro fu gi abra, dan na wan getrow fasi wi e dini den wan disi di de reti-ati sma di musu kisi yepi ete. Wi no abi fu tweifri taki Yehovah nanga Yesus sa sorgu taki bun furu fu den sma disi di de leki warti sani, sa kon ete èn taki den sa kisi yepi bifo a kaba kon.—Hagai 2:7.
20. Fa wi kan gi sma leri nanga yepi fu na eksempre fu wi?
20 Wan tra fasi fa wi kan sori taki wi de klariklari fu dini trawan, na fu gi den leri nanga yepi fu na eksempre fu wi. Kon meki wi taki dati wi wani leri sma taki a moro bun sani di wi kan du, na fu dini Yehovah, a „koloku Gado”, èn taki dati na a moro prisiri fasi fu libi di de (1 Timoteyus 1:11). A de so taki tra sma kan si krin taki wi de koloku èn taki wi prisiri nanga a fasi fa wi e libi? A de so tu taki den kan si dati te den e luku a fasi fa wi e libi nanga birtisma, skoromati, nanga sma na wrokope? Na a srefi fasi wi e leri bijbelstudenti taki a Kresten gemeente de wan presi pe sma e sori switifasi nanga furu lobi gi makandra, aladi wi e libi na ini wan grontapu di no abi lobi èn di ogri srefisrefi. A de so tu dan taki den studenti fu wi kan si taki wi lobi ala sma na ini a gemeente èn taki wi e wroko tranga fu tan libi na ini vrede nanga makandra?—1 Petrus 4:8.
21, 22. (a) Sortu sani wi sa man du kande efu wi ondrosuku wisrefi fu si fa a de nanga a diniwroko fu wi? (b) Fu san wi sa taki na ini den artikel fu a Waktitoren di e kon?
21 Efu wi de klariklari fu du ala san wi man na ini a diniwroko, dan ten na ten dati kan gi wi deki-ati fu ondrosuku wisrefi baka. Furu sma di e du dati na wan opregti fasi, kon si taki den man du moro srefi na ini a diniwroko fu di den man bigin nanga a furuten diniwroko, noso fu di den man go dini na wan presi pe moro preikiman de fanowdu. Sonwan fu den ben teki a bosroiti srefi fu leri wan tra tongo, so taki den kan yepi trakondre-sma di kon tan na ini a kontren pe den e libi. Efu yu kisi na okasi fu du den sortu sani disi, dan prakseri bun fu en èn suku a tiri fu Gado na ini begi. Te wi e gi wisrefi na ini a diniwroko, dan dati sa gi wi prisiri, nanga koloku, nanga wan korostu firi.—Preikiman 5:12.
22 Meki wi du ala muiti fu tan teki na eksempre fu Yesus Krestes, fu di wi sa wroko tranga fu kisi moro lobi gi den tru tori di wi e leri trawan, èn sosrefi gi den sma di wi e gi leri. Te wi e kweki èn e sori lobi tapu den tu kontren disi, dan dati sa yepi wi fu seti sani na so wan fasi taki wi kan gi sma leri soleki fa Krestes ben e du dati. Ma san moro wi musu du fu kan doro a marki dati? Na ini a Waktitoren di e kon, wi sa kisi wan tu artikel di sa taki fu wan tu spesrutu fasi fu gi leri di Yesus ben gebroiki.
[Futuwortu]
a Yehovah Kotoigi tyari en kon na doro.
San yu ben sa piki?
• Sortu dyaranti wi abi taki na eksempre fu Yesus leki leriman no de so kefalek taki wi no man du leki fa en ben du?
• Fa wi kan sori taki wi lobi den tru tori di wi leri fu Bijbel?
• Fu san ede meki a de prenspari fu tan abi sakafasi te wi e kon kisi moro sabi fu Bijbel?
• San na wan tu fasi fa wi kan sori taki wi lobi den sma di wi e gi leri?
[Prenki na tapu bladzijde 16]
Du san yu man fu de srekasreka
[Prenki na tapu bladzijde 16, 17]
Efu yu e si „a sabi fu Gado” leki wan warti sani, dan yu sa man gebroiki Bijbel na wan tumusi bun fasi
[Prenki na tapu bladzijde 18]
Wi e sori lobi gi tra sma te wi e fruteri den a bun nyunsu