Kownukondre preikiman e fruteri

Den e „yere” a Kownukondre boskopu na ini Brasyonkondre

FURU Yehovah Kotoigi na ini Brasyonkondre teki a tyalensi fu leri a Dofusma-tongo fu Brasyonkondre. Den ben du disi fu man preiki a bun nyunsu fu a Kownukondre na den dofusma na ini Brasyonkondre. Soleki fa den ondrofenitori di e kon e sori, dan a muiti di den Kotoigi e meki, abi tumusi bun bakapisi.

Efa,a na wan dofu uma di e libi na ini a foto São Paulo. Baka di Efa nanga den dri pikin fu en ben go tan nanga wan dofu man, dan a bigin leri a dofusma-tongo. Efa nanga a man nanga suma a ben hori, ben miti wan tu dofu Kotoigi na wan presi pe furu wenkri de. Den Kotoigi ben gi den a kari fu go na a konmakandra na a Kownukondre zaal. Den ben teki a kari disi fu di den ben denki taki wan fesa ben o drape.

Fu di Efa no ben sabi a dofusma-tongo so bun, meki a no ben man frustan ala den sani na a konmakandra. Baka dati, wan tu Kotoigi gi en wan kari fu go nyan switi sani na den oso. Nanga yepi fu den prenki di de na ini a brochure Njan Boen Foe Tégo Foe A Libi Na Grontapoe!, den ben fruteri en fu a pramisi di Gado abi na ini a ten di e kon fu meki grontapu kon tron wan paradijs. Efa ben lobi den sani di a ben leri èn a ben bigin go na den konmakandra doronomo.

Syatu baka dati, Efa gowe libi a man nanga suma a ben hori. A du dati fu di a ben wani libi akruderi Bijbel markitiki. Aladi a ben kisi hebi gens fu en famiri, toku a ben tan go na fesi na yeye fasi èn a ben teki dopu na ini 1995. Baka siksi mun Efa tron wan pionier, noso wan furuten Kownukondre preikiman. Sensi a ten dati a yepi fo dofusma fu gi den libi abra èn teki dopu.

Carlos dofu sensi a ben gebore. Sensi pikin-nengreten a ben e gebroiki drugs doronomo, a ben e du hurudu èn a ben e fufuru. Boiti dati a ben de wan memre fu wan grupu fu ogriman. Fu di tra grupu nanga ogri-ati man na ini ben wani du ogri nanga en, meki a ben lowe go na a foto São Paulo èn a ben go tan wan pisi ten nanga João. Neleki Carlos, dan João ben dofu tu, a ben de wan ogriman èn a ben libi wan yayo libi.

Baka wan tu yari, Carlos ben kon leri sabi a Kownukondre boskopu. Disi meki taki a ben kenki en libi akruderi Bijbel markitiki èn a trow. Baka di a doro den Bijbel markitiki, a teki dopu fu sori taki a gi en libi abra na Yehovah. Carlos no ben sabi taki na a srefi ten João ben kon sabi a bun nyunsu tu. João sosrefi tyari bigi kenki kon na ini en libi. Di a kon leri taki Yehovah no e feni en wan bun sani fu gebroiki popki na ini na anbegi, dan a trowe ala den popki di a ben abi. Baka di João kenki a fasi fa a ben libi fosi, a teki dopu.

Carlos nanga João ben prisiri srefisrefi di den miti makandra na a Kownukondre zaal, èn di den kon si fa a libi fu den kon kenki! Now den ala tu na lepi osofamiri edeman di e dini leki fayafaya Kownukondre preikiman.

Now na ini Brasyonkondre 30 gemeente nanga 154 grupu de gi dofusma. Moro leki 2500 preikiman de na ini den gemeente nanga grupu disi èn 1500 fu den na dofusma. Na a „Leriman fu Gado Wortu” Distrikt Kongres fu 2001 di ben hori na ini Brasyonkondre gi den dofusma, moro leki 3000 sma ben de èn 36 sma ben teki dopu. Nanga a blesi fu Yehovah, wi howpu taki moro dofusma sa teki a Kownukondre boskopu.

[Futuwortu]