Sorgoe gi den sani di den dofoewan abi fanowdoe na jeje fasi
1 Wan nomroe foe dofoe sma di e gro dei foe dei e kon na a Toemoesi Boen Skapoeman èn den e kon ini wan matifasi nanga Jehovah Gado foe di den e gi densrefi abra na en (Johanes 10:3, 11). Trawan ini a gemeente, spesroetoe den owroeman, moesoe de na ai ini a tori foe den sani di den dofoe brada nanga sisa foe wi abi fanowdoe na jeje fasi.
2 Sorgoe gi den sani di den dofoewan abi fanowdoe: Den seti sani foe poti gemeente konmakandra abra dofoesma-tongo, efoe bekwaam tolkoe de. Efoe no wan sma ini a gemeente sabi a dofoesma-tongo, a sa fiti kande foe meki dofoe sma go na a moro krosibei gemeente di kan gi a jepi disi. A no de foe taki, dati efoe so wan seti no de ini a gebied foe oenoe, dan kande a kan foe meki ibri leisi wan tra preikiman di kisi toewijzing, go sidon sei a dofoe sma èn prati nanga en den moro prenspari edeprakseri di a skrifi foe den sani di den ben taki.
3 Sani di seti ini a kring èn a gemeente: Sani e seti nanga jepi foe a kring opziener foe poti a kringkonmakandra nanga spesroetoe deikonmakandra abra ini dofoesma-tongo. Den kan teki wan owroeman noso wan bekwaam dinari ini a diniwroko foe orga a sani disi. Bekwaam brada nanga sisa di de wan boen eksempre, kan kisi a toewijzing foe abi prati foe poti a kring programa abra ini a dofoesma-tongo. A srefi gronprakseri disi den kan gebroiki ini a gemeente, foe de seiker taki den e sorgoe na wan joisti fasi gi sani di den dofoewan abi fanowdoe.
4 A moro boen foe meki den dofoewan go sidon pe a kan si a sma di sabi a dofoesma-tongo, so boen leki a podium di de leti na a tolkoe baka. Disi de prenspari na tapoe gemeente konmakandra, so boen leki na tapoe kringkonmakandra. Na gemeente konmakandra a moro boen taki a sma di sabi a dofoesma-tongo e sidon, efoe a nomroe foe den dofoe sma di e fisiti a konmakandra, de pikin. A ben sa de wan boen sani efoe den owroeman e aksi wan lepi brada di dofoe, efoe a kan, foe kisi spesroetoe rai ini a tori foe sani di seti gi sidonpresi di fiti.
5 Efoe wan bekwaam sma de di sabi a dofoesma-tongo èn di e dini leki wan owroeman noso dinari ini a diniwroko èn a nomroe foe dofoe brada nanga sisa e aksi disi, dan den owroeman kan teki a bosroiti taki wan toe konmakandra moesoe hori dorodoro ini a dofoesma-tongo. A Gemeente Boekoestudie kan de heri boen a fosi alawiki konmakandra di seti na a fasi disi. Efoe a gemeente ben sa wani foe hori iniwan foe den tra feifi alawiki konmakandra ini a dofoesma-tongo (noso ini wan tra tongo boiti Sranantongo), dan den owroeman moesoe taigi a Genootschap san den wani.
6 Ala di komunikâsi na mindri dofoe sma nanga sma di e jere, e aksi kande spesroetoe moeiti foe a sei foe ala toe groepoe, ala memre foe a gemeente moesoe doe moeiti foe kon sabi makandra, so taki den troetroe kan gi makandra deki-ati (Heb. 10:24). A jeje disi na mindri den brada sa meki taki ala njoen sma firi taki wi e bari den wan switikon.