Ondrofenitori

A prati di mi ben abi fu meki a bijbel leriwroko go na fesi na heri grontapu

SOLEKI FA ROBERT NISBET FRUTERI

Kownu Sobhuza II fu Swasikondre ben gi mi brada George nanga mi wan switikon na ini en paleisi. A yari ben de 1936, ma mi kan memre a takimakandra di mi ben abi nanga en heri bun. A langa takimakandra di mi ben abi nanga wan kownu ben de wan fu den ondrofeni di mi ben abi na ini den someni yari di mi gi Bijbel leri. Now mi abi 95 yari èn nanga prisiri mi e prakseri baka fu a prati di mi ben abi na a wroko dati; wan wroko di ben meki mi go na feifi difrenti pisi fu grontapu.

A BEN bigin na ini 1925, di wan man di ben e seri te, bigin kon na wi famiri na ini Edinburg, wan foto na Skotland. A man disi ben nen Dobson. Mi ben de wan tini ete èn mi ben e wroko na wan presi fu leri meki dresi. Aladi mi ben yongu ete, toku mi ben e broko mi ede nanga den prenspari kenki di a grontapufeti fu 1914-1918 ben tyari kon na ini osofamiri èn na ini a fasi fa sma ben e denki fu kerki. Wan fu den leisi di masra Dobson ben kon na unu, dan a gi wi a buku The Divine Plan of the Ages. A buku disi ben sori krin san a koni Mekiman „abi na prakseri”. Den sani disi ben de so krin taki mi ben wani dini so wan Gado.

Heri esi mi nanga mi mama bigin go na den konmakandra fu den Bijbel Ondrosukuman, soleki fa sma ben sabi Yehovah Kotoigi na a ten dati. Na ini september 1926 mi nanga mi mama sori taki wi gi wi libi abra na Yehovah fu di wi teki dopu na ini watra na a kongres na ini Glasgow. Ibri sma di ben o teki dopu ben kisi wan langa yapon di den ben musu weri tapu den krosi nanga san den ben o teki dopu. Den ben musu tai a langa yapon na den aifutu so taki a no ben o kon na loktu te den ben o teki dopu. Na a pisi ten dati den ben si a langa yapon leki wan sani di fiti na so wan seryusu okasi.

Na ini a ten dati wi ben musu kon frustan furu sani moro bun. Furu, noso pikinmoro ala den memre fu a gemeente ben e hori Kresneti. Wan tu sma nomo ben e teki prati na a preikiwroko. Son owruman srefi ben e weigri fu prati publikâsi tapu sonde, fu di den ben denki taki disi no ben e kruderi nanga a Sabadei. Ma den artikel na ini den Watch Tower fu 1925, ben bigin taki moro nanga moro fu tekst soleki Markus 13:10: „Sosrefi na ini ala den nâsi a bun nyunsu musu preiki fosi.”

Fa a wroko ben sa du na heri grontapu? A fosi leisi di mi go oso fu oso mi ben taigi den sma nomo taki mi ben e seri moi buku di abi fu du nanga kerki tori. Mi ben pristeri den a buku The Harp of God; wan buku di e fruteri tin difrenti prenspari leri fu Bijbel di yu kan teki gersi nanga tin titei fu wan harpu. Bakaten wi ben kisi a kotoigi karta di ben abi wan syatu boskopu na tapu di na ososma ben kan leisi. Wi ben e tyari wan gramofon sosrefi di ben e prei wan lezing fu fo nanga afu miniti. Den gramofon fu a pisi ten dati ben hebi fu tyari. Ma den gramofon di ben kon baka dati ben moro lekti èn wi ben kan poti den tanapu leti-opo srefi fu prei en.

Fu 1925 te go miti den yari syatu baka 1930, wi ben gi kotoigi na a moro bun fasi fa wi ben man du dati. Syatu baka 1940, a Theokrasia Diniwroko-skoro ben seti na ini ala gemeente. Wi ben kisi leri di ben sori wi fa wisrefi ben kan taki nanga den ososma di ben wani arki a Kownukondre boskopu. Wi kon leri o prenspari a de fu hori oso-bijbelstudie nanga den sma di wani sabi moro. Te yu e luku en bun, dan wi kan taki dati disi ben de a bigin fu a Bijbel leriwroko di e du now na heri grontapu.

Mi kisi deki-ati fu Brada Rutherford

A winsi di mi ben abi fu du moro na ini a leriwroko disi ben meki taki mi go na ini a furuten diniwroko na ini 1931. Mi ben o bigin wantewante baka wan kongres di ben hori na ini Londen. Ma na a brekten dati di mi ben teki bro fu nyan na a kongres dati, dan Brada Joseph Rutherford ben wani taki nanga mi. Brada Rutherford ben abi a frantwortu fu a leriwroko na ini a pisi ten dati. A ben abi na prakseri fu seni wan pionier go na Afrika. A aksi mi: „Yu de klariklari fu go drape?” Aladi mi ben fruwondru fu disi, toku mi ben man taki sondro fu degedege: „Iya mi sa go.”

Na a ten dati wi ben abi a marki fu prati so furu Bijbel publikâsi leki wi man. Disi ben wani taki dati ala ten wi ben abi fu go fu a wan presi go na a trawan. Mi ben kisi a deki-ati fu no trow. Furu brada na ini a pisi ten dati di ben abi a frantwortu fu luku a wroko, ben kisi a srefi deki-ati tu. A kontren di mi ben kisi fu wroko ben e bigin na ini foto Kaapstad, a zuidsei pisi fu Afrika, èn a ben go te na a owstusei fu Afrika èn sosrefi a pisi kontren fu den èilanti na ini a Indisch Se di de krosibei fu syoro. Fu doro a westsei pisi mi ben musu abra a faya santi fu a drei sabana Kalahari go te na Victoriameer di de a bigin fu a Nijl-liba. Makandra nanga wan tra brada nanga suma mi ben wroko, wi ben musu tan siksi mun ibri yari na wán noso moro fu den Afrikan kondre di ben de na a pisi disi fu Afrika.

Tu hondro dosu nanga yeye gudu

Di mi doro na ini Kaapstad, dan den ben sori mi 200 dosu nanga publikâsi di ben de gi na Owstusei fu Afrika. Den publikâsi ben druk na ini fo tongo fu Europa nanga fo tongo fu Asia, ma nowan fu den ben druk na ini wan Afrikan tongo. Di mi aksi fu san ede ala den publikâsi ben de drape kaba bifo mi doro srefi, dan mi kisi fu yere taki den ben de gi Frank nanga Gray Smith, tu pionier di no so langa pasa ben go na Kenia fu preiki. Syatu baka di den doro na ini Kenia, den ala tu ben kisi malaria èn a de wan sari taki Frank dede.

Aladi a sani disi meki mi denki seryusu fu a situwâsi fu mi, toku mi no lasi-ati. Mi nanga a patna fu mi, David Norman, ben gowe libi Kaapstad fu go na a fosi presi fu du wi diniwroko. Wi komoto nanga sipi fu Kaapstad go na Tansania, di ben de sowan 5000 kilometer moro fara. Wan man di ben e wroko na wan kantoro pe sma kan bai ticket na ini a foto Mombasa, na Kenia, ben hori den publikâsi fu wi èn a ben seni den go na den presi pe wi ben aksi en fu seni den go. Na ini a bigin wi ben gi kotoigi na den distrikt pe sma e du bisnis, soleki na den wenkri nanga kantoro na ini ibri foto. Den publikâsi di wi ben prati ben de 9 buku nanga 11 pikin buku, di sma ben kon sabi leki alenbo buku fu di den buku ben abi difrenti kloru.

Bakaten wi bosroiti fu go na a èilanti Zanzibar di de sowan 30 kilometer fu a owstusei syoro fu Afrika. Furu hondrohondro yari langa Zanzibar ben de wan prenspari presi pe sma ben e seri èn bai srafu. Na èilanti disi kisi barinen fu a nagri di den sma e prani drape èn wi ben man smeri disi na ini a heri foto. A no ben de makriki gi wi fu waka na ini a foto fu di a ben bow bruyabruya. Den strati ben kronkron èn ben e waka na wan bruya fasi èn disi ben meki wi lasi pasi makriki. A hotel pe wi ben e tan ben bun ma den doro ben de nanga isri èn a ben abi deki skotu. A hotel ben gersi wan dungru-oso na presi fu wan hotel. Ma wi ben abi bun bakapisi na ini Zanzibar èn wi ben e prisiri fu feni Arabiri, sma fu India, nanga trawan di ben wani teki den publikâsi fu wi.

Loko, boto nanga oto

Na den dei dati a no ben makriki fu go na den difrenti presi na Owstusei fu Afrika. Fu gi wan eksempre, di wi ben komoto fu Mombasa go na den hei presi na Kenia, dan a loko no ben man go moro fara fu di wan plaag fu sprenka ben de. Milyunmilyun sprenka ben de tapu a gron èn den ben de tapu a pasi pe a loko ben e waka. Disi ben meki a pasi grati so taki a ben muilek gi a loko fu tan tapu a pasi. A wan-enkri lusu ben de fu puru den sprenka na tapu a pasi pe a loko ben musu waka. Nanga yepi fu bun faya watra di ben komoto fu a loko den ben man krin a pasi. Na so wan fasi wi ben e go safrisafri na fesi teleki wi ben pasa a bosu sprenka. Wi ben breiti di a loko doro na den moro hei pisi fu a kondre, pe a ben de moro kowru!

Wi ben man doro den foto na syoro moro makriki nanga loko èn nanga boto. Ma na a tra sei wi ben man doro den boitipresi moro makriki nanga oto. Mi ben breiti di mi brada George ben kon wroko makandra nanga mi, fu di baka dati wi ben man bai wan pikin bus di ben bigi nofo fu poti wi bedi, wan pikin kukru, nanga wan presi fu poti sani. Wi ben seti den fensre fu a bus na so wan fasi taki maskita no ben man kon na inisei. Wi ben poti boksu na tapu a bus sosrefi. Na so wan fasi wi ben man gi kotoigi oso fu oso na deiten èn wi ben man kari sma kon na den lezing di wi ben e hori mofoneti na den presi pe wowoyo e hori. Sma ben lobi fu arki wan fu den lezing di wi ben prei di nen: „Hel de wan faya presi?” Nanga a bus wi ben waka sowan 3000 kilometer fu Zuid-Afrika go na Kenia. Wi ben breiti fu abi difrenti pikin buku na a pisi ten dati di ben de na ini wan tu Afrikan tongo. Nanga furu prisiri den sma fu a presi drape ben teki den buku fu wi.

Wan moi ondrofeni di wi ben abi te wi ben teki waka go na den presi disi, na taki wi ben man si so furu busimeti fu Afrika. A no de fu taki dati wi ben de na ai èn wi ben sorgu taki wi ben tan na ini a bus te dungru ben fadon. Ma a ben tranga a bribi fu wi fu si someni difrenti meti di Yehovah meki na a ini a naturu.

Wi bigin kisi gens

Aladi wi ben luku bun taki busimeti no du wi ogri, toku wi ben musu broko wi ede moro nanga den difrenti lantiman èn nanga son kerki fesiman di no ben lobi wi srefisrefi. Den bigin gens a Kownukondre preikiwroko fu wi krinkrin. A moro bigi problema fu wi ben abi fu du nanga wan fayafaya kerkiman di ben e kari ensrefi Mwana Lesa, èn dati wani taki „Manpikin fu Gado”. Fu wi ongoloku, a grupu fu en ben nen Kitawala san wani taki „Waktitoren”. Wan pisi ten bifo wi ben doro na a kontren disi, dan a man disi ben kiri furu Afrikansma na watra fu di a ben e taki dati a ben e dopu den. Te fu kaba den ben kisi en èn den ben anga en. Bakaten mi ben kisi na okasi fu taki nanga a man di ben anga Mwana Lesa èn mi ben fruteri en dati a Waktitoren Genootschap fu wi no abi noti fu du nanga a man disi.

Wi ben abi problema tu nanga furu sma fu Europa di no ben e prisiri nanga a leriwroko fu wi fu di den ben e denki taki dati ben o tyari a bisnis fu den na ini problema. Wan basi di e wroko na wan maksin ben kragi: „Efu a weti man wani tan na ini a kondre, dan den Afrikansma no musu kon sabi taki den weti man no e pai den nofo moni fu a wroko di den e du.” Fu a srefi reide disi wan basi fu wan bedrijf pe den e suku gowtu ben yagi mi gowe fu en kantoro; nanga atibron a tyari mi go te na strati.

A no de fu taki dati den kerki fesiman nanga den bisnisman di ben gens wi, ben abi furu krakti tapu a tirimakti fu Rhodesia (now Zimbabwe) so taki te fu kaba den ben taigi wi fu gowe libi a kondre. Wi ben tyari a tori disi na fesi krutu. Wi ben abi bun bakapisi fu di wi ben mag tan, ma soso efu wi no ben o preiki gi den Afrikansma. Wán fu den heihei-man ben taigi wi taki na fu di den publikâsi „no ben fiti gi a frustan fu den Afrikansma” meki den ben krutu na afersi so. Ma na ini tra Afrikan kondre den sma fu a presi drape no ben gens a leriwroko fu wi èn den ben gi unu wan switi kon srefi na son presi. Wán fu den kondre disi ben de Swasikondre.

Wan Kownu e gi wi wan switi kon na ini Swasikondre

Swasikondre na wan pikin kondre di abi en eigi tirimakti. A kondre bigi sowan 17.364 fokanti kilometer èn a de na Zuid-Afrika. Dyaso wi ben miti a Kownu Sobhuza II di ben kari na a bigin fu na ondrofenitori disi. A Kownu disi ben man taki Ingrisitongo heri bun. A ben leri disi di a ben go na wan universiteit na Ingrisikondre. A no ben weri krosi leki kownu èn a ben gi wi wan switi kon.

Wi ben abi wan takimakandra nanga en fu a Paradijs na grontapu di Gado pramisi na den wan di abi a yoisti denki. Aladi a no ben wani sabi so furu fu a tori disi, toku a sori krin taki a ben e broko en ede nanga wan tra tori. A kownu ben wani du ala san a man fu meki den pôti sma nanga den sma di no kisi skoro abi wan moro bun libi. A no ben lobi fa den zendeling fu Krestenhèit ben du den wroko fu di den ben e broko den ede nomo nanga o furu sma e kon na den kerki na presi taki den broko den ede nanga a gi di den e gi leri. Ma a kownu ben sabi fa wan tu fu den pionier fu wi ben e wroko. A ben prèise wi fu a leri di wi e gi fu Bijbel, spesrutu fu di wi du a wroko disi sondro taki wi e aksi moni noso sondro fu aksi tra sani gi a wroko di wi e du.

Moro Bijbel leri e gi

Na ini 1943 a Waktitoren Bijbelskoro Gilead ben seti fu gi leri na zendeling. Furu prakseri ben poti na a gi di wi musu gi yepi na den sma di wani sabi moro, na presi fu poti prakseri nomo fu prati Bijbel publikâsi. Na ini 1950, George nanga mi ben kisi wan kari fu go na a di fu 16 klas fu Gilead. Dyaso mi miti Jean Hyde a fosi leisi; a ben de wan fayafaya sisa fu Australia. Baka di wi ben klari a skoro nanga bun baka pisi, dan a sisa disi kisi a wroko fu go leki zendeling na Yapan. A matifasi fu wi no ben gro moro fara fu di na a pisi ten dati moro furu sma no ben e trow ma ben e du den diniwroko den wawan.

Baka di wi kisi leri na a Gileadskoro, dan George nanga mi kisi a wroko fu go leki zendeling na a èilanti Mauritius na a Indisch Se. Wi ben tron mati fu den sma drape, wi ben leri a tongo fu den, èn wi ben hori oso-bijbelstudie nanga den. Bakaten wan moro yongu brada fu mi, William nanga en wefi Muriel, ben klari a Gileadskoro nanga bun bakapisi tu. Den ben kisi a wroko fu go leki zendeling na Kenia, a pisi kontren pe mi ben wroko fosi.

Aiti yari pasa esi, èn na a internationaal kongres na ini New York na ini 1958, mi miti nanga Jean Hyde baka. Wi bigin abi kontakti nanga makandra baka èn dan wi meki mofo fu trow. A zendelingwroko fu mi ben kenki fu Mauritius go na Yapan, èn drape Jean nanga mi ben trow na ini 1959. Wi ben bigin nanga wan tumusi prisiri ten na ini a zendelingwroko na ini Hiroshima. Na a pisi ten dati wán pikin gemeente nomo ben de drape. Tide na a dei, 36 gemeente de na ini a foto dati.

Wi e gowe libi Yapan

Baka furu yari fu zendelingwroko, dan Jean nanga mi bigin siki. Disi meki a zendelingwroko fu wi kon muilek moro nanga moro. Te fu kaba wi ben musu gowe libi Yapan èn wi go na Australia, a kondre pe Jean komoto. A dei di wi gowe libi Hiroshima ben de wan sari dei gi wi. Na a loko-station wi ben gi adyosi na ala den mati fu wi di wi lobi.

Now wi e libi na ini Australia èn wi e du san wi man, aladi dati no de so furu moro. Wi e tan dini Yehovah makandra nanga a gemeente Armidale na ini a distrikt New South Wales. A ben de wan prisiri fu prati a waarheid fu Bijbel nanga so furu sma sowan 80 yari kaba! Mi ben si fa a Bijbel leriwroko ben gro na wan tumusi bun fasi. Misrefi ondrofeni den prenspari sani di ben pasa na yeye fasi. Nowan sma noso grupu man kisi grani gi disi. Fu tru, fu taki en leki fa a psalm skrifiman ben taki, dan „na Yehovah srefi meki a sani disi pasa; a de wan wondru sani na wi ai”.​—Psalm 118:23.

[Prenki na tapu bladzijde 28]

Mi brada George nanga a bus di ben de wi oso

[Prenki na tapu bladzijde 28]

Mi na a Victoriameer

[Prenki na tapu bladzijde 29]

Pikin fu middelbaar skoro di ben go na wan publikitaki na ini Swasikondre na ini 1938

[Prenki na tapu bladzijde 30]

Nanga Jean tapu a trowdei fu wi na ini 1959 èn now na ini a ten disi