A diniwroko fu Yehovah gi mi prisiri na ini mi libi

A yari baka dati den brada na Betel meki bekènti taki sma ben de fanowdu fu yepi nanga a wroko na a bijkantoro fu Zuid-Afrika fu di den ben o poti wan nyun drukpers drape. Mi gi mi nen fu go èn mi ben breiti di den teki mi. Den ben teki ete dri brada fu a Betel fu Kanada: Dennis Leech, Bill McLellan nanga Ken Nordin. Den ben taigi wi taki wi ben o tan langa na Zuid-Afrika.

Mi bel mi mama, dan mi taki: „Mama, mi abi wan bigi nyunsu gi yu. Mi e go na Zuid-Afrika!” Mi mama ben de wan frow di no ben e taki furu, ma a ben abi wan tranga bribi èn wan bun matifasi nanga Yehovah. Di mi taigi en a nyunsu a no taki furu, ma mi ben sabi taki a ben o horibaka gi mi. Aladi mi mama nanga mi papa ben sari taki mi ben o go libi so fara, toku noiti den no krutu a bosroiti disi di mi teki.

MI E GO NA ZUID-AFRIKA!

Fosi wi go na Zuid-Afrika, mi nanga den dri tra brada go na Brooklyn Betel fu kisi leri dri mun langa fa fu wroko nanga wan spesrutu sortu drukpers. Baka dati, wi teki sipi go na Kaapstad, na Zuid-Afrika. Na a ten dati mi ben tapu 20 yari kaba. Di wi doro Kaapstad na mofoneti, wi teki loko fu drape go te na Johannesburg. A fosi presi pe a loko ben stop, ben de na wan pikin foto na Karoo, di ben de leki wan sabana. A presi ben faya, a ben lai smoko nanga furu stof. Wi ala fo luku na a fensre go na dorosei èn wi ben aksi wisrefi sortu presi na dati. Wi ben broko wi ede tu fa a ben o de na ini a nyun toewijzing fu wi. Furu yari baka dati, wi ben e go baka na den presi disi èn wi ben kon si taki den sortu pikin foto disi ben de trutru moi presi pe sma ben e libi bun nanga makandra.

Wan tu yari mi ben e wroko nanga a kefalek Linotype masyin pe mi ben musu sorgu taki den lin pe den ben seti den letter ben seti bun, so taki den ben kan druk den tijdschrift A Waktitoren nanga Ontwaakt! A bijkantoro ben druk tijdschrift na ini furu Afrikan tongo gi Zuid-Afrika èn gi furu tra kondre na ini Afrika. Wi ben breiti taki a no fu soso wi ben komoto te na Kanada fu kon wroko nanga a nyun drukpers, fu di den ben gebroiki en furu.

Bakaten mi ben e wroko na a Drukkerij Kantoro di ben wroko makandra nanga den sma fu a drukkerij, den sma na a presi pe den ben seni den buku gowe èn den sma fu a Vertaalafdeling. Mi ben abi furu fu du, ma mi ben de koloku.

MI TROW ÈN MI KISI WAN NYUN TOEWIJZING

Na ini 1968, mi trow nanga Laura Bowen, wan pionier sisa di ben e libi krosibei fu Betel. A ben e yepi fu skrifi sani nanga typ-masyin tu gi a Vertaalafdeling na Betel. Na a ten dati sma di ben trow paspas no ben tan na Betel èn dati meki a bijkantoro meki wi tron spesrutu pionier. Ma a sani disi ben gi mi broko-ede. Mi ben de tin yari na Betel pe mi ben kisi nyanyan nanga wan presi fu tan. Ma leki spesrutu pionier wi no ben e kisi furu moni. Fa wi ben o man pai gi ala sani di wi abi fanowdu? Ibri mun ibriwan fu wi ben o kisi 25 rand (na a ten dati, dati ben abi a waarde fu 35 Amerkan dala), soso efu wi ben doro den yuru, efu wi ben tyari nofo gobaka èn efu wi ben prati a nomru fu buku di wi ben musu prati leki spesrutu pionier. A moni dati ben de fu pai gi yuru-oso, nyanyan, fu go fu a wan presi na a trawan, datrayepi nanga tra sani di wi ben abi fanowdu.

Wi ben kisi a toewijzing fu go leki pionier na wan pikin grupu krosibei fu a foto Durban, na a India Se. Wan bigi grupu fu Indiasma ben e libi drape. Furu fu den ben de bakapikin fu den wrokoman di ben kon drape nanga wan kontrakti fu wroko na den presi pe den ben e meki sukru na a ten fu 1875. Den bakapikin fu den sma disi den e du tra sortu wroko now, ma den hori den kulturu ete èn a switi nyanyan fu den di den e bori nanga masala nofo tron. Fu di den sma disi ben taki Ingrisitongo, meki a ben makelek gi wi fu preiki gi den.

Spesrutu pionier ben musu wroko 150 yuru ibri mun. Dati meki mi nanga Laura meki wan schema fu wroko siksi yuru a fosi dei. Ma a weer ben faya èn a ben banawtu. Wi no ben abi nowan gobaka noso Bijbelstudie. Dati meki wi ben preiki siksi yuru oso-fu-oso. Di wi preiki wan pisi ten, mi luku mi oloisi, dan mi si taki na soso 40 miniti wi ben preiki nomo! Mi ben aksi misrefi fa wi ben o meki en leki spesrutu pionier.

Heri esi wi seti wi schema moro bun. Ibri dei wi ben meki brede èn wi ben poti supu noso kofi na ini wan thermos. Efu wi ben musu stop fu nyan wan sani, dan wi ben poti wi pikin wagi na ondro wan bon ini a skaduw. Son leisi wan lo pikin ben lontu wi wagi fu tanapu luku wi. Den pikin ben moi. Baka wan tu dei wi ben kon si taki efu wi preiki tu noso dri yuru kaba, dan a ten ben go gaw baka dati.

A ben gi wi furu prisiri fu fruteri den sma disi di ben abi switifasi, den tru tori fu Bijbel. Den sma disi fu India, ben abi lespeki gi trawan, den ben abi switifasi, èn den ben lobi Gado. Furu Hindusma ben arki a boskopu di wi ben tyari gi den. Den ben lobi fu leri sani fu Yehovah, Yesus, Bijbel, a howpu taki freide o de na ini a nyun grontapu èn a howpu taki den dedewan o kon na libi baka. Baka wán yari, wi ben abi 20 Bijbelstudie. Ibri dei wi ben nyan makandra nanga wan fu den famiri di wi ben studeri nanga den. Wi ben de koloku srefisrefi.

Ma syatu baka dati, wi kisi wan tra toewijzing. Wi ben musu du a kringwroko na ini a kontren di de na a sesyoro fu a moi India Se. Ibri wiki, wi ben tan nanga wan tra famiri, wi ben go luku den preikiman na ini den gemeente èn wi ben wroko makandra nanga den fu gi den deki-ati. Wi ben de leki den famiri. Wi ben lobi de makandra nanga den, nanga den pikin èn nanga den meti di den ben abi. Wi du a moi wroko disi tu yari langa. Ne wan dei a bijkantoro bel mi. Den brada taki: „Wi ben o wani taki unu kon baka na Betel.” Mi taigi den: „Yu sabi, wi lobi pe wi de dyaso.” Ma a no de fu taki dati wi ben de klariklari fu go awinsi pe den seni wi go.

WI E GO BAKA NA BETEL NA ZUID-AFRIKA

Na Betel mi ben go wroko na a Dienst Afdeling pe mi ben abi a grani fu wroko makandra nanga furu lepi brada di abi ondrofeni. Na a ten dati, te wan kring-owruman ben go na wan gemeente, dan a ben seni wan brifi di abi fu du nanga a gemeente go na a bijkantoro. Baka dati a Dienst Afdeling ben seni wan brifi go na a gemeente di abi fu du nanga den sani di a kring-owruman ben skrifi fu a gemeente dati. Den sortu brifi dati ben gi a gemeente a deki-ati nanga a rai di den ben abi fanowdu. Den brada di ben skrifi den brifi disi ben wroko tranga. Den ben musu vertaal den brifi fu den kring-owruman di ben skrifi na ini Xhosatongo, Zulutongo nanga tra tongo go na ini Ingrisitongo èn baka dati den ben musu vertaal den brifi di a bijkantoro ben o seni gi den gemeente fu Ingrisitongo go na ini den Afrikan tongo dati. Mi ben warderi a tranga wroko di den brada di ben e vertaal ben du. Den yepi mi fu frustan tu sortu problema den blaka Afrikan brada nanga sisa ben abi.

Na a ten dati, apartheid ben de wan fasi fu tiri na ini Zuid-Afrika. Disi ben wani taki dati lanti ben bosroiti pe ibri ras ben musu libi. Sobun, sma fu difrenti ras no ben mag moksi nanga makandra. Den blaka Afrikan brada nanga sisa fu wi ben taki den eigi tongo, den ben e preiki na ini den eigi tongo, èn den ben go na den gemeente di ben taki a tongo fu den.

Mi no ben sabi furu blaka Afrikan sma, fu di ala gemeente pe mi ben go ben de Ingrisitongo gemeente. Ma now mi ben abi na okasi fu leri moro fu den blaka Afrikan sma nanga den kulturu nanga gwenti fu den. Mi kon sabi sortu problema den brada nanga sisa ben kisi te a abi fu du nanga den kerki gwenti nanga kulturu gwenti fu den. Den brada nanga sisa disi ben abi trutru deki-ati! Den ben weigri fu hori densrefi na gwenti di Bijbel e krutu èn den ben weigri fu du afkodrei sani aladi den famiri nanga den sma fu a dorpu fu den ben e gens den hebi. Sma na den boitipresi ben pôti srefisrefi. Furu fu den no ben kisi furu skoroleri, ma den ben abi lespeki gi Bijbel.

Mi ben abi a grani fu yepi nanga wan tu krutu-afersi pe wi ben sori taki ala sma abi a reti fu anbegi Gado fa den wani èn taki wi no e teki sei na ini politiek. A ben tranga mi bribi trutru fu si fa yongu pikin fu Kotoigi ben abi deki-ati fu tai hori na Yehovah nanga den wet fu en. Sma ben yagi den pikin disi fu skoro fu di den no ben wani begi èn singi kerki singi nanga den.

Den brada nanga sisa ben kisi wan tra problema na ini wan pikin Afrikan kondre di ben nen Swaziland na a ten dati. Di Kownu Sobhuza dede, ala sma fu a kondre ben musu du den sani di sma gwenti du te wan sma fu den dede. Den mansma ben musu sker ala den wiwiri puru èn umasma ben musu koti den wiwiri syatu. Sma ben frufolgu furu brada nanga sisa fu di den no ben wani du den sani dati di abi fu du nanga na anbegi fu den afo. A fasi fa den brada nanga sisa disi tai hori na Yehovah, ben gi wi furu prisiri. A fasi fa den Afrikan brada nanga sisa fu wi ben tai hori na Yehovah èn a pasensi fu den leri wi furu. Disi tranga a bribi fu wi trutru!

MI E GO WROKO BAKA NA A DRUKKERIJ NA ZUID-AFRIKA

Na ini 1981, mi kisi a wroko fu go yepi na a drukkerij pe den ben o bigin gebroiki computer now fu druk den buku. Dati ben de wan span ten! A fasi fa sma ben e druk sani ben kenki furu. Wan man di ben seri den sortu sani disi, ben gi a bijkantoro wan nyun masyin fu pruberi fu wroko nanga en sondro fu pai. Disi meki taki te fu kaba wi bai feifi fu den nyun masyin disi di kon na ini a presi fu den neigi owruwan. Den ben poti wan nyun drukpers tu. Noiti ete wi ben druk so furu sani!

Nanga yepi fu computer wi feni nyun fasi tu fu seti a tekst tapu den bladzijde di wi ben o druk. Wi ben man du dati nanga yepi fu a nyun computer programa MEPS (Multilanguage Electronic Publishing System). Ala den nyunyun wrokosani disi meki a wroko go na fesi esi-esi. Furu sani kenki sensi a ten di mi nanga den dri tra brada fu Betel Kanada ben kon dyaso fu yepi nanga a wroko (Yes. 60:17). Wi ala fo ben trow nanga bun pionier sisa di lobi Yehovah trutru. Mi nanga Bill ben e dini na Betel ete. Ken nanga Dennis ben libi krosibei nanga den osofamiri.

Moro nanga moro wroko ben de fu du na a bijkantoro. Moro nanga moro buku ben vertaal èn druk na ini furu tongo. Dan den ben seni den buku disi go na tra bijkantoro. Dati meki wan nyun Betel ben de fanowdu. Den brada bow wan nyun Betel na wan moi birti na westsei fu Johannesburg, èn den gi a presi abra na Yehovah na ini 1987. A ben de wan grani gi mi fu yepi nanga ala den sani disi. A ben de wan grani gi mi tu fu dini na ini a Bijkantoro Komte fu Zuid-Afrika furu yari langa.

WI E KISI ETE WAN TOEWIJZING!

Na ini 2001, wi ben fruwondru srefisrefi di mi kisi a kari fu dini na a nyun Bijkantoro Komte fu Amerkankondre. Aladi wi ben sari fu gowe libi a wroko fu wi nanga den mati fu wi na Zuid-Afrika, toku wi ben breiti taki wi ben kan bigin wan nyun libi na Betel fu Amerkankondre.

Ma wi ben broko wi ede nanga Laura en mama di ben kon owru kaba. Wi no ben o man du furu gi en efu wi ben o froisi go na New York. Ma den dri sisa fu Laura taki dati den ben o yepi sorgu gi en èn den ben o sorgu gi san a ben abi fanowdu. Den ben taki: „Wi no man du furuten diniwroko, ma efu wi e sorgu gi mama, dan dati o yepi unu fu tan du a wroko fu unu go doro.” Wi de nanga bigi tangi taki den yepi na so wan fasi.

Na a srefi sortu sani pasa nanga mi tu. Mi brada nanga en wefi di ben e libi na ini Toronto, na Kanada, ben e sorgu gi wi mama di ben lasi en masra na ini dede. Mi mama ben e libi nanga mi brada nanga en wefi moro leki 20 yari langa. Wi e warderi en trutru taki den sorgu gi en na wan lobi-ati fasi teleki a dede syatu baka di wi doro na New York. A de wan trutru blesi efu famiriman e horibaka gi yu. Den de klariklari fu kenki sani na ini den eigi libi, so taki den kan teki a hebi wroko na den tapu fu sorgu gi papa noso mama di kon owru kaba.

A fosi toewijzing di mi ben kisi na ini Amerkankondre, ben de fu wroko na a drukkerij di ben abi ala sortu nyun masyin di makelek fu gebroiki. Na ini den lasti yari di pasa mi wroko na a afdeling di e bai sani gi Betel. A e gi mi furu prisiri taki mi kan wroko sowan 20 yari kaba na a bigi bijkantoro disi. Now yu abi sowan 5000 sma na ini a Betel famiri disi èn sowan 2000 sma di e kon yepi nanga a wroko dyaso.

Siksitenti yari pasa mi no ben o denki noiti taki na dyaso mi ben o kon te fu kaba. Laura horibaka gi mi nanga en heri ati na ini ala den yari dati. Mi ben abi wan trutru bun libi! Wi ben lobi en taki wi ben man du difrenti wroko èn taki wi miti someni sma nanga suma wi ben man wroko bun. Wi ben breiti tu taki wi ben man go na difrenti bijkantoro na ala sei fu grontapu pe wi miti furu sma. Fu di mi pasa 80 yari kaba, meki mi no abi fu du so furu wroko moro. Furu yongu brada de di kan du a wroko bun.

A psalm skrifiman ben skrifi: „Koloku fu den sma di abi Yehovah leki Gado” (Ps. 33:12). Dati tru! Mi de nanga bigi tangi taki mi ben man dini Yehovah makandra nanga a koloku pipel fu en!