A muiti di libisma du fu plisi Gado

„NOITI ete wan libimakandra ben de pe sma no ben e bribi na ini Gado, èn nofo tron sma e si Gado leki a Tiriman èn a Mekiman fu hemel nanga grontapu. Na so a de tu srefi na ini libimakandra pe sma e bosroiti fu no bribi na ini Gado, èn sosrefi na ini kondre pe sma e luku bun taki kerki nanga politiek no e moksi nanga makandra.” Na so John Bowker skrifi na ini en buku God—A Brief History (Gado—Wan syatu historia). Awinsi fa a no fa, libisma meki nanga a firi fu suku Gado èn fu plisi en. Furu sma na heri grontapu wani plisi Gado trutru. A no de fu taki dati den e pruberi fu du disi na difrenti fasi, fu di den e bribi difrenti sani.

Son sma e bribi taki a wan-enkri sani di wan sma musu du fu man plisi Gado, na fu libi bun. Trawan e denki taki Gado o feni den bun te den e yepi pôtisma. Dan yu abi milyunmilyun sma tu di e bribi taki a de prenspari fu hori densrefi na kerki seremonia nanga kerki gwenti.

Ma sma de tu, di e bribi taki Gado de tumusi farawe fu den, èn den e feni taki a abi so furu fu du taki a no man poti prakseri na den afersi fu libisma. Soleki fa sma e taki, dan a filosofiaman Epikurus fu owruten Grikikondre, ben e bribi taki ’den gado de tumusi farawe fu man du iniwan sani gi libisma’. Toku, furu sma di abi a denki disi, e bribi na ini Gado. Son sma e tyari ofrandi srefi, noso den e du tra sani fu di den wani plisi den afo fu den di dede kaba.

San yu e denki? Gado e si trutru taki wi e meki muiti so taki a kan feni wi bun? Wi kan abi krakti tapu a fasi fa Gado e firi, èn wi kan plisi en?

[Sma di abi a reti fu a prenki na tapu a kafti]

KAFTI: Courtesy of ROE/Anglo-Australian Observatory, photograph by David Malin