San E Pasa Nanga wan Sma Te A Dede?

Dede de a kontrari fu libi. Dede de leki wan hebi sribi (Yohanes 11:11-14). Den dedesma no man yere, si, taki, noso prakseri wan sani (Preikiman 9:5, 10). Falsi bribi e leri taki dedesma e go na wan yeye kondre fu go libi nanga den afo fu den. Dati a no san Bijbel e leri.

Den sma di dede no kan yepi wi, èn den no kan du wi ogri. Furu sma e bribi taki te den hori densrefi na wan lo gwenti èn den e tyari ofrandi, dan dati sa plisi den sma di dede. A sani disi no e plisi Gado fu di a gron na tapu wan fu den lei fu Satan. Disi no kan plisi den dedesma tu, fu di den no de na libi. Wi no musu frede dedesma noso anbegi den. Wi musu anbegi Gado wawan.​—Mateus 4:10.

Dedesma sa kon na libi baka. Yehovah sa wiki dedesma so taki den kan libi na wan Paradijs grontapu. A ten dati musu kon ete (Yohanes 5:28, 29; Tori fu den Apostel 24:15). Gado kan wiki den sma di dede, neleki fa yu kan wiki wan sma di e sribi.​—Markus 5:22, 23, 41, 42.

A prakseri taki wi no e dede na wan lei di Satan Didibri ben panya. Satan nanga den ogri yeye fu en e meki sma denki taki den yeye fu dedesma de na libi èn taki den e siki sma èn e tyari tra problema kon. Satan e kori sma, son leisi fu di a e gebroiki dren nanga fisyun. Yehovah e krutu den sma di e pruberi fu taki nanga dedesma.​—Deuteronomium 18:10-12.