„Mi sa kisi yepi fu Yehovah”

Den no trow, ma toku den e firi koloku na ini a diniwroko fu Yehovah

„FURU fu wi e firi koloku trutru, aladi wi no trow”, na so wan Kresten uma di e libi na Spanyorokondre ben taki. Fu san ede a e firi koloku? „Wi breiti taki wi no abi den broko-ede di abi fu du nanga a trowlibi, èn fu dati ede wi man du moro na ini a diniwroko fu wi Gado, Yehovah.”

A sani disi di na uma taki dyaso e kruderi nanga san Gado Wortu e taki fu sma di no trow. Di na apostel Paulus ben taki fu sani di abi fu du nanga a trowlibi, dan nanga yepi fu santa yeye, a gi a koni rai disi: „Mi e taigi den sma di no trow èn sosrefi den uma di lasi den masra na ini dede, taki a bun efu den tan leki mi.” Paulus srefi no ben trow. Ma fu san ede a ben gi sma a rai fu no trow? A ben sori taki a sma di trow, en ati prati fu di a musu broko en ede nanga furu sani, ma taki a man noso na uma di no trow, „e broko en ede nanga den sani fu Masra” (1 Korentesma 7:8, 32-34). A moro prenspari sani di e meki taki wan sma di no trow e firi koloku, na fu di a e dini Yehovah.

Sma di no e trow fu di den wani du wan tumusi moi wroko

A sani di Paulus taki dya, sa fruwondru sma di e libi na ini kondre pe a trowlibi èn a kweki fu pikin na wan tumusi prenspari sani. Ma Yesus Krestes srefi no ben trow, toku a ben firi koloku, èn a ben taki fu wan tumusi moi wroko di Kresten di no trow, ben sa kan du. A ben taki: „Yu abi sma di meki densrefi tron leki wan eunuch fu a kownukondre fu hemel ede. Efu wan sma kan tan sondro fu trow, dan meki a du so.”​—Mateyus 19:12.

Furu sma du a sani disi èn den kon si taki fu di den no trow, meki den man dini Gado sondro taki den sani fu a trowlibi puru den prakseri (1 Korentesma 7:35). Dusundusun Kresten e prisiri taki den man anbegi Yehovah sondro wan trowpatna, èn den e prisiri taki den man du furu fu yepi tra sma.a

Furu Kresten di no trow, sabi taki a no soso trowpaar kan firi koloku èn den sabi tu taki a no soso den sma di no trow, kan firi sari. Na ini ala tu grupu yu abi sma di son leisi kan firi koloku noso firi sari. Te yu luku en bun, dan Bijbel e taki krin dati a trowlibi srefi e meki taki sma „e kisi banawtu na ini den libi”.​1 Korentesma 7:28.

Sma di no trow fu di den no kisi na okasi

Furu sma no trow fu di den no kisi na okasi fu du disi. Ma a no de so taki den no wani trow. A kan taki den wani de nanga wan sma di e meki den firi bun, wan sma di e sori taki a lobi den, neleki fa a de na ini a trowlibi. Ma son sma no man trow nownowde fu di den abi wan problema na moni sei, noso fu di wan tra sani e hori den. Son Kresten no trow fu di den wani gi yesi na a Bijbel rai di e taki dati wi musu „trow soso na ini Masra”; furu fu den na lobi sisa di tranga na yeye fasi (1 Korentesma 7:39). Fu di den de getrow, meki den e suku wan trowpatna soso na mindri anbegiman di gi densrefi abra na Yehovah èn di teki dopu.

Son leisi, sonwan fu den sma disi e lasi-ati fu di den de den wawan. Wan Kresten sisa di ben taki dati a abi a firi disi, e taki: „Wi sabi a wet fu Yehovah èn wi no ben sa wani du noti fu meki Yehovah firi sari. A kan de so taki wi wani de nanga wan sma, ma awansi omeni leisi grontapusma e pruberi fu suku wan trowpatna gi wi, toku wi abi a fasti bosroiti fu tan leki fa wi de. Wi no wani de srefi nanga wan man noso uma di no de na bribi efu dati no de fanowdu.” Wi wani prèise den Kresten disi taki den e gi yesi na a rai fu Bijbel èn taki den e hori densrefi na bun gwenti nanga gronprakseri, so taki den man plisi Yehovah, awansi den e lasi-ati son leisi.

Gado e yepi den furu

Yehovah de getrow na den sma di de getrow na en fu di den sma disi e weigri fu trow nanga sma di no e dini en. A sani di Kownu David srefi ben ondrofeni, meki taki a ben man taki: „Nanga wan sma di de loyaal, yu sa handri na wan loyaal fasi” (Psalm 18:25). Gado e pramisi den sma di e gi yesi na en na wan getrow fasi: „Mi no sa libi yu kwetikweti èn noiti mi no sa gowe fu yu” (Hebrewsma 13:5). Te wi e si fa Kresten di no trow e hori densrefi getrow na Gado Wortu, awansi o owru den de, dan wi kan prèise den gi dati nanga wi heri ati. Na so fasi wi e waka baka na eksempre fu Yehovah. Wi kan begi Yehovah tu fu gi den a krakti fu kan kakafutu gi den problema di e miti den.​—Krutuman 11:30-40.

Furu Kresten di no trow, kon si taki den e firi moro koloku te den e du so furu leki den man fu gi sma Bijbel leri. Fu eksempre, luku Patricia, wan uma di pasa 35 yari kaba èn di no trow. A de wan pionier, noso wan furuten dinari èn a e taki: „Aladi mi e kisi tesi fu di mi no trow, toku disi gi mi na okasi fu tron wan gewoon pionier. Fu di mi no trow, meki mi man seti mi schema soleki fa mi wani, èn disi e gi mi moro ten fu studeri. Mi leri tu fu frutrow moro tapu Yehovah, spesrutu te tesi e miti mi.”

Den sani di a sisa taki, e kruderi nanga san Bijbel e pramisi. Bijbel e taki: „Lolo yu pasi go na tapu Yehovah, èn frutrow na en tapu, èn ensrefi sa handri” (Psalm 37:5). Iya, ala den getrow futuboi fu Yehovah, awansi den trow noso den no trow, kan feni trowstu nanga krakti na ini den wortu di skrifi nanga yepi fu santa yeye, namku: „Mi sa kisi yepi fu Yehovah.”​—Psalm 121:2.

[Futuwortu]

[Prenspari pisi na tapu bladzijde 9]

„A man di no trow e broko en ede nanga den sani fu Masra, namku fa a kan meki taki Masra feni en bun.”​—1 KORENTESMA 7:32

[Faki na tapu bladzijde 8]

SAN WAN SMA DI NO TROW, KAN DU FU FIRI KOLOKU

Yesus di no trow noiti, ben taki: „Mi nyanyan de, fu mi du a wani fu en di ben seni mi kon èn fu kaba a wroko fu en.”​—Yohanes4:34.

Den fo umapikin fu Filipus ben gebroiki den ten fu „taki profeititori”.​—Tori fu den Apostel 21:8, 9.

Kresten sisa di no trow èn di e meki a Kownukondre boskopu bekènti, de a moro bigi pisi fu a ’bigi legre umasma di e fruteri a bun nyunsu’.​—Psalm 68:11.