Na fasi fu de na ini sondro fu trow de wan libifasi di e pai
„A uma de fri fu trow nanga suma a wani soso na ini Masra. Ma a de moro koloku efu a tan soleki a de.” — 1 KORINTE 7:39, 40.
1. San wi mu gi Yehovah ofu wi de now sondro dati wi trow ofu dati wi trow?
YEHOVAH mu kisi na anbegi di no prati fu ala sma di gi densrefi abra na en. Efu wi trow ofu de sondro fu trow now, wi mu lobi Gado nanga wi heri ati, heri wi sili, heri wi ferstan, èn heri wi krakti (Markus 12:30). A de tru dati wan kristen di no trow abi moro mendri sani di e puru en prakseri leki den sma di de ini wan trowlibi. Ma wan dienstknegti fu Yehovah di no trow kan de trutru koloku?
2, 3. San ben de na mama fu a tori na ini na takmakandra fu Paulus na ini 1 Korinte 7:39, 40? (b) Sortu aksi de warti fu wi go luku?
2 Na apostel Paulus e piki na aksi disi nanga iya. Fu den sma di wan dei ben trow ma di den omstandigheden ben kenki a ben skrifi: „Wan uma tai ini na heri ten di en masra e libi. Ma efu en masra ben sa dede, dan a de fri fu trow nanga suma a wani, soso ini Masra. Ma leki fa mi meine de dan a de moro koloku efu a tan soleki a de. Mi e denki seiker dati ooktu mi abi na yeye fu Gado”. — 1 Korinte 7:39, 40.
3 Fudi Paulus e sori dati sma di no trow kan de koloku, dan suma redelijkerwijs ben kan wegi go wegi kon fu tan sondro fu trow, awans fa a no fa fu wan seiker pisten? San e meki a koloku kon gi kristen di no trow? Iya, fa na fasi fu de na ini sondro fu trow kande wan libifasi di e pai?
Yari fu de yu wawan di e pai
4. San wi kan taki fu den yari na ini san wan sma de yongu ete?
4 Na koni kownu Salomo ben gi dekati fu san e kon now: „Prakseri now yu gran Mekiman ini yu yonkuman dei, bifo den rampu dei [fu owrudei] e go kon, ofu den yari doro na ini san yu sa taki: ’Mi no abi prisiri na ini’” (Preikiman 12:1). Den yonkuman dei gewoonlek de wan ten ini san wan yonguman ofu uma e prisiri na ini wan seiker marki fu krakti nanga gesontu. Fa a de fu dat’ede wan sani di fiti dati den pluspunt disi gebroiki ini Yehovah dienst, sondro fu meki wan sani puru yu prakseri. Boiti foe dati, a de so dati den fruku yari disi de wan ten fu kisi ondrofeni fu a libi, fu kweki stabiliteit. Ma disi de ooktu wan pisten na ini san yongusma e kisi firi fu law sortu lobi tapu sma fu a tra sekse. Luku pikinso den bakapisi fu wan ondrosuku pe 1079 sma mindri den 18 nanga 24 yari ben de na ini. Ibriwan fu den ben abi gemiddeld „seibi romantische ondrofeni” a den baka èn alamala ben taki dati na disiten ondrofeni fu den ben de trutru lobi, nowan law sortu lobi tapu wan sma fu a tra sekse.
5. Sortu persoonlijk aksi fu na tori fu a trow wan yongusma kan luku nanga leti?
5 Fu statistisch bodoi fu prati fu tafra nanga bedi, brokotrow èn a fadon komoto fu makandra fu osofamiri e kon a krin dati a no de wan ferstan sani fu trow yongu. Na presi fu so esi leki a kan fu wani meki mofo èn fu suku verkering èn fu trowe yusrefi esesi go ini wan trowlibi, dan yongu kristen e du bun fu go prakseri positief fu en fa den ini ibri geval kan gebroiki den yongu yari fu dini Yehovah sondro fu wan sani puru den prakseri a tapu. Te yu e wegi go wegi kon den omstandigheden fu yu leki wan yongusma dan yu ben sa kan aksi yusrefi heri bun a sani disi: Mi de now lepi ini firi èn klarklari fu denki seryusu fu na trowlibi? Mi abi nofo ondrofeni fu a libi fu de wan bun trowpatna? Mi ben sa kan teki den frantwortu fu na trowlibi èn kande fu wan osofamiri nanga pikin tapu wan bun fasi tapu mi? Te mi luku dati mi gi misrefi abra na Yehovah dan mi no mu gi en na energie èn krakti fu na yongu yari sondro dati sani di de na ini na trowlibi puru wan sma prakseri e tapu mi?
De paiman fu wan krin libi fu wan sma di no trow
6, 7. (a) San kan de wantu winimarki di e kon gi kristen di gewoonlijk no trow? (b) San wan zendeling di de ini Afrika èn di no trow ben taki fu dati?
6 Kristen di no trow e de fri fu sani di e puru den prakseri èn kan ’abi furu fu du ini na wroko fu Masra’ (1 Korinte 7:32-34; 15:58). Na presi dati na fasi fu de sondro fu trow e poti en prakseri na tapu wan sma fu na tra sekse, a abi moro okasi fu meki en kristen lobi kon moro bigi èn fu a go na furu sma ini a gemeente, èn ooktu na den owruwan nanga trawan di abi lobi yepi fanowdu (Psalm 41:1). Ini algemeen den sma di no trow abi moro ten gi studie èn e go denki dipi fu a Wortu fu Gado (Odo 15:28). Den abi wan moro bigi okasi fu kweki wan moro steifi banti nanga yehovah, fu leri fertrow tranga tapu en èn fu suku en tiri (Psalm 37:5; Fillipensen 4:6, 7; Yakobus 4:8). Wan man di no trow èn di e dini Yehovah yari kaba leki zendeling ini Afrika, ben taki wan dei:
7 „A libi ini den Afrikan dorpu ben de ini ala den yari eenvoudig, sondro furu sani fu na modern beschaving di kan puru yu prakseri a tapu na diniwroko. Sondro den sani disi di kan puru yu prakseri, mi ben abi bun furu na okasi fu studeri na Wortu fu Gado èn fu go denki dipi fu en. Disi ben meki mi tan tranga. Iya, a libi leki wan zendeling de wan trutru blesi èn kibri teige a lobi fu gudu. Ini den switi tropenneti mi abi ten furu fu go denki dipi fu den sani di Yehovah meki èn go denki èn kon krosbei fu en. A moro bigi koloku fu mi e kon ibri neti efu mi yeye de na ai ete èn mi kan waka mi wawan wan pisten na ondro na stari hemel èn taki nanga Yehovah. Disi e tyari mi kon moro krosbei na Yehovah.”
8. San wan sisa di no trow ma e du dienst furu yari kaba tapu na edekantoro fu a Genootschap ben taki fu na fasi pe wan sma kan de na ini dati a no trow?
8 Wan sani di de ooktu moi de na kommentaar fu wan sisa di no trow èn di furu yari kaba e du dienst tapu na edekantoro fu na Wachttoren Genootschap: „Ini mi dienst gi Yehovah mi ben teki na bosroiti fu tan sondro fu trow. Ma mi e firi misrefi oiti mi wawan? Futru, den momenti dati mi de mi wawan, de den momenti di de moro diri gi mi. Mi kan taki dan nanga Yehovah ini begi èn gi misrefi na a denki dipi sondro fu wan sani puru mi prakseri èn ini mi persoonlijk studie . . . na de di mi de sondro fu trow no pikinso ben yepi fu mi prisiri ben kon moro furu.”
9. San na wantu dienstgrani san wan kristen di no trow kan prisiri na ini?
9 Wan sma di no trow, ooktu kan teki dienst grani di kande no de opo gi sma di trow èn di abi osofamiri frantwortu. Fu eksempre okasi kan sori densrefi ini wan gebied pe na fanowdu fu Kownukondre preikiman de bigi, fu abi leki pionier wan prati na a furutendienst. Ofu wan yonkuman di no trow kan kisi a grani fu du dienst tapu na edekantoro fu na Wachttorengenootschap ofu tapu wan bijkantoro. Wan yongu uma di no trow kan go pionier kande makandra nanga wan owru sisa di no trow ini na gemeente fu en, ofu ini wan tra gemeente di kan gebroiki yepi na ini a wroko fu a gebied. Fu san-ede yu no e taki fu den sortu mogelijkheid disi nanga na kringopziener? Yu poti yusrefi leki wan kristen di no trow fu den kan gebroiki yu fu wan moro bigi dienst leki wan prijse gi Yehovah èn a sa blesi yu. — Maleachi 3:10.
Eksempre fu a ten di psa
10. Suma gi na moro prenspari eksempre fu wan dienstknegti fu Yehovah di no trow, èn fu san-ede yu e denki dati na fasi fu en fu no trow ben abi winimarki?
10 A moro prenspari eksempre fu wan sma di no trow ben de Yesus Kristus. A ben go krinkrin na ini a du fu na wani fu Gado. „Mi nyanyan de dati mi e du a wani fu en di ben seni mi kon èn fu klari en wroko”, Yesus ben taki (Yohannes 4:34). Èn fa a ben de druk bezig nanga preiki, nanga a dresi fu sikiman, èn so moro fara! (Matt. 14:14). Yesus ben abi opregti belangstelling gi sma èn ben firi ensrefi na mindri man, uma nanga pikin tapu en gemak. Iya, a ben reis na ini a ten fu en diniwroko go na alape, èn na bepaalde okasi tra sma ben go nanga en (Lukas 8:1-3). Ma fa a ben sa de muilek gi en fu du den activiteit disi efu a ben abi wan uma nanga nyofipikin na en! Sondro degedege a ben abi winimarki ini a geval fu Yesus dati a ben de sondro a ben trow. Na ini a ten disi wan kristen di no trow kan prisiri ini den sortu winimarki disi, spesrutu efu a mu meki na Kownukondre boskopu bekenti ini farawe ofu kefarlek gebied.
11, 12. Sortu tumsi moi eksempre tyari kon dya na fesi leki wan dekati gi unu di e dini Yehovah ini a ten disi?
11 Ma ooktu trawan ben ondrofeni dati na fasi fu de sondro fu trow de praktis èn e pai. Na umapikin fu Yefta ben pai na pramisi fu en papa fudi nanga en friwani a ben tan sondro fu trow ini wan gemeenschap pe a trowlibi èn a abi fu pikin ben e teki wan prenspari presi ini a libi. A ben feni prisiri ini a dienst fu en gi Yehovah èn a de wan tumsi moi sani dati trawan ben gi en dekati geregeld. Iya, „fu yari go miti yari den umapikin fu Israël ben abi a gwenti fu prijse na umapikin fu na Gileadman Yefta fo dei langa ini a yari”! (Krutuman 11:34-40) Kristen di trow èn trawan na asrefi fasi musu prijse èn gi dekati na umasma di no trow èn di e dini Yehovah ini a ten disi nanga dekati.
12 Den fo umapikin fu Filippus di ben de wenke „ben taki profeititori” (Tori fu den Apostel 21:8, 9). Den uma disi di no ben trow ben mu abi furu satisfaksi ini na actief dienst fu den leki wan prijse fu Yehovah. Na asrefi fasi furu yongu uma di no trow na ini a ten disi ben abi na grani di e pai fu dini leki pionier ofu furuten préikiman fu na Kownukondre. Leki wan pisi fu na ’bigi legre fu umasma di e ferteri na bun nyunsu’, den e ferdini seiker prijse. — Psalm 86:11.
13. Fa ini na geval fu Paulus e kon a fesi dati a fasi fu no trow kan de wan libifasi di e pai?
13 Na apostel Paulus ben ondrofeni dati na toestand pe wan sma de na ini sondro fu trow abi winimarki. Ini en diniwroko a ben reis dusundusun kilometer èn a ben musu kakafutu gi bigi pina, furu kefar, neti sondro sribi èn angri-bere diben e bari (2 Korinte 11:23-27). Ala disi ben sa de moro muilek èn wansani di ben pina en efu Paulus ben sa de ini wan trowlibi. Boiti fu dati a no de kwetkweti so, dati a ben sa prisiri ini en grani leki „wan apostel fu den natie” efu a ben sa abi wan osofamiri (Romeini 11:13). Aladi a ben kon tanapu na fesi tesi, toku Paulus e ondrofeni fu ensrefi dati na fasi fu de sondro fu trow kan de wan di e pai.
Disiten eksempre
14. Sortu ondrofeni colporteur ben abi fu suma a moro bigi pisi ben de sondro fu trow?
14 Netleki Paulus nanga tra fosten kristen di no ben trow na so wan lo sma ben de a mindri a pipel fu Gado di ben abi wan prati na a colporteur wroko (fu sensi 1882), èn no ben abi famirman di ben anga fu den. Nanga den heri ati, den ben hari go na foto, dorpu nanga pranasi presi fu suku den sma di ben abi wan bun ati èn fu prati buku na den. Den ben reis kande nanga trein, nanga fiets, nanga asi èn wagi ofu ini wan oto. Morofuru tron den ben waka nanga prisiri go oso fu oso (Tori fu den Apostel 20:20, 21). „Sontron den ben kenki [bijbel lectuur] fu sani fu wan boerderij, fowru, sopo èn ala sortu sani, san densrefi ben gebroiki èn ben seri na tra sma baka”, wan Kotoigi fu Yehovah e memre ensrefi, èn a taki morofara: „Ini kontren pe furu sma no ben de a ben psa ooktu dati den ben sribi na buru nanga sma di e kweki meti, èn sontron den ben e sribi srefi ini strobergi . . . Den getrowwan disi [fu suma a moro bigi pisi fu den no ben trow] ben tan furu yari baka makandra fu wroko, te leki owrudei ben fadon kon a den tapu.” Seiker wan fu den ben tyari na prakseri fu ala den fosten colporteur kon ini algemeen ondro wortu di a ben skrifi: „Wi ben yongu èn de koloku ini a dienst èn ben feni en wan prisiri fu gebroiki wi krakti ini a dienst fu Yah.”
15. Sortu doro di ben tyari wan sma go na moro bigi activiteit ben kon opo sowan 25 yari psa kaba gi furu pionier di no ben trow?
15 Furu pionier ofu furuten preikiman fu na Kownukondre fu den ten a baka ben de ooktu sondro dati den trow. Nofotron den ben gi kotoigi ini geïsoleerd gebied, ben yepi opo nyun gemeente èn ben nyan bun fu tra blesi ini Yehovah dienst. Gi wantu fu den wan span doro ben wai opo di ben tyari den go na moro bigi activiteit, di na Wachttoren Bijbelskoro Gilead ben bigin fu drai na ini 1943, aladi na di fu Tu Grontapufeti ben de ete (1 Korinte 16:9). Iya, furu fu den pionier dati di no ben trow ben kisi tapu na Gileadskoro wan zendelingen opleiding èn esesi den ben de bezig fu panya na Kownukondre boskopu ini nyun gebied. Sondro dati trowfrantwortu ben tapu den den ben poti densrefi ini na dienst fu Yehovah èn son wan fu den fosten studenti dati ben studeri komoto fu na Gileadskoro de te now ete sondro dati den trow èn den de actief bezig ini na zendingsveld ofu ini wan tra pisi fu na furutendienst.
16. Sortu buweisi de dati memre fu na Bethelfamiri di no ben trow ben ondrofeni na fasi fu de sondro trow leki wan libifasi di e pai?
16 Furu kristen di no trow e dini yari kaba leki memre fu na Bethelfamiri tapu na edekantoro fu na Wachttorengenootschap ofu tapu wan fu den bijkantoro fu en na wan tra presi na grontapu. Den ben ondrofeni dati na fasi fu de sondro fu trow de leki wan libifasi di e pai? Iya, fu tru. Wan brada di no trow fu eksempre èn di furu yari langa ben dini na tapu a Betheloso ini Brooklyn ben taki: „Na prisiri fu si dati milyunmilyun tijdschrift nanga tra publikatie na ini san na boskopu fu na Wortu fu Gado skrifi, e prati go te na den kaba fu na grontapu, de wan kefarlek bigi paiman tapu ensrefi.” Baka sowan 45 yari fu Betheldienst wan tra brada di no trow ben taki: „Ibri dei wi e aksi wi lobi hemel Tata ini begi fu yepi èn koni èn fu hori misrefi gesontu èn tranga na yeyefasi èn skinfasi, sodati mi kan tan du en santa wani . . . Mi ben prisiri fu tru ini wan koloku èn blesi libifasi di e pai.”
Tan krin leki wan sma di no trow
17. San na tu yepisani fu tan krin leki wan sma di no trow?
17 Dati wan libi leki wan sma di no trow kan pai e kon a krin fu bijbel nanga disiten eksempre. A no de fu taki dati yu mu ’tan faste ini yu ati’ na ini sortu pisten ini yu libi ooktu na ini san yu de sondro fu trow (1 Korinte 7:37). Ma san kan yepi yu leki wan sma di no trow fu tan krin? Na moro bigi fonten fu yepi na Yehovah na „Yereman fu begi” (Psalm 65:2). Meki en sobun leki wan gwenti fu seni nofotron tranga begi go na en. „Tan hori doro ini begi”, pe yu e aksi Gado fu en yeye èn e aksi en yepi ini a kweki fu den froktu fu en, makandra nanga vrede èn dwengi yusrefi (Romeini 12:12; Lukas 11:13; Galacia 5:22, 23). Denki morofara ooktu geregeld na ini begi dipi fu na rai fu a Wortu fu Gado èn poti dati alaten ini yu libi.
18. Fa 1 Korinte 14:20 de nanga a kibri fu wan sma krinfasi leki wan sma di no trow?
18 Ete wan yepi fu kan tan krin leki wan sma di no krin, de fu tan farawe fu ala sani di ben kan wiki lostu fu seks kon. A de krin dati disi wani taki ooktu pornografie (fisti buku èn prenki) èn hurudu prisiri. Paulus ben taki: „De pikinnengre na ini san ogri; ma na a tra sei de bigisma na ini ferstan” (1 Korinte 14:20). No proberi fu kisi sabi fu san de ogri èn ooktu fu kisi ondrofeni fu en, ma de so koni nanga a yepi fu Gado fu de sondro ondrofeni èn sondro fowtu leki wan pikinnengre ini a tori disi. Hori na asrefi ten disi ini prakseri dati sekshurudu nanga ogri de ini Yehovah ai wan sani di no de yoisti.
19. Sortu tekst e meki wi si tapu sortu tra fasi wan sma kan kibri en krinfasi leki wan sma di no trow?
19 Yu sa kisi yepi ooktu leki wan sma di no trow fu kibri yu krinfasi te yu de nanga opo ai ini a tori fu yu demakandra (1 Korinte 15:33). Tan farawe fu de makandra nanga den sma di e gi seks nanga trowlibi wan prenspari presi ini den libi èn alaten den mofo furu fu dati. Hori yusrefi spesrutu farawe fu dottaki! Paulus ben gi na rai: „Meki hurudu èn ala sortu fu bigi-ai no kon de fu taki srefi na un mindri, soleki a fiti santawan; ooktu nowan syen waka nanga libi èn ooktu law taktaki èn dottaki, sani di no e fiti, ma morofuru fu taki tangi.”
Wan tamara di e pai
20. San sa de a bakapisi te wan sma gebroiki en yari di a de en wawan sondro fu trow so bun leki a kan na ini Yehovah dienst?
20 Efu yu e gebroiki den yari fu yu leki wan sma di de en wawan sondro fu trow so bun leki a kan ini a dienst fu Yehovah, dan disi sa gi satisfaksi èn vrede fu na yeye. Na libifasi dati sa meki ooktu yu yeye lepifasi nanga stabiliteit gro. Efu yu tan te na a kaba fu na goddelowsu seti fu seni disi sondro fu trow fu na bun fu na Kownukondre, dan Yehovah no sa frigiti den muiti fu yu fu offer yusrefi ini en santa dienst.
21. San yu sa abi seiker efu yu go paa ini a trowlibi bakadi wan pisten yu ben prisiri na ini wan krin toestand fu no trow di e gi pai?
21 Efu yu leki wan man ofu uma di no trow e feti fayafaya na baka den Kownukondre belang dan yu sa kisi furu blesi (Odo 10:22). Efu dan na ini wan pisten ini yu libi bakaten yu e go trow, dan yu sa go nanga wan moro bigi ondrofeni èn wan moro lepi yeye bakagron ini na trowlibi. Boiti fu dati, fudi yu hori na a rai fu den Buku, yu sa meki yu bosroiti fadon tapu wan kompe di gi ensrefi abra na Gado èn di e kibri en soifri-retifasi èn di kan yepi yu fu dini Gado getrow. Ini a ten disi yu kan ondrofeni dati na fasi fu de sondro fu trow de wan libifasi ini na dienst fu wi lobi Gado Yehovah.
San yu ben sa piki?
◻ San de a mindri Yehovah dienstknegti wantu paiman gi den wan di no trow èn di e kibri den krinfasi?
◻ Sortu bijbeleksempre di e kon a krin dati na fasi fu de sondro fu trow kan pai?
◻ Sortu eksempre fu wan fasi fu de sondro fu trow e pai de ini a ten disi?
◻ San kan yepi wan kristen di no trow fu tan krin?
[Prenki na tapu bladzijde 8]
No umapikin fu Yefta, na apostel Paulus èn tra dienstknegti fu Yehovah ben ondrofeni dati na fasi fu de sondro fu trow de wan libifasi di e pai. Yu ben sa kan ondrofeni disi ooktu?