„Efu wan sma kan tan sondro fu trow, dan meki a du so”
1 Wan leisi di Yesus ben taki nanga den disipel fu a trowlibi, dan a ben taki dati a de leki ’wan presenti’ te wan sma e tan sondro fu trow. Baka dati a taki: „Efu wan sma kan tan sondro fu trow, dan meki a du so” (Mat. 19:10-12). Wan tu yari baka dati, na apostel Paulus ben skrifi fu den winimarki di wan sma abi te a no trow. A ben gi trawan a deki-ati fu waka baka na eksempre fu en, fu tan sondro fu trow (1 Kor. 7:7, 38). Na ini a ten disi furu sma e „tan sondro fu trow” èn den e kisi furu wini fu disi. San na wan tu fu den winimarki?
2 Dini „sondro fu sani puru un prakseri”: Paulus ben frustan taki fu di a no ben trow, meki a ben man dini Yehovah ’sondro fu wan sani puru en prakseri’. Na ini a ten disi sosrefi, wan brada di no trow kan meki muiti fu go na a Dinariskoro. Furu tron a de so taki te wan sma no trow, a kan go moro makriki na ini a pionierwroko, a kan leri wan tra tongo, a kan froisi fu go dini na wan presi pe moro preikiman de fanowdu, a kan dini na Bethel, noso a kan kisi tra sortu grani na ini a diniwroko. A kan abi moro ten fu ondrosuku sani moro fini te a e studeri èn fu denki dipi fu sani. A kan abi moro ten sosrefi fu taki nanga en heri ati nanga Yehovah na ini begi. Furu tron a de so taki wan sma di no trow abi moro ten fu yepi trawan. Ala den sani disi na fu wan sma en „eigi bun”.—1 Kor. 7:32-35; Tori. 20:35.
3 Te wan sma e dini Gado sondro fu wan sani puru en prakseri, dan a sa kisi bun furu wini fu disi. Wan sisa di no trow èn di e dini 27 yari kaba na ini Kenia, ben skrifi: „Mi ben abi so furu mati èn so furu wroko ben de fu du! Wi ben e du sani makandra èn wi ben go luku makandra. . . . Fu di mi no trow meki mi ben man go na difrenti presi èn mi ben abi moro ten gi a diniwroko, èn ala den sani disi ben gi mi furu prisiri.” A sisa disi e taki moro fara: „Na ini den yari di pasa, a banti di mi abi nanga Yehovah kon moro tranga.”
4 Efu yu kan tan sondro fu trow, dan du so: Yesus taki dati efu wan sma wani tan sondro fu trow, dan a musu du dati „fu a bun fu a kownukondre” ede (Mat. 19:12). Neleki fa a de nanga iniwan tra presenti, dan a trow di wan sma no e trow musu de leki wan presenti di a sma e gebroiki bun, so taki a sa kisi prisiri èn winimarki fu disi. Furu sma di no trow gebroiki a ten fu den na wan yoisti fasi èn den poti den frutrow tapu Yehovah fu kisi koni nanga krakti. Den kon frustan taki a warti trutru efu wan sma kan tan sondro fu trow.