A wet fu Yehovah gi en prisiri

ALBERT D. SCHROEDER, wan memre fu a Tiri Skin fu Yehovah Kotoigi, kaba en diniwroko dyaso na grontapu tapu dridewroko 8 maart 2006. A ben abi 94 yari èn a ben de na ini a furuten diniwroko moro leki 73 yari.

Brada Schroeder ben gebore na ini 1911, na ini a foto Saginaw, Michigan, na Amerkankondre.a Di a ben pikin, dan en granmama fu en mama-sei leri en furu fu Bijbel, èn a leri en tu fu kon lobi leisi Yehovah Wortu tu. Na a Universiteit fu Michigan, a ben e studeri Latijntongo nanga Doisritongo, èn a ben studeri sosrefi fu tron wan sabiman di e meki sani di e wroko nanga stroom. Ma fu di a ben e kisi moro nanga moro warderi gi Bijbel, meki a no go moro na a universiteit, ma a go na ini a furuten Kownukondre preikiwroko. Na ini 1932 a tron wan memre fu a Bethelfamiri na ini Brooklyn, New York.

Na ini 1937, di Brada Schroeder ben abi 26 yari, a kisi a grani fu teki fesi na ini a wroko di Yehovah Kotoigi e du na ini Ingrisikondre. A faya di a ben abi gi a preikiwroko, gi furu sma deki-ati fu go na ini a furuten diniwroko. Wan yonkuman di ben e wroko makandra nanga en na Bethel na ini London, na John E. Barr. Bakaten, den tu brada disi dini furu yari langa na ini a Tiri Skin.

Na a ten fu na orloku, lanti poti prakseri na a wroko di Brada Schroeder ben e du fu a bun fu Yehovah Kotoigi. Na ini augustus 1942, den komanderi en fu gowe libi Ingrisikondre. Na a ten di na orloku ben de fayafaya, a ben musu abra na Atlantisch Se nanga boto, èn dati no ben de wan moi ondrofeni kwetikweti. A doro baka na ini Brooklyn na ini september.

Na a ten dati, den futuboi fu Yehovah ben fruwakti kaba taki den ben o abi fu du wan bigi wroko baka a di fu Tu Grontapufeti. Brada Schroeder ben musu yepi fu bosroiti sortu sani den studenti ben o leri na a Waktitoren Bijbelskoro Gilead. A ben fruwondru taki a kisi a wroko disi, èn a ben breiti tu. Furu yari langa, a ben de wan fu den leriman na a skoro disi, di ben e gi leri na den zendeling. Studenti di kisi leri fu en na a Gileadskoro, èn sosrefi studenti di kisi leri fu en bakaten na a Kownukondre Diniwroko-skoro, e memre den moi sani ete di a ben leri den. Brada Schroeder ben prisiri fu leri den fu kon lobi den wet fu Gado, èn a sori den krin taki a de prenspari fu kon leri sabi Yehovah.

Na ini 1956, Brada Schroeder trow nanga Charlotte Bowin, èn na ini 1958 Judah Ben, a manpikin fu den, gebore. Brada Schroeder ben de wan heri bun Kresten masra èn papa. Na ini 1974 a bigin dini na ini a Tiri Skin, èn den brada ben abi bigi lespeki gi a fasi fa a ben e si sani. A ben de wan man di ben abi switifasi nanga sakafasi, èn a sani di de moro prenspari, na taki a ben wani gi glori na a bigi nen fu Gado. Wi de seiker taki Brada Schroeder kisi libi na ini hemel leki wan salfu Kresten di trutru ben ’abi prisiri na ini a wet fu Yehovah’.—Psalm 1:2.

[Futuwortu]