Yepi yu pikin te wan lobiwan fu en dede

NA INI wan bukuwenkri di ben lai nanga sma, wan mama ben e suku wan buku di ben musu yepi a pikin boi fu en fu no sari tumusi fu di wan krosibei famiri fu en dede. Di a no feni san a ben e suku, dan a bruya, èn a bari gi na uma di ben e wroko na ini a wenkri: „A wenkri disi lai nanga buku, ma toku mi no man feni nowan enkri buku di kan yepi mi pikin!”

A mama disi ben abi leti fu broko en ede. A de wan sari sani trutru gi wan pikin te wan lobiwan fu en dede! Te papa nanga mama e sorgu bun gi den pikin fu den, dan den pikin disi e firi koloku. Ma sondro taki den pikin e fruwakti dati, wan sma di den lobi kan dede. Fa yu leki papa noso mama kan yepi yu pikin te yu e fruwakti taki so wan sani o pasa, noso te a pasa kaba?

A no de fu taki dati te wan lobiwan fu yu dede, dan kande yu e feti nanga yu eigi firi. Kande yu e sari srefisrefi, noso kande yu e prakseri a sma dati doronomo. Ma yu no musu frigiti taki yu pikin abi yu fanowdu. Wan ati-oso na ini Minnesota, na Amerkankondre, tyari wan buku kon na doro di e taki: „Te sma e taki, dan pikin-nengre e yere pisipisi fu den tori dati, èn te sma no e yepi den fu kon frustan sani moro krin, dan nofo tron den kan kisi wan heri tra denki fu sani.” A buku e taki moro fara: „Sma musu fruteri pikin-nengre krin fa sani de trutru.” Dati meki te wi e fruteri pikin-nengre den sortu sani disi, dan wi musu du dati na so wan fasi taki den sa man frustan san pasa. A sani disi no makriki, fu di a no ala pikin man frustan wantewante san e pasa.—1 Korentesma 13:11.

Yepi a pikin fu kon frustan san na dede

Son ondrosukuman e taki dati te papa nanga mama e taki nanga den pikin fu a lobiwan fu den di dede, dan den musu luku bun fu no fruteri a pikin taki a sma „e sribi”, taki „a lasi”, noso taki „a gowe”. Te papa nanga mama e fruteri yongu pikin den sani dati sondro fu fruklari gi den san dati wani taki, dan dati kan bruya den pikin. A no de fu taki dati Yesus ben agersi dede nanga wan sribi, èn a sani dati ben fiti. Ma hori na prakseri taki a no ben e taki nanga pikin-nengre. Boiti dati, a tyari kon na krin san a ben wani taki nanga den wortu dati. Yesus ben taigi den bakaman fu en: „Wi mati Lasarus go sribi.” Aladi den disipel ben de bigisma, toku den „ben prakseri taki [Yesus] ben taki dati Lasarus ben go sribi fu kan rostu”. Fu dati ede, Yesus meki den kon frustan sani moro krin. A taigi den: „Lasarus dede” (Yohanes 11:11-14). Efu bigibigi sma ben musu kon frustan sani moro krin, dan fa fu pikin-nengre dan?

Den skrifiman Mary Ann Emswiler nanga James P. Emswiler e taki: „Te wan mama e yepi a pikin fu en fu frustan san pasa nanga wan sma di dede, dan a mama ben kan gebroiki spesrutu wortu fu no skreki a pikin. Ma te a mama e du dati, dan a pikin kan bigin prakseri sani di kan frede en, èn di no bun gi en.” Fu eksempre, te wan mama e taigi wan yongu pikin taki a sma di dede e sribi nomo, dan dati kan meki taki a pikin e frede fu go sribi te neti, fu di a e denki taki a no o man wiki moro. Efu wan mama e taigi a yongu pikin fu en nomo taki a sma „gowe”, dan a pikin kan denki taki a sma no lobi en, noso taki a gowe libi en.

Furu papa nanga mama di e pruberi fu fruteri wan pikin fu den san pasa nanga wan sma di dede, kon si taki a moro bun fu taigi a pikin krin san pasa (1 Korentesma 14:9). Ondrosukuman e taki dati a bun te yu e gi yu pikin deki-ati fu poti aksi èn fu fruteri san e trobi en. Te yu e taki furu nanga a pikin, dan yu kan yepi en fu kon abi wan yoisti denki fu sani, èn yu sa man kon sabi moro bun fa fu yepi en moro fara.

Wan buku di e gi wi bun rai

Na a pisi ten te yu pikin e sari, dan a sa suku rai nanga yepi na yu, èn a sa wani kisi piki tapu spesrutu aksi. Ma pe yu kan feni bun rai te a abi fu du nanga dede? Furu sma kon si taki Bijbel trutru e gi sma trowstu nanga howpu. A e fruteri wi krin fu san ede sma e dede, san na a situwâsi fu den dedewan, èn sortu howpu de gi den sma disi. Te yu e fruteri yu pikin krin taki „den dedewan no sabi notinoti”, dan dati sa yepi en fu kon frustan taki a sma di dede no e pina (Preikiman 9:5). Boiti dati, na ini Bijbel, Gado e gi wi a howpu taki wi sa si den lobiwan fu wi baka, te den kisi wan opobaka na ini a paradijs na grontapu.—Yohanes 5:28, 29.

Te yu e suku yepi na ini den Santa Buku fu Bijbel, dan yu kan yepi yu pikin fu kon frustan taki Bijbel e gi sma bun rai, èn taki a kan trowstu sma ala ten te sari sani e miti den. Ma yu pikin sa si tu taki yu leki papa noso mama e meki Gado Wortu tiri yu te yu musu teki prenspari bosroiti na ini a libi.—Odo 22:6; 2 Timoteyus 3:15.

Yu kan kisi piki tapu den aksi fu yu

Te yu e pruberi fu yepi yu pikin te a e sari, dan a kan taki son leisi yu no sa sabi san fu du. San yu kan du te a sani dati miti yu?a Meki wi luku wan tu aksi di yu ben kan abi.

• A bun fu meki a pikin fu mi si taki mi e sari? A no de fu taki dati yu wani yepi yu pikin fu no sari tumusi. Ma disi wani taki dati a pikin no mag si taki yu e sari? Furu papa nanga mama kon si taki a moro bun te den e meki a pikin si fa den e firi trutru. Na so den e sori a pikin fu den taki a no fowtu fu sari. Son papa nanga mama fruteri den pikin fu sma na ini Bijbel di no ben syen fu sori taki den ben e firi sari. Fu eksempre, Yesus bigin krei di en bun mati Lasarus dede. Yesus sori sma krin fa a ben e firi.—Yohanes 11:35.

• A bun fu tyari mi yongu pikin go na a dede-oso, na a beri, noso na a grebi? Efu yu o tyari yu pikin go na den presi dati, dan a bun fu taigi a pikin na fesi san o pasa drape, èn fu san ede den sani dati e pasa. A no de fu taki dati son leisi papa nanga mama abi bun reide fu no meki den pikin go na sonwan fu den okasi disi, noso den kan bosroiti fu no meki den go na nowan-enkri wan fu den. Pikin-nengre di e go na den beri fu Yehovah Kotoigi kan kisi wini fu a Bijbel-lezing di e hori drape. Boiti dati, a „dipi firi” nanga a lobi di den sma drape abi gi makandra kan de wan yepi èn wan trowstu gi sma, iya, srefi gi wan pikin.—Romesma 12:10, 15; Yohanes 13:34, 35.

• Mi musu taki fu a dedesma nanga mi pikin? Son ondrosukuman e taki dati efu yu no e taki srefisrefi fu a tori disi, dan yu pikin ben kan abi a fowtu denki taki yu e kibri sani gi en, noso taki yu wani en fu frigiti ala sani fu a sma. Skrifiman Julia Rathkey e taki: „A de prenspari fu yepi pikin fu kon frustan taki a sma dede, èn fu no frede gi a tori dati.” Te yu e taki fri fu a sma di dede, namku fu den bun fasi fu en èn fu den bun sani di a du na ini en libi, dan dati kan yepi a pikin fu no sari tumusi. Papa nanga mama di de Kotoigi fu Yehovah, e trowstu den pikin fu den nanga a howpu di Bijbel e gi taki den dedewan sa kisi wan opobaka fu libi na ini a paradijs na grontapu pe siki nanga dede no sa de moro.—Openbaring 21:4.

• Fa mi kan yepi mi pikin te a e sari? Na a ten te yu pikin e sari, dan a kan kon siki. A kan atibron, noso kande a e broko en ede fu di a no sabi san fu du èn fu di a e firi brokosaka. No fruwondru te yu pikin e feni taki na en meki taki a sma dede. No fruwondru tu te a pikin e bigin anga na yu skin, te a e bruya te yu e kon lati na oso, noso te a e bruya fu di yu e siki. Fa yu kan yepi a pikin? Noiti a pikin musu denki taki yu no e si taki wan sani e trobi en. Sobun, poti prakseri na a pikin, èn pruberi fu kon sabi san e du en. No denki taki a pikin fu yu no e broko en ede tumusi te wan lobiwan fu en dede. Trowstu en doronomo èn gi en deki-ati fu poti aksi èn fu fruteri yu fa a e firi. Yu kan tranga a howpu fu yu pikin èn sosrefi a di fu yu nanga yepi fu „a trowstu di Gado Buku e gi”.—Romesma 15:4.

• O ten wi musu bigin du den sani baka di un ben gwenti du leki osofamiri? Sabiman e gi papa nanga mama a rai fu du ala muiti fu tan du den sani di den ben gwenti du. Den e taki dati te osofamiri e du bun sani makandra, dan dati e yepi fu no sari tumusi. Furu papa nanga mama di de Yehovah Kotoigi, kon si taki te den e studeri Bijbel doronomo nanga na osofamiri fu den, èn te den e go na den konmakandra doronomo, dan dati e meki taki sani e waka bun nanga na osofamiri fu den, èn a kan tranga a bribi fu den.—Deuteronomium 6:4-9; Hebrewsma 10:24, 25.

Solanga Yehovah Gado no tyari wan kaba kon na siki nanga dede, dan a o pasa son leisi taki pikin-nengre o lasi lobiwan na ini dede, èn a sani dati sa meki den sari srefisrefi (Yesaya 25:8). Ma te den e kisi deki-ati nanga trowstu na wan yoisti fasi, dan dati kan yepi den fu no sari tumusi te wan lobiwan fu den dede.

[Futuwortu]

[Prenspari pisi na tapu bladzijde 19]

Gi a pikin fu yu deki-ati fu poti aksi èn fu fruteri san e trobi en

[Prenki na tapu bladzijde 20]

Tan du sani di un ben gwenti du, èn tan studeri Bijbel leki osofamiri