Jepi joe pikin foe gro na ini a gi ensrefi na ini a dini foe Gado

„Kweki wan boi akroederi a pasi foe en; srefi te a kon owroe, a no sa drifi komoto foe en.” — ODO 22:6.

1. San joe moe doro efoe joe wani kweki wan pikin nanga boen bakapisi èn foe san-ede?

WAN oema di de wan pajasiman na ini wan circus ben si di a ben proeberi foe leri en manpikin na koni foe a trapezewroko dati a ben abi moeiti foe kon abra na rektiki (a tiki foe hari joesrefi go a tapoe). „Joe moe iti joe ati abra a tiki”, a ben gi leki rai, „dan joe skin e go foe en srefi”. Na so ooktoe papa nanga mama di e ’kweki’ den pikin nanga na winsi dati a gro na ini a gi ensrefi na ini a dini foe Gado, moe gi na ati réde. Disi de spesroetoe moeilek na ini den tinijari. — Odo 4:23.

2. Foe san-ede den tini jari de moeilek, èn fa papa nanga mama kan gi jepi?

² „Jari langa a no ben moeilek foe kon sabi san ben e go na ini den boi foe mi”, wan kristen papa ini Doisrikondre ben e ferteri. „Ma dati kenki esesi, so esi leki den doro na ini na puberteit.” Na ini na pisten dati foe abra tron bigisma foeroe njoen span lostoe, di e kon tranga foe di skin èn hormonale kenki e sori densrefi abi krakti tapoe na ati foe wan jongoesma. Ma foeroetron den sortoe jari dati a kon pori foe di fowtoe e meki di e tjari pen kon. Srefi na getrow Job ben sari dati a ben moesoe si na ondro ai „den bakapisi foe den sondoe foe en jongoe jari” (Job 13:26). Spanning foe sma firi kan tjari „skreki brok’ede ini a ati” foe wan jongoewan kon. Odo 12:25 e taki dati leki wan bakapisi foe dati na ati sa „boigi go na gron, ma na boen wortoe de san e meki dati a e prisiri ensrefi”. Fa joe kan jepi joe pikin na ini den moeilek jari disi nanga jepi foe wan boen communicatie.

Kommunikatie foe ati kon miti ati

3, 4. (a) Fa na fasi fa Elihu ben taki nanga Job foe gi en rai e kenki foe na fasi fa den dri „mati” foe Job ben doe disi? (b) San sa de wan skotoe gi kommunikatie foe ati go miti ati?

³ Loekoe na kontrari pikinso a mindri a fasi fa Elihu kon taki nanga Job èn gi en rai èn a fasi fa den dri „mati” foe Job ben doe disi. Foe disi e kon krin a fesi san boen foe abi kommunikatie èn san no boen. Elihu ben de wan boen arkiman. Aladi den trawan ben hori densrefi farawe èn noiti ben e erken den égi libisma swakifasi, a ben taki: „Loekoe mi de a fesi na troe Gado precies leki joe; ooktoe mi ben meki komoto foe tokotoko.” A ben gi Job tranga foe ’gi piki’, foe taki san de tapoe en ati èn foe no frede (Job 33:5-7). Den dri „mati” na a tra sé ben meki a gersi leki den e firi nanga Job èn e trowstoe en, ma den ben arki nanga wan prakseri pe den ben kroetoe sani a fesi kaba. „Arki grantangi na den bewijsi di mi abi tége, èn poti prakseri na den wortoe foe mi mofoboeba”, Job ben aksi foe soso (Job 13:6). Ija. a fasi fa den ben kon foe taki ben opo wan skotoe poti.

⁴ Wan papa ofoe mama efoe a no loekoe boen, sondro foe a sabi dati, kan opo skotoe poti. Soboen, meki joe pikin taki san de tapoe en ati (Odo 18:13). Denki boen fa joe piki sa kon abra tapoe en. „Wan sma de di e taki sondro foe a prakseri leki nanga den djoekoe foe wan fet’owroe, ma na tongo foe wan koniwan de leki dresi” (Odo 12:18). A de troe dati fasi èn/ofoe den wortoe foe wan jongoesma sontron kan de wan tergi sani. Ma prakseri dati a baka den sortoe ’wortoe di taki somaar’ wan ati kan de di foeroe nanga problema. Gebroiki joe tongo nanga koni foe dresi. — Job 6:2, 3.

5. (a) San sa jepi wan papa ofoe mama foe kon sabi san de ini na ati foe a pikin? (b) Fa na go loekoe foe den publikatie foe a Genootschap de wan jepi?

⁵ Arki boen — san wani taki ooktoe na poti foe tactvol aksi — sa meki dati a pikin sa taki èn sa meki en moro makriki gi en foe taki san e trobi en (Odo 20:5). „Boen foeroetron mi manpikin ben bigin taki tapoe wan momenti di gersi no ben de so boen èn dan a ben taki soso wán ofoe toe zin, foe wan sani di ben psa na skoro ofoe so”, na mama foe wan 18-jari skoroboi ben taki. Ma a ben de a mi foe „kisi komoto foe en tapoe wan switifasi san ben de na ini en ati, foe di mi ben e poti aksi leki: ’Èn san ben psa dan?’ Ofoe: ’Fa joe ben feni dati?’ Ofoe: ’San joe ben doe dan? ofoe ben taki?’ Dati a ben abi fanowdoe èn dan a ben kon nanga en problema a fesi. Ma foeroe ten ben e go na ini dati!” Teki a ten dati gi joe pikin! Kande joe kan kon sabi san e go na ini en tapoe wan langa koiri ofoe efoe joe sidon makandra foe ontspan joesrefi. Foeroe papa nanga mama ben kon si dati di den go loekoe den bodoi na ini den boekoe foe na Wachttoren Genootschap, di ben kon na ini den jari di psa, den ben kisi jepi foe ferstan den pikin foe den, di e gro kon, moro boen èn foe abi takmakandra nanga den di wani taki wan sani gi den. Na bakapisi de dati den osofamirman nofotron e taki nanga makandra foe ati go miti ati. Ma moro leki wan boen kommunikatie de fanowdoe foe gro na ini a gi joesrefi na ini a dini foe Gado.

Meki na jeje njanjan go a fesi

6, 7. San Timóteus mama ben doe, èn fa papa nanga mama kan waka na baka na eksempre foe en?

⁶ Timóteus mama no ben sidon na ini a tori foe den jeje afersi di ben wani taki libi gi en manpikin. Foe en den e skrifi: „Foe pikinnengre jari kaba joe ben sabi den santa Boekoe, di kan meki joe kon koni foe kisi ferloesoe” (2 Timóteus 3:15). Na so ooktoe na ini a ten disi papa nanga mama foe soema den pikin e gro na ini a gi densrefi na ini a dini foe Gado e broko den ede srefsrefi foe a jeje njanjan foe den pikin foe den. Den e leri den tapoe jongoe libi marki kaba foe poti prakseri tapoe persoonlek studie.

⁷ Joe ben loekoe a tapoe kaba dati joe pikin abi en égi bijbellektuur èn e sreka ensrefi a tapoe den gemeente komakandra? Joe e gi en dek’ati srefisrefi foe meki ten fri foe diki go na den goedoe na ini a Wortoe foe Gado? (Odo 2:1-5; 1 Johannes 2:14) Na a ten foe komakandra leki wan dek’ati, joe e go sdon na en sé, sodati sani no hari en ferstan èn ati poeroe? A e kisi tranga foe doe actief mee? (Hebrewsma 10:23-25). Joe abi wan geregelde osofamiri bijbelstudie, pe sabi e gi di de spesroetoe gi den fanowdoe foe joe pikin? Poti prakseri na den aksi disi pikinso. — Odo 24:5.

Jepi den ’foe si Jehovah leki wan troetroe persoon’

8. Pe soleki Deuteronomium 11:18, 19 e taki a gi ensrefi foe dini Gado moe bigin, èn fa papa nanga mama kan doe disi na ini a ten disi ini a tori foe wan pikin?

⁸ Ma efoe soso na ede foeroe nanga troe tori, dan na ati nanga konsensi kan tan sondro den seki. Foe meki wan boen konsensi gro, joe pikin moe si dati Jehovah de wan persoon di de dynamisch èn di abi foeroe belangstelling gi en nanga gi san a e doe. Ma fosi joe égi ati moe foeroe nanga lobi gi Jehovah, sodati dati e boewégi joe foe taki geregeld foe en foeroe-nanga-lobi sorgoe èn en granfasi. Joe moe lobi a waarheid èn libi akroederi na waarheid. Di den ben aksi wan mama na ini Ingrisikondre fa en pikin di ala toe de foeroeten prékiman ben meki so wan krakti lobi foe Gado gro ini den a ben leg uit: „Foe di mi ben taki nanga den dati wi moe si Jehovah leki wan troetroe sma. A ben jepi mi sote, dati mi no ben kan tra fasi leki meki Jehovah de troetroe gi den. Ala sani e drai lontoe en.” Kweki joe pikin ooktoe foe taki nanga Jehovah nanga ibri vorm foe begi èn tranga begi èn ’na ibri okasi tan begi ini jeje’ (Efesesma 6:18). Meki na pikin jere joe opregti faja begi èn taki nanga en foe na inhoud foe en égi begi. — Deuteronomium 11:1, 2, 18, 19; Odo 20:7.

9. Fa papa nanga mama kan gebroiki eksempre foe a troetroe libi foe oefen na konsensi foe na pikin?

⁹ Eksempre foe na troetroe libi kan abi tranga krakti tapoe na jongoe konsensi. (Teki gersi nanga 1 Korinte 8:10.) Ten na ten kande joe e jere dati sma e ondrofeni moeilekheid foe di den ben pasa den wet foe Gado. Taki foe den sortoe eksempre dati nanga joe pikin, sondro dati joe e kragi den èn jepi den na a fasi disi foe si o troe Paulus wortoe de „Gado no e meki den spotoe nanga en. Bika san wan sma e sai na dati a sa koti” (Galacia 6:7). Taki leki positief eksempre makandra foe den moi evangeliumtori foe a libi foe Jezus. Dan joe e jepi joe pikin „foe kisi na denki foe Kristus” (1 Korinte 2:16). Ma joe moe meki den tori kon na libi! Gi na pikin dek’ati foe tjari den dramatische tori kon a den fesi èn foe denki foe den meesterlekfasi fa Jezus ben doe sani. Teki materiaal foe bijbel publikatie pe a libi foe Jezus nanga en persoonlek égifasi e taki finifini èn gebroiki den disi wawantron leki wan kenki tapoe joe osofamiri studie.a

10. Fa joe kan jepi joe pikin „foe leri sabi a lobi foe Kristus”?

¹⁰ A pikin foe joe moe feti ooktoe a baka foe waka baka a eksempre foe Kristus. Soso dan wan jongoewan sa leri sabi foe égi ondrofeni „na lobi foe na Kristus, di e pasa a sabi” (Efese 3:19). Gi en foe dat’ede dek’ati foe waka finifini na baka na tegoe di Jezus ben abi gi kroektoedoe, a lobi foe en gi libisma, a faja gi na troe anbegi foe en Tata, na sari-ati foe en èn en boen-ati-fasi, èn a de klari di a ben de klari foe ferdrage spotoe (Hebrewsma 1:9; Markus 6:34; Johannes 4:34; Lukas 23:34; 1 Petrus 2:23). Gafa joe pikin opregti te a e waka na baka na rai foe joe. A moe si dati aladi wi de onvolmaakti, wi e de moro kolokoe, èn e kisi wan konsensi di de moro boen o moro wi e waka soifri na baka na model foe na Meester. Wi e kon ooktoe moro krosbé na Gado foe di Jezus ben sori na ini en libi na Sma di en Tata de (Johannes 14:6-10). Memre joe pikin alaten baka foe warderi a matifasi disi. Wan kristen mama foe fo pikin di a ben waka boen gi en ben taki disi: „Mi man noiti e meki wan dé pasa sondro foe brasa den èn ferteri den omeni a lobi den èn dati a sabi fa Jehovah ede e bigi tapoe den fasi foe waka nanga libi. ’Jehovah lobi oenoe’, a e taki. ’No meki a kisi sjen’.” — Odo 21:11.

Na fanowdoe foe foeroe-nanga-lobi tranga leri

11. Foe san-ede ibri pikin abi tranga leri fanowdoe?

¹¹ Ala di Gado ben leri David foe sensi en jongoe jari, tokoe a ben begi: „Den sondoe foe mi jongoe jari èn mi doe foe oproeroefasi, o no prakseri den” (Psalm 71:5, 17; 25:7). Ija, na a ati foe ibri pikin lawfasi tai, ma „na tiki foe tranga leri de san sa poeroe en poti farawe foe en” (Odo 22:15). Na „tiki” disi foe na makti foe papa nanga mama kan abi nofotron na ini en dati a pikin e kisi pir’ai ofoe den e poeroe wan sani na en di a moe kisi. Te na verradelek ati foe joe pikin e angri foe doe wan ogri sani, dan wan faste bosroiti soboen de fanowdoe foe taki nono! — Jeremia 17:9; Odo 29:17, 19, 21.

12, 13. Fa joe kan sorgoe dati a tranga leri foe joe doro na ati?

¹² Waka na ini a gi foe tranga leri èn spesroetoe te joe e gi strafoe, na baka na eksempre foe Jehovah, di „e poti sani reti . . . akroederi san de joisti”. Jesaja 28:26-29 e meki wi si dati a de leki na gronman di e gebroiki na makti foe si sani foe bepaal sortoe wrokosani a moe gebroiki foe masi den difrenti sortoe foe karoe nanga alési èn olanga a moe masi; a no „sa masi en sondro foe stop”. Soboen aksi joesrefi: Na verbod de redelek efoe mi loekoe na libimarki foe mi pikin èn na marki foe lepifasi di a ben doro? Na strafoe de ini akroederi nanga na serjoesoefasi nanga na fowtoedoe èn a de ooktoe consequent foe di a no soso ini wan firi di kon mi handri? Èn a pikin sabi troetroe foe san-ede a e kisi strafoe? — Job 6:4.

¹³ Onredelek verbod ofoe inconsequent tranga leri sa de wan tergib gi na pikin (Efesesma 6:4; Kolosse 3:21). Ma lobi tranga leri sa kibri joe pikin gi omstandigheid di kan pori ala a boen leri di poti go na ini en ati. Disi de spesroetoe prenspari na ini a tori foe a demakandra foe en (Odo 13:20; 28:7). Ma efoe joe pikin baka ala moeiti di joe ben doe tokoe kon na ini serjoesoe moeilekheid san dan?

Efoe moeilekheid sori densrefi

14. Foe san-ede wan papa ofoe mama no moe libi ala sani es’esi ofoe wan pikin kon na ini serjoesoe moeilekheid?

¹⁴ Son papa nanga mama di ben kisi sjen nanga pen ben libi wan pikin es’esi di ben doe wan fowtoe. Aladi Jehovah ben gi strafoe nanga pir’ai di fiti, tokoe a no ben go es’esi abra foe libi na naatsi Israël foe owroeten di ben de wan dé leki wan „manpikin” foe en (Hosea 11:1; 2 Kronieken 36:15, 16; Psalm 78:37, 38; Nehemia 9:16, 17). Net soleki trainers na ini owroeten ben man foe tai soro èn seti broko bonjo efoe wan atleet ben kisi mankeri na so papa nanga mama moe proberi ’foe poti den anoe di e anga slap reti, sodati san de malengri no komoto foe en presi, ma moro foeroe kon de gesontoe’. — Hebrewsma 12:12, 13.

15. Fa wan papa ofoe mama kan gebroiki Galacia 6:1 foe tjari wan pikin di ben doe wan fowtoe kon tapoe na reti pasi?

¹⁵ Foe opo wan pikin di na jejefasi „malengri” èn foe loekoe dati a toestand foe en no kon moro ogri, a de fanowdoe dati a denki foe a pikin poti kon reti. „Srefi awinsi wan sma [wan pikin foe eksempre] doe wan fowtoe bifo a kisi ensrefi”, na apostel Paulus ben gi rai, „dan joe, di abi jejefasi e proeberi foe tjari so wan sma kon baka na ini wan jeje foe safrifasi.” (Galacia 6:1, Ingrisi NW-Verwijsbijbel). Na Griki wortoe di vertaal nanga „tjari kon baka”, ben de wan wortoe di datra ben gebroiki ini a ten foe Paulus foe ’a seti foe bonjo’. Na skin-ati tori disi ben aksi séker boen bekwaamheid efoe wan sma ben wani dati wan broko foetoe ben tron wan malengri foe en heri libi langa. A srefi gron wortoe vertaal nanga „meki kon boen” (foe srépi) èn „foe vul aan” (Markus 1:19; 1 Thessalonica 3:10). Foe meki na ati foe wan jongoewan „kon boen baka” wan sma moe proeberi foe doro na en nanga jepi foe na „Koni foe leri sma”. Na presi foe bigin nanga wan stré foe wortoe, waka na baka na toemsi prenspari bijbel rai: ’De nanga switifasi, dwengi joesrefi na ondro ogri, leri den sma di no abi boen jejefasi nanga safrifasi, foe di Gado kande e gi den berow.’ — 2 Timóteus 2:24-26; 3:16; 4:2.

16. (a) Sortoe kenki kan de fanowdoe foe wini wan pikin baka di ben doe wan fowtoe? (b) San moe tjari kon na krin gi na pikin?

¹⁶ Foe poti na fowtoe denki foe wan pikin kon reti a de fanowdoe dati wan papa ofoe wan mama doe moro ini a moeiti foe en foe kweki en. Kande a papa ofoe mama moe tjari kenki kon na ini a fasi foe libi foe kan poti na fanowdoe prakseri tapoe a pikin. Na ini wan agersitori di e meki oen si sortoe moeiti nanga leti e doe foe wini „wan sondari” baka, Jezus ben taki foe wan oema di ben libi pikinmoro ala sani foe feni baka na moni foe wan drachme di a ben lasi (Lukas 15:7-10). Wan pikin di ben kweki na ini a frede foe Gado, kan kon ini a makti foe firi taki a no warti noti èn a de fowtoe te en sondoe kon na krin èn a kan de soboen fanowdoe dati wan papa ofoe mama e djaranti a pikin foe a lobi foe en gi en. Jepi a pikin foe ferstan dati a no en ma en fasi foe libi joe e tegoe foe en, èn dati en fasi foe libi kan kon moro boen. — Judas 23.

17, 18. (a) Fa wan papa ben kon so fara dati a ben go boen baka nanga en manpikin? (b) San nofotron ben tjari boen bakapisi kon?

¹⁷ Wan papa di a manboi foe en ben kisi pir-ai foe a gemeente foe hoeroedoe ede ben go difrenti tron ini wan wiki tapoe langa koiri nanga en manpikin èn ben abi langa ontspannen takmakandra nanga en. A ben teki ooktoe bijbel publikatie pe den spesroetoe fanowdoe foe en manpikin ben e taki foe en. A papa ben studeri disi nanga en èn ben meki a boi teki prati na a studie di a papa ben abi nanga na heri osofamiri. Na papa ben tjari kenki kon na ini a hoeveelheid wroko foe san eigenlek wan owroeman na ini na gemeente ben moesoe doe foe kan gi en manpikin na prakseri na a sé foe firi nanga fersten di a abi fanowdoe. A ben waka boen baka nanga na boi.

¹⁸ Ma sontron wan manpikin ofoe wan oemapikin kan de nanga oproeroefasi, ija, ’e ferakti a gi jesi’c (Odo 30:17). Kolokoe dati den sortoe aparti situwasi disi de wan di no e kon foeroe a mindri a pipel foe Gado. Fa a de wan sani di e gi dek’ati foe sabi dati na ini moro foeroe situwasi pe den papa ofoe mama, sondro foe loekoe psa na fowtoe libi nanga waka, no libi a pikin es’esi, ma proeberi nanga pasensi foe doro en ati, den bakapisi de toemsi boen!

Tranga wroko — ma a warti na moeiti

19. Fa na ini na sorgoe foe joe osofamiri joe kan waka na baka na eksempre foe Maria?

¹⁹ Kweki pikin, spesroetoe na ini den „laatste dé” disi, de wan kefarlek bigi wroko. Papa nanga mama di e teki sowan frantwortoe na wan serjoesoefasi de foe prijse! Wegi-go-wegi-kon ala ten san moe kon na a fosi presi. No meki a broko-ede foe den lobiwan foe joe foe sorgoe gi „foeroe sani” na skinfasi gi den noiti tapoe joe foe graboe okasi foe de bezig makandra tapoe jeje kontren. Prakseri dati Jezus ben taigi Martha dati soso „pikinso sani de fanowdoe ofoe soso wan”. Ija, wan eenvoudig njanjan ben de fanowdoe. De leki Maria di tapoe na jeje kontren ben njan boen foe na demakandra nanga Jezus. Teki „na boen pisi” gi joe osofamiri foe di joe na ini osofamiri verband e teki prati na jeje activiteit. — Lukas 10:38-42.

20. Sortoe paiman e wakti kristen papa nanga mama di a kweki foe pikin waka boen gi den?

²⁰ Wantoe jari baka di wan mama ben kweki en siksi pikin nanga boen bakapisi foe lobi Jehovah, a ben kisi wan karta foe wan foe den. Tapoe dati ben tanapoe disi: „Mama, mi lobi joe foeroe, moro foeroe leki joe ben sabi oiti. Mi e taki joe tangi: foe na boen rai nanga tiri di joe ben gi mi . . . Joe ben gi mi na moro boen howpoe foe grontapoe, namkoe na waarheid. Mi e taki joe tangi dati joe ben ferloesoe mi libi.” Fa na mama disi ben prisiri! A de soleki Odo 23:24, 25 e taki: „Joe kan abi bigi-ede tapoe wan koni manpikin [ofoe oemapikin]. Meki joe papa nanga mama abi bigi-ede tapoe joe; gi joe mama na kolokoe dati” (Today’s English Version). Meki nanga jepi foe Jehovah so wan sortoe kolokoe kon gi joe ooktoe!

[Foetoewortoe]

San joe ben sa piki tapoe disi?

◻ Fa wan papa ofoe mama kan meki na kommunikatie foe ati go miti ati nanga wan pikin kon moro boen?

◻ San sa jepi wan pikin foe meki wan boen konsensi gro?

◻ Oten tranga leri kan de boen?

◻ Fa wan pikin di ben meki wan fowtoe kan tjari kon baka tapoe wan reti pasi?

[Prenki na tapoe bladzijde 13]

Arki boen, srefi efoe a no de na joisti ten, sa gi tranga foe abi kommunikatie foe ati go miti ati

[Prenki na tapoe bladzijde 15]

A de troetroe wan tjalansi foe djaranti wan pikin foe a lobi foe joe èn foe doro en ati te a doe wan bigi ogridoe