Bijbel e kenki sma libi
San meki taki wan uma di ben e tyari dyamanti gowe kibrikibri fu a kondre èn di ben e fufuru fu en wrokobasi, tron wan sma di e wroko tranga èn di no e bedrigi trawan? San yepi wan uma di pruberi tu leisi fu kiri ensrefi, fu kon de koloku? Fa wan man di ben e gebroiki drugs èn di ben e dringi sopi pasa marki, ben man tapu nanga den takru gwenti disi? Luku san den sma disi e taki.
NEN: MARGARET DEBRUYN
YARI: 45
KONDRE: BOTSWANA
A BEN DE WAN SMA DI BEN E TYARI SANI GOWE KIBRIKIBRI FU A KONDRE ÈN A BEN E FUFURU
A LIBI FU MI FOSI: Mi papa ben komoto fu Doisrikondre, ma a ben tron wan borgu fu Zuid-West Afrika (now a nen Namibia). Mi mama ben de fu Botswana, fu a lo Mangologa. Mi gebore na ini a foto Gobabis, na Namibia.
Na ini den yari baka 1970, a tirimakti fu Zuid Afrika ben abi a makti na ini Namibia èn den ben sorgu taki ala sma na ini den foto nanga dorpu ben hori densrefi na den wèt di ben taki dati den blaka sma nanga weti sma no ben mag moksi. Fu di mi papa ben de wan weti sma èn mi mama wan blaka sma, meki den ben dwengi den fu broko a trow fu den. Fu dati ede, mi mama drai go baka na Ghansi, na Botswana, makandra nanga en pikin.
Na ini 1979, mi froisi go na Lobatse, na Botswana, èn mi ben libi nanga wan famiri di ben teki mi na den oso, teleki mi kaba nanga mi skoro. Bakaten, mi ben wroko na a kantoro fu wan presi pe den e meki wagi di broko. Di mi gro kon bigi, mi ben bribi taki Gado no e sorgu gi sma, èn taki yu musu du ala san yu man, awansi dati bun noso ogri, fu man sorgu gi yusrefi èn gi yu famiri.
Fu di mi ben abi wan prenspari posisi na wrokope, meki mi ben teki na okasi dati fu fufuru sani di den ben poti gi wagi. Ala ten te wan loko ben e pasa na ini a foto na neti, mi nanga wan tu mati fu mi ben go tapu a loko èn wi ben fufuru ala san wi ben man feni drape. Kibrikibri, mi ben e tyari dyamanti, gowtu, nanga bronsu komoto fu a kondre. Mi ben bigin gebroiki drugs, mi ben e du ogri, èn mi ben hori nanga furu man.
Dan na ini 1993, den kisi mi èn mi lasi mi wroko. Den mati fu mi gowe libi mi, fu di den ben frede taki sma ben o kisi den tu. A sani disi di den du, ben hati mi trutru, èn mi no ben e frutrow nowan sma moro.
A FASI FA BIJBEL KENKI MI LIBI: Na ini 1994, mi miti Tim nanga Virginia, tu Kotoigi fu Yehovah di ben de zendeling. Den ben taki nanga mi na a presi pe mi ben e wroko na a ten dati, èn na a ten te mi ben abi pauze den ben yepi mi fu leri moro fu Bijbel. Bakaten, di mi ben si taki mi ben kan frutrow den, mi meki den kon na mi oso fu studeri nanga mi.
Heri esi mi kon frustan taki efu mi wani plisi Gado, dan mi ben o abi fu tyari kenki kon na a fasi fa mi ben e libi. Fu eksempre, mi leri fu 1 Korentesma 6:9, 10, taki „sma di e huru, . . . fufuruman, gridiman, drunguman, sma di e kosi trawan, nanga bedrigiman no sa kisi a kownukondre fu Gado”. Safrisafri, mi tapu nanga den takru gwenti fu mi. Mi no ben e fufuru moro. Mi no ben bemui moro nanga den ogrisma di mi gro kon nanga den. Èn Yehovah gi mi a krakti fu no hori moro nanga den man di mi ben abi.
DEN WINI DI MI KISI: Mi ben du furu muiti fu hori misrefi taki mi no e atibron esi èn fu no bari mi pikin moro te wan sani no e go bun (Efeisesma 4:31). Mi e pruberi fu taki na wan switi fasi. Te mi e taki na a fasi disi, dan sani e go bun èn wi e kon kisi wan moro bun matifasi na ini na osofamiri.
Den mati di mi ben abi fosi, èn sosrefi den birtisma fu mi, kon si taki den kan frutrow mi. Mi kon tron wan sma di no e bedrigi trawan, mi no e fufuru sani na wrokope moro èn mi e sorgu taki mi e seti ala den moni afersi bun. Na so fasi mi man sorgu gi misrefi, aladi mi e teki mi ten now fu yepi trawan fu kon sabi moro fu Bijbel. Nanga mi heri ati mi e agri nanga den wortu disi di skrifi na ini Odo 10:22: „Na den blesi fu Yehovah e meki sma kon gudu, èn a no e meki wi firi sari.”
NEN: GLORIA ELIZARRARÁS DE CHOPERENA
YARI: 37
KONDRE: MEKSIKOW
A BEN DE WAN SMA DI BEN PRUBERI FU KIRI ENSREFI
A LIBI FU MI FOSI: Mi gro kon bigi na ini a gudu birti Naucalpan, na Meksikow City. Sensi di mi ben yongu, mi no ben gi yesi na sma èn mi ben lobi fu go na fesa. Mi bigin smoko di mi ben abi 12 yari, mi bigin dringi sopi di mi ben abi 14 yari, èn mi bigin gebroiki drugs di mi ben abi 16 yari. Wan tu yari baka dati, mi gowe libi oso. Furu fu den mati fu mi ben gro kon bigi na ini osofamiri di ben lai problema, fu di den ben kisi hebi fonfon noso den bigisma fu den ben kosi den. Mi no ben abi nowan howpu na ini a libi èn fu dati ede mi pruberi fu kiri misrefi tu leisi.
Di mi ben abi 19 yari, mi bigin waka na ini show fu sori sma moi krosi di den kan bai. Na so fasi, mi bigin bemui nanga sma na ini politiek èn sma di ben orga show noso tra prisiri sani. Te fu kaba, mi trow, èn mi meki pikin, ma na mi wawan ben e teki ala bosroiti na ini na osofamiri. Mi ben tan smoko èn dringi sopi, èn mi ben gwenti fu go meki prisiri nanga mi mati. Mi ben lobi fu taki dotitaki èn fu fruteri morsu lafutori. Mi ben atibron esi-esi.
Furu fu den sma di mi ben waka nanga den, ben e libi na a srefi fasi tu. Gi den, a ben gersi leki mi ben abi ala sani di de fanowdu na ini a libi. Ma toku mi ben firi taki mi no ben de koloku.
A FASI FA BIJBEL KENKI MI LIBI: Na ini 1998, mi bigin studeri Bijbel nanga Yehovah Kotoigi. Mi leri fu Bijbel taki a libi abi wan marki. Mi kon sabi taki Yehovah Gado o meki grontapu kon tron wan Paradijs baka, taki a o gi den dedewan wan opobaka, èn taki mi abi na okasi fu libi drape tu.
Mi kon sabi tu taki a fasi fa mi kan sori taki mi lobi Gado, na te mi e gi yesi na en (1 Yohanes 5:3). Na a bigin, a sani disi ben muilek gi mi fu du, fu di noiti mi ben gi yesi na sma. Ma te fu kaba, mi kon frustan taki mi no man tan libi soleki fa mi wani (Yeremia 10:23). Mi begi Yehovah fu tiri mi. Mi aksi en fu yepi mi libi soleki fa a wani, èn fu leri den pikin fu mi fu libi tra fasi leki fa mi ben e libi fosi.
A ben muilek srefisrefi gi mi fu tyari kenki kon na ini mi libi, ma mi bigin du san skrifi na ini Efeisesma 4:22-24: „Un musu kenki a fasi fa unu ben de fosi; dati na a fasi fa unu ben gwenti tyari unsrefi, . . . un musu tron wan nyun sma di de soleki fa Gado wani, nanga trutru regtfardikifasi èn loyaalfasi.” Fu tron wan nyun sma, ben wani taki gi mi dati mi ben musu tapu nanga den takru gwenti fu mi, soleki fu tapu nanga smoko, èn fu leri fu no taki dotitaki moro. A teki pikinmoro dri yari fu tyari kenki kon na ini mi libi, so taki mi ben kan teki dopu leki wan Kotoigi fu Yehovah.
Boiti dati, mi bigin si a frantwortu fu mi leki wan wefi nanga mama, leki wan seryusu sani. Mi bigin du san skrifi na ini 1 Petrus 3:1, 2: „Un uma, na so un musu saka unsrefi tu na ondro un eigi masra, so taki te sonwan fu den no e du san a wortu e taki, dan unu kan wini den sondro wortu nanga yepi fu a fasi fa unu e tyari unsrefi, bika den si nanga den eigi ai fa unu e tyari unsrefi na wan krin fasi èn nanga bigi lespeki.”
DEN WINI DI MI KISI: Mi de Yehovah tangi trutru, fu di mi sabi now taki wan reide de fu san ede wi de na libi. Mi si taki mi de wan moro bun sma now èn mi man kweki den pikin fu mi na wan bun fasi. Son leisi, mi ati e krutu mi fu den sani di mi ben du fosi, ma Yehovah sabi san de na ini mi ati (1 Yohanes 3:19, 20). A no de fu taki dati mi kisi kibri èn mi kon abi wan korostu firi fu di mi e libi soleki fa Bijbel e taki.
NEN: JAILSON CORREA DE OLIVEIRA
YARI: 33
KONDRE: BRASYONKONDRE
A BEN DE WAN SMA DI BEN E DRINGI SOPI ÈN GEBROIKI DRUGS
A LIBI FU MI FOSI: Mi gebore na ini Bagé, wan foto na ini Brasyonkondre pe sowan 100.000 sma e libi krosibei fu a lanki na Urugwei. Furu fu den sma drape e prani sani èn den e kweki meti. Mi gro kon bigi na ini wan pôti distrikt pe grupu ogri-ati yonguwan ben e du ogri, èn pe yonguwan ben gwenti fu dringi sopi pasa marki èn gebroiki drugs.
Baka di mi klari skoro, mi bigin dringi sopi, smoko marwana, èn mi ben e arki hebi rock poku. Mi no ben bribi na ini Gado. Mi ben feni taki ala a pina nanga a bruya na grontapu ben sori taki Gado no de.
Mi ben e plèi gitara, mi ben e skrifi poku, èn nofo tron den sani di mi ben skrifi na ini den poku mi ben teki puru fu a Bijbel buku Openbaring. A grupu pe mi ben plèi poku no ben kon pôpi soleki fa mi ben fruwakti, èn fu dati ede mi bigin gebroiki moro hebi drugs. Mi no ben broko mi ede taki mi kan dede efu mi ben gebroiki tumusi furu drugs. Furu fu den pokuman di mi ben si leki mi gado, dede fu di den ben gebroiki tumusi furu drugs.
Mi no ben man tan sondro fu gebroiki drugs, èn te mi ben abi moni fanowdu fu bai drugs, dan mi ben leni moni na mi granmama di ben kweki mi. Mi ben e lei te a ben aksi mi san mi o du nanga a moni. Èn san ben de moro ogri, na taki mi bigin du afkodrei. Mi ben go dipi na ini sani di abi fu du nanga afkodrei, fu di mi ben denki taki dati ben o yepi mi fu skrifi moro bun poku.
A FASI FA BIJBEL KENKI MI LIBI: Di mi bigin studeri Bijbel èn di mi bigin go na den konmakandra fu Yehovah Kotoigi, mi bigin kenki a fasi fa mi ben e denki fu sani. Safrisafri mi ben kon kisi na angri fu libi èn fu de koloku. Fu di mi ben denki tra fasi now, meki mi bosroiti fu koti mi langa wiwiri. Mi ben meki a gro kon langa fu sori taki mi no ben de tevrede nanga a fasi fa sani ben e waka na ini a libi, èn fu sori taki mi ben e opo mi srefi teige ala sma. Mi kon frustan taki efu mi wani taki Gado feni mi bun, dan mi ben musu tapu fu dringi sopi pasa marki, mi no ben musu gebroiki drugs moro, èn mi ben musu tapu nanga smoko. Mi ben kon si tu taki mi no ben musu arki den poku di mi ben gwenti arki.
A fosi leisi di mi go na wan konmakandra fu Yehovah Kotoigi, mi ben si wan Bijbeltekst di ben de na wan fu den skotu. A ben de a tekst fu Odo 3:5, 6, di e taki: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti.” Di mi prakseri fu a tekst dati, dan mi kisi a dyaranti taki Yehovah o yepi mi fu kenki mi libi efu mi e gi en na okasi fu du dati.
Ma toku, a ben tranga gi mi fu kenki a fasi fa mi ben e libi furu yari kaba, èn fu tapu nanga den takru gwenti fu mi. A ben de so tranga gi mi neleki te mi ben o abi fu koti mi eigi anu puru (Mateyus 18:8, 9). Mi ben sabi taki a no ben o yepi, efu mi ben o pruberi fu tyari den kenki disi kon safrisafri. Fu dati ede, mi tapu wantewante nanga den takru gwenti fu mi. Boiti dati, mi no ben go na presi noso mi ben pruberi fu no miti sma di ben kan meki taki mi fadon go baka na ini a libi dati.
Mi ben si taki a moro bun fu prisiri te mi ben du wan bun sani ibri dei, leki fu sidon prakseri den momenti te mi ben du wan sani di meki mi lasi-ati. Mi ben kon frustan taki te mi skin no ben o doti moro, èn te mi ben o tyari misrefi na wan bun fasi, dan dati ben o meki taki Yehovah feni mi bun. A sani disi na wan grani gi mi. Mi begi Yehovah fu yepi mi, èn a gi mi a krakti fu no prakseri a fasi fa mi ben e libi fosi, ma fu prakseri a ten di de na mi fesi. Son leisi mi ben fadon go baka na ini den owru gwenti fu mi. Ma toku, te a sma di ben e studeri nanga mi ben kon, mi ben de nomonomo fu studeri, aladi mi no ben firi bun fu di mi ben dringi tumusi furu sopi a dei na fesi.
Mi ben leri den tru tori fu Bijbel di abi fu du nanga Gado, soleki tori di e sori taki Gado e broko en ede nanga ibriwan fu wi, taki a sa pori falsi bribi, èn taki a e horibaka gi a preikiwroko di e du na heri grontapu. Mi ben frustan ala den sani disi bun (Mateyus 7:21-23; 24:14; 1 Petrus 5:6, 7). Te fu kaba, mi bosroiti fu gi mi libi abra na Gado. Mi ben wani sori en taki mi de nanga tangi gi ala den sani di a du gi mi.
DEN WINI DI MI KISI: Now mi e feni taki mi sabi fu san ede mi de na libi èn taki mi libi abi wan marki (Preikiman 12:13). Na presi fu de leki wan hebi gi mi famiri, mi ben man yepi den. Mi fruteri mi granmama den bun sani di mi leri fu Bijbel, èn now a gi ensrefi abra na Yehovah. Wan tu tra sma fu mi famiri èn wan fu den sma nanga suma mi ben prei poku, gi densrefi abra na Yehovah tu.
Now mi trow, èn mi nanga mi wefi e gebroiki furu fu wi ten fu yepi trawan fu kon sabi moro fu Bijbel. Mi kisi furu blesi fu di mi leri fu ’frutrow tapu Yehovah nanga mi heri ati’.
[Prenspari pisi na tapu bladzijde 28]
„Safrisafri mi ben kon kisi na angri fu libi èn fu de koloku”