Suma musu gi pikin leri fu Gado?
„Wan disipel no bigi moro en leriman, ma ibri sma di kisi trutru bun leri o de leki en leriman.”—LUKAS 6:40.
SON papa nanga mama feni taki den no abi a koni fu gi den pikin fu den leri fu Gado. Kande den feni taki den no kisi nofo skoroleri, noso taki den no sabi nofo fu a bribi fu den fu man gi bun leri. Dati meki son leisi den e libi a tumusi prenspari frantwortu disi gi wan famiriman, noso gi wan kerki fesiman.
Ma suma na trutru a moro bun sma di kan leri pikin den tru tori fu Gado nanga den gronprakseri di e sori den fa den musu tyari densrefi? Luku san Bijbel e taki fu a tori disi èn teki den sani dati gersi nanga den sani di ondrosukuman kon si.
San na a frantwortu fu wan papa?
Bijbel e taki: „P’pa, un no mus du sani di e gi den pikin atibron. Ma te un e kweki den, un mus leri den fu du san Masra wani, èn un mus warskow den leki fa A wani.”—Efeisesma 6:4, „Nyun Testamenti.”
San ondrosukuman kon si: Fa papa e kisi wini te den e kon abi wan tranga bribi na ini Gado? Wan artikel di tyari kon na doro na ini 2009, ben taki: „Te mansma abi demakandra nanga tra sma di abi a srefi bribi leki den, dan dati kan yepi den fu tron moro bun papa. Kerki e meki taki sma kisi yepi fu trawan, den e kisi deki-ati fu tyari kenki kon na ini den libi, èn den e kisi leri nanga rai di e sori den fa den musu libi” (Fathers’ Religious Involvement and Early Childhood Behavior).
Bijbel e sori taki a prenspari srefisrefi taki wan papa e tyari a frantwortu di a abi fu kweki den pikin fu en èn fu gi den leri (Odo 4:1; Kolosesma 3:21; Hebrewsma 12:9). Ma a rai dati fiti na ini a ten disi? Na ini 2009, na Universiteit fu Florida, tyari wan artikel kon na doro di ben taki fu a krakti di papa abi tapu den pikin fu den. Den ondrosukuman kon si taki te pikin ben abi wan papa di yepi fu kweki den, dan a ben moro makriki gi den pikin dati fu firi gi trawan èn fu denki bun fu densrefi. A no de fu taki dati a rai fu Bijbel e fiti ete na ini a ten disi.
O prenspari a frantwortu fu wan mama de?
Bijbel e taki: „No drai baka gi a wèt fu yu mama.”—Odo 1:8.
San ondrosukuman kon si: Na ini 2006, wan buku ben taki dati te yu luku en bun, dan a ten di mama e gebroiki fu taki nanga den yongu pikin fu den, furu omeni tron moro a ten di papa e gebroiki fu du dati. Na so a de na ini furu kondre (Handbook of Child Psychology). Fu di wan mama e meki so furu ten gi den pikin fu en, meki den sani di a e taki, den sani di a e du, èn a denki fu en, abi furu krakti tapu a fasi fa a pikin e gro kon bigi.
Te wan papa nanga wan mama e wroko makandra fu leri den pikin fu den den tru tori fu Gado, dan den e gi den awansi tu moi kado. A fosiwan, na taki den pikin e kisi na okasi fu kon abi wan matifasi nanga den hemel Tata, èn den kan kisi wini fu a matifasi dati den heri libi langa. A di fu tu sani, na taki den pikin e kisi wini fu na eksempre fu den papa nanga mama, fu di den e leri fa wan masra nanga en wefi musu wroko makandra fu doro prenspari marki (Kolosesma 3:18-20). Aladi tra sma kan yepi wan papa nanga mama, toku na a papa nanga mama abi a frantwortu fu gi den pikin fu den leri fu Gado èn fu sori den fa Gado wani taki sani musu waka na ini wan osofamiri.
Ma fa papa nanga mama musu gi den pikin fu den leri? San na den moro bun fasi fa den kan du dati?