O ten a feti fu Armagedon o kon?

„Mi si wan bigi ipi sma di nowan sma ben man teri. Den ben komoto fu ala kondre, lo, pipel, nanga tongo. . . . Den wan disi na den sma di komoto na ini a bigi banawtu.”​—OPENBARING 7:9, 14.

A TEN lepi kaba gi a feti fu Armagedon. Fa so?

Na heri grontapu wan grupu sma de kaba di e anbegi Yehovah èn di e hori densrefi na den hei markitiki fu Bijbel. Gado e meki taki den e kon na wán leki brada nanga sisa di de na ini wánfasi èn di e sori lobi gi makandra. Den sma disi na Yehovah Kotoigi.​—Yohanes 13:35.

Heri esi Satan o tyari den legre fu en kon na wán, fu bigin a moro bigi feti fu en. A o bigin feti nanga den sma disi di soleki fa a gersi, no abi wan yepiman (Esekièl 38:8-12; Openbaring 16:13, 14, 16). Fu san ede wi kan bribi dati? Bijbel e taki finifini fu sani di e yepi wi fu kon sabi o ten a feti fu Armagedon o bigin. Furu fu den sani dati e kon tru nownow kaba.

Sani di e kon tru nownow kaba

Den disipel fu Yesus ben aksi en fa sma ben o sabi o ten „a kaba fu a grontapu disi” ben o kon (Mateyus 24:3). Yesus ben poti prakseri na wan ten di ben musu kon ete, fu di a taki dati „a wan pipel o go feti nanga a tra pipel, èn a wan kownukondre o go feti nanga a tra kownukondre. Angriten nanga gronseki o de na difrenti presi.” Baka dati a taki: „Ala den sani disi na a bigin fu wan ten fu banawtu di de leki a hebi pen fu wan uma di de fu meki en pikin” (Mateyus 24:7, 8). Na apostel Paulus ben kari a srefi pisi ten disi „den lasti dei” èn a taki dati den dei dati ben o „tranga fu pasa” (2 Timoteyus 3:1). Yu feni taki den tori disi abi fu du nanga sani di e pasa na ini a ten disi?

Fu san ede a pisi ten disi ben o tranga fu pasa? Na apostel Yohanes e taigi wi fu san ede. A ben taki fu wan ’syatu pisi ten’ te Satan nanga den ogri yeye fu en ben o man du ogri soso na grontapu. Bijbel e taki dati Satan o abi „bigi atibron” na a ten dati (Openbaring 12:7-12). Yu no si fa sma na ini a ten disi lobi kisi atibron èn fa den lobi du ogri nanga trawan? Yu no si taki a sani disi no de na wán presi nomo, ma na heri grontapu?

Yesus ben taki tu dati na a tranga ten dati, sma ben o du wan heri moi wroko. A ben taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). Na ini a ten disi, Yehovah Kotoigi e preiki a bun nyunsu fu Gado Kownukondre na ini moro leki 235 kondre èn na ini moro leki 500 tongo. Den tu tijdschrift fu den, A Waktitoren nanga Ontwaakt! di e taki fu Bijbel tori, e prati moro leki iniwan tra tijdschrift na heri grontapu. Boiti dati, den Kotoigi vertaal a Bijbel na ini sowan 100 tongo. Den no e kisi pai gi a wroko di den e du èn na a moni di sma e gi fu densrefi e pai gi den kostu fu a wroko dati. Yu denki taki a moi preikiwroko disi na wan kontru fu a profeititori fu Yesus?

Bijbel e taki sosrefi sortu sani o meki taki Yehovah Gado o bigin feti nanga den wan di e gens en. Luku dri fu den profeititori dati di o kon tru.

Sani di o pasa heri esi

Profeititori 1. Bijbel e taki dati den pipel fu grontapu o meki a prenspari boskopu bekènti taki ’freide de èn taki ala sani e waka bun’. Kande den o prakseri taki pikinmoro den lusu den moro bigi problema di de. Ma den sani di o pasa baka dati o sori krin taki freide no de kwetikweti.​—1 Tesalonikasma 5:1-3.

Profeititori 2. Baka dati, difrenti tirimakti o opo densrefi teige den kerki fu grontapu. Na ini Bijbel, wan ogri meti e prenki den tirimakti disi, èn wan uma di e sidon na tapu a meti disi e prenki den falsi bribi fu grontapu (Openbaring 17:3, 15-18). Sondro fu a meti disi sabi, a o du san Gado wani. Iya, a o pori kerki di e du neleki den e teki presi gi Gado.

Na apostel Yohanes e agersi a sani di o pasa na a fasi disi: „Den tin tutu di yu si nanga na ogri meti, o abi bita-ati gi a huru-uma. Na wan ogri-ati fasi, den o teki ala san a abi èn den o libi en sososkin. Dan den o nyan a meti fu en skin èn den o bron en nanga faya. Noti no o tan abra fu en, bika na Gado meki den du san en ben abi na prakseri.”​—Openbaring 17:16, 17.

Profeititori 3. Baka te na ogri meti puru falsi bribi na pasi, a o gi den pipel fu grontapu deki-ati fu go feti nanga den wan di e anbegi Yehovah Gado.​—Openbaring 7:14; Mateyus 24:21.

San o pasa nanga yu?

Efu yu no ben abi na okasi fu studeri Bijbel finifini, dan kande yu sa feni en muilek fu bribi taki den sani di skrifi na ini na artikel disi o pasa trutru. Ma wi kan abi a frutrow taki ala sani o kon tru finifini èn taki den sani disi o pasa heri esi. Den someni Bijbel profeititori di kon tru kaba e gi wi a dyaranti dati.a

Fu san ede yu no e meki ten fu ondrosuku Bijbel? Te yu du dati, dan yu o kon sabi fu san ede Yehovah Kotoigi e bribi taki „a feti na a bigi dei fu Gado na Almaktiwan” de krosibei èn fu san ede yu no abi fu frede a dei dati. Meki Yehovah Kotoigi sori yu nanga yepi fu Bijbel san yu kan du fu de wan fu den sma di e kisi kibri fu Yehovah Gado (Openbaring 16:14). Den sani di yu o kon sabi kan yepi yu fu denki tra fasi fu a ten di e kon.

[Futuwortu]

[Prenspari pisi na tapu bladzijde 8]

Yu denki taki a wroko di Yehovah Kotoigi e du na wan kontru fu Bijbel profeititori?