Gado Kownukondre e tiri nownow kaba!

1. Fu san wi kan de seiker èn fu san ede?

TE YU e luku ala den problema di de na grontapu, dan a muilek gi yu fu bribi taki moro bun ten e kon? Famiriman no e sori lobi gi makandra moro leki fosi. Sma e kon ogri moro nanga moro èn den e denki densrefi nomo. Èn furu sma e feni en muilek fu frutrow sma di abi makti. Ma te wi e si den sani disi, dan wi kan de seiker taki wan moro bun ten e kon. Fu san ede? Fu di sma e tyari densrefi soifri soleki fa wan prenspari profeititori e sori di abi fu du nanga „den lasti dei” (2 Tim. 3:1-5). Ala sma di eerlijk o taki dati a profeititori disi e kon tru na ini a ten disi. Èn fu di a profeititori disi e kon tru, meki wi kan de seiker taki Krestes Yesus bigin tiri kaba leki Kownu fu Gado Kownukondre. Ma disi a no a wan-enkri profeititori di abi fu du nanga Gado Kownukondre. Wi o go luku wan tu tra profeititori di kon tru na ini den yari di pasa di o tranga a bribi fu wi.

2. San wi o luku na ini na artikel disi èn fu san ede? (Luku a fowtow na tapu a kafti.)

² Na ini na artikel disi wi o luku (1) wan profeititori di e yepi wi fu frustan o ten Gado Kownukondre bigin tiri, (2) profeititori di o yepi wi fu kon frustan taki Yesus tron Kownu fu Gado Kownukondre na hemel èn (3) profeititori di o tyari kon na krin fa den feanti fu Gado Kownukondre o kisi pori. Wi o si taki den profeititori disi e fiti na makandra neleki fa pisi fu wan puzzel e fiti na makandra. Den pisi disi e sori wi krin taki heri esi a kaba o kon soleki fa Yehovah pramisi.

FA WI DU SABI O TEN GADO KOWNUKONDRE BIGIN TIRI

3. Sortu dyaranti a profeititori di skrifi na ini Danièl 7:13, 14 e gi wi?

³ A profeititori di skrifi na ini Danièl 7:13, 14 e gi wi dyaranti taki Krestes Yesus o de a moro bun Tiriman fu Gado Kownukondre. Sma fu ala kondre o dini en nanga prisiri èn nowan sma o teki a tirimakti fu en abra. Wan tra profeititori na ini a buku Danièl e fruteri wi taki Yesus ben o bigin tiri na a kaba fu seibi pisi ten. Wi o man kon sabi o ten Yesus tron Kownu?

4. Fruteri fa Danièl 4:10-17 yepi wi fu kon sabi na ini sortu yari Krestes ben o tron Kownu. (Luku a futuwortu.)

⁴ Leisi Danièl 4:10-17. Den „seibi pisi ten” e prenki 2520 yari. A pisi ten dati bigin na ini 607 Fosi Krestes di den Babilonsma puru a lasti kownu di ben sidon tapu a kownusturu fu Yehovah na Yerusalem. Èn a kon na wan kaba na ini 1914 Baka Krestes di Yehovah poti Yesus Krestes leki Kownu fu Gado Kownukondre fu di en na „a wan di abi a reti fu kisi en”.b​—Esek. 21:25-27.

5. Fa a profeititori fu den „seibi pisi ten” e yepi wi?

⁵ Fa a profeititori disi e yepi wi? Efu wi e frustan a profeititori fu den „seibi pisi ten”, dan dati e gi wi a dyaranti taki Yehovah o meki den pramisi fu en kon tru na a reti ten. Neleki fa a ben poti wan ten taki a Kownukondre fu en ben o bigin tiri na so a o sorgu taki ala den tra profeititori o kon tru na a ten di a poti. Iya, a dei fu Yehovah „no o kon lati”!​—Hab. 2:3.

FA WI DU SABI TAKI KRESTES TRON KOWNU FU GADO KOWNUKONDRE

6. (a) Fa den sani di wi e si e pasa na grontapu now e sori taki Yesus tron Kownu na ini hemel? (b) Fa Openbaring 6:2-8 e sori krin taki Yesus bigin tiri?

⁶ Na a kaba fu Yesus en diniwroko dyaso na grontapu a fruteri san na wan tu sani di ben o pasa na grontapu. Den sani disi ben o yepi den bakaman fu en fu sabi o ten a ben o bigin tiri na hemel. Wan tu sani di a ben taki na taki feti ben o de, angriten nanga gronseki. A ben taigi den tu taki takru siki di e kiri ipi-ipi sma ben o de „na ini a wan presi baka a trawan”. A COVID-19 pandemie na wan eksempre fu dati. Den sani disi na wan tu fu den sani di Bijbel e kari „a marki” di e sori taki Krestes bigin tiri (Mat. 24:3, 7; Luk. 21:7, 10, 11). Moro leki 60 yari baka di Yesus dede èn di a opo go na hemel a fruteri na apostel Yohanes moro sani di e sori taki den sani disi ben o pasa trutru. (Leisi Openbaring 6:2-8.) Ala den sani disi e sori taki Yesus bigin tiri leki Kownu na ini 1914.

7. Fu san ede a situwâsi na grontapu kon moro ogri baka di Yesus tron Kownu?

⁷ Fu san ede a situwâsi na grontapu kon moro ogri baka di Yesus tron Kownu? Openbaring 6:2 e fruteri wi wan prenspari sani. A e sori taki a fosi sani di Yesus du di a tron Kownu fu Gado Kownukondre na taki a ben musu feti wan feti. Nanga suma a go feti? Nanga Didibri nanga den ogri yeye fu en. Soleki fa Openbaring kapitel 12 e sori, dan Satan lasi a feti èn den fringi en nanga den ogri yeye kon na grontapu. A bakapisi na taki Satan puru atibron na libisma tapu. Dati meki Bijbel e taki „helu fu grontapu”.​—Openb. 12:7-12.

8. Te wi e si fa den Bijbel profeititori e kon tru, dan fa dati e yepi wi?

⁸ Fa den profeititori disi kan yepi wi? A fasi fa sani de na grontapu now èn a fasi fa sma e tyari densrefi e yepi wi fu kon frustan taki Yesus tron Kownu. Sobun na presi fu atibron te wi e si taki sma e denki densrefi nomo èn e du ogri ati sani nanga trawan, wi musu hori na prakseri taki a fasi fa den e tyari densrefi e meki Bijbel profeititori kon tru. A Kownukondre e tiri nownow kaba! (Ps. 37:1) Èn wi kan fruwakti taki sani o kon moro ogri na grontapu o moro Armagedon e kon krosibei (Mark. 13:8; 2 Tim. 3:13). Yu no de nanga tangi taki wi lobi-ati Papa e yepi wi fu kon frustan fu san ede so furu problema de na grontapu?

FA DEN FEANTI FU GADO KOWNUKONDRE O KISI PORI

9. San a profeititori na ini Danièl 2:28, 31-35 e taki fu a lasti grontapumakti, èn o ten a bigin tiri?

⁹ Leisi Danièl 2:28, 31-35. Wi e si taki a profeititori disi e kon tru na ini a ten disi. A dren di Nebukadnesar kisi ben sori san ben o pasa na ini „den lasti dei” baka te Krestes ben o bigin tiri. Den platafutu di meki fu „isri nanga klèidoti” e prenki a lasti grontapumakti di kari na ini Bijbel, di de wan fu den feanti fu Yesus na grontapu. A grontapumakti disi e tiri kaba. A bigin tiri na a ten fu a Fosi Grontapufeti di Ingrisikondre nanga Amerkankondre bigin wroko nanga makandra. A popki di Nebukadnesar si na ini a dren fu en e sori tu sani di e meki taki a grontapumakti disi ben e difrenti fu den wan di kon na en fesi.

10. (a) Fa a profeititori fu Danièl e sori taki den platafutu e prenki a grontapumakti fu Ingrisikondre nanga Amerkankondre? (b) Nanga san wi musu luku bun? (Luku a faki „Luku bun nanga a klèidoti!”)

¹⁰ A fosi sani, na taki den platafutu di e prenki a grontapumakti fu Ingrisikondre nanga Amerkankondre no meki fu wán sani nomo soleki gowtu noso solfru, ma a meki fu isri di moksi nanga klèidoti. A klèidoti e prenki „ala sortu pipel” noso den borgu fu a kondre (Dan. 2:43). A de krin fu si taki den borgu fu den kondre na ini a ten disi e feti fu kisi moro reti na lanti èn na den wrokope. Èn den e go na strati fu protesteer. A sani disi e meki en muilek gi a grontapumakti fu Ingrisikondre nanga Amerkankondre fu doro den marki di den poti.

11. Fu san ede wi kan abi a frutrow taki wi e libi na ini den lasti dei?

¹¹ A di fu tu sani, na taki den platafutu di e prenki a grontapumakti fu Ingrisikondre nanga Amerkankondre na a lasti grontapumakti di Bijbel e taki fu en. Nowan tra libisma regering o kon baka en. Na presi fu dati Gado Kownukondre o pori en nanga ala tra libisma regering na ini a feti na Armagedon.c​—Openb. 16:13, 14, 16; 19:19, 20.

12. Na sortu tra fasi a profeititori fu Danièl e gi wi howpu nanga trowstu?

¹² Fa a profeititori disi e yepi wi? A profeititori fu Danièl e sori wi tra krin buweisi taki wi e libi na ini a ten fu a kaba. Moro leki 2500 yari pasa, Danièl ben taki na fesi taki baka Babilon ete fo grontapumakti ben o abi krakti tapu a pipel fu Gado. Boiti dati a ben sori taki a grontapumakti fu Ingrisikondre nanga Amerkankondre ben o de a lasti grontapumakti. Disi e gi wi trowstu nanga howpu taki heri esi Gado Kownukondre o pori ala libisma regering èn taki a o tiri heri grontapu.​—Dan. 2:44.

13. San „a di fu aiti kownu” nanga den „tin kownu” di kari na ini Openbaring 17:9-12 e prenki, èn fa a profeititori disi kon tru?

¹³ Leisi Openbaring 17:9-12. Fu di a Fosi Grontapufeti tyari furu pori kon, meki wan tra profeititori kon tru di abi fu du nanga den lasti dei. Den tiriman fu grontapu ben wani taki freide de na heri grontapu. Dati meki na ini yanuari 1920 den seti a Volkenbond. Ma na ini oktober 1945 den Verenigde Naties kon na ini a presi fu en. Na organisâsi disi Bijbel e kari „a di fu aiti kownu”. Ma a no wan grontapumakti. A abi makti fu di den regering e horibaka gi en. Bijbel e kari den regering disi „tin kownu”.

14-15. (a) San Openbaring 17:3-5 e tyari kon na krin fu Babilon a Bigiwan? (b) San den sma di e horibaka gi den falsi kerki e du?

¹⁴ Leisi Openbaring 17:3-5. Na apostel Yohanes ben kisi wan fisyun fu Gado pe a si wan huru-uma di nen „Babilon a Bigiwan”. A huru-uma disi na ala falsi kerki na heri grontapu. Fa a fisyun disi kon tru? Langa ten kaba den falsi kerki e wroko makandra nanga den regering fu grontapu èn den e horibaka gi den. Ma heri esi Yehovah o poti en na ini na ati fu den tiriman fu den regering disi fu „du san en ben abi na prakseri”. San o de a bakapisi? Den regering di e prenki den „tin kownu” o feti nanga den falsi kerki disi èn den o pori den.​—Openb. 17:1, 2, 16, 17.

¹⁵ Fa wi du sabi taki Babilon a Bigiwan o kisi pori heri esi? Fu kisi piki tapu na aksi dati wi musu memre taki a bigi Eufraat-liba ben kibri na owruten foto fu Babilon. A buku Openbaring e agersi den milyunmilyun sma di e horibaka gi Babilon nanga „liba” di e kibri en (Openb. 17:15). Ma a e tyari kon na krin tu taki den liba ben o „kon drei”. Disi e sori taki furu sma no ben o horibaka moro gi Babilon a Bigiwan (Openb. 16:12). A profeititori disi e kon tru na ini a ten disi fu di furu sma e gowe libi den falsi kerki èn den e go na tra presi fu feni lusu gi den problema fu den.

16. Now di wi sabi taki den Verenigde Naties seti èn taki Babilon a Bigiwan o kisi pori, dan fa dati e yepi wi?

¹⁶ Fa den profeititori disi e yepi wi? Fu di den Verenigde Naties seti kaba èn fu di sma e gowe libi den falsi kerki, meki wi man si krin taki wi e libi na ini a ten fu a kaba. Aladi furu sma no e horibaka moro gi den falsi kerki, toku a no dati o meki taki den falsi kerki no o de moro. Ma soleki fa wi si kaba, na Yehovah o poti en na ini na ati fu den „tin kownu”, di e prenki den regering di e horibaka gi den Verenigde Naties, fu ’du san a abi na prakseri’. Den kondre dati o pori Babilon a Bigiwan wantronso èn grontapu o skrekid (Openb. 18:8-10). A pori disi o tyari furu bruya nanga problema kon na grontapu. Ma wi kan taki fu tu sani di o meki a pipel fu Gado de nanga prisiri. Den falsi kerki di de wan feanti fu Gado wan heri pisi ten kaba o kisi pori fu têgo èn heri esi wi o kisi frulusu fu na ogri grontapu disi!​—Luk. 21:28.

YU KAN BRIBI TAKI YEHOVAH O KIBRI A PIPEL FU EN NA INI A TEN DI E KON

17-18. (a) San wi kan du fu kan abi wan tranga bribi? (b) San wi o luku na ini a tra artikel?

¹⁷ Danièl ben taki na fesi taki sma ben o „kon sabi bun furu tru tori” èn na dati pasa tu. Fu di now wi e frustan den profeititori di abi fu du nanga a ten fu wi (Dan. 12:4, 9, 10). Fu di den profeititori e kon tru soifri soleki fa Bijbel ben taki na fesi, meki wi e kisi moro lespeki gi Yehovah nanga en Wortu (Yes. 46:10; 55:11). Sobun meki wi tan studeri Bijbel fayafaya fu tranga a bribi fu wi èn meki wi yepi trawan fu abi wan bun matifasi nanga Yehovah. Yehovah o kibri ala den wan di e frutrow na en tapu èn a o „meki sani waka bun gi den”.​—Yes. 26:3.

¹⁸ Na ini a tra artikel wi o poti prakseri na den profeititori di abi fu du nanga a Kresten gemeente na ini a ten fu a kaba. Soleki fa wi o si, dan den profeititori disi o sori wi krin taki wi e libi na ini a ten fu a kaba. Èn wi o si moro buweisi taki Yesus di de wi Kownu e tiri den getrow futuboi fu en na ini a ten disi.