Aksi fu leisiman
A de so taki den sani di Yesus taki na Mateyus 19:10-12 e sori taki Gado du wan wondru fu meki son sma tan sondro fu trow?
Luku san pasa, fosi Yesus taki skrifi na ini den tekst disi. Di den Fariseiman kon na en fu taki fu brokotrow, Yesus sori den krin fa Yehovah e si a trowlibi. A Wèt ben sori taki efu wan uma ben „du wan sani di no fiti”, en masra ben kan broko a trow èn a ben musu skrifi dati na tapu papira (Deut. 24:1, 2). Ma disi no ben de so na ini a bigin. Yesus taki: „Efu wan man broko trow nanga en wefi, ma a wefi no du hurudu èn a man trow nanga wan tra uma, dan a du sutadu.”—Mat. 19:3-9.
Di den disipel yere disi, den taki: „Efu dati de so gi wan man nanga en wefi, dan a no de wan koni sani fu trow.” Yesus piki den: „A no ala sma kan du san unu taki didyonsro. Wan sma man du dati, soso te Gado e gi en na okasi. Son sma no trow, fu di den gebore nanga wan mankeri na den syenpresi. Trawan no trow, fu di sma gi den mankeri na den syenpresi. Ma yu abi tra sma di no trow, fu di den wani du moro gi a Kownukondre fu hemel. Efu wan sma kan tan sondro fu trow, dan meki a du so.”—Mat. 19:10-12.
Sobun, son sma no ben trow fu di den gebore nanga wan mankeri na den syenpresi noso fu di sma gi den mankeri na den syenpresi. Yu ben abi sma tu di ben man trow, ma den no du dati fu di den no ben wani. Den hori densrefi èn den tan sondro fu trow „fu di den [ben] wani du moro gi a Kownukondre fu hemel”, neleki Yesus. Ma disi no wani taki dati den gebore sondro firi èn a no Gado meki taki den no trow. Na densrefi bosroiti nanga den krin frustan taki den no o trow.
Nanga den wortu fu Yesus na prakseri, na apostel Paulus tyari kon na krin taki ala tru Kresten kan dini Gado na wan fasi di a feni bun, awinsi den trow noso awinsi den no trow. Ma Paulus taki dati wan Kresten di „bosroiti na ini en ati” fu no trow, e „du moro bun”. Fa so? Sma di trow musu gebroiki den ten nanga krakti fu plisi a patna fu den èn fu sorgu gi den. Ma Kresten di no trow kan du furu na ini a diniwroko fu Masra sondro a frantwortu fu sorgu gi wan trowpatna. Den e frustan taki den man tan sondro fu trow fu di „Gado meki ala sma tra fasi. Dati meki a wan sma man du disi, èn a trawan man du dati.”—1 Kor. 7:7, 32-38.
Sobun, Bijbel no e taki dati na Gado e du wan wondru fu meki taki son Kresten man tan sondro fu trow. Na presi fu dati, na den Kresten srefi e bosroiti fu tan sondro fu trow. Den e meki muiti fu libi na so wan fasi taki den man du moro gi a Kownukondre sondro fu broko en ede nanga tra sani di trowpaar musu du. Na fu a sani disi ede furu sma na ini a ten disi bosroiti na ini den ati fu tan sondro fu trow èn a bun te trawan e horibaka gi den.