Den wan „di e libi wan syatu pisi ten nomo na ini a grontapu disi” de wán na ini a tru anbegi
„Na trakondre sma . . . o wroko na den gron nanga den droifidyari fu unu. Sma o kari unu priester fu Yehovah.”—YES. 61:5, 6.
1. Fa son sma e si trakondre sma, ma fu san ede a no bun fu denki so?
NA INI a tra artikel wi ben si kaba taki son sma no lobi trakondre sma èn den e wisiwasi den. Den sortu sma disi denki kande taki den betre moro den trakondre sma. Ma wi no e sori lespeki te wi e denki so. Nowan sma betre moro wan trawan. Wan buku taki: „Bijbel e sori taki ala libisma na brada nanga sisa fu makandra, awinsi fu sortu ras den de” (The Races of Mankind). Aladi trutru brada nanga sisa kan difrenti fu makandra, toku den na brada nanga sisa.
2, 3. Fa Yehovah e si trakondre sma?
2 Awinsi pe wi e libi, trakondre sma ben de na wi mindri ala ten. Dati ben de so tu nanga den Israelsma fu owruten di ben de a spesrutu pipel fu Yehovah Gado fu di a ben meki a Wètfrubontu nanga den. Aladi den trakondre sma di ben libi na mindri den Israelsma, no ben abi a reti fu du son sani, toku den Israelsma ben musu sori lespeki gi den èn den ben musu libi bun nanga den. Disi na wan moi eksempre gi wi. Tru Kresten no musu desko trawan èn den no musu denki takru fu den. Fu san ede? Na apostel Petrus ben taki: „Now mi e frustan trutru taki Gado no lobi a wan sma moro a trawan, ma awansi fu sortu kondre wan sma de, efu a e lespeki Gado èn a e du san reti, dan Gado feni en bun.”—Tori 10:34, 35.
3 Trakondre sma ben e kisi wini te den ben e libi na ini Israel. Disi e sori fa Yehovah e si den sortu sma disi. Bakaten na apostel Paulus ben taki fu Yehovah: „Gado na a Gado fu den Dyu wawan? A no de a Gado fu tra pipel tu? Iya, en na a Gado fu tra pipel tu.”—Rom. 3:29; Yoèl 2:32.
4. Fu san ede wi kan taki dati trakondre sma no de na ini „na Israel fu Gado”?
4 Di Gado meki a nyun frubontu nanga den salfu Kresten, a pipel Israel no ben de a spesrutu pipel fu Gado moro. Dati meki Bijbel e kari den salfu Kresten disi „na Israel fu Gado” (Gal. 6:16). Paulus ben taki dati na mindri a nyun pipel disi „a no abi trobi efu [wan sma] de wan Grikisma noso wan Dyu, efu a besnèi noso efu a no besnèi, efu a de wan trakondre sma, wan Skitsma, wan srafu noso wan friman, ma Krestes de ala sani èn a de na ini ala sma” (Kol. 3:11). Sobun, na ini a Kresten gemeente, brada nanga sisa no ben o si nowan sma leki trakondre sma.
5, 6. (a) San son sma di e leisi Yesaya 61:5, 6, kan aksi densrefi? (b) Suma na „den priester fu Yehovah” nanga den „trakondre sma” na ini Yesaya? (c) Fa den tu grupu disi e wroko makandra?
5 Ma efu wan sma e leisi Yesaya kapitel 61, a kan aksi ensrefi san a kapitel disi wani taki. A e taki fu wan profeititori di e kon tru na ini a Kresten gemeente. Vers 6 e taki fu sma di ben o dini leki „priester fu Yehovah”. Ma vers 5 e taki fu „trakondre sma” di ben o wroko makandra nanga den „priester” disi èn di ben o horibaka gi den. Fu san ede a tekst e taki fu trakondre sma dan?
6 Den „priester fu Yehovah” na den salfu Kresten di kisi „a fosi opobaka”. Den „o de priester fu Gado èn fu Krestes, èn na ini den wán dusun yari, den o tiri leki kownu makandra nanga en” (Openb. 20:6). Ma yu abi furu Kresten tu di e gi yesi na Gado èn di abi a howpu fu libi na grontapu. Aladi den e wroko skinskin nanga den wan di o dini na hemel, toku den na trakondre sma na agersi fasi. Den breiti fu horibaka gi „den priester fu Yehovah” èn fu wroko makandra nanga den. Wi kan taki dati den de leki sma di e „wroko na den gron nanga den droifidyari” fu den priester disi. Den e yepi den salfuwan fu gi glori na Gado fu di den e fruteri sma den tru tori fu Bijbel èn fu di den e gi den sma disi leri tu. Ala tu grupu, sobun, den salfuwan nanga den „tra skapu”, e suku sma di wani dini Gado fu têgo. Na wan lobi-ati fasi den e yepi den sma disi fu libi soleki fa Gado wani.—Yoh. 10:16.
NELEKI ABRAHAM, WI NA SMA „DI E LIBI WAN SYATU PISI TEN NOMO NA INI A GRONTAPU DISI”
7. Fa Kresten na ini a ten disi de leki Abraham èn leki tra sma fu owruten di ben gi yesi na Gado?
7 Soleki fa wi ben si kaba na ini a tra artikel, dan tru Kresten de leki trakondre sma, fu di den e libi wan syatu pisi ten nomo na ini na ogri grontapu fu Satan. Den de leki Abraham èn leki tra sma fu owruten di ben gi yesi na Gado. Bijbel e taki dati den sma disi ’ben de trakondre sma èn taki den ben e libi wan pisi ten nomo na ini a kondre’ (Hebr. 11:13). Awinsi sortu howpu wi abi, wi kisi a grani fu de wan mati fu Yehovah, neleki Abraham. Yakobus e taki dati „’Abraham ben poti bribi na ini Yehovah. Fu dati ede Gado ben si en leki wan reti-ati sma’ èn den ben kari en ’Yehovah mati.’”—Yak. 2:23.
8. San Gado pramisi Abraham èn san Abraham ben denki fu a pramisi disi?
8 Gado pramisi taki Abraham nanga den bakapikin fu en ben o meki taki a no wán pipel nomo, ma ala pipel fu grontapu kisi blesi. (Leisi Genesis 22:15-18.) Aladi a pramisi disi ben o kon tru baka te Abraham dede, toku a ben de seiker taki Gado ben o du san a pramisi en. Sowan hondro yari, en nanga en osofamiri go fu a wán presi na a trawan. A heri pisi ten dati Abraham tan wan mati fu Yehovah.
9, 10. (a) Fa wi kan teki na eksempre fu Abraham? (b) Sortu kari wi kan gi sma tu?
9 Aladi Abraham no ben sabi o langa a ben o abi fu wakti teleki a pramisi kon tru, toku a tan lobi Yehovah èn a tan dini En fayafaya. Fu di Abraham ben e hori na prakseri taki a ben de wan trakondre sma na ini a kondre, meki a no suku fu seti libi na ini a kondre dati (Hebr. 11:14, 15). A de wan koni sani fu teki na eksempre fu Abraham. Wi musu de tevrede nanga san wi abi. Wi no musu feti na baka furu gudu noso wan hei posisi èn wi no musu pruberi fu meki en na ini a grontapu disi. Fu san ede wi ben o meki muiti fu libi leki fa tra sma e libi, efu a grontapu disi o kon na wan kaba dyonsro? Fu san ede wi musu lobi a grontapu disi di de fu wan syatu pisi ten nomo? Wan moro betre sani ben e wakti Abraham èn na so a de tu nanga wi. Wi wani abi pasensi èn wi wani tan wakti teleki wi kisi san wi e howpu na tapu.—Leisi Romesma 8:25.
10 Te now ete Yehovah e gi sma fu ala kondre a kari fu kisi den blesi di sma kan kisi nanga yepi fu den bakapikin fu Abraham. Den salfu „priester fu Yehovah” nanga den tra skapu di de leki „trakondre sma” e gi ala sma na grontapu a kari disi na ini moro leki 600 tongo.
LOBI SMA FU ALA KONDRE
11. San den trakondre sma ben kan du, soleki fa a begi fu Salomo e sori?
11 Na ini a yari 1026 fosi Krestes, Salomo gi a tempel abra na Yehovah. A taki wan tu sani na ini a begi fu en di e tyari kon na krin fa Yehovah e si trakondre sma. Salomo aksi Yehovah fu arki den begi fu ala den trakondre sma di ben o begi go na a sei fu a tempel. Na so den ben kan kisi wini fu a pramisi di Yehovah ben gi Abraham. Di a begi Gado fayafaya, a taki: „Mi e begi yu fu arki a trakondre sma tu di no de wan Israelsma èn di komoto fu wan farawe kondre, baka di a kon sabi yu nen (bika sma o yere fu yu bigi nen èn fu den bigi sani di yu du nanga a tranga anu fu yu). Iya, arki a trakondre sma te a e begi yu nanga en fesi kon na a sei fu na oso disi. Yu di de na hemel, a presi pe yu e tan fu ala ten, mi e begi yu fu arki den begi disi èn fu du den sani di a trakondre sma e aksi yu fu du. Dan ala sma na grontapu o kon sabi yu nen, so taki den kan lespeki yu neleki fa yu pipel Israel e lespeki yu.”—1 Kow. 8:41-43.
12. Fu san ede Yehovah Kotoigi de leki trakondre sma?
12 Wan trakondre sma na wan sma di komoto na ini en eigi kondre fu go na wan tra kondre. Yehovah Kotoigi de leki trakondre sma. Na a fosi presi den e horibaka gi a hemel Kownukondre fu Gado di abi Krestes leki Kownu. Dati meki den no e bumui nanga politiek, srefi te son sma feni taki den musu du dati.
13. (a) Fa wi kan leri fu no si wan sma leki wan trakondre sma? (b) Fa Yehovah ben wani taki ala libisma ben musu libi na ini a bigin?
13 Son leisi yu man si te sma de fu wan tra kondre, fu di den e taki wan tra tongo, den abi tra gwenti, den no gersi den sma fu a kondre pe den de, noso den e weri tra sortu krosi. Ma toku den sani disi no prenspari, bika den alamala na libisma. Sobun, te wi e leri fu no luku den sani di e meki taki wan sma de tra fasi leki wi, dan kande wi no o si en leki wan trakondre sma moro. Efu heri grontapu ben abi wán tirimakti noso wán kondre nomo, dan nowan sma ben o de wan trakondre sma. Na ini a bigin Yehovah ben wani taki ala libisma ben musu libi leki wán famiri di ben o abi wán tirimakti: Dati na a tirimakti fu en. Wan ten o de taki sma fu ala kondre no o si trawan moro leki trakondre sma?
14, 15. San Yehovah Kotoigi leki grupu kon frustan?
14 Na ini a grontapu disi sma e prakseri densrefi nomo èn den e poti prakseri nomo na a lobi di sma musu abi gi a kondre fu den. Sobun, a de wan moi sani taki sma de ete di lobi pipel fu ala kondre. Ma a no makriki fu tron so wan sma. Ted Turner, di opo a telefisi station CNN, e fruteri fa a ben e wroko makandra nanga wan lo koni sma di ben de fu difrenti kondre. A taki: „Di mi miti den sma disi, mi leri furu fu den. Mi no ben si sma fu tra kondre leki ’trakondre sma’ moro, ma mi ben si den leki sma di e libi na a grontapu disi tu.” Fu dati ede a meki wan wèt na CNN taki den wrokoman no ben musu taki „sma fu wan tra kondre”. Na presi fu dati, den musu taki „sma fu heri grontapu”.
15 Na heri grontapu Yehovah Kotoigi wawan leki grupu e denki leki fa Gado e denki. Den leri fu si sma leki fa Yehovah e si den. Dati meki den kenki a fasi fa den e denki fu trakondre sma èn den leri fu lobi den. Den no e denki takru fu sma fu tra kondre èn den no abi bita-ati gi den, ma den e frutrow den. Boiti dati, den lobi en taki someni difrenti sma de di abi difrenti fasi. A de wan moi sani fu si taki Yehovah Kotoigi leri fu denki so fu trakondre sma, a no so? Yu no feni taki disi yepi yu fu libi moro bun nanga tra sma?
WAN GRONTAPU PE NOWAN SMA O DE WAN TRAKONDRE SMA
16, 17. Te Openbaring 16:16 nanga Danièl 2:44 kon tru, dan san disi o wani taki gi yu?
16 Heri esi ala pipel o go feti nanga Yesus Krestes èn nanga den engel fu en. Dati o de a lasti leisi taki sma o feti nanga a tirimakti fu Gado. Bijbel e kari a feti disi „Armagedon na ini Hebrewtongo” (Openb. 16:14, 16; 19:11-16). Moro leki 2500 yari pasa, Gado ben taigi a profeiti Danièl fu fruteri san ben o pasa nanga libisma tirimakti di opo densrefi teige Gado. A profeiti ben skrifi: „Na ini a ten fu den kownu dati, a Gado fu hemel o seti wan kownukondre di noiti no o kisi pori. A kownukondre srefi no o gi na nowan tra pipel. A o broko ala den kownukondre disi pisipisi èn a o tyari wan kaba kon na den. A kownukondre srefi o tan fu têgo.”—Dan. 2:44.
17 Yu e frustan san a wani taki gi yu te a profeititori disi kon tru? Na ini a ten disi libisma e prati grontapu na ini kondre èn dati meki ala sma na trakondre sma. Ma na ini a ten di e kon dati no o de so moro. Sma o difrenti ete fu makandra, ma dati o sori nomo na sortu moi fasi Gado kan meki difrenti sortu sani. A moi howpu disi musu gi wi deki-ati fu du ala san wi man fu tan prèise wi Mekiman Yehovah Gado èn fu gi en glori.
Yu wani libi na wan ten pe grontapu no prati moro na ini kondre èn pe den no o kari trawan „trakondre sma” moro?
18. Sortu eksempre e sori wi taki Yehovah Kotoigi no e si makandra leki trakondre sma?
18 Yu denki taki a ten o kon trutru taki sma no o si trawan leki trakondre sma moro? Wi kan bribi taki a o pasa trutru. Nownow kaba Yehovah Kotoigi no e si makandra leki trakondre sma. Fu eksempre, na ini a ten di pasa den brada meki den bijkantoro na ini son kondre teki a wroko abra fu wan tu pikin bijkantoro na ini tra kondre, so taki a preikiwroko kan seti moro bun (Mat 24:14). Di den brada teki a bosroiti disi, den no luku suma na fu sortu kondre. Ma den hori na prakseri taki son leisi den wèt fu den kondre kan meki taki den ben musu seti sani tra fasi. Disi na ete wan sani di e sori fa Yesus Krestes, a Kownu fu Gado Kownukondre, e yepi wi fu no si makandra leki sma fu difrenti kondre. Heri esi a o wini ala kondre èn a o meki den alamala tron wán.—Openb. 6:2.
19. San Gado en pipel man du fu di den sabi a soifri tongo, noso den tru leri fu Bijbel?
19 Fu di Yehovah Kotoigi de fu someni kondre, meki den e taki difrenti tongo, ma toku den alamala e meki muiti fu sabi a soifri tongo, noso den tru leri fu Bijbel. Na so den e tron wán pipel èn nowan sma man prati a grupu disi. (Leisi Sefanya 3:9.) Yehovah Kotoigi de leki wán famiri di e libi na heri grontapu, aladi den no de wan pisi fu na ogri grontapu disi. A famiri disi e sori fa sani o de na ini a nyun grontapu pe trakondre sma no o de moro. Na a ten dati ala sma na grontapu o breiti fu si ala libisma leki brada nanga sisa, awinsi fu sortu ras den de noso awinsi fu sortu presi den de.