A wini di a troe anbegi sa wini, e kon krosibei
„Jehovah moesoe tron kownoe foe heri grontapoe.” — SAKARIA 14:9.
1. San salfoe kresten ben ondrofeni na a ten foe a Fosi Grontapoefeti, èn fa ben froeteri na fesi foe disi?
NA A TEN foe a fosi grontapoefeti, den kondre di ben e feti, ben meki salfoe kresten pina tranga èn ben poti den na ini strafoe-oso omeni leisi. Pikinmoro den no ben kisi okasi moro foe tjari srakti-ofrandi foe prèise gi Jehovah, èn den ben kon na ini wan situwâsi foe katibo na jejefasi. Foe ala den sani disi den ben froeteri na fesi na ini Sakaria 14:2, di e taki dati tra kondre ben sa kon feti nanga Jerusalem. A foto foe a profeititori disi na a „hemel Jerusalem”, a hemel Kownoekondre foe Gado nanga a presi pe „a kownoestoeroe foe Gado èn foe a Pikin Skapoe” de (Hebrewsma 12:22, 28; 13:14; Openbaring 22:3). Den salfoewan foe Gado na grontapoe ben prenki a foto dati. Den getrow-wan na den mindri ben man kakafoetoe gi na ogri di sma ben wani doe den, èn den ben weigri foe gi densrefi pasi foe sma poeroe den „na a foto”, tjari den go na ini katibo.a
2, 3. (a) Fa na anbegi di sma e anbegi Jehovah, wini foe sensi 1919? (b) San feni presi foe sensi 1935?
2 Na ini 1919, getrow salfoewan ben kon fri foe a katibo situwâsi di den ben de na ini, èn wantronwantron den ben meki boen gebroiki foe a pisi ten foe vrede di ben kon baka a feti. Leki sma di e teki presi gi a hemel Jerusalem, den ben teki a bigi okasi foe preiki a boen njoensoe foe Gado Kownoekondre èn foe jepi tjari den lasti memre foe den 144.000 kon makandra (Mateus 24:14; 2 Korentesma 5:20). Na ini 1931, den ben teki a nen Jehovah Kotoigi, di fiti èn di bijbel e horibaka gi. — Jesaja 43:10, 12.
3 Sensi a ten dati, den salfoe Kotoigi foe Gado noiti no loekoe na baka. Srefi Hitler nanga a Nazi politiek èn nanga sroedati orga foe en, no ben kan meki den tapoe den mofo. Ala di sma ben froefolgoe den na heri grontapoe, tokoe a wroko foe den meki froktoe na heri grontapoe. Spesroetoe foe sensi a jari 1935, den kisi jepi foe na internationaal „bigi ipi”, di a boekoe Openbaring ben froeteri na fesi foe den. Den na kresten so srefi di gi densrefi abra èn teki dopoe, èn „den wasi den langa krosi foe den èn meki den kon weti na ini a broedoe foe a Pikin Skapoe”, Jesus Krestes (Openbaring 7:9, 14). Ma den no de salfoewan, di abi a howpoe foe libi na hemel. A howpoe foe den na foe kisi san Adam nanga Eva ben lasi, dati na volmaakti libisma libi na ini wan paradijs na grontapoe (Psalm 37:29; Mateus 25:34). Na ini a ten disi, a bigi ipi e teri moro leki feifi miljoen sili. A troe anbegi foe Jehovah e wini, ma en lasti wini moesoe kon ete.
Freimde sma na ini a jeje tempel foe Gado
4, 5. (a) Pe a bigi ipi e anbegi Jehovah? (b) Sortoe grani den abi, èn leki a kontroe foe sortoe profeititori?
4 Soleki fa ben froeteri na fesi, dan a bigi ipi „e anbegi [Gado] na ini a tempel foe en dei nanga neti” (Openbaring 7:15, foetoewortoe). Foe di den no de Israèlsma di de priester na jejefasi, meki kande Johanes ben si den e tanapoe na ini a tempel na ini a dorosei fesidjari foe den heiden (1 Petrus 2:5). A jeje tempel foe Jehovah troetroe kisi bigi glori, nanga den djari foe en di e kon foeroe nanga a bigi ipi disi, di makandra nanga a fikapisi foe Israèl na jejefasi, e prèise en!
5 A bigi ipi no e dini Gado na a fasi di a moro inisei pisi foe a priester fesidjari e prenki. Gado no froeklari den regtfardiki foe tron jeje manpikin di a teki (Romesma 8:1, 15). Ma tokoe den abi wan krin posisi na fesi foe Jehovah, foe di den e sori bribi na ini a loesoe-paiman foe Jesus. A froeklari den regtfardiki nanga a prakseri foe kan de en mati. (Teki gersi Jakobus 2:21, 23.) Den kisi a grani toe foe pristeri srakti-ofrandi di fiti, na tapoe a jeje altari foe Gado. So boen, ini a tori foe a bigi ipi disi, a profeititori foe Jesaja 56:6, 7 e kon troe na wan toemoesi moi fasi: „Den freimde sma di go wroko makandra nanga Jehovah foe dini en èn foe lobi a nen foe Jehovah, . . . mi wani tjari den kon na mi santa bergi toe èn meki den prisiri na ini mi oso foe begi. A heri bron-ofrandi foe den nanga den srakti-ofrandi foe den mi sa teki na tapoe mi altari. Bika mi eigi oso den sa kari srefi wan oso foe begi, gi ala den nâsi.”
6. (a) Sortoe srakti-ofrandi den freimde sma e tjari? (b) Na sortoe sani a beki nanga watra na ini a priester fesidjari e memre den?
6 Na mindri den srakti-ofrandi di den freimde sma disi e tjari de „a froktoe foe den mofoboeba [leki siri-ofrandi di sreka boen] di e meki [Gado] nen bekènti na poebliki” èn a ’doe di den e doe boen èn a prati di den e prati sani nanga trawan’ (Hebrewsma 13:15, 16). A bigi beki nanga watra di den priester ben moesoe gebroiki foe wasi densrefi, de wan prenspari sani toe foe memre den freimde sma disi na sani. Den moesoe kon krin toe na jejefasi èn na moreel sei, ala di a Wortoe foe Gado e tjari kon na krin gi den moro nanga moro.
A Santapresi nanga den sani di de na ini
7. (a) Fa a bigi ipi e si den grani foe a santa priesterwroko? (b) Sortoe tra grani son freimde sma kisi?
7 A Santapresi nanga den sani di de na ini, wani taki wan sani gi a bigi ipi freimde sma disi? We, noiti den sa kisi a fasi di a Santapresi e prenki. Den no gebore ete wan tron leki jeje manpikin foe Gado di o de borgoe na hemel. Disi e meki den firi djaroesoe noso kisi bigi-ai? Nôno. Na presi foe dati den e prisiri foe a grani di den abi foe horibaka gi a fikapisi foe den 144.000, èn den e sori troetroe warderi gi a prakseri di Gado abi foe teki den wan disi leki jeje manpikin, di o abi wan prati makandra nanga Krestes foe meki a libisma famiri kon de volmaakti. So srefi, a bigi ipi freimde sma e si a bigi no-froedini boen-ati foe Gado leki wan warti sani, foe di a gi den wan howpoe foe libi foe têgo na ini Paradijs. Wan toe foe den freimde sma disi, neleki den Netinim foe owroeten, kisi grani foe hori ai na tapoe sani èn e jepi a santa priesterwroko (Jesaja 61:5).b Na mindri foe den wan disi Jesus e teki sma poti na wroko leki „granman na heri grontapoe”. — Psalm 45:16.
8, 9. Sortoe winimarki a bigi ipi e kisi, foe a hori di den e hori den sani di de na ini a Santapresi na prakseri?
8 Ala di a bigi ipi freimde sma noiti no sa go na ini na agersi Santapresi, tokoe den e leri warti sani foe den sani di de na ini en. Neleki fa a kandratiki ben moesoe kisi oli doronomo, na so den freimde sma abi santa jeje fanowdoe foe jepi den doronomo foe froestan den waarheid foe Gado Wortoe moro nanga moro di den ben kisi nanga jepi foe „a getrow èn koni srafoe” (Mateus 24:45-47). Moro fara, a jeje foe Gado e jepi den foe teki a kari disi: „A jeje nanga a trow-oema [a salfoe fikapisi] ben tan e taki: ’Kon!’ Èn meki ibriwan sma di e jere, taki: ’Kon!’ Èn meki ibriwan sma di e dreiwatra, kon; meki ibriwan sma di wani so, teki a watra foe libi foe soso” (Openbaring 22:17). So boen, a kandratiki na wan sani di e memre a bigi ipi foe a froeplekti di den abi foe skèin leki kresten èn foe loekoe boen taki den no ben sa doe wan sani foe sari a santa jeje foe Gado nanga a fasi fa den e tjari densrefi, wan prakseri, wan sani di den e taki, noso e doe. — Efeisesma 4:30.
9 A tafra nanga soribrede e memre a bigi ipi taki efoe den wani tan gosontoe na jejefasi, dan den moesoe teki jeje njanjan foe bijbel èn foe poeblikâsi foe „a getrow èn koni srafoe” doronomo (Mateus 4:4). A wierook-altari e memre den o prenspari a de foe begi opregti na Jehovah foe kisi jepi so taki den kan hori a soifri retifasi foe den (Lukas 21:36). Den begi foe den moesoe abi so srefi opregti wortoe foe prèise èn foe taki tangi (Psalm 106:1). A wierook-altari e memre den toe na a fanowdoe di a de fanowdoe foe prèise Gado na tra fasi, soleki nanga a singi di den e singi Kownoekondre singi nanga den heri ati na den kresten konmakandra èn foe di den e sreka densrefi boen so taki den kan abi boen bakapisi te den „meki sani bekènti na poebliki foe kan kisi froeloesoe”. — Romesma 10:10.
A wini di a troe anbegi sa wini krinkrin
10. (a) Na tapoe sortoe bigi froewakti wi kan howpoe? (b) San moesoe feni presi fosi?
10 Na ini a ten disi „foeroe sma” di e kon foe ala nâsi e go ipi-ipi na Jehovah en oso foe anbegi (Jesaja 2:2, 3). Nanga den wortoe disi, Openbaring 15:4 e taki dati a de so: „Soema no sa frede joe troetroe, Jehovah, èn gi joe nen glori, bika joe wawan de loyaal? Bika ala den nâsi sa kon èn anbegi na joe fesi, bika den regtfardiki bosroiti foe joe kon de foe si.” Sakaria kapitel 14 e taki san e kon baka dati. Na ini a krosibei tamara, a takroe fasi fa moro foeroe sma e tjari densrefi, sa doro wan heimarki te den e konmakandra wan lasti leisi foe feti nanga Jerusalem — den sma na grontapoe di e teki presi gi a hemel Jerusalem. Dan Jehovah sa doe wan sani. Leki wan Fetiman-Gado, „foe troe [a] sa go èn feti nanga den nâsi dati” di e prefoeroe foe doe a sani disi foe go feti. — Sakaria 14:2, 3.
11, 12. (a) San Jehovah sa doe, te na heri grontapoe den sa feti den anbegiman na ini a tempel foe en? (b) San sa de a bakapisi foe a feti di Gado sa feti?
11 „Disi sa sori foe de a krawasi di Jehovah sa krawasi a heri pipel nanga dati di troetroe sa doe sroedatiwroko teige Jerusalem: A meti foe wan sma sa pori gowe, ala di a e tanapoe na tapoe en foetoe; èn den ai srefi foe wan sma sa pori gowe na ini den ai-kasi foe den, èn a tongo foe wan sma srefi sa pori gowe na ini en mofo. Èn a moesoe pasa na a dei dati taki broeja di e kon foe Jehovah sa panja ensrefi na mindri den; èn ibriwan foe den troetroe sa graboe na anoe foe en kompe hori, èn na anoe foe ibriwan sma troetroe sa opo ensrefi teige na anoe foe en kompe.” — Sakaria 14:12, 13.
12 Wi sa moesoe wakti foe si efoe a krawasi disi na wan troetroe sani noso efoe a de wan agersi sani. Ma wán sani de seiker. Ala di den feanti foe Gado e sreka densrefi na heri grontapoe foe feti den foetoeboi foe Jehovah, tokoe den toemoesi aparti sani di den sa si foe Gado en almakti krakti, sa tapoe den. A mofo foe den sa tapoe. A sa de neleki a tongo foe den di ben tjalensi sma, ben pori gowe. Den no sa man si krin moro san na a wán prakseri di den ben abi, neleki den ai foe den ben pori gowe. A skin krakti foe den, di ben gi den deki-ati foe go feti, sa lasi gowe. Ini broeja, den sa go feti nanga makandra nanga wan bigi kiri foe sma leki bakapisi. Na so fasi ala den sma na grontapoe di de feanti foe na anbegi foe Gado, sa kisi pori. Te foe kaba, ala den nâsi sa moesoe erken na universeel soevereiniteit foe Jehovah. A profeititori sa kon troe: „Jehovah moesoe tron kownoe foe heri grontapoe” (Sakaria 14:9). Baka dati, den sa tai Satan nanga den ogri jeje foe en te a Doesoen Jari Tiri foe Krestes e bigin nanga den bigi blesi di e wakti a libisma famiri. — Openbaring 20:1, 2; 21:3, 4.
Na opobaka na grontapoe
13. Soema na den wan di „tan abra foe ala den nâsi”?
13 A profeitori foe Sakaria e go doro na ini kapitel 14, vers 16: „Ini a tori foe ala sma di tan abra foe ala den nâsi di e opo kon teige Jerusalem, a moesoe pasa taki den moesoe opo go jari baka jari foe boigi gi a Kownoe, Jehovah foe den legre, èn hori a wiwirikampoe-fesa.” Soleki fa bijbel e sori, dan ala sma di e libi na ini a ten disi èn di sa de na libi te a kaba foe a godelowsoe seti e kon èn di e tan feanti foe a troe anbegi, sa kisi a „kroetoe strafoe foe têgo pori” (2 Tesalonikasma 1:7-9; loekoe so srefi Mateus 25:31-33, 46.) Den no sa kisi wan opobaka. Soleki fa a sori, dan den wan di „tan abra” wani taki so srefi den memre foe den nâsi di dede fosi a lasti feti foe Gado èn gi soema wan howpoe de di gron na tapoe bijbel, taki den sa kisi wan opobaka. „A joeroe e kon”, na so Jesus ben pramisi, „pe ala sma di de na ini den memre-grebi, sa jere en sten èn sa kon na doro, den wan di ben doe boen sani, foe go ini wan opobaka foe kisi libi, den wan di ben doe tegoe sani, foe go ini wan opobaka foe kisi kroetoe.” — Johanes 5:28, 29.
14. (a) San den wan di opo baka, moesoe doe foe kisi têgo libi? (b) San sa pasa nanga ibriwan sma di e weigri foe gi ensrefi abra na Jehovah èn foe libi akroederi a troe anbegi?
14 Ala den wan disi di opo baka, moesoe doe wan sani so taki na opobaka foe den kan sori foe de wan foe kisi libi èn no wan opobaka foe kisi wan takroe kroetoe. Den moesoe kon na den fesidjari na grontapoe, foe a tempel foe Jehovah èn gi densrefi abra na Gado nanga jepi foe Jesus Krestes. Iniwan sma di kisi wan opobaka èn di e weigri foe doe disi, sa pina foe a srefi krawasi ede di e kon na tapoe den nâsi na ini a ten disi (Sakaria 14:18). No wan sma sabi omeni foe den sma di kisi wan opobaka, sa prisiri foe moksi densrefi nanga a bigi ipi foe hori na agersi Wiwirikampoe-fesa. Tweifri no de taki den sa de foeroe, èn a bigi jeje tempel foe Jehovah sa kisi moro glori srefi leki bakapisi foe dati!
Na agersi Wiwirikampoe-fesa
15. (a) San ben de wan toe aparti sani foe a Wiwirikampoe-fesa foe Israèl foe owroeten? (b) Foe san ede den ben òfer 70 mankaw na a ten foe a fesa?
15 Ibri jari, Israèl foe owroeten ben moesoe hori a Wiwirikampoe-fesa. Den ben hori en wán wiki èn a ben kon na a kaba foe a kotiten foe den. A ben de wan prisiri ten foe taki tangi. Wán wiki langa den ben moesoe libi na ini kampoe di no ben o tan langa èn pe den ben poti wiwiri foe bon na tapoe, spesroetoe palmtaki. A fesa disi ben memre Israèl fa Gado ben froeloesoe den fositen tata foe den foe Egipti èn fa a ben sorgoe gi den di den ben tan na ini kampoe ala di den ben waka lontoe 40 jari langa, na ini a gran sabana, te leki den ben doro a Pramisi Kondre (Lefitikus 23:39-43). Na a ten foe a fesa, den ben òfer 70 mankaw na tapoe a tempel altari. Soleki fa a sori, dan a sani disi foe a fesa ben de wan profeiti sani foe a volmaakti wroko di Jesus Krestes ben doe krinkrin foe kibri sma libi. Te foe kaba, foeroe bakapikin — kande miljardmiljard — foe den 70 famiri foe den libisma di ben kon foe Noa, sa kisi den winimarki foe Jesus froeloesoe-ofrandi. — Genesis 10:1-29; Numeri 29:12-34; Mateus 20:28.
16, 17. (a) O ten na agersi Wiwirikampoe-fesa ben bigin, èn fa a fesa ben waka? (b) Fa a bigi ipi abi wan prati na a fesa?
16 Na so fasi na owroeten Wiwirikampoe-fesa ben sori go na a prisiri ten foe tjari sondari di kisi froeloesoe kon na ini a bigi jeje tempel foe Jehovah. A kontroe foe a fesa disi ben bigin na a Pinksterfesa na ini 33 G.T. di a prisiri ten ben bigin foe tjari Israèlsma na jejefasi kon na ini a kresten gemeente (Tori foe den Apostel 2:41, 46, 47). Den salfoewan disi ben froestan taki den ben de ’sma di e libi foe wan sjatoe pisi ten nomo’ na ini a grontapoe foe Satan foe di a troetroe ’tanpresi [foe den] leki borgoe, de na hemel’ (1 Petrus 2:11; Filipisma 3:20). A prisiri fesa ben pori foe wan pisi ten, foe di sma ben fadon komoto na bribi èn dati ben abi a seti foe krestenhèit leki bakapisi (2 Tesalonikasma 2:1-3). Ma a fesa ben go doro na ini 1919 nanga a prisiri ten foe tjari den lasti memre foe den 144.000 Israèlsma na jejefasi kon na ini, èn baka dati joe ben kisi a tjari kon na ini foe na internationaal bigi ipi foe Openbaring 7:9.
17 Den e prenki a bigi ipi leki sma di abi palmtaki na ini den anoe, san e sori taki den na prisiri fesaman toe foe na agersi Wiwirikampoe-fesa. Leki kresten di gi densrefi abra na Gado, den e teki prati nanga prisiri na a wroko foe tjari moro anbegiman kon makandra na ini a tempel foe Jehovah. Moro fara, leki sondari den e froestan taki den no abi a reti foe tan foe ala ten na grontapoe. Den, makandra nanga den wan di sa opo baka na ini a ten di e kon, moesoe tan sori bribi na ini a froeloesoe-ofrandi foe Krestes, te leki den tron volmaakti libisma na a kaba foe a Doesoen Jari Tiri foe Krestes. — Openbaring 20:5.
18. (a) San sa pasa na a kaba foe a Doesoen Jari Tiri foe Jesus Krestes? (b) Fa a troe anbegi foe Jehovah sa wini te foe kaba?
18 Baka dati, den anbegiman foe Gado na grontapoe sa tanapoe na fesi foe en leki volmaakti libisma sondro taki den abi wan hemel priesterwroko fanowdoe. A ten sa doro te foe kaba, taki Jesus Krestes sa „gi a kownoekondre abra na en Gado nanga Tata” (1 Korentesma 15:24). Den sa loesoe Satan „foe wan sjatoe pisi ten” foe tesi a volmaakti libisma famiri. Ibriwan sma di no de getrow, sa kisi pori foe têgo makandra nanga Satan nanga den ogri jeje foe en. Den wan di e tan getrow, sa kisi têgo libi. Den sa tron sma di e tan foe ala ten na ini a Paradijs na grontapoe. Na so fasi na agersi Wiwirikampoe-fesa sa abi wan glori kaba, nanga boen bakapisi. A troe anbegi sa wini te foe kaba, so taki Jehovah e kisi têgo glori èn a libisma famiri e kon kolokoe foe ala ten. — Openbaring 20:3, 7-10, 14, 15.
[Foetoewortoe]
a Foe kon sabi san den e taki vers na vers foe Sakaria kapitel 14, loekoe a boekoe Het herstel van het Paradijs voor de mensheid — door de Theocratie! (A Paradijs di meki kon boen baka gi a libisma famiri — nanga jepi foe a Theokrasia!), di a Watchtower Bible and Tract Society of New York, Inc., tjari kon na doro na ini 1972, kapitel 21 nanga 22.
b Foe kon sabi moro foe a tori foe a disiten Netinim, loekoe A Waktitoren foe 1 april 1992, bladzijde 24.
Aksi foe loekoe sani sjatoe baka
◻ Fa den ben go feti nanga „Jerusalem” na a ten foe a fosi grontapoefeti? — Sakaria 14:2.
◻ San pasa nanga a pipel foe Gado foe sensi 1919?
◻ Soema na ini a ten disi abi wan prati na a agersi Wiwirikampoe-fesa?
◻ Fa a troe anbegi sa wini krinkrin?
[Prenki na tapoe bladzijde 21]
Den ben gebroiki palmtaki te den ben hori a Wiwirikampoe-fesa