Wan fesa di miljard miljard soema sa njan
1. Sortoe bewijsi ben kon na krin ini 1931 nanga 1932, di e sori dati ooktoe den „tra skapoe” ben sa abi wan prati ini na wiwirikampoe-fesa?
DEN „tra skapoe” foe na Boen Herder, Jezus Kristus e teki prati na a fesa foe na agersi wiwiri-kampoe-fesa de wan toemsi prisiri sani foe si, dati tapoe Gado joisti ten den sa teki prati troe troe na disi. Ini 1931 na fesa-leti ben fadon tapoe kapitel 9 foe na profétitori foe Ezechiël. Nanga disi ben tjari kon na krin dati den sma nanga sari di na man di ben weri linnen nanga na skrifiman-skrifitiki na hen sébere, ben poti wan marki tapoe den fesi-ede, ben de den srefi soema leki den „skapoe” ini na agersitori foe Jezus ini Matteus 25:31-46. Moro fesa-leti ben tjari kon na krin ini 1932 dati na srefi klasse disi foe „skapoe” ben abi na agersifasi foe den ini Jonadab, na manpikin foe Rechab, di ben de na mati foe na kroetoeman foe Jehovah kownoe Jehu foe Israël. — 2 Kon. 10:15-28; Jer. 35:19.
2. (a) Sortoe tra tjari kon makandra, boiti di foe Matteus 24:31 ben sa feni presi ini na „bosroiti foe na seti foe sani” soleki Jezus profétitori ben taki? (b) San ben gi ini 1935 wan bigi tranga na a tjari konmakandrawroko?
2 Meki wi hori na prakseri dati Jezus ben gi na agersitori ini Matteus 25:1-46 leki wan pisi foe na „marki” di ben sa sori tapoe na „de no ja” foe hen di no de foe si nanga na „bosroiti foe na seti foe sani” (Matt. 24:3) Nanga disi Jezus ben taki na fesi, dati ini na ten disi foe „na bosroiti foe na seti foe sani”, boiti, den soema foe Matteus 24:3 di Gado „ben verkisi”, trawan ben sa tjari konmakandra toe. Na tjari konmakandra foe den soema disi, di e doe boen na den „soema di verkisi”, ben bigin ini na bakajari foe 1935. Na tjari konmakandra foe den ben kisi bigi tranga nanga na lezing di ben bori tapoe fréda 31 mei 1935 tapoe na congres foe Jehovah Kotoigi ini Washington D.C. pe moro spesroetoe den Jonadab-klasse ben kisi wan kari.
3. (a) Foe sortoe tori na lezing ben go di ben hori na a ten dati en omeni ben dopoe baka dati? (b) Foe sortoe „marki” na kon troe foe Matteus 25:31-46 ben de now wan pisi?
3 Tapoe na dé dati na presenti foe na Wachttoren-genootschap ben taki foe na thema „Na bigi ipi” en a ben teki foe na profétitori foe Openbaring 7:9-14. A ben meki kon na krin, dati na „bigi ipi” ben de na srefi klasse leki den „skapoe” ini na agersitori foe Jezus ini Matteus 25:31-46. Na poeroe kon na krin disi foe den profétitori disi ben de wan prisiri gi èn den memre foe na salfoe fikapisi èn di foe na Jonadab-klasse. Na tamara wan dopoedienst ben hori en aiti hondro nanga fotenti soema ben sori dati den ben gi densrefi abra na Jehovah nanga na go di den ben go ondro watra. Na moro bigi pisi foe den sori dati den de foe den „skapoe” di e gi jepi na den jeje „brada” foe na Kownoe Jezus Kristus. Disi ben tron now wan pisi foe na „marki” di e bewijsi dati na rigeri Jezus Kristus de-noja sondro foe si hen en dati wi e libi ini na bosroiti foe na seti foe sani.
4. Fa den sani disi ben meki bekenti na ala „skapoe” en sortoe tjari konmakandrawroko ben go doro now?
4 Den sani disi ben meki bekenti tapoe na heri grontapoe gi ala soema di gersi skapoe, foedi den ben poti ini na Watchtower foe 1 nanga 15 augustus 1935 (De Wachttoren foe november en december 1935). Na tjari konmakandra foe na Jonadabklasse ben go soboen moro fara nanga na makti foe Jehovah Gado.
5. (a) Te o fara na tjari konmakandrawroko ben panja hensrefi sensi na ten dati? (b) Sortoe fositen tjari konmakandrawroko no ben tapoe?
5 Ala di ala moeilijkheid ben de leki wan bakapisi foe na Tweede Grontapoefeti foe 1939 te 1945 nanga na ogri vervolgoe foe Jehovah Kotoigi ini na takroe ten dati, tog na tjari konmakandra foe den „tra skapoe” gro kon tron wan wroko ini moro leki 200 kondre nanga eilanti-groepoe. Na tjari konmakandra foe den memre foe na „bigi ipi” no ben wani taki na kaba foe na tjari konmakandra foe moro memre foe na Ruth- nanga Estherklasse. Nono, bikasi moro „taki” ben tjari konmakandra, di de boen foe de wan pisi foe na „droifibon” Kristus (Joh. 15:1-8). Moro „taki” ben tjari konmakandra foe ben ent tapoe na agersi „kweki olijfbon”, soleki skrifi ini Romein 11:17-24. — Deut. 16:13.
6. (a) San Jehovah ben taki foe na jejefasi di den soema ben moe abi ini na ten foe na fesa disi foe na sébi moenkenkimoen (b) A ben de wiwiri-kampoe-fesa di ben bigin tapoe wan difrenti ten?
6 Soboen sensi 1919 wi kan taki troe troe foe wan agersi fesa foe tjari konmakandra, di ben abi leki marki na prisiri di ben de wan spesroetoe marki foe a wiwiri-kampoe-fesa foe owroeten. Den wortoe foe Jehovah tapoe na tori doe den fesaman foe na wiwiri-kampoe-fesa ben kon troe ibri dé: „Oen no moe de noti moro leki nanga prisiri” (Deut. 16:15). Meki wi no frigiti dja dati na wiwiri-kampoe-fesa nanga na fesa foe tjari konmakandra de wan fesa dati na wan fesa no e bigin, baka di na trawan ben bigin boen langa na fesi kaba. Na fesa foe tjari konmakandra ben de na srefi ten nanga na fesa pe den Israëlsoema ben libi ini wiwiri-kampoe. Ini na eksempel ini owroeten den ben gebroiki toe nen gi na sébi dé fesa ini na di foe sébi moen, foedi na libi ini wiwiri-kampoe ben feni presi ini na ten foe koti njanjan foe na di foe sébi moen Tisjri (Ethanim). Foedi ini na eksempel ini na owroeten na njanjan foe den Israëlsma ben koti, a ben de wan fiti sani dati na kon troe foe na fesa foe tjari konmakandra ben bigin ini 1919 nanga na koti foe den soema di den Israëlsoema na skinfasi ben agersi, da foe taki wan fikapisi foe jeje Israëlsoema. — Loekoe De Wachttoren, 15 oktober 1967, bladzijde 632-634.
DEN VERWAKTI FOE NA TEN DI E KON FOE NA FESA
7. Foe san ede den verwakti ini na ten di e kon foe na wiwiri-kampoe-fesa de toemsi boen?
7 San den verwakti foe na agersi wiwiri-kampoe-fesa ofoe fesa foe tjari konmakandra de, en pe wi de now kaba na ini? Toemsi moi! Foe san ede? Foedi na „bigi benawtoe” nanga na „feti di e kon foe na bigi dé foe Gado na Almakti Wan” na Harmageddon no sa poti wan brokoskin tapoe na prisiri foe na fesa foe wi (Matt. 24:21; Openb. 16:14, 16). Den bijbel profétitori e sori wi dati na agersi fesa sa go doro sondro foe tapoe te na ini na Njoen Ordening, di Jehovah Gado sa meki kon nanga jepi foe na victori Sroedatiman-Kownoe foe hen, Jezus Kristus. Den soema di tan na libi foe na oorlog na Har-màgeddon, da foe taki na salfoe fikapisi nanga na „bigi ipi” „tra skapoe”, sa tan njan na fesa ini na regtvaaardiki Njoen Ordening.
8, 9. O langa na fikapisi di sa tan na libi tapoe grontapoe, en sortoe verwakti Zacharia 14:16-19 e gi tapoe na tori foe na wiwiri-kampoe-fesa?
8 O langa den memre foe na salfoe fikapisi sa tan leki „wakaman” tapoe grontapoe te leki den kisi glori ini na hemel kownoekondre, wi no sabi now ete. Na disiten prisiri verwakti foe den tapoe na tori foe na hori foe na fesa ini na ten di den de ete na grontapoe, abi hen gron tapoe na proféti wortoe foe Jehovah. Ini Zacharia 14:16-19 e kon na fesi dati den disiten nomroe foe fesaman foe na agersi wiwiri-kampoe-fesa sa kon moro foeroe:
9 „En a moe pasa, foe taki foe ibri soema di tan abra foe den naatsi di e opo kon feti nanga Jeruzalem, dati jari baka jari den moe opo go foe boigi gi na kownoe, Jehovah foe den fetiman, en foe njan na wiwiri-kampoe-fesa. En a moe pasa foe taki foe ibri soema di no opo go foe den famiri foe grontapoe go na Jeruzalem foe boigi gi na Kownoe, Jehovah foe den fetiman, ja, tapoe hen alen sa kon. En efoe na famiri foe Egypte no opo go en no go troe troe, dan ooktoe tapoe den no wan sa de. Na krawasi sa kon di Jehovah e krawasi den naatsi, di no e opo go foe njan na wiwiri-kampoe-fesa. Ja, disi sa de na strafoe foe na sondoe foe Egypte en gi na sondoe foe ala naatsi di no e opo go foe njan na wiwiri-kampoe-fesa.”
10. Te den naatsi kon feti na laatste tron nanga na agersi Jeruzalem, soema dan sa tan na libi tapoe grontapoe en soema no sa tan?
10 Soema de now na soema di den skrifi foe hen leki „ibri soema di tan abra foe ala naatsi di e opo go feti nanga Jeruzalem”? No na salfoe fika-pisi foe den jeje Israëlsoema, no den mati foe den, den memre foe na „bigi ipi” di komoto foe ala naatsi en di fesi na ai foe ala naatsi e teki na aanbegi foe Jehovah tapoe den, e kon feti nanga na agersi Jeruzalem. Na fikapisi nanga na „bigi ipi” de joisti den sma di den naatsi moksi makandra foe go feti nanga den, foedi den de tan getrouw na a „hemel Jeruzalem” (Hebr. 12:22). Ini den vers na fesi (Zach. 14:1-15) e skrifi fa Gado e stré nanga den naatsi di e kon feti en fa a de poti hen kownoefasi ofoe soevereiniteit tapoe na grontapoe foe wi. Openbaring 19:11-21 e sori fa den naatsi en joe kan kan poeroe no wan na mindri, e go feti nanga de soema na grontapoe di e tan getrouw na a „hemel Jeruzalem” en dati no wan soema foe den naatsi sa pasa libi-libi na „oorlog foe na bigi dé foe Gado na Almakti wan”. Srefi den soema di kon wi taki e tan na oso ma di e steun den legre foe den na a fetigron, no sa tan na libi spesroetoe den no sa tan na libi, bikasi den e sreka ala soema foe go na feti.
11. O definitief na pori de di ala féjanti sa ondrofeni ini Har-mágeddon en foe san ede?
11 Ini Gado feti na Har-mágeddon ala den sortoe féjanti sa kisi pori foe tégo, sondro wan sani seti foe na opobaka foe den (Matt. 25:31, 32, 41-46; Jes. 66:23, 24; Rom. 6:9; 1 Kor. 6:9, 10). Na dedeskin foe den, sa de leki na njanjan gi den fowroe (Openb. 19:17-21). San sa pasa baka dati?
12. Te joe loekoe na bijbel, dan soema de „ibriwan . . . di tan abra foe ala naatsi di e go feti nanga Jeruzalem”?
12 Now na okasi e kon gi na soema di den taki foe hen nanga „ibriwan . . . di tan abra foe ala naatsi di opo go feti nanga Jeruzalem” (Zach. 14:16). Soema den disi ben kan de now? Te joe loekoe hen nanga na bijbel, dan a ben kande „ibriwan” foe den miljard miljard dede soema di ben dede bifo na „bigi benawtoe” di ben taki na fesi en bifo na „feti foe hen foe na bigi dé foe Gado na Almakti Wan” en di wan howpoe tapoe wan opobaka de gi den. Kristus ben taki foe wan ten foe opobaka gi „ala soema di de ini den memregrebi” (Joh. 5:28, 29; Openb. 20:12, 13). Na mindri den soema di sa opobaka foe dede, joe sa abi boen foeroe fositen Egyptesoema, aladi a no wan bepaalde pisi kondre sa nen Egypte na a ten dati en so toe tra nationaal grens foe fositen no sa de toe.
13. Sortoe joisti erkenning den e aksi foe den soema di sa opobaka tapoe grontapoe ondro Kristus kownoekondre; noso san sa pasa nanga den?
13 Ondro na doesoen jari kownoekondre foe Kristus, dan ala den di opobaka foe dede tapoe grontapoe sa kisi leri foe na wan enkri troe religie. Alamala sa waka fa a sori? Ibriwan soema di wani kisi tégo libi, sa moe kon na Jehovah jeje tempel di tai makandra nanga na „hemel Jeruzalem”. A sa moe njan na agersi wiwiri-kampoe-fesa ini na grontapoe Fesidjari foe na tempel, pe na „bigi ipi” di o pasa Har-mágeddon de now na ini kaba (Openb. 7:9-15). A sa moe teki „den granman tapoe na heri grontapoe”, di na Kownoe Jezus Kristus sa „poti” foe loekoe den afersi tapoe grontapoe (Ps. 45:16). Moro foeroe den soema di opobaka na grontapoe moe teki Jehovah leki Gado en Soeverein foe na universum, leki na soema di nanga jepi foe Jezus Kristus „de Kownoe tapoe na heri grontapoe” (Zach. 14:9). Noso na Bigi Alenmekiman Jehovah no sa kanti blesi kon tapoe den nanga jepi foe Kristus (Zach. 10:1). Gi den soema disi di no kisi blesi a sa de leki den e libi ini wan kondre di dré, en disi sa wani taki na dede foe den te foe kaba.
14. San a sa wani taki gi wan soema di Jehovah krawasi ini na ten foe na doesoen jari rigeri foe Kristus?
14 Jehovah sa abi ooktoe na „krawasi”, di e akroederi nanga na krawasi di a ben naki den naatsi di ben feti nanga hen „hemel Jeruzalem” (Zach. 14:12-15). Dati a de naki den sortoe tranga ede gensman foe na troe aanbegi, sa wani taki na tégo dede gi den, alwasi disi e pasa bifo na kaba foe na doesoen jari rigeri foe Kristus. Den sortoe sondari disi di den krawasi sa dede bifo na kaba foe Kristus doesoen jari rigeri en soboen den no sa abi na okasi foe Jehovah feni den regtvaardiki foe kisi tégo libi tapoe wan grontapoe paradijs. Na pisiten dati den ben de „wakaman” ondro na kownoekondre foe Kristus, no ben doro hen marki.
15. (. . .)?
15 Te na Njoen Ordening bigin, dan den memre foe na fikapisi foe jeje Israëlsoema di tan na libi sa de ete alaten leki „wakaman” tapoe grontapoe. Den sa angri na a ten dati den sa poeroe foe grontapoe go kisi na hemel goedoe foe den, foe moksi nanga Kristus en den kompe-kownoe nanga priester foe hen (Openb. 20:4-6). Ma baka Har-mágeddon ini na pisiten di den sa de na grontapoe den sa kisi jepi foe na „granman”-klasse — den „granman . . . tapoe na heri grontapoe” — di e wroko loyaal nanga den ini na loekoe foe na agersi fesa foe na di foe sébi moen, na wiwiri-kampoe-fesa. — Ezech. 45:17, 25.
16. (a) Foe sortoe soema den sa teki foeroe memre foe na „granman”-klasse? (b) Sortoe grani na fikapisi di ben sa de na libi ben sa wani abi nanga den en si leki wan spesroetoe prisiri?
16 Den memre foe na „granman”-klasse sa teki komoto foe na „bigi ipi” soema di gersi skapoe di sa pasa libi-libi na „bigi benawtoe” makandra nanga fikapisi di gebore njoen nanga jeje (Openb. 7:1-15). Den disi sa de kotoigi foe na opobaka foe den miljard miljard dedesma en na tjari konmakandra foe den ini na grontapoe Fesidjari foe Jehovah jeje tempel foe njan na agersi wiwiri-kampoe-fesa. Fa a sa de gi na jeje fikapisi wan prisiri ondrofeni te den ben sa tan libi tapoe grontapoe te na a bigin foe na wondroe tjari konmakandra dati, soleki Zacharia 14:16-19 ben si na fesi! Makandra nanga ala den soema disi di ben bai nanga na diri broedoe foe na „Lam foe Gado”, „Kristus, wi pascha”, dan den ben sa teki prati nanga bigi prisiri na a grontapoe fesa. — Ezech. 44:3; 45:7–46:18; 48:21, 22.
17. (a) Foe san ede na hori foe na fesa ini den doesoen jari rigeri foe Kristus no sa de foe soso? (b) Sortoe situatie den soema di e libi tapoe grontapoe ete sa doro, baka na waka foe den leki soema di e libi ini tenti?
17 Na hori foe na fesa no sa de foe soso, bikasi na a kaba foe na doesoen jari rigeri foe Kristus, dan ala soema di e libi dan na grontapoe, sa boigi hensrefi fesi Jehovah en anbegi hen ini na grontapoe fesidjari foe hen bigi jeje tempel, di tai nanga na „hemel Jeruzalem”. Moro fara hen manpikin Jezus Kristus, di sa tjari hen rigeri kon na wan boen kaba ini den doesoen jari, sa gi na „kownoekondre” na hen abra (1 Kor. 15:24-26). Disi sa de na grontapoe situatie di ala soema foe grontapoe sa doro, baka na waka foe den leki soema di e libi ini tenti.
18. San sa de na paiman foe den soema di e pasa na lasti tesi?
18 Ini na moeiliki momenti disi e kon na laatste tesi tapoe na getrouwfasi foe den gi Jehovah leki na Soeverein foe na universum. Den soema di sa fadon ondro na tesi, sa kisi pori foe tégo. Den soema di Jehovah e feni regtvaardiki foedi den pasa na laatste tesi disi, sa kisi na reti foe libi foe tégo tapoe na Edense grontapoe. Den no sa de moro langa soema di e libi ini tenti, „wakaman” ini na kondre. Na tanpresi foe den tapoe na paradijsgrontapoe sa tan foe alaten (Openb. 20:7-15). Na prisiri di den ben ondrofeni ini na ten foe na njan foe na agersi wiwiri-kampoe-fesa, sa go doro foe tégo tapoe na grontapoe foetoebangi disi foe na kolokoe Gado-Kownoe, Jehovah. — 1 Tim. 1:11.
[Foetoewortoe]
Loekoe foe moro inlichting na bigi foe na „wiwiri-kampoe-fesa” te go miti na ten foe na doesoen jari rigeri, na boekoe Het herstel foe na paradijs gi libisma — nanga jepi foe theocratie!, kapitel 22, en spesroetoe bladzijde 399-401; loekoe ooktoe den bladzijde 53-57, 79-89 en 106-115. Na kristen troe-troe-fasi di na fesa disi e agersi ben bigin foe sensi pinksteren ini 33 G.T. foe kon troe. Di na bigi fadon komoto foe na troe bribi ben bigin, wan doengroe ben fadon tapoe na prisiri foe na gemeente. Nanga na verloesoe foe na jeje Israël komoto foe na Bigi Babylon ini 1919, baka na fosi Grontapoe Feti, den ben teki na wroko baka . . . foe na tjari konmakandra, fosi foe na salfoe fikapisi en moro fara foe na „bigi ipi”, sodati ooktoe na agersi „wiwiri-kampoe-fesa” ben bigin baka. Disi de wan fesa di moe hori go doro, „foe na wan jari go miti na tra jari”, ooktoe ini na ten foe na opobaka, di o feni presi. A sa kon pas na wan kaba baka te na libisoema famiri di kon de volmaakti ondrofeni na laatste tesi te ala soema di pasa na tesi boen te foe kaba sa de soema, di sa tan libi alaten tapoe grontapoe. Loekoe ooktoe De Wachttoren, 1967, blz. 632-635; 1973 blz. 198-211; 1977, blz. 734 nanga Aid to Bible Understanding, blz. 573-576.