Pe wi moe go baka na pori di e kon gi na Georganiseerde Religie?
„Vloekoe moe kisi na soema di no e doe na komando foe Jehovah boen, en vloekoe moe kisi na soema di e tapoe hen feti-owroe foe trowe broedoe.” — Jeremia 48:10.
1. Na fesi sortoe problema den soema sa kon tanapoe, di sa pasa libi-libi na pori foe Georganiseerde religie?
„NA GEORGANISEERDE religie foe na grontapoe fadon!” Te na georganiseerde religie foe now sa go na ondro ini wan ogri pori, dan wi kan verwakti dati ogri ati soema foe ala populair religie sa bari nanga prisiri den sortoe wortoe disi. Na sortoe presi den soema sa go di sa pasa libi-libi na sani disi di pikinmoro joe no kan bribi? San sa tan abra, sodati den sa kan go drape? Wi e aksi na aksi disi ini ala ernst.
2. Sortoe aksi ben aksi tapoe na sani di Jeremia ben taki na fesi, en pe a ben de baka di a ben taki profétitori so wan fo-tenti jari?
2 Son soema di te leki now ben hori fasti na wan ofoe tra populair religie, sa aksi densrefi kande ongelovig: ’Na Mekiman foe hemel nanga grontapoe sa gi pasi foe so wan sani?’ Na aksi disi e akroederi nanga di ben aksi so wan 2625 jari pasa kaba tapoe na sani di wan djoe foe na priester famiri, na jongoe proféti Jeremia foe na foto Anathoth ini na Midden-Oosten, ben préki. A ben taki profétitori kontrari na religie di ini na ten dati hen égi pipel ben e beoefen. Leki fa Jeremia ben taki, dan na tempel foe den, na enkri wan di ben kisi pasi foe de leki fa na kerki wet foe den taki, ben sa bron krin krin nanga faja. Den soema di ben beoefen na populair religie, ben sa tjari gwe leki strafoeman na a kondre foe den winiman foe den foe tan drape sébi-tenti jari. Den ben kaka foetoe tranga gi den proféti taki foe Jeremia tapoe na tori foe den sortoe rampoe disi. Na a kaba foe den fo-tenti jari, pe Jeremia ben taki profétitori tapoe so wan fasi, a ben de ini strafoe-oso ondro na rigeri foe na laatste kownoe foe na kownoe famiri-lin foe David, di ben sidon tapoe na troon, Zedekia.
3. Jehovah ben tjari wan kaba kon na hen égi aanbegi nanga so wan kerki rampoe, ofoe san wi kan taki foe dati?
3 Na Gado di hen nen ben kari tapoe na tempel foe Jeruzalem, ben gi pasi troe troe dati so wan kerki rampoe ben pasa. Na boskopoe foe so wan fadon go ini pori, ben komoto foe na Gado disi srefi, Jehovah. San? A ben sa pori hen égi religie, na aanbegi foe hen leki na troe Gado? Nono! A ben teki na bosroiti soso nomo foe tjari wan kaba kon na a doti, kroektoe aanbegi, di ben beoefen na a ten dati ini na tempel, di ben tjari na nen foe hen, en dati ben tjari sjen kon tapoe hen santa nen. Den wortoe di Jehovah ben taki nanga mofo foe Jeremia ben kon troe! Den soema di ben kaka foetoe tranga, ben lasi. Ini na drétenmoen Ab, na di foe féfi moen foe na kalender-jari, foe na di foe sébi te nanga tin dé foe na moen dati, na tempel ben pori en na foto Jeruzalem di angriten kisi, ben broko te na gron. Bifo disi ben pasa, na kownoe, Zedekia, den ben kisi di a ben lon gwe, aladi den doesoen doesoen mangri djoe ben tjari gwe leki strafoeman, tapoe na pasi foe go na katibo foe Babylon, na naatsi di ben tron now na komanderiman foe na grontapoe.
4. Ala den owroe historia disi abi waarde gi wi?
4 Ma ala na owroe historia disi abi waarde gi na ten disi? Ja! Foe san ede? Bikasi a de wan profétitori, sodati a ben moe skrifi en te nanga na ten disi ben moe tan kibri ini foeroe libi tongo tapoe na bladzijde foe na bijbel. Wan soema di ben stoeka dipi na owroe historia dati ben de wan djoe, di na pipel foe hen ben tai wan slag nanga na sari historia dati, en heb ben poti krakti tapoe na prensparifasi foe na owroe historia dati, foedi ini na fosi eeuw foe wi gewoon teri a ben skrifi disi: „Den sani disi ben tan miti den leki eksempel en den ben skrifi den leki wan warskow gi wi, di den kaba foe den seti foe sani e kon na wi tapoe.” — 1 Kor. 10:11.
5. Sortoe kerki rampoe ben de foe kon di Paulus ben skrifi ini na ten dati 1 Korinte 10:11, en foe san ede so wan sani no sa kon ete wan tron?
5 Den wortoe disi di wani taki foeroe ben komoto foe na apostel Paulus, di ben skrifi den so wan 15 jari bifo na herbouwde foto Jeruzalem nanga hen tempel ben pori ini 70 foe G.T. nanga wroko foe den Romein legre. So wan pori no sa pasa . . . di foe dri tron, bikasi na disiten Jeruzalem wan djoe tempel no e moi hen. Now dri bigi religie e taki dati den abi belangstelling gi na historia foto dati, na kristenheid, na islam nanga na djoe-bribi.
6. San sa de na fosi pisi foe na Georganiseerde Religie di sa pori, en san a ben sa wani taki efoe baka dati wan soema ben soekoe kibri ini tra pisi foe na Georganiseerde Religie?
6 Joe abi religie di de moro owroe leki di foe na kristenheid. En tog, akroederi nanga san Jeremia ben taki gi na fosi Jeruzalem, na kristenheid sa de na fosi pisi foe Georganiseerde Religie di sa pori. Ja, foe troe, Jeruzalem ben de na profetifasi wan agersifasi foe na kristenheid, foedi na kristenheid e taki dati den e beoefen na religie, di ben bigin ini 33 foe G.T. ini na tweede Jeruzalem. Na sortoe presi den bakaman foe hen di tan kande na libi sa go te na disiten model foe na Jeruzalem foe Jeremia ten poeroe na pasi? Den sa go kande ete na religie di no de kristen religie? Efoe den doe disi, dan den ben sa lon go kibri ini tra pisi foe na Georganiseerde Religie di moe pori foe tégo.
7. Pe den Babylon soema ben gi Jeremia nanga hen sekretarsi pasi foe libi baka na fadon foe Jeruzalem, en sortoe fesa ben de foe kon dan?
7 Meki wi loekoe pikinso fa disi ben agersi, baka na fosi Jeruzalem ini 607 bifo G.T., ini Jeremia ten, ben pori. Ondro Gedalja, di na victori kownoe Nebukadnezar ben poti leki granman tapoe na kondre, dan son foe den pôti soema ben kisi pasi foe tan ini na kondre Juda. Disi ben pasa ini na di foe 5 moen (AB) foe 607 bifo G.T. Jeremia nanga hen sekretarsi Baruch ben tan na libi en na Babylon sroedati edeman ben libi hen na Jeremia foe tan na den pôti soema foe na kondre ondro granman Gedalja. San now? Na ten foe na bakajari-koti-foe njanjan ini na 7 moen (Ethanim ofoe Tisjri) ben kon krosibé. Na fasti ten foe na 7 dé fesa foe tjari konmakandra, ofoe na wiwiri-kampoe-fesa (11-21 Tisjri), soboen no ben de farawe moro. Ma ke! Ini Jeruzalem tempel no ben de moro pe fesa ben kan hori nanga prisiri. — Deut. 16:13-16.
8. Den djoe di ben lowe gwe ben drai kon baka na Juda foe ben hori na fesa foe tjari njanjan konmakandra?
8 Boiti wan groepoe sroedati, dan na Babylon legre ben gwe libi na kondre en ben tjari foeroe djoe di ben tan na libi gwe leki strafoeman. Djoe loweman di ben lowe gwe na tra kondre, soboen ben bigin drai kon baka safri safri na a kondre Juda. Den ben drai go baka na den égi kondre foe gi jesi na a Wetgever foe den, Jehovah, foe hori na wiwiri-kampoe-fesa, ofoe na fesa foe tjari konmakandra, aladi Jeruzalem nanga hen tempel ben lasi gwe? Den troe tori e sori dati disi no ben de so.
9. Foe san ede a ben de onzeker san den soema di ben drai baka nanga den pôti soema foe na kondre Juda ben sa go doe?
9 San den djoe di ben drai baka nanga den pôtiman foe na kondre ben go doe now? Den no ben de verplekti foe libi na kondre. Ma Jeremia ben taki wel na fesi, dati wan ten ben sa kon, dati na kondre ben sa didon légi 70 jari langa, sondro dati wan libisoema ofoe oso-meti ben de na ini. Tog Jeremia ben taki gi den soema di ben libi ini na kondre, dati den ben kan tan drape, ini vréde, sondro foe frede ogri foe na sé foe den Babylon soema di ben hari gwe. Na granman foe den, Gedalja, ben de leki den, wan djoe, soso a ben de now ondro kownoe Nebukadnezar foe Babylon. Na Gado foe den no ben dwengi den foe libi na kondre di a ben gi den, wansi a ben meki Jeremia ben taki na fesi nanga jepi foe santa jeje dati 70 jari na kondre Juda ben kon légi krinkrin.
WAN KIRIMAN NA KIBRIFASI E NAKI
10. Foe san ede na kerki toestand di den „moro pôti soema foe na kondre” drape ini na kondre Juda ben kon tanapoe na hen fesi, ben de wan sari wan?
10 Fa a ben de wan sari kerki toestand di ben de gi „den moro pôti soema foe na kondre”, di ben tan na baka ini na gebied foe Juda! (Jer. 40:7, Willibrord-vertaling). No wan tempel ben de ini Jeruzalem pe den ben kan loekoe foe begi Jehovah! Te joe poeroe Jeremia na ini, dan no wan priester en no wan leviet no ben de! No wan altari pe den ben kan tjari den slagti-ofrandi foe den! Ja, en no wan gowtoe „ark foe na verbontoe”, nanga tapoe dati den popki foe toe engel, pe na hépriester tapoe 10 Tisjri spats na broedoe foe den slagti-ofrandi foe na verzoendé. Na ark disi lasi gwe na wan presi di te leki na dé foe tide no de bekenti na no wan soema! — Hos. 3:4.
11. Foe sainde na kownoe foe Ammon, Baälis, ben si Ismaël na manpikin foe Nethanja, leki wan boen wrokosani foe poeroe na djoe granman Gedalja na pasi?
11 Now wan takroe kiriman e kon tapoe na toneel foe actie! A ben kon ini na persoon foe Ismaël, na manpikin foe Nethanja. Kande na kownoe foe den Ammoniet-soema, Baälis, pe Ismaël ben lowe go foe komoto foe den Babylonsoema, ben si Ismaël leki na joisti soema di ben kan teki ini dienst foe kiri Gedalja, na soema di kownoe Nebukadnezar ben poti leki granman foe na provincie Juda, Fa a ben doe kon tapoe na prakseri? Foedi Ismaël ben de „foe na kownoe famirilin”. Foe datede, meki kownoe Baälis, di ben prisiri foe na pori foe Jeruzalem, ben gebroiki Ismaël leki hen wrokosani foe poeroe Gedalja na pasi. — Ps. 83:7, 8; Jer. 10:14.
12. Fa Ismaël ben doe hen takroe wroko en foe sainde a ben moe lowe te foe kaba?
12 Aladi Johanan, na manpikin foe Karéah ben warskow, toku Gedalja ben teki Ismaël nanga hen tin mati na oso, meki wan njanjan-tafra gi den ini na foto Mizpa, na njoen rigeri-presi di ben didon wan toe kilometer noordsé foe den ston-ipi foe Jeruzalem. Aladi wan toe Babylon sroedati ben de drape, tog Ismaël nanga na pikin groepoe foe hen, di ben de na hen, ben graboe ala soema di ben de na a njanjan-tafra en ben de ini na birti dati, slagti den tapoe wan ogri-ati fasi (Jer. 41:2, 3). Joe ben abi trawan ete di ben fadon ini anoe foe Ismaël nanga den feradelek troepoe foe hen. Dis ben pasa ini na 7 moen Tisjri, na moen di na fesa foe na 7 dé wiwiri-kampoe-fesa ben de leki wan marki. Den soema di ben libi ini Mizpa ben firi now foe waka baka na winiman disi leki hen strafoeman. Ma di Johanan, na manpikin foe Karéah ben sori hensrefi en ben kaka foetoe gi Ismaël, dan Ismaël nanga aiti foe den man foe hen lon gwe na a kondre Ammon, di kownoe Nebukadnezar foe Babylon no ben poti ete na hen ondro. — Jer. 41:10-15; 49:1-5.
13. Sortoe boskopoe foe santa jeje Jehovah meki Jeremia gi Johanan nanga den bakaman foe hen, baka di den ben aksi foe dati? Fa den ben teki hen?
13 Foe na sani di ben pasa nanga na voorlopige rigeri di Babylon ben poti, meki Johanan nanga na pipel ben prakseri, dati nanga reti den ben kan frede foe na njoen grontapoemakti, na Babylon kownoekondre, di Jehovah Gado ben gebroiki foe ben kan doe wroko leki hen kroetoebakra di e gi strafoe. Sortoe pasi den ben moe waka now? Johanan nanga den granman foe hen go aksi Jeremia di ben taki soifri na fesi na pori foe Jeruzalem. Den ben pramisi foe waka baka na boskopoe foe Jehovah nanga mofo foe Jeremia, ofoe disi ben sa boen gi den ofoe no ben sa boen gi den. Tin dé baka di den ben aksi Jeremia, na boskopoe foe Jehovah ben kon nanga mofo foe hen. Den no ben moe brokosaka foe frede ede, ma den ben moe tan ini na kondre en tan poti densrefi ondro Babylon. Ma efoe den ben sa de ontrouw en hari gwe na zuidsé, na Egypte, dan sa fadon kon tapoe den na victori owroe foe na kownoe foe Babylon, nanga na angriten en nanga na pestsiki. Boiti wan pikin fikapisi, den ben sa dede ini na kondre Egypte di sa kisi pori. Baka na trowe foe na Babylon kownoekondre den no sa drai go ini vréde na a distrikt Juda. Johanan ben handri akroederi nanga na boskopoe disi foe Gado nanga den bakaman foe hen? Nono, kwetkweti! Den ben kari na boskopoe wan lé en den ben kari Jeremia wan léman. — Jer. 42:1-43:3.
14. Soema ben bewijsi dati den ben de den soema di no ben hori den wortoe, en sa a doe kon, dati na fesa foe tjari konmakandra no ben hori ini 607 bifo G.T.?
14 Ma soema ben de na léman, efoe a no de alamala, foe di den ben sweri dati den ben sa handri akroederi nanga na boskopoe di den ben kisi foe Jeremia, ofoe disi ben boen gi den, ofoe disi no ben boen gi den? Den ben de kaba na pasi foe go na zuidsé, na Egypte, en now den ben teki na fasti bosroiti foe go doro nanga na waka foe den te leki den ben doro na kondre foe na Nijl. Den no ben wani foe saka densrefi ondro na rigeri-makti foe na di foe dri Grontapoemakti, na di foe Babylon. Fositen, Egypte ben de na staman tegen na grontapoemakti Babylon di ben meki hensrefi kon moro bigi. Now di Juda ben kon ondro na rigerimakti foe Babylon, dan den ben abi na fasti bosroiti, dati no wan soema ben moe tan ini na kondre na baka foe de ondro Babylon. Den fesiman foe saka ondro Babylon, foe taki Jeremia nanga Baruch, no moe tan na baka. Sondro dati den ben verstan dati den ben „poti na ten” so, den oproeroeman dati ben gwe libi na kondre, kontrari na wani foe Jehovah, precies na a ten dati na kondre Juda, ben moe hori nanga prisiri na fesa foe tjari konmakandra, ofoe na wiwiri kampoe-fesa, foe 15 te nanga 21 Tisjri 607 bifo G.T., sodati, joisti leki fa a ben taki na fesi, a ben sa tan légi na baka, sondro dati libisma ofoe osometi ben libi na ini. — Jer. 43:4-7.
15. Fa den sani di ben pasa ini na ten foe Jeremia ben abi foe doe nanga na situatie ini wi ten, sodati den abi waarde gi wi?
15 Wan soema noiti kan kaka foetoe gi na wani foe na Almakti Gado en abi winimarki. Noiti na bewijsi kan gi dati na proféti wortoe foe hen no de soifri. Nanga na hari gwe foe den djoe di no ben wani saka densrefi foe na kondre Juda, dan den 70 jari di ben taki na fesi dati na kondre ben sa de légi en sondro Israëlsoema nanga osometi di ben libi drape, ben bigin. Dan den agersi „sébi ten” di Jehovah ben meki kownoe Nebukadnezar dren foe den en di na proféti Daniël ben tjari den kon na krin, ben bigin foe waka den 2520 jari foe den. (Dan. 4:13-27; Luk. 21:24). Soboen, a no ben de wan toeval, dati na Fosi Grontapoefeti ben broko kon tapoe wan vrédig grontapoe en ini na moenkenki-moen Tisjri ini 1914 foe G.T. ben marki na kaba foe den „sébi ten” dati. Den sani di ben pasa soboen ini na ten foe Jeremia ben abi soboen troe troe foe doe nanga na ten foe wi. San den sani disi wani taki gi wi ini disi ten, de toemsi prenspari!
16. Foe sainde na bewijsi ben gi dati na lon gwe na Egypte foe den djoe di no ben bribi no ben de na joisti pasi en na san wi moe loekoe, te wi loekoe na fasi foe den djoe dati?
16 Baka di ini 607 bifo G.T. na religie ben fadon, di den djoe di ben kaka foetoe gi na Wet, ben orga ini Jeruzalem, den djoe ben lon gwe na Egypte. Ma den ben drai baka gi na sani di den ben tegoe so gi hen? Den ben teki na moro boen pasi, na joisti pasi? Kwetkweti, te wi e hori na prakseri, dati den ben tron wan kefarlek komedi foe san e pasa nanga kerki soema di e wégri foe gi jesi na a wortoe foe Jehovah. Aladi ondro dwengi Jeremia ben libi ini Egypte, a no ben stop foe taki profétitori. Na jeje foe Jehovah ben tan gi Jeremia tranga foe taki profétitori, ja tegen den djoe loweman di no ben bribi nanga tegen na kondre di den ben verkisi en di ben gi na den leki libipresi. Den boekoe foe hen di ben skrifi ondro na krakti foe santa jeje de te leki na moeiliki ten disi. Den de leki wan warskow gi den disiten model foe den oproeroe djoe dati ini na ten foe Jeremia. Te wi loekoe ala den sani disi, dan san wi kan verwakti ini den dé di de wantewante na wi fesi?
17. Sortoe fasi foe doe wi no kan verwakti foe den aikotoigi di pasa libilibi na pori foe na kristenheid en foe sainde?
17 Wi kan verwakti na pori foe na moro makti pisi foe na Georganiseerde Religie, da foe taki na kristenheid, nanga na eri babel foe sekte nanga kerki groepoe. Disi sa pasa tapoe na ten foe Jehovah di no kan kenki. Na aksi de foe datede: Te disi pasa, dan sortoe fasi foe doe ala kotoigi foe na froewondroe sani disi sa teki? Te wi loekoe na eksempel ini 607 bifo G.T. foe Ismaël nanga Johanan, di ben wégri foe waka baka na rai foe Jehovah, dan wi no kan verwakti dati wan bigi ipi di joe no kan teri foe den sortoe aikotoigi disi sa drai go na a troe kristendom di na Jeremiaklasse nanga den mati foe hen di de loyaal e beoefen. Na troe kristendom moksi nanga aanbegi foe na Gado foe Jeremia, Jehovah, na hemel Tata foe Jezus Kristus. Na Jezus disi ben taki foe na aanbegi foe Jehovah di a ben taki gi na fraw na a fonten ini Samaria: „Na joeroe e kon en a de now kaba, dati den troe aanbegiman sa aanbegi na Tata nanga jeje en nanga waarheid, ja, bikasi na Tata e soekoe den sortoe sma foe aanbegi hen. Gado de wan jeje en na sma di e aanbegi hen, moe aanbegi hen ini jeje nanga waarheid.” — Joh. 4:23, 24.
18. Foe soema Jezus ben de wan kotoigi di a ben de na grontapoe en soema moe de leki hen now kotoigi?
18 Srefi wan kristen kan poti na aanbegi foe Jehovah na wan sé. Ini Openbaring 1:5 na Manpikin foe Gado ben kari hensrefi „Jezus Kristus, ’na Getrouw Kotoigi’”. Di a ben de leki libisma na grontapoe, a ben de wan djoe, wan Israëlsoema, di den wortoe foe Jesaja 43:10 ben taki gi na naatsi foe hen: „’Oen de mi kotoigi’, so Jehovah taki, ’ja, mi knegti di mi ben verkisi’”. Jezus ben bewijsi dati a ben de wan getrouw nanga troe kotoigi foe Jehovah Gado. Den troe discipel foe hen ini disi ten moe de den srefi sortoe foe kotoigi, Jehovah Kotoigi.
19. Den aikotoigi di tan na libi foe na pori foe na kristenheid sa lon go baka dati na Jehovah Kotoigi, en sortoe howpoe tra kerki seti foe sani abi foe den sma di sa tan na libi?
19 Wi no kan kari no wan proféti bijbeltekst, di e sori dati wan bigi groepoe foe fositen bakaman foe na kristenheid sa drai den libi, baka na pori foe na disiten model foe na Jeruzalem foe owroeten ini na „bigi benawtoe” di e kon krosibé en dati den sa go poti densrefi na a sé foe den kristen di e kisi vervolgoe en di de bekenti leki Jehovah Kotoigi. Foeroe kande sa sari foe na mankeri foe winimarki di den lasi leki wan bakapisi foe na faja pori foe na kristenheid di lobi goedoe, soleki disi ben de nanga den koopman di soleki Openbaring 18 skrifi e sari foe na bron foe na Bigi Babylon. Den ben lasi na okasi foe doe boen zaak nanga hen. A de mogelijk dati son kerki sma sa lon go na bepaalde religie di no de kristen religie di sa tan sjatoe ten baka na pori foe na kristenheid. Den sortoe soema dati sa kon soso ini wan tra kerki seti foe sani, di sa pori, foedi den de wan pisi foe na Bigi Babylon, na grontapoe kownoekondre foe falsi religie. Ala pisi foe hen te foe kaba sa go ini pori!
20. Fa wi kan kon sabi sortoe pasi den soema di tan na libi foe na pori foe na Bigi Babylon sa koti go na ini?
20 Na sortoe presi den soema di tan na libi foe na pori foe na Bigi Babylon sa go te foe kaba? San den proféti Boekoe di skrifi nanga santa jeje e sori? Den wani en den kan foe poti densrefi na a sé foe sma di Jeremia nanga Baruch de wan agersi fasi foe den? Den sani di ben pasa na proféti fasi ini den laatste dé foe den aanbegiman dati foe Jehovah e gi na piki.