Libisma e feti nanga dede

Dede na wan feanti di ala sma e frede. Wi e du ala san wi man so taki a no wini wi. Kande wi no man bribi te wan lobiwan fu wi e dede. Boiti dati, a krakti di wi abi te wi yongu e gi wi a denki taki noiti wi o dede, èn wi e tan kori wisrefi nanga a denki disi solanga wi man.

Nowan sma ben feti so fu wini dede, leki den Farao fu owruten. Den ben e gebroiki pikinmoro den heri libi èn sosrefi a di fu den dusundusun wrokoman fu den fu wini dede. Den piramide di den bow e sori dati, èn den e sori tu taki den no wini dede.

Den grankownu fu Sneisikondre ben abi wan srefi sortu howpu. Den ben e suku têgo libi, ma den ben e du en na wan tra fasi. Den ben e meki towfrudresi fu tan na libi. Grankownu Qin Shi Huang ben taigi den sabiman fu en fu meki wan towfrudresi di ben o tapu pasi gi dede. Ma furu fu den dresi disi ben abi kwik na ini, èn a kan taki wan fu den dresi dati kiri en.

Na ini a di fu 16 yarihondro, Juan Ponce de León, wan ondrosukuman fu Spanyorokondre, teki sipi go na a kontren fu den Karibis-èilanti fu suku wan watra-olo nanga watra di e meki sma tan yongu. Na a ten dati a doro na Florida, na Amerkankondre. Ma a dede wan tu yari baka dati, di a ben feti nanga wan tu Ingi fu drape. Noiti sma feni a watra-olo di e meki sma tan yongu.

Den Farao, den grankownu, nanga den ondrosukuman, alamala ben e suku fu wini dede. Awinsi wi no e agri nanga a fasi fa den du en, toku wi kan frustan fu san ede den du dati. Dipi na ini wi ati, wi alamala wani tan na libi.

WI KAN WINI DEDE?

Fu san ede wi e feti nanga dede? Bijbel e taki fu san ede. Disi na san a e taki fu wi Mekiman, Yehovah Gado:a „Ala sani a meki moi na a reti ten. Srefi têgo ten a poti na ini den [libisma] ati” (Preikiman 3:11). Wi no wani libi sowan 80 yari nomo, ma wi wani tan fu têgo na a moi grontapu disi (Psalm 90:10). Na dati wi wani trutru.

Fu san ede Gado poti „têgo ten” na ini wi ati? Na fu bruya wi? Dati no kan. Gado e pramisi wi taki a o wini dede. Wi kan leisi furu tron na ini Bijbel taki dede o kon na wan kaba èn taki Gado o gi wi têgo libi.​—Luku a faki „A o wini dede”.

Yesus Krestes srefi ben taki krin: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Sobun, a no fu soso wi e feti nanga dede. Ma Yesus e sori krin taki na Gado wawan kan wini a feti disi gi wi.