San kan yepi yu fu lobi studeri Bijbel èn fu kisi wini fu en?

Yosua e leisi a Wet; den skotu fu Yerikow e fadon èn na oso fu Rakab e tan tanapu; Yosua e opo en anu go na loktu aladi a e begi

YOSUA ben musu tyari den Israelsma go na ini a Pramisi Kondre. A sani disi no ben o makelek gi en. Ma Yehovah gi en deki-ati nanga den wortu disi: ’Yu musu abi deki-ati èn yu no musu frede. Du ala den sani di skrifi na ini a wèt. Dei nanga neti yu musu leisi en, so taki yu kan du ala den sani di skrifi na ini. Te yu du dati, dan sani o waka bun nanga yu èn yu o handri nanga koni.’—Yos. 1:7, 8.

Wi e libi na ini ’muilek ten di tranga fu pasa’, sobun wi srefi kan kisi fu du nanga muilek situwâsi (2 Tim. 3:1). Ma neleki Yosua sani o waka bun gi wi te wi e du den sani di Yehovah ben taigi en fu du. Wi musu abi a gwenti fu leisi Bijbel èn wi musu gebroiki den sani di wi e leri fu teki bun bosroiti.

Ma kande sonwan fu wi no sabi fa wi musu studeri èn kande wi no lobi studeri. Toku a prenspari taki wi e studeri Bijbel. Na ini a faki „Pruberi den sani disi”, yu o feni wan tu rai di o yepi yu fu studeri moro bun èn fu kon lobi en.

A psalm skrifiman ben singi: „Meki mi hori den komando fu yu, fu di mi e prisiri fu du dati” (Ps. 119:35). Yu srefi kan kon lobi en fu studeri Gado Wortu. Yu o feni furu gudu na ini Gado Wortu te yu e tan meki muiti fu studeri en.

Aladi yu no kisi a frantwortu fu tiri wan pipel neleki Yosua, toku yu abi yu eigi problema. Sobun teki na eksempre fu Yosua, studeri Gado Wortu èn du san yu e leri. Te yu e du dati, dan yu o man teki koni bosroiti èn sani o waka bun gi yu.

PRUBERI DEN SANI DISI

Begi fosi yu bigin studeri. Bijbel abi den prakseri fu na Almakti Gado èn a skrifi den fu yepi wi. Sobun, te yu e leisi Bijbel, aksi en fu yepi yu fu frustan san yu e leisi, fu no frigiti en èn fu gebroiki den sani di yu leri fu teki bun bosroiti na ini yu libi.—Esra 7:10.
Poti aksi gi yusrefi te yu e leisi Bijbel noso den tra buku fu na organisâsi. Aksi yusrefi: ’San a pisi disi e leri mi fu Yehovah? San a pisi disi abi fu du nanga a thema fu Bijbel? Fa mi kan gebroiki den san di mi leri fu yepi trawan?’
Denki dipi fu den sani di yu studeri. Stop eife, èn denki dipi fu den sani di yu leisi. Aksi yusrefi: ’Fa a pisi disi e meki mi firi? Fu san ede a e meki mi firi so? San a abi fu du nanga den sani di mi ondrofeni na ini a ten di pasa, den sani di e pasa na ini mi libi now èn di kan pasa na ini a ten di e kon? Fa mi kan gebroiki den Bijbel rai disi na ini mi libi?’ (Yob 23:5; Ps. 49:3) Luku tu efu yu man fruklari fu san ede Yehovah e taigi en pipel fu no du son sani. Noso prakseri san ben o de a bakapisi efu a sma di yu leisi fu en ben du sani tra fasi.—Deut. 32:28, 29.
Pruberi fu si a tori na yu fesi te yu e leisi. Fu eksempre, prakseri taki yu ben de drape di den brada fu Yosef seri en gi den Ismaelsma (Gen. 37:18-28). San yu e si, san yu e yere èn san yu e smeri? Prakseri fa a ben o de efu yu ben de wan fu den sma na ini a pisi di yu e leisi. San den e denki èn fa den e firi? Te yu e du disi, dan yu o kisi moro wini fu a leisi di yu e leisi Bijbel.
Gebroiki den sani di wi kisi fu na organisâsi fu ondrosuku Bijbel moro bun. Wroko nanga den sani di yu abi na ini yu tongo. Gebroiki den buku nanga a website fu wi. No syen fu aksi trawan fu sori yu fa yu kan wroko nanga den. Fu eksempre, a buku Ondrosuku Bijbel moro fini—Gi Yehovah Kotoigi, kan yepi yu fu si sortu tijdschrift noso buku e taki fu wan spesrutu tori. Gebroiki a brochure Studeri Gado Wortu moro fini. A abi karta, a e sori o ten son sani pasa, a e sori fa sma ben marki sani èn wegi sani, nanga tra sani tu.
Te yu kaba, poti prakseri baka na den prenspari sani di yu leri. Disi o yepi yu fu no frigiti san yu studeri. San moro bun na te yu e fruteri trawan san yu leri. Yu leri wan sani di yu kan gebroiki na ini a preikiwroko? Te yu e du den sani disi, dan yu no o frigiti den prenspari tori di yu leri èn trawan o kisi wini tu fu den sani di yu leri.