Aksi fu leisiman

Efu wan man nanga wan uma di no trow nanga makandra ben o sribi den wawan na ini a srefi oso wan heri neti langa aladi den no abi bun reide fu du dati, den kan kon na fesi wan krutu komte?

Iya, efu bun reide no de fu san ede den sma ben musu de na ini a srefi oso wan heri neti langa, dan dati kan sori taki den du hurudu. Dati meki wan krutu komte o seti fu luku a tori.​—1 Kor. 6:18.

Den owruman fu a gemeente musu ondrosuku sani bun, fu sabi efu a de fanowdu fu seti wan krutu komte. Fu eksempre: Den tu sma e hori nanga makandra? Den ben kisi rai kaba fu di den ben du sani di no fiti? Sortu sani meki taki den sma ben de den wawan na ini a srefi oso? Den ben seti sani na fesi fu de drape? Den ben kan bosroiti fu du wan tra sani, noso den no ben abi tra fasi? A de so taki wan sani pasa di den no ben fruwakti? Noso na wan seryusu problema ben meki taki tra fasi no ben de leki fu tan na ini a srefi oso wan heri neti langa? (Preik. 9:11) Pe fu na oso den ala tu ben e sribi? Fu di ibri situwâsi de tra fasi, meki tra sani kan de di owruman o luku tu.

Baka te den owruman kon sabi fa sani waka trutru, dan den musu luku efu a de fanowdu fu seti wan krutu komte fu luku a tori fu den tu sma disi.