Owroeman, kroetoe nanga regtfardikifasi

„Te oenoe abi wan kroetoe na mindri den brada foe oenoe, oenoe moesoe kroetoe nanga regtfardikifasi.” — DEUTERONOMIUM 1:16.

1. Sortoe gi di sma e gi makti na wan trawan, ben pasa ini na afersi foe kroetoe sani èn san disi wani taki gi libisma kroetoeman?

LEKI a Moro Hei Kroetoeman, Jehovah ben gi a kroetoe makti abra na a Manpikin foe en (Johanes 5:27). Foe en sei, leki Edeman foe a kresten gemeente, Krestes e gebroiki a getrow èn koni srafoe-groepoe èn a Tiri Skin foe en, foe poti owroeman, di sontron abi foe handri leki (Mateus 24:45-47; 1 Korentesma 5:12, 13; Titus 1:5, 9). Leki man di e teki presi gi trawan leki kroetoeman, den owroeman disi de froeplekti foe waka krosibei baka na eksempel foe den hemel Kroetoeman, Jehovah nanga Jesus Krestes.

Krestes — A Kroetoeman di e gi na eksempel

2, 3. (a) Sortoe Mesian profeititori e tjari den eigifasi foe Krestes leki Kroetoeman kon na krin? (b) Sortoe penti warti spesroetoe foe wi hori den na prakseri?

² Foe Krestes leki Kroetoeman, den ben skrifi nanga jepi foe profeititori: „Na en tapoe a jeje foe Jehovah moesoe kon tan, a jeje foe koni èn foe froestan, a jeje foe rai èn foe krakti, a jeje foe sabi èn foe a frede gi Jehovah; èn a sa abi prisiri ini a frede foe Jehovah. Èn a no sa kroetoe sani akroederi san den ai foe en wawan e si, èn a no sa gi piri-ai akroederi san den jesi foe en wawan e jere. Èn nanga regtfardikifasi a moesoe kroetoe den mofinawan, èn nanga opregtfasi a moesoe gi piri-ai foe a boen foe den safri-atisma foe grontapoe.” — Jesaja 11:2-4.

³ Loekoe ini a profeititori dati den eigifasi di e meki Krestes man „kroetoe grontapoe pe libisma e libi, ini regtfardikifasi” (Tori foe den Apostel 17:31). A e kroetoe ini akroederi nanga a jeje foe Jehovah, a koni foe Gado, froestan foe sani, rai, nanga sabi. Loekoe toe, taki a e kroetoe sani ini a frede foe Jehovah. So boen, „a kroetoestoeroe foe Krestes”, e prenki „a kroetoestoeroe foe Gado” (2 Korentesma 5:10; Romesma 14:10). A e loekoe boen foe e kroetoe den afersi na a fasi fa Gado e kroetoe den (Johanes 8:16). A no e kroetoe sani soso foe san a e si noso foe san a e jere sma e takitaki wawan. A e kroetoe nanga opregtifasi foe na boen foe den safri-atiwan èn den mofinawan. Fa a de wan toemoesi boen Kroetoeman! Èn fa a de wan toemoesi moi eksempel gi onvolmaakti libisma di den e kari foe handri leki kroetoeman ini a ten disi!

Grontapoe kroetoeman

4. (a) San sa de wan foe den wroko foe den 144.000 ini a Millenium Tiri foe Krestes? (b) Sortoe profeititori e sori taki den ben sa poti wan toe salfoe kresten leki kroetoeman ala di den de ete na grontapoe?

⁴ Den Boekoe e sori taki a pikin nomroe salfoe kresten, te joe e teki den gersi nanga trawan, foe bigin nanga den 12 apostel, sa de kompe kroetoeman nanga Krestes Jesus ini a Milenium (Lukas 22:28-30; 1 Korentesma 6:2; Openbaring 20:4). Wan fikapisi foe salfoe memre foe Israèl na jeje fasi na grontapoe, densrefi ben kisi kroetoe èn ben kisi den presi baka ini 1918-1919 (Maleaki 3:2-4). Ini a tori foe a kisi disi di Israèl na jeje fasi ben kisi den presi baka, den ben taki profeititori foe disi: „Mi wani tjari kroetoeman kon baka gi oenoe so leki fosi, èn raiman gi oenoe so leki a ben de na a bigin” (Jesaja 1:26). So boen, neleki fa Jehovah ben doe „na a bigin” foe Israèl na skin fasi, na so a ben gi a fikapisi di ben kisi a presi foe den baka, opregti kroetoeman nanga raiman.

5. (a) Soema den ben „poti leki den kroetoeman” baka na meki kon boen baka foe Israèl na jeje fasi, èn fa den e prenki den ini a boekoe Openbaring? (b) Foe soema den salfoe opziener e kisi jepi now ini kroetoe wroko, èn fa den e kisi skoro foe tron moro boen kroetoeman?

⁵ Ini a bigin, den ’koni man’ di den ben „poti leki kroetoeman”, ben de alamala salfoe owroeman (1 Korentesma 6:4, 5). Getrow, salfoe, opziener di sma ben lespeki den e prenki ini a boekoe Openbaring leki Jesus e hori den na ini en reti anoe, dati wani taki, na ondro en ai èn en tiri (Openbaring 1:16, 20; 2:1). Sensi 1935 den salfoewan ben kisi a loyaal horibaka foe wan „bigi ipi”, di e gro doronomo, èn di e howpoe foe pasa „a bigi banawtoe” libilibi èn foe libi foe têgo na wan paradijs grontapoe (Openbaring 7:9, 10, 14-17). Foe di „a trow foe a Pikin Skapoe” e kon moro krosibei, a salfoe Tiri Skin e poti moro nanga moro foe den, foe dini leki owroeman èn kroetoeman ini den moro leki 66.000 gemeente foe Jehovah Kotoigi na heri grontapoea (Openbaring 19:7-9). Nanga jepi foe spesroetoe skoro, den e skoro den foe teki frantiwortoe ini a „njoen grontapoe” libimakandra (2 Petrus 3:13). A Kownoekondre Bedinariskoro, di ben hori na a kaba foe 1991 na foeroe kondre, ben poti krakti tapoe a joisti fasi foe handri kroetoe afersi. Owroeman di e dini leki kroetoeman de froeplekti foe waka na baka Jehovah nanga Krestes Jesus, di den kroetoe foe den de troe èn regtfardiki. — Johanes 5:30; 8:16; Openbaring 19:1, 2.

Kroetoeman di ’e tjari densrefi nanga frede’

6. Foe san ede owroeman di de memre foe kroetoe komte ’moesoe tjari densrefi nanga frede’?

⁶ Efoe Krestes srefi e kroetoe sani ini a frede gi Jehovah èn nanga a jepi foe En jeje, o moro foeroe onvolmaakti owroeman moesoe doe dati! Te den kisi a toewijzing foe de wan memre foe wan kroetoe komte, den moesoe ’tjari densrefi nanga frede’, èn kari „a Tata di e kroetoe sani sondro foe teki sma partèi” foe jepi den kroetoe sani na wan regtfardikifasi (1 Petrus 1:17). Den moesoe memre taki den abi foe doe nanga sma libi, den „sili” foe sma, leki den di „sa moesoe gi frantiwortoe” (Hebrewsma 13:17). Nanga disi ini prakseri, foe troe den sa moesoe gi frantiwortoe na fesi foe Jehovah gi iniwan fowtoe, di den kan tan farawe foe en, èn di den kan meki te den e kroetoe sma. J. H. A. Ebrard ben skrifi ini sani di a ben taki foe Hebrewsma 13:17: „A de a plekti foe a skapoeman foe loekoe den sili di den ben gi abra na a sorgoe foe en, èn . . . a moesoe gi frantiwortoe foe den alamala, so srefi foe den wan di ben lasi foe di a meki fowtoe. Disi na wan serjoesoe wortoe. Meki ibri bedinari foe a wortoe go prakseri, taki nanga friwani a ben teki a kefarlek bigi frantiwortoe wroko disi.” — Teki gersi Johanes 17:12; Jakobus 3:1.

7. (a) San disiten kroetoeman moesoe memre èn san moesoe de a marki foe den? (b) Sortoe leri owroeman moesoe teki foe Mateus 18:18-20?

⁷ Owroeman di e handri leki wan kroetoeman moesoe memre taki den troe Kroetoeman foe ibri afersi na Jehovah nanga Krestes Jesus. Memre san den ben taigi den kroetoeman na Israèl: „A no gi libisma oenoe e kroetoe, ma a de gi Jehovah; èn a de nanga oenoe ini na afersi foe kroetoe. Èn now meki a frede gi Jehovah kon na oenoe tapoe. . . . Disi na fa oenoe moesoe doe, so taki oenoe no lai fowtoe na oen tapoe” (2 Kroniki 19:6-10). Nanga dipi lespeki frede, den owroeman di e kroetoe wan afersi moesoe doe ala san den man foe de seiker taki Jehovah de troetroe ’nanga den ini na afersi foe kroetoe’. A bosroiti foe den moesoe sori a fasi finifini fa Jehovah nanga Krestes e prakseri foe na afersi. San den e ’tai’ (feni taki a abi fowtoe) noso ’loesoe’ (no feni taki a abi fowtoe) na simbôlis fasi na grontapoe, moesoe de san ben tai noso loesoe kaba na hemel — so leki fa e kon na krin nanga jepi foe san skrifi ini a Wortoe foe Gado di skrifi nanga jepi foe santa jeje. Efoe den e begi Jehovah na nen foe Jesus, Jesus sa de „na den mindri” foe jepi den (Mateus 18:18-20, foetoewortoe; A Waktitoren, 15 februari 1988, bladzijde 12). A fasi fa sani e waka na wan takimakandra foe wan kroetoe komte, moesoe sori taki Krestes de troetroe na den mindri.

Foeroeten skapoeman

8. San na a moro prenspari frantiwortoe foe den owroeman ini a tori foe na ipi, so leki fa Jehovah, èn Jesus Krestes, e gi na eksempel? (Jesaja 40:10, 11; Johanes 10:11, 27-29)

⁸ Owroeman no e kroetoe foeroeten. Den na foeroeten skapoeman. Den na sma di e meki trawan kon betre, no sma di e gi strafoe (Jakobus 5:13-16). A fondamenti prakseri di de baka a Griki wortoe gi opziener (e·piʹsko·pos) na di foe sorgoe gi sma foe kibri den. A Theological Dictionary of the New Testament e taki: „Foe froeteri moro foe skapoeman [na 1 Petrus 2:25], a wortoe [e·piʹsko·pos] e sori tapoe a skapoemanwroko foe e loekoe den noso kibri den.” Ija, a moro prenspari frantiwortoe foe den na foe loekoe den skapoe èn foe kibri den, foe hori den na ini na ipi.

9, 10. (a) Fa Paulus ben poti krakti na tapoe a fosi plekti foe owroeman èn sortoe aksi wi kan poti djaso heri boen? (b) San den wortoe foe Paulus na Tori foe den Apostel 20:29 wani taki, so boen fa owroeman kan proberi foe meki a nomroe foe kroetoe afersi kon moro mendri?

⁹ Te na apostel Paulus e taki nanga den owroeman foe a gemeente foe Efeise, a e poti krakti tapoe den wortoe di moesoe kisi dati: „Poti prakseri na joesrefi èn na a heri ipi, di na mindri den a santa jeje ben poti oenoe leki opziener, foe wei a gemeente foe Gado, di a ben bai nanga a broedoe foe en eigi Manpikin” (Tori foe den Apostel 20:28). Paulus e poti krakti tapoe a wei foe na ipi, no tapoe a gi foe strafoe. Son owroeman sa doe boen foe prakseri boen foe na aksi di e kon now: ’Wi ben kan wini wan heri ipi ten di de fanowdoe foe ondrosoekoe èn foe handri kroetoe afersi efoe wi ben gi moro ten nanga moeiti foe wei na ipi?’

¹⁰ A de troe, taki Paulus ben warskow gi „wolfoe di e kwinsi sma”. Ma a no ben gi den fowtoe foe di den ‘no ben handri na ipi nanga safoefasi’? (Tori foe den Apostel 20:29) Èn ala di a ben abi na prakseri taki den getrow opziener ben moesoe trowe den „wolfoe”, disi go na doro, dan tokoe a no de so taki den wortoe foe en no e sori taki den owroeman moesoe handri den tra memre foe na ipi „nanga safoefasi”? Te wan skapoe e kon swaki na jejefasi èn e tapoe foe dini Gado, san a sma dati abi fanowdoe — foe joe naki en noso foe joe meki en kon betre, foe gi en strafoe noso foe wei en? (Jakobus 5:14, 15) Foe dati ede, owroeman doronomo moesoe poti ten tapoe schema foe doe a skapoemanwroko. Disi sa abi a prisiri bakapisi taki pikinso ten e gi na kroetoe afersi di e njan ten, di abi foe doe nanga kresten di sondoe ben basi den. Foe troe, a fosi sani di owroeman moesoe broko den ede nanga en, moesoe de foe gi wan fonten foe froelekti èn trowstoe, èn na so fasi den e meki vrede, korostoe èn seikerfasi go a fesi na mindri a pipel foe Jehovah. — Jesaja 32:1, 2.

Dini leki skapoeman èn kroetoeman di e doe boen

11. Foe san ede owroeman di de memre foe wan kroetoe komte moesoe de sondro foe teki sma partèi èn abi „a koni foe tapoesei”?

¹¹ Wei den skapoe moro boen bifo wan kresten e teki wan fowtoe stap, ben sa kan meki a nomroe foe kroetoe afersi kon moro pikin na mindri a pipel foe Jehovah. (Teki gersi Galasiasma 6:1.) Ma tokoe, foe a sondoe foe libisma èn onvolmaaktifasi, kresten opziener wawan tron sa kisi foe doe nanga afersi foe fowtoe di sma doe. Sortoe gronprakseri moesoe tiri den? Den gronprakseri disi no kenki foe sensi a ten foe Moses noso a ten foe den fosi kresten. Den wortoe foe Moses di a ben tai gi den kroetoeman na Israèl abi waarde ete: „Te oenoe abi wan kroetoe na mindri den brada foe oenoe, oenoe moesoe kroetoe nanga regtfardikifasi . . . Oenoe no moesoe teki sma partèi te oenoe e kroetoe sani” (Deuteronomium 1:16, 17). Foe no teki sma partèi, na wan eigifasi foe „a koni foe tapoesei”, a koni di de so prenspari gi owroeman di de wan memre foe wan kroetoe komte (Jakobus 3:17; Odo 24:23). So wan koni sa jepi den foe man si a difrenti na mindri swakifasi èn ogridoe krin.

12. Na sortoe fasi kroetoeman no moesoe de regtfardiki man wawan ma boen man?

¹² Owroeman „moesoe kroetoe nanga regtfardikifasi”, ini akroederi nanga Jehovah markitiki foe boen nanga ogri (Psalm 19:9). Tokoe, ala di den e doe moeiti foe de man di regtfardiki, tokoe den moesoe proberi toe foe de boen man, na a fasi di Paulus e sori a difrenti foe en na Romesma 5:7, 8. Te a boekoe Insight on the Scriptures e skrifi foe den vers disi, ini na artikel di abi foe doe nanga „Righteousness” (Regtfardikifasi) a e taki: „A gebroiki foe a Griki wortoe e sori taki a sma di trawan e si wantewante, noso di den e si tra fasi leki trawan, foe di a e sori boen-ati, na wan sma di e meine en boen nanga sma (di wani foe doe boen noso di wani tjari wini gi trawan) èn di de wan sma di e jepi trawan (wan sma di e sori so wan boen-ati fajafaja, foe di ensrefi wani dati). A no e broko en ede nomo foe doe san fiti retifasi, ma a e go moro fara, foe di a hori di a e hori trawan na prakseri na wan gesontoefasi èn na angri foe feni wini gi den èn foe jepi den, e boeweigi en foe doe dati” (Pisi 2, bladzijde 809; noso Hulp tot begrip van de bijbel, bladzijde 1283). Owroeman di no de regtfardiki wawan ma boen toe, sa handri sma di doe fowtoe na wan switi fasi ala di den e hori den na prakseri na wan switi fasi (Romesma 2:4). Den moesoe wani foe sori sari-ati èn sori taki den e firi sari gi sma. Den moesoe doe san den man foe jepi a sma di doe fowtoe meki a si a fanowdoe foe abi berow, srefi ala di a sa gersi ini a bigin taki a no e doe wan sani tapoe den moeiti foe den. — Efeisesma 4:32–5:1; Jakobus 2:13; Judas 22, 23.

Joisti eigifasi te den e ondrosoekoe den tori

13. (a) Te wan owroeman e handri leki wan kroetoeman, san a no moesoe tapoe foe de? (b) Sortoe rai di Paulus ben gi e fiti toe gi den ondrosoekoe di wan kroetoe komte e ondrosoekoe den tori?

¹³ Te wan situwâsi e aksi foe wan kroetoe komte ondrosoekoe wan tori, dan opziener no moesoe frigiti taki den na skapoeman ete, di e handri nanga den skapoe foe Jehovah, na ondro, „a toemoesi boen skapoeman” (Johanes 10:11). A rai di Paulus ben gi foe gi doronomo jepi na skapoe di de ini problema, e fiti nanga a srefi krakti te wan kroetoe komte e ondrosoekoe den tori. A ben skrifi: „Brada, srefi efoe wan sma meki wan fowtoe stap, bifo a kisi ensrefi, dan oenoe di abi jeje eigifasi, proberi foe meki so wan sma kon boen baka ini wan jeje foe safri-atifasi, ala di ibriwan foe oenoe e hori ai na oensrefi tapoe, foe frede ede taki oenoe toe kan kisi tesi. Tan tjari den hebi foe makandra, èn doe a wet foe Krestes na so wan fasi.” — Galasiasma 6:1, 2.b

14. Fa opziener moesoe si a ondrosoekoe di wan kroetoe komte e ondrosoekoe den tori èn san na a fasi fa den moesoe de nanga a sma di doe ogri?

¹⁴ Na presi foe prakseri foe densrefi leki den na moro hei kroetoeman di e kon makandra foe gi sma strafoe, dan owroeman di de memre foe wan kroetoe komte moesoe si a kroetoe leki wan tra pisi foe a herderwroko foe den. Wan foe den skapoe foe Jehovah de ini problema. San den kan doe foe froeloesoe en? A de toemoesi lati foe jepi a skapoe disi di dribi gowe foe na ipi? Wi no sa howpoe taki disi no de so. Owroeman moesoe tan abi wan positief loekoe tapoe a sori foe sari-ati pe disi ben sa de joisti. A no de so taki den moesoe lagi den markitiki foe Jehovah efoe wan serjoesoe sondoe ben doe. Ma a sabi di den sabi taki iniwan omstandigheid di e meki a fowtoe foe wan sma kon moro pikin, sa jepi den foe sori sari-ati pe disi man (Psalm 103:8-10; 130:3). A de wan sari sani foe taki, dati son sma di e doe ogri, de so tranga-ede ini a fasi fa den e tjari densrefi taki den owroeman de froeplekti foe sori kraktifasi, ma noiti krasifasi. — 1 Korentesma 5:13.

A marki foe na ondrosoekoe di a kroetoekomte e ondrosoekoe den tori

15. San den moesoe bosroiti fosi, te wan serjoesoe problema e opo ede kon na mindri sma?

¹⁵ Te wan serjoesoe problema e opo ede kon na mindri sma, dan koni owroeman sa ondrosoekoe fosi efoe den sma di de ini a tori ben proberi foe seti a tori densrefi, so leki fa Mateus 5:23, 24 noso Mateus 18:15 e taki. Efoe disi no waka boen, dan kande rai foe wán noso toe owroeman sa nofo. Foe doe sani nanga jepi foe kroetoe de fanowdoe soso efoe wan bigi sondoe ben doe, di ben kan abi leki bakapisi a sluit di den e sluit wan sma uit (Mateus 18:17; 1 Korentesma 5:11). Wan boen bijbel fondamenti moesoe de foe seti wan kroetoe komte. (Loekoe A Waktitoren, 15 september 1989, bladzijde 27.) Te den e sreka wan kroetoe komte, den moesoe teki den moro bekwaam owroeman, gi a spesroetoe kefal.

16. San owroeman e proberi foe doro nanga jepi foe den ondrosoekoe di a kroetoekomte e ondrosoekoe den tori?

¹⁶ San owroeman e proberi foe doro nanga jepi foe na ondrosoekoe di a kroetoe komte e ondrosoekoe den tori? Na a fosi presi, joe no man kroetoe sani nanga regtfardikifasi efoe joe no sabi a troe foe a tori. Neleki fa a ben de na Israèl, den moesoe ’ondrosoekoe’ serjoesoe afersi ’dorodoro’ (Deuteronomium 13:14; 17:4). So boen, wan marki foe a ondrosoekoe di den e doe wan ondrosoekoe na foe feni den finifinitori foe na afersi. Ma disi kan èn moesoe doe nanga lobi (1 Korentesma 13:4, 6, 7). Te den sabi kaba san troe, dan den owroeman sa doe ala sani di de fanowdoe foe kibri a gemeente èn den sa hori den hei markitiki foe Jehovah èn meki a jeje foe En kon fri ini a gemeente (1 Korentesma 5:7, 8). Ma, wan foe den marki foe wan onndrosoekoe na foe jepi, efoe disi man pikinso srefi, wan sondoeman di de ini kefar. — Teki gersi Lukas 15:8-10.

17. (a) Fa wan kroetoe komte moesoe handri nanga wan sma di den kragi, te den e ondrosoekoe wan tori èn nanga sortoe marki? (b) San disi e aksi foe a sei foe den memre foe a kroetoe komte?

¹⁷ Noiti den moesoe handri wan sma, di den kragi, tra fasi leki wan skapoe foe Gado. Den moesoe handri nanga en nanga safoefasi. Efoe wan sondoe (noso den sondoe) ben doe, a marki foe den regtfardiki kroetoeman sa de foe jepi a sondoeman foe kon boen baka, foe froestan a fowtoe foe a fasi foe en, foe abi berow, èn foe den hari en poeroe na so fasi foe „a trapoe foe Didibri.” Disi sa aksi foe den „bekwaamfasi foe gi leri”, „foe gi trawan leri nanga safri-atifasi” (2 Timoteus 2:24-26; 4:2). Ma, kon wi taki, dati a sondoeman e erken na a ten dati, taki a doe sondoe, a e sari troetroe te dipi na ini en ati èn e aksi Jehovah pardon? (Teki gersi Tori foe den Apostel 2:37.) Efoe a kroetoe komte abi na overtoigi, taki a wani foe den jepi en troetroe, dan moro foeroe tron a no ben sa de fanowdoe foe sluit en uit. — Loekoe A Waktitoren (Bakratongo), 1 april 1983, bladzijde 30, paragraaf 1.

18. (a) Oten wan kroetoe komte moesoe sori kraktifasi ini a sluit di den e sluit wan sma, di doe ogri, uit? (b) Ini a tori foe sortoe situwâsi di e meki wi ati firi sari owroeman moesoe span densrefi gi a boen foe a skapoe di dribi gowe?

¹⁸ Na a tra sei, te memre foe wan kroetoe komte e kisi foe doe nanga wan kefal pe a de krin taki a sma fadon komoto na bribi sondro foe firi sari, a opo ensrefi foe espresi kontrari den wet foe Jehovah, noso dorodoro ogridoe, dan a wroko foe den de foe kibri den tra memre foe a gemeente, foe di den e sluit a sondoeman di no abi berow, uit. A kroetoe komte no de froeplekti foe miti a sma di doe fowtoe ibritron baka, noso foe poti wortoe na ini a mofo foe en, foe di den e dwengi en foe abi berow, efoe a de krin taki a e no abi sari na wan fasi fa Gado wani dati.c Ini den jari di pasa a sluit di den ben sluit sma uit na heri grontapoe ben de so wan 1 procent foe den preikiman. Dati wani taki, dati foe so wan wánhondro skapoe di e tan waka boen, wán e lasi — awansi fa a no fa, foe wan sjatoe pisi ten. Te wi e prakseri foe a ten èn a moeiti di a e teki foe meki wan sma kon na ini a skapoepen, dan a no de so taki wi ati e firi sari foe sabi taki tin doesoendoesoen sma ’e gi abra baka na Satan’ ibri jari? — 1 Korentesma 5:5.

19. San owroeman di de wan memre foe wan kroetoe komte no moesoe frigiti noiti, so boen san sa de a marki foe den?

¹⁹ Owroeman di e bigin wan kroetoe afersi moesoe memre taki moro foeroe foe den kefal foe sondoe ini a gemeente abi foe doe nanga swakifasi, no nanga ogridoe. Noiti den moesoe frigiti na agersitori foe Jesus foe a lasi skapoe, di a ben tapoe nanga den wortoe: „Mi e taigi oenoe taki netso toe moro prisiri sa de na hemel foe wán sondari di abi berow moro leki foe neigitenti nanga neigi regtfardikiwan di no abi berow fanowdoe” (Lukas 15:7). Foe troe, „Jehovah . . . no wani taki wan sma go lasi, ma a wani taki alamala kon kisi berow” (2 Petrus 3:9). Nanga a jepi foe Jehovah, meki kroetoe komte na heri grontapoe kan doe ala san den man foe meki taki prisiri de ini hemel foe di den e jepi sma di doe ogri foe si a fanowdoe foe abi berow èn e poti den foetoe steifi baka tapoe a smara pasi di e tjari sma go na têgo libi. — Mateus 7:13, 14.

[Foetoewortoe]

Overzicht aksi

◻ San sa de a moro prenspari belangstelling foe den owroeman te den e waka baka na eksempel foe a Bigi Skapoeman èn a Toemoesi Boen Skapoeman?

◻ Na sortoe fasi owroeman kan proberi foe meki a nomroe foe kroetoe afersi kon moro mendri?

◻ Na sortoe fasi kroetoeman no moesoe de regtfardiki wawan, ma boen toe?

◻ Fa den moesoe handri nanga wan sma di doe ogri te den e ondrosoekoe wan tori èn nanga sortoe marki?

◻ Foe san ede a sluit di den sluit wan sma uit na wan sani di e doe te ala tra sani no jepi?

[Prenki na tapoe bladzijde 18]

Te joisti herderwroko e doe, dan den sa kibri densrefi, meki foeroe kroetoe afersi no ben sa de fanowdoe

[Prenki na tapoe bladzijde 20]

Srefi te wan kroetoe komte e ondrosoekoe wan tori, owroemam moesoe proeberi foe meki wan sma di doe ogri kon boen baka ini wan jeje foe safri-atifasi