Te yu abi wan seryusu siki

„Di mi kon sabi taki mi ben abi kanker na ini mi long èn na ini mi bere, dan mi ben de seiker taki mi ben o dede. Ma baka di mi komoto fu datra, mi ben e denki: ’A no dati mi ben fruwakti, ma mi o abi fu feni wan fasi fu pasa a sani disi.’”—Linda, di abi 71 yari.

„Mi abi wan siki di e meki taki a kruktu-anusei fu mi fesi e hati mi srefisrefi. Son leisi a e hati mi so te taki mi e firi brokosaka srefisrefi. Furu tron mi ben e firi leki mi de mi wawan èn mi ben e firi so takru taki mi ben prakseri fu kiri misrefi.”—Elise, di abi 49 yari.

Wan siki man sidon na ini wan rolsturu èn famiriman lontu en

TE YU noso wan lobiwan fu yu abi wan seryusu siki, dan a kan muilek srefisrefi. Boiti den problema di a siki e tyari kon, yu noso a sma kan lasi pasensi noso ati bron esi-esi. Te yu musu tyari a sikisma go na datra ibri leisi, dan disi kan gi yu moro broko-ede. A srefi sani disi kan pasa te yu no man feni bun datrayepi noso te yu no man pai fu en, èn te den dresi e gi problema. Den broko-ede di a siki e tyari kon no makriki srefisrefi.

Pe wi kan feni yepi? Furu sma kon si taki a sani di e gi den moro furu trowstu na te den e begi Gado èn te den e leisi den pisi na ini Bijbel di kan trowstu den. Wan sani di e gi deki-ati, na a lobi nanga a yepi di wi e kisi fu famiriman nanga mati.

SAN YEPI SON SMA FU NO GI ABRA

Robert di abi 58 yari, e taki: „Poti bribi na ini Gado te yu siki, dan a o yepi yu fu horidoro. Begi Yehovah. Taigi en fa yu e firi. Aksi en fu gi yu en santa yeye. Aksi en fu yepi yu so taki yu kan de wan deki-ati gi yu famiri. Yu kan aksi en tu fu gi yu krakti so taki yu no e bruya na ini a muilek ten disi.

Yu e firi bun te yu famiriman e gi yu deki-ati. Ibri dei wán noso tu fu den e bel mi fu aksi mi fa a e go. Awinsi pe den mati fu mi de, toku den e gi mi deki-ati. A no de fu taki dati den e meki mi firi bun èn a sani dati e yepi mi fu no gi abra.”

Efu yu e go luku wan mati fu yu di siki, dan hori na prakseri san Linda taki: „Yu kan frustan taki a sikisma wani libi en libi go doro èn kande a no wani taki fu a siki fu en ala yuru. Dati meki a bun fu taki fu tra sani di yu gwenti taki nanga a sma.”

Sobun, wi kan de seiker taki a krakti di Gado e gi wi, a trowstu di wi e kisi fu Bijbel, nanga a yepi fu famiriman nanga mati o yepi wi fu no gi abra, awinsi wi abi wan seryusu siki.

Bijbeltekst di kan yepi yu

Frutrow tapu Gado.

„Di mi begi Yehovah fu a yepi mi, a piki mi. Ne a meki taki mi no ben frede moro. A mofinawan disi bari kari Gado èn Yehovah srefi arki en.”—Psalm 34:4, 6.

Linda, di wi ben taki fu en kaba e taki: „Mi no e begi Gado fu meki mi kon betre, ma ala ten mi e aksi en fu yepi mi fu abi deki-ati èn fu no gi abra.”

Leisi Gado Wortu fu kisi krakti.

„Nowan sma di e tan na ini a kondre o taki: ’Mi siki.’”—Yesaya 33:24.

Denki dipi fu den sani di Gado o du na ini a ten di e kon, so taki a howpu fu yu kon moro tranga.

Aksi famiriman nanga mati fu yepi yu.

„Wan trutru mati e sori lobi ala ten. En na wan brada di gebore fu te nowtu de.”—Odo 17:17.

Elise di wi ben taki fu en kaba, e taki: „No hori yusrefi aparti fu trawan. Meki den mati fu yu yepi yu. Son leisi yu kan firi leki yu de yu wawan èn yu kan denki srefi taki Gado no e arki yu. Ma no meki a sani dati tapu yu fu moksi nanga trawan.”