Fa yu kan abi wan moro bun libi?

A LIBI disi a no san Gado ben wani gi libisma. Te yu luku en bun, dan grontapu ben musu lai nanga sma di wani taki a Mekiman fu wi tiri den. Den ben musu de sma di e gi yesi na en èn di e sori lobi nanga den tra moi fasi fu en. Gado ben wani taki den musu de koloku te den ben e seti osofamiri, te den ben e leri sabi nyun sani, èn te den ben e meki grontapu tron wan paradijs.

GADO E PRAMISI FU TYARI KENKI KON SO TAKI A LIBI NA GRONTAPU KAN DE SOLEKI FA A BEN WANI SENSI A BIGIN

• „Na ala sei fu grontapu a e meki feti kon na wan kaba.”​—Psalm 46:9.

• „A reti ten doro fu pori den wan di e pori grontapu.”​—Openbaring 11:18.

• „Nowan sma di e tan na ini a kondre o taki: ’Mi siki.’”​—Yesaya 33:24.

• „Den wan di mi teki o nyan bun fu a wroko di den du.”​—Yesaya 65:22.

Fa den profeititori disi o kon tru? Gado poti en Manpikin Yesus leki Kownu fu wan bun regering na hemel di o tiri grontapu. Bijbel e kari a regering dati a Kownukondre fu Gado (Danièl 2:44). Bijbel e taki fu Yesus: ’Gado o gi en a kownusturu èn a o tiri leki Kownu.’​—Lukas 1:32, 33.

Di Yesus ben de na grontapu, dan a du furu bigi wondru fu sori taki libisma o abi wan moro bun libi te a o tiri leki Kownu.

YESUS SORI SORTU BUN SANI A O DU GI LIBISMA DI E GI YESI NA GADO

• A dresi ala sortu siki. Na so a sori fa a o tyari wan kaba kon na siki na ini a ten di e kon.​—Mateyus 9:35.

• A meki a se kon tiri. Na so a sori taki a o man kibri libisma gi sani soleki winti nanga watra.​—Markus 4:36-39.

• A gi dusundusun sma nyanyan. Na so a sori taki a o gi libisma den sani di den abi fanowdu fu man tan na libi.​—Markus 6:41-44.

• A kenki watra kon tron win na wan trowfesa. Na so a sori taki a o yepi sma fu nyan bun fu a libi.​—Yohanes 2:7-11.

Fa yu kan abi a libi di Gado wani gi den sma di lobi en? Wan „pasi” de di yu musu waka. Bijbel e kari en a pasi di „e tyari sma go na libi”, èn „wan tu sma nomo e feni en”.​—Mateyus 7:14.

FENI A PASI DI E TYARI YU GO NA WAN MORO BUN LIBI

San na a pasi di o tyari wi go na libi? Gado e taki: „Mi, Yehovah, na yu Gado. Mi na a sma di e leri yu fu kisi wini. Mi na a sma di e meki yu waka a pasi di yu musu waka” (Yesaya 48:17). Te yu e waka a pasi disi, dan yu o abi a moro bun libi di yu kan abi.

Yesus ben taki: „Mi na a pasi, mi na san tru, èn mi na a libi” (Yohanes 14:6). Efu wi e du san Yesus taki èn efu wi e teki na eksempre fu en, dan wi o tron moro bun mati fu Gado èn wi o abi wan moro bun libi.

Fa yu kan feni a pasi di e tyari sma go na libi? Furu kerki de, ma Yesus ben warskow: „A no ala sma di e taigi mi: ’Masra, Masra’, o go na ini a Kownukondre fu hemel. Ma na a sma di e du a wani fu mi Tata na hemel o go na ini” (Mateyus 7:21). A ben taki tu: „Na den froktu fu den, unu o si suma na den” (Mateyus 7:16). Bijbel kan yepi yu fu kon sabi sortu bribi na a tru bribi.​—Yohanes 17:17.

Fa yu kan waka tapu a pasi di e tyari sma go na libi? Wi o abi fu kon sabi a sma di gi ala sma libi. Suma na a sma dati? Fa a nen? Fa a de? San a e du? San a wani taki wi du?a

Gado no ben wani nomo taki libisma wroko, nyan, prei, èn seti wan famiri, ma a ben wani moro gi wi. Wi kan kon sabi wi Mekiman èn wi kan tron en mati. Te wi e du a wani fu en, dan wi e sori taki wi lobi en. Yesus ben taki: „Efu sma wani kisi têgo libi, den musu leri sabi yu, a wan-enkri tru Gado.”​—Yohanes 17:3.

TEKI A FOSI STAP

Efu yu wani gi yesi na a wan-enkri tru Gado, dan yu o abi fu tyari wan tu kenki kon. A kan gersi leki a sani dati muilek. Ma wi o kon abi wan moro bun libi te wi e bigin waka tapu a pasi di e tyari wi go na libi. Efu yu wani feni piki tapu prenspari aksi di abi fu du nanga Gado, dan Yehovah Kotoigi wani studeri Bijbel nanga yu sondro taki yu abi fu pai gi dati. Den kan du dati na wan ten èn na wan presi di yu feni bun. Efu yu wani sabi moro, dan go na www.pr418.com/srn.