Sori warderi foe na seti foe na loesoe-ofrandi
1 Foe na sondoe foe oen fosi tata Adam ede meki a libismafamiri ben abi wan sma di ben kan bai en fri-fanowdoe — wan volmaakti sma, di ben sa man foe bai baka san Adam ben lasi. Oen lobi Tata Jehovah ben kon jepi wi foe di a seni en wan enkri lobi Manpikin kon na grontapoe (Matt. 1:20, 21; Joh. 1:1-3, 4). Na krakti di en srakti-ofrandi ben abi, ben de precies abrasé foe na krakti di a sondoe foe Adam ben abi. — 1 Kor. 15:22.
2 Troe kristen e sori warderi gi na seti foe na loesoe-ofrandi foe di den e sori bribi na ini Jezus Kristus èn foe di den e waka na ini en foetoestap. Wi e sori warderi ooktoe foe di wi e gi jesi na a gebod foe bijbel foe fisiti na ala jari fesa foe na Avondmaal foe Masra (1 Kor. 11:24). A jari disi Jehovah Kotoigi na heri a grontapoe sa kon na wan, tapoe sonde 15 april, baka te son dongo, foe ori na fesa disi.
SREKA NA FESI
3 A no de foe taki dati den owroeman sa wani loekoe ofoe ala sani seti di de fanowdoe foe sreka sani na fesi. Ma na tapoe foe dati a de prenspari dati iniwan foe oen persoonlek moesoe teki nofo ten foe go prakseri abra san a okasi disi wani foe taki. Na wan tra presi foe na Wi Kownoekondre Dienst disi wan schema tanapoe foe wan bijbel-lésiprogramma foe na wiki di e waka a fesi foe a datum foe a Memrefesa. Oen ala moesoe teki den vers disi boen na ini oenoe. Na rai e gi efoe a kan, foe lési a stof disi nanga na osofamiri. Na tapoe foe dati sowan ben feni en boen foe gebroiki sosrefi toe tra materiaal di druk, soleki den bladzijde 917-933 foe na Aid-boekoe, pe e behandel na grontapoe diniwroko foe Jezus Kristus èn sosrefi toe en wroko èn den persoonlek fasi foe en. Efoe wi sa loekoe a sortoe materiaal disi ondro begi, oen sa kisi wan moro dipi warderi foe na santafasi foe na Avondmaal foe Masra èn na seti foe na loesoe-ofrandi.
4 Foe san-ede joe, te joe prakseri na moi eksempre foe dini nanga en heri ati di Jezus ben gi, no sa meki pikinso ten tapoe joe schema foe teki moro froekoe tapoe a dé dati prati na a oso-na-osoprékiwroko? Ma sorgoe taki tapoe a dé dati taki joe sreka joe afersi so dati te na lezing e ori joe moesoe de nanga ai, dati joe sa arki boen na a takiman èn teki èn poti ala joe prakseri foe a stof foe san a e taki.
KARI TRAWAN FOE DE DRAPE TOE
5 Nanga prisiri wi wani dati oen bijbelstudi nanga tra sma di abi belangstelling moesoe de makandra nanga oen na a santa afersi disi. Sosrefi toe den inactiefwan sa abi oenoe spesroetoe prakseri fanowdoe. Foe dat’ede ini maart nanga april wi sa doe ekstra moeiti foe kan miti den, èn wi sa meki wan boen gebroiki foe den uitnodiging foe na Genootschap. Kande joe kan kari trawan foe di joe o telefoon den ofoe foe skrifi brifi. Sreka sani foe sorgoe foe tjari den kon èn go pe dati de fanowdoe èn pe a kan. Sonwan kon si dati a de wan boen sani foe meki wan lijst nanga den nen foe ala den sma di abi belangstelling èn di moesoe kisi wan kari. Te joe go fisiti den kaba, joe kan marki dati tapoe na lijst. De nanga switifasi nanga faja te joe e gi den sma disi di abi belangstelling wan kari. Meki den kon waran gi na fisiti foe na komakandra disi.
6 Wi sa wani de so froekoe leki a kan sonde neti foe bari den njoen sma nanga den inactiefwan di kande sa kon, wan switikon. Sorgoe dati den firi densrefi fri èn tjari den foe leri sabi trawan. Wi howpoe dati a de foe den tapoe a fesa foe a Avondmaal foe Masra sa gi den krakti foe soekoe geregeld demakandra nanga a gemeente.
7 Omeni foe den moro leki 4 miljard sma de na grontapoe di e sori taki den abi warderi foe na okasi di den abi, tangi gi na loesoe-ofrandi. foe kisi na tégo libi, oenoe no sabi. Ma wi abi na sékerfasi dati „wan bigi ipi” sma sa bribi ini „a broedoe foe na Lam” èn sa feni jepi (Openb. 7:9, 10, 14). A jari di psa 6.767.707 sma na ini heri grontapoe ben fisiti na Memrefesa! Meki a de so taki a jari disi Jehovah blesi oen krakti di e bondroe te wi wani gi doesoendoesoen sma moro a dek’ati foe sori makandra nanga wi warderi gi na loesoepaiman.