Wi musu de nanga tangi te wi o memre a lusu-paiman fu Yesus
1, 2. Fu san ede wi musu de nanga tangi taki wi o memre a lusu-paiman fu Yesus?
1 Kresten na heri grontapu o gi yesi na a komando fu Yesus te den o kon makandra tapu satra 22 maart 2008 baka te son dongo, fu memre a dede fu Yesus Krestes (Luk. 22:19; 1 Kor. 11:23-26). Wi o du disi, fu di wi de nanga tangi gi ala den sani di pasa tapu a dei disi, 1975 yari pasa. Fu di Yesus sori fu de getrow na wan volmaakti fasi aladi a dede na wan ogri-ati fasi na wan pina postu, meki a santa a nen fu en Tata, èn na so fasi a gi a moro bun piki na Satan di e spotu Gado.—Yob 1:11; Odo 27:11.
2 A brudu fu Yesus meki taki a nyun frubontu kon abi krakti. Na so fasi Gado teki sondu libisma leki en manpikin, so taki den kan abi a howpu fu tiri makandra nanga Krestes na ini en hemel Kownukondre (Yer. 31:31-34; Mark. 14:24). Boiti dati, Gado sori taki a lobi libisma trutru di a gi en lobi Manpikin leki wan ofrandi, soleki fa Yesus fruteri Nikodeimus.—Yoh. 3:16.
3. Sortu wini den sma di e kon na a Memrefesa o kisi?
3 Gi trawan wan kari: Na ini Wi Kownukondre diniwroko fu yanuari, wi kisi a rai fu skrifi den nen fu den sma di wi wani gi wan kari èn fu gi ibriwan fu den sma disi a kari. Yu bigin fu gi den sma dati wan kari kaba? Yu e seti sani fu teki prati so furu leki yu kan na a wroko di o bigin tapu 1 maart, te wi o gi sma wan kari fu kon na a Memrefesa? Den sma di o de drape fu arki a lezing di teki puru fu Bijbel, kan kisi wan moro tranga bribi na ini a lusu-paiman, èn dati o meki taki den kan kisi têgo libi.—Rom. 10:17.
4. Fu san ede wi musu kon fruku na a Memrefesa?
4 Ala sma di man kon fruku na a Memrefesa, musu seti sani fu du dati so taki den kan gi den sma di teki a kari, wan switikon. Fu di furu sma e kon na a Memrefesa, meki a de tumusi prenspari taki wi e poti prakseri na den nyunwan èn sosrefi na den sma di e kon wanwan leisi na den konmakandra.
5. Fa yu kan sreka yu ati gi na okasi disi?
5 Sreka yu ati: A pikin buku Ondrosuku den Buku fu Bijbel ala dei—2008 èn a Kalender fu 2008 abi wan spesrutu schema pe skrifi sortu pisi fu Bijbel wi musu leisi na a ten fu a Memrefesa. A leisipisi disi o bigin tapu 17 maart. Te yu leisi den prenspari sani di pasa tapu den lasti dei fu Yesus en libi na grontapu, dan dati o yepi yu fu sreka yu ati gi a Memrefesa di wi o hori (Esra 7:10). Te wi e begi èn e denki dipi fu den Bijbel tori disi, dan wi o kisi moro warderi gi a lobi di Yehovah nanga en Manpikin sori, di den sorgu taki a lusu-paiman pai.—Ps. 143:5.
6. Sortu wini wi o kisi te wi e du muiti fu abi moro warderi gi a lusu-paiman?
6 Meki wi sreka wisrefi bun gi a Memrefesa di e kon, èn meki wi yepi trawan fu sreka densrefi bun tu gi a prenspari okasi disi. Efu wi de nanga tangi te wi o memre a lusu-paiman fu Yesus, dan dati sa meki taki wi kisi wan moro bun matifasi nanga Yehovah èn nanga en Manpikin (2 Kor. 5:14, 15). Disi sa meki tu taki wi o handri neleki den, fu di wi no o prakseri wisrefi nomo, ma wi o sori lobi gi trawan.—1 Yoh. 4:11.