Hori a fesa foe a dede di e gi howpoe tapoe têgo libi
1 Baka sondongo tapoe 6 april 1993, wi sa memre a dede foe a Meester Wrokoman foe libi (Tori. 3:15). Foetroe, a fiti srefisrefi foe wi memre a libi èn dede foe Jesus Krestes. Wi troetroe howpoe tapoe libi didon na a broedoe foe Jesus di ben lon gi wi.
2 A Memrefesa e poti krakti tapoe a warti foe a dede foe Krestes ini a kaba foe a kontroe foe Jehovah en prakseri. A prakseri dati abi na ini toe a gi foe a volmaakti libisma ofrandi di ben de fanowdoe foe bai den bakapikin foe Adam fri, èn foe meki a kan taki miljardmiljard sma sori bribi èn libi foe têgo na wan paradijs grontapoe.—Joh. 3:16.
3 Ala sma di lobi waarheid nanga libi e loekoe nanga froewakti na a hori foe na Avondmaal foe Masra nanga san den e gi jesi na a gebod foe Jesus (Luk. 22:19). San wi leki aparti sma kan doe foe sori wi warderi gi a seti foe na ofrandi paiman foe Krestes? Foe erken a wartifasi foe a memrefesa, wan boen orga de toemoesi prenspari. Sortoe sani joe e sreka gi a spesroetoe okasi disi?
4 Sreka a fesi de fanowdoe: Wi wani gi a djaranti taki ala memre foe na osofamiri de drape. Wi moesoe de sreka toe na jeje fasi foe di wi e leisi èn go denki dipi foe den bijbel pisi di skrifi na tapoe a kalender foe 1993 gi 1 te nanga 6 april. A ben sa fiti foe gebroiki bodoi di e poti krakti tapoe a Memrefesa na ini wi persoonlijk studie nanga osofamiri-bijbelstudie sjatoe bifo 6 april. Meki plan foe doro froekoe èn tan wan pikinso baka te a Memrefesa kaba so taki joe kan gi wan switi odi na njoen sma di ben kon foe a fositron.
5 Ini den wiki bifo a Memrefesa, dan oenoe moesoe kari ala den sma di abi belangstelling èn di oenoe sabi foe kon na a fesa disi. Den kari tapoe papira sa de foe kisi ini gemeente na a srefi fasi fa den e seni den kon ala jari. Te joe e gebroiki den disi no frigiti foe taigi den sma di abi belangstelling a presi nanga a ten foe a fesa ini den birti. Meki wan lijst foe den sma di joe wani gi wan kari. A de so taki ala den sma di wani kon, abi oto foe tjari den kon? Efoe a no de so, dan san joe kan doe foe asisteri den? Efoe joe abi nofo presi ini joe oto, foe san ede joe no e aksi den owroeman efoe wan sma de di joe kan tjari?
6 Foe di disi de a moro prenspari fesa foe a jari èn wi e froewakti foeroe fisitiman, den owroeman sa moesoe foe sreka sani boen a fesi (1 Kor. 14:40). Wan wiki noso so bifo 6 april, den owroeman sa hori wan spesroetoe konmakandra nanga den brada di sa asisteri na a fesa, foe meki a de seiker taki den froestan san seti foe den sma sa sidon èn fa den sa langa a brede èn a win gi den. Efoe joe kisi a wroko foe asisteri na a ten foe a fesa leki wan dienstverlener noso wan sma di sa go lontoe nanga a brede nanga a win, joe sa sorgoe boen taki joe e doe leki fa den owroeman taki èn hori joesrefi na san seti ini den tori disi. Te den owroeman sa loekoe den sani foe memre den ini a boksoe na tapoe bladzijde 7, den moesoe loekoe boen taki ala den sani di seti gi den dienstverlener, den sma di e go lontoe nanga a brede nanga a win, a brede nanga a win srefi èn a takiman, seti boen a fesi.
7 Soso wan toe foe den brada foe Krestes tan abra na grontapoe ini a ten disi, èn ini a ten di de leti na wi fesi a fesa foe na Avondmaal foe Masra sa kon na wan kaba (1 Kor. 11:25, 26). So langa leki a de a grani foe wi foe doe so, dan meki na wan joisti fasi wi tan hori a fesa foe a dede di e gi howpoe foe têgo libi.