Tan taki: „Kon!”
1 Fa a de wan toemoesi moi seti di Jehovah ben meki nanga jepi foe a slakti-ofrandi foe Jesus! Ini disi wi e feni a gron foe ala san de fanowdoe foe meki sma kan de troetroe kolokoe (Joh. 3:16). A sari foe taki, ma toemoesi pikinso sma nomo kon sabi èn kon bribi steifi ini a waarheid disi. Tokoe, di ini en lobi a e broko ede gi a libisma famiri, Jehovah ben seti sani meki sma na ala sei kan kon sabi a boen njoensoe disi. Nanga jepi foe en Manpikin, Jesus Krestes, a ben gi pasi na ala sma foe feni kolokoe èn a howpoe foe libi têgo.—Joh. 17:3.
2 Doesoendoesoen jari langa, sma no ben sabi a Sma di ben sa bai a libisma famiri fri foe sondoe nanga dede. A ben de wan „santa kibritori” te di Krestes Jesus kon èn „skèin leti a tapoe libi èn krinfasi nanga jepi foe a boen njoensoe” (Rom. 16:25; 2 Tim. 1:10). Ini a fosi jarihondro den bakaman foe Jesus ben teki a meki bekènti foe a boen njoensoe a den tapoe; now wi di e libi ini njoen-modoten abi a bigi grani foe meki a srefi boen njoensoe disi bekènti. Te wi e meki a Kownoekondre njoensoe bekènti, wi e abi prati nanga Jehovah Gado, Jesus Krestes èn den brada foe Krestes, di e kari sma foe ala sortoe sociaal nanga ekonomia groepoe foe a libisma libimakandra di e taki: „Kon!” . . . teki a libi watra fri.”—Openb. 22:17.
3 A no de foe taki, a no ibriwan sma wani arki na a boen njoensoe disi. Toemoesi pikinso nomo e poti boen prakseri. Sonwan foe den e behandel den dienstknekti foe Gado grofoe, di e kari den foe abi wini foe a watra foe waarheid di e gi libi. Ala di a de so, nanga a krakti foe Jehovah, wi e hori doro ini a wroko disi. Wi sabi taki a wani di wi wani taki waarheid nanga a jepi foe ibri sma di wan jere, boen gi Jehovah èn e tjari en blesi kon.
4 Ini oen diniwroko foe maart, wi wani gi deki-ati na sma di e soekoe waarheid foe leisi Na Openbaring-boekoe èn feni prisiri ini a howpoe di a e meki bekènti. Den sa feni foeroe blesi efoe den doe so. Te joe loekoe en boen a boekoe openbaring e taki foe a ten di e kon—foe den nanga so toe foe oenoe. Son sma di de now sma di gi densrefi abra foe dini Jehovah ben bigin kisi belangstelling gi a waarheid baka di den ben leisi froeklari foe a boekoe openbaring ini wan foe den boekoe foe a Genootschap. Di no so langa pasa wi ben meki wan finifini studie foe Na Openbaring-boekoe gi oensrefi wi kan meki den sma nanga wan eerlijk ati di e angri foe waarheid kon froestan foe en. Te wi feni den sortoe sma disi ini wi diniwroko, wi sa proeberi foe poti krakti tapoe wan noso toe sani ini Na Openbaring-boekoe foe kan sori den a warti fasi foe en. Boiti dati, wi kan taki toe foe o krin a e froeklari bijbel profeititori di ben kon troe ini a di foe twenti jarihondro disi, so leki na aprati rèi foe den simbôlis asi foe san skrifi ini den siksi kapitel foe openbaring.
5 A de toemoesi joisti foe oenoe taki foe den libi sani di Jehovah seti gi libisma famiri te wi e sreka gi a Memrefesa foe a dede foe Krestes tapoe 6 april. Efoe sma wani arki noso den no wani arki, wi sa hori doro ini a toewijzing di wi kisi foe Gado foe go doro foe tjari a kari di e gi deki-ati gi iniwan sma di wani dati: „Kon! . . . teki a watra foe libi fri.”