Wi o studeri na Anbegi Gado-buku

Wi o studeri a buku Anbegi a wan-enkri tru Gado na a Gemeente Bukustudie. A buku disi sa yepi wi fu kisi moro lobi nanga warderi gi Yehovah èn gi en organisâsi. Fa wi kan kisi trutru wini te wi sa studeri na Anbegi Gado-buku?

A fasi fa wi o hori a studie: Fu di wi sa studeri wan heri kapitel ibri wiki, meki den Bukustudie-opziener sa musu prati a ten na wan koni fasi. Fu di den wani taki nofo ten tan abra gi den moro prenspari pisi fu a kapitel, meki den no sa taki tumusi langa fu den bigin paragraaf. Na a kaba fu ibri kapitel, yu abi wan faki nanga wan tu aksi. Na a kaba fu ibri studie, den Bukustudie-opziener o taki syatu fu den aksi disi fu luku baka san wi leri. Disi sa yepi den wan na a Bukustudie fu memre den moro prenspari penti.

Na ini sowan afu fu den kapitel fu na Anbegi Gado-buku, aksi de di skrifi pikinso moro fara fu a lanki na a kruktu-anusei fu a bladzijde. Den aksi disi na fu yepi wi fu prakseri dipi fu tori èn fu gi piki tapu den. Wan eksempre de fu feni na tapu bladzijde 48 nanga 49. A no de fanowdu fu leisi den aksi disi makandra nanga den paragraaf. Te na opziener o luku den aksi nanga a grupu, dan a sa meki wan sma leisi den bijbeltekst di kari èn a sa taki fu den efu nofo ten de.

Sreka na fesi: Wi musu sreka wisrefi bun gi a studie. Dati no wani taki dati wi musu hari strepi nomo na ondro den piki. Te wi e begi fosi èn te wi e prakseri dipi fu den bijbeltekst di kari, dan wi no sa de srekasreka wawan fu gi piki, ma wi sa sreka wi ati sosrefi (Esra 7:10). Wi alamala kan gi makandra deki-ati, fu di wi e gi piki na wan fasi di fiti.—Rom. 1:11, 12.

A studeri di wi o studeri na Anbegi Gado-buku sa yepi wi fu kon krosibei na Yehovah èn a sa sreka wi fu yepi opregtisma fu kon dini En makandra nanga wi (Ps. 95:6; Yak. 4:8). Meki wi alamala nyan bun dorodoro fu a moi seti disi di sa yepi wi fu tan abi wan bun matifasi nanga Gado.