Pristeri na boen njoensoe — Nanga na Openbaring-boekoe
1 Den manpikin foe Kora ben skrifi foe Jehovah: „Bika na Gado disi na wi Gado te ten di no abi skotoe, ija, foe têgo. Ensrefi sa tiri wi te leki wi dede” (Ps. 48:14). Den getrow man dati ben froetrow doronomo na tapoe Jehovah èn ben handri den heri libi langa akroederi den rai foe Gado. Fa a de wan toemoesi boen eksempel gi wi! Den wan di Jehovah e tiri na ini a ten disi, e ondrofeni kowroe-ati èn a krin di sani e kon a krin gi den (Jes. 58:11). Den e wai pasi gi na lòt foe den wan di e waka na baka den „breni tjariman” foe na gadolowsoe seti foe sani disi, di e tjari den bakaman foe den go na wan „olo” foe sari nanga broeja. — Mat. 15:14.
2 Tiri foe Gado de spesroetoe prenspari na ini a ten disi, now di na grontapoe lontoe wi e kon broeja èn kefarlek moro nanga moro. Foeroe sma kon skreki èn e lostoe foe kisi piki di e gi satisfaksi. A e fiti so boen heri boen taki wi e gi den deki-ati foe leisi na Openbaring-boekoe (Bakratongo)! Na publikâsi disi e gi tiri foe Gado foe di a e froeklari den sani di pasa na grontapoe, èn di e seki sma, na ini a leti foe den profeititori foe Openbaring. Den sortoe bodoi disi e meki sani kon moro lekti gi sma èn e gi den boen tiri ini a tori foe na fasi fa sma di e libi na ini a ten disi, kan libi wan libi di Gado e feni boen.
TJARI NA OPENBARING-BOEKOE KON NA DEN PRAKSERI
3 Wan spesroetoe sani foe na Openbaring-boekoe (Bakratongo) di e naki joe ati na den prenki, di de wan bigi jepi foe leri sma. Meki gebroiki foe den prenki disi nanga boen bakapisi te joe e pristeri na boekoe na ini a velddienst. Na tapoe bladzijde 302 foe eksempel, wan prenki de di e agersi den blesi foe na Kownoekondre na wan libilibi fasi. Disi na a fasi fa wan sma di e teken, e sori san den taki na ini 2 Petrus 3:13 nanga Openbaring 21:4, den toe tekst foe wi Tori foe takimakandra.
4 Baka di wi taki soema wi de, wi ben sa kan bigin wan takimakandra na a fasi disi: „Na marki foe na fisiti foe wi na foe taki foe san den sani wani taki di e pasa na ini a grontapoe lontoe wi nownow. Son grontapoe fesiman e prakseri taki wi tanapoe na a marki foe wan njoen ten foe vrede. Joe e prakseri taki dati de so? [Meki na oso sma piki.] Ala di tirimakti nanga boen bakapisi kande e loesoe wan toe politiek kesekese, a e gersi taki na fasi fa den sma de nanga makandra èn na tranga di e feni presi, foeroetron e gens na proeberi di libisma e proeberi foe tjari vrede kon. Ma na ini 2 Petrus 3:13 na bijbel e djaranti wi taki wan njoen grontapoe seti foe sani sa kon di sa wroko na ondro wan hemel tirimakti. [Leisi den tekst èn opo na boekoe na tapoe bladzijde 302.] Djaso wan sma di e teken ben meki wan prenki foe san bijbel e taki na ini a tekst disi. San na ini a prenki disi, joe e feni e hari joe? [Gi na sma ten foe piki.] Foe den situwâsi di sa de na grontapoe, na bijbel e taki moro fara na ini Openbaring 21:4: [leisi na tekst na ini paragraaf 6 na tapoe bladzijde 303.] Srefi dede no sa pori na vrede di Gado sa tjari kon.” Na tapoe bladzijde 9-15 foe na Taki-go-taki-kon-boekoe (Bakratongo) joe kan feni difrenti inleiding di fiti gi na kontren foe joe.
5 Ala di wi wani poti krakti tapoe den Kownoekondre blesi te wi e pristeri na boen njoensoe, wi moesoe jepi so srefi sma di abi belangstelling foe froestan na tranga fanowdoe boskopoe di Jesus Krestes ben meki bekenti na ini a boekoe Openbaring. Foe dati-ede meki wi sa tapoe na takimakandra foe wi nanga wan tranga fanowdoe deki-ati èn wan pristeri foe jepi opregti sma, foe kon froestan taki na seti foe sani disi èn den wan di e hori baka gi en, heri-esi sa kisi kroetoe.
6 Den profeititori foe Openbaring na wan toemoesi boen fonten foe feni kowroe-ati nanga prisiri. Jehovah e gi wan kari na ala opregti sma foe waka na baka na tiri foe en èn kisi wini gi densrefi. Meki wi fajafaja pristeri na Openbaring-boekoe (Bakratongo) so taki ala sma kan waka na baka na koni tiri foe Jehovah.