Jepi den wan di abi belangstelling foe froestan sani
1 Na apostel Petrus ben erkèn taki son sani di ben skrifi na ini bijbel „moeilek foe froestan” (2 Petr. 3:16). Foeroe sma ben e prakseri a srefi fasi foe a boekoe Openbaring. Ma a boekoe De Openbaring — Haar grootse climax is nabij! (Na Openbaring — En moro bigi heimarki di krosibei!) tjari krinkrin kon na fesi san a boekoe Openbaring wani taki. Fa wi kan jepi den wan di abi belangstelling foe gebroiki en tapoe a moro boen fasi?
2 Efoe joe ben taki foe Openbaring 1:3 na joe fosi fisiti, a prakseri disi ben sa kan wiki belangstelling baka:
◼ „A leisi di pasa, wi ben taki fa a froestan di wi e froestan a boekoe Openbaring kan tjari kolokoe kon. Ma sowan kolokoe no e kon foe ensrefi. A e aksi toe sani foe wi di de nomonomo fanowdoe: Wi moesoe studeri bijbel, èn wi moesoe doe san wi e leri.” Leisi èn gi komentaar tapoe Jakobus 1:25. Drai go na paragraaf 9 tapoe bladzijde 8 èn taki fa a boekoe Openbaring kan jepi wi foe leri fa foe de kolokoe na ini wan njoen grontapoe paradijs, te wi e froestan en.
3 Efoe joe ben taki foe Johanes 17:3 na joe fosi fisiti, joe ben kan poti krakti tapoe a fanowdoe foe teki moro sabi foe bijbel, foe di joe e taki:
◼ „A lasti leisi di mi ben de djaso, wi ben leisi na ini Johanes 17:3 taki a teki foe sabi foe Gado kan tjari têgo libi kon gi wi. Ma joe ben sa wani foe libi foe têgo na ini a sortoe grontapoe di wi e libi na ini nownow? [Gi okasi foe piki.] Moro foeroe sma no ben sa wani dati. Foe dati ede, wi kan prisiri te wi e jere san Gado pramisi.” Drai go na paragraaf 6 na tapoe bladzijde 303 èn leisi Openbaring 21:4 èn baka dati, taki fa grontapoe sa gersi te „den fosi sani pasa gowe”. Aksi foe drai go baka foe taki moro fara.
4 Efoe joe ben gebroiki a prenki tapoe bladzijde 302 foe sori taki Gado Kownoekondre sa tjari wan kaba kon na banawtoe, joe ben kan opo a boekoe tapoe a bladzijde dati baka èn taki:
◼ „Wi ben taki foe den blesi di prenki djaso, di sma sa njan boen foe den na ondro a tiri foe Gado Kownoekondre. San joe denki taki wi moesoe doe efoe wi wani foe libi na ondro a Kownoekondre dati? [Gi okasi foe piki.] Son sma na ini bijbel ten, ben poti wan toemoesi boen eksempre di ben sa gi wi winimarki foe waka na baka.” Leisi Tori foe den Apostel 17:11, pe den e poti krakti tapoe a fanowdoe foe ’ondrosoekoe den Boekoe foe bijbel ala dei’. Taki dati den Kotoigi foe Jehovah e jepi opregti sma na ini a libimakandra foe studeri a Wortoe foe Gado èn foe froestan en moro betre.
5 Efoe joe ben libi a traktaat „Zal deze wereld blijven bestaan”? (A grontapoe disi sa tan?) na wan ososma na baka di no ben abi ten foe taki, dan joe ben kan gebroiki a fasi disi foe bigin:
◼ „Di mi ben kon djaso no so langa pasa, joe no ben abi ten. Mi ben libi wan traktaat na joe di ben poti na aksi efoe grontapoe sa tan na mindri foe den broeja ten disi. Wi e leisi Openbaring 21:4 di skrifi djaso na ini a boekoe disi, De Openbaring — Haar grootse climax is nabij! [Leisi en na ini paragraaf 6 tapoe bladzijde 303.] A prenki disi [tapoe bladzijde 302] e gi joe wan idea fa a sa de te ’Gado sa poeroe ala den watra-ai foe wi ai’. A boekoe disi e gi boeweisi di e overtoigi taki a pramisi disi sa kon troe na ini wan ten di no de so langa moro srefisrefi. Efoe joe ben sa wani foe leisi en, dan mi ben sa wani foe libi na eksemplaar disi gi joe na baka.”
6 Efoe joe feni sma di abi belangstelling, dan kande joe sa poti a prakseri tapoe a boekoe Joe kan libi foe têgo na ini wan paradijs na grontapoe èn gebroiki en foe bigin wan studie. Joe sa feni seiker foeroe prisiri foe jepi „den wan sondro ondrofeni kon froestan sani”. — Ps. 119:130.