Pristeri a boen njoensoe na wan serjoesoe fasi sondro foe draidrai
1 Wi e sori wi dipi warderi gi den pramisi foe a Kownoekondre foe Gado te wi e teki prati nanga wi heri ati na ini a kresten diniwroko. Wi moesoe teki prati na ini a wroko disi na wan serjoesoe fasi sondro foe draidrai. Foe san ede? Bika den wrokoman no foeroe, a kaba foe a godelowsoe seti foe sani disi e kon moro krosibei èn a libi foe den sma na ini wi kontren de ini kefar (Esek. 3:19; Mat. 9:37, 38). So wan hebi frantiwortoe e aksi taki wi moesoe doe ala wi moeiti na ini a diniwroko. Fa wi kan sori taki na wan serjoesoe fasi sondro foe draidrai wi e doe a velddienst wroko foe wi? Te wi e sreka boen pristeri na fesi, te wi de fajafaja e soekoe sma awinsi pe den de foe feni, te wi e gebroiki wan raport finifini foe ala sma di sori belangstelling, te wi e go wantewante baka na den wan di ben abi belangstelling, èn te wi e hori na prakseri taki foe di a diniwroko foe wi abi foe doe nanga libi, dan wi moesoe si en leki wan serjoesoe sani. Den rai di e kon now kan jepi te wi e sreka foe pristeri a boen njoensoe na wan serjoesoe fasi sondro foe draidrai na ini februari. A pristeri sa de a boekoe De Openbaring—Haar grootse climax is nabij! (Na Openbaring—En moro bigi heimarki de krosibei!)
2 Joe ben sa kan bigin wan takimakandra te joe e taki sjatoe foe wan toe problema di sma na ini a libimakandra abi, èn dan joe ben kan taki:
◼ „Foeroe sma e bribi taki wan Gado de, ma den e aksi densrefi: ’Sortoe tamara a wani gi wi?’ Fa joe ben sa piki na tapoe dati? [Gi okasi foe piki.] Joe ben sabi taki bijbel e taki krinkrin foe a wani foe Gado gi a libisma famiri èn den sani di a e doe foe meki dati kon troe?” Drai go na bladzijde 301 na ini na Openbaring-boekoe. Leisi Openbaring 21:1 na ini paragraaf 1 èn leisi baka dati a froeklari di gi foe dati na a lasti pisi foe paragraaf 2. Drai go na a prenki na tapoe bladzijde 302 foe sori san dati wani taki gi a tamara foe wi. Leisi Openbaring 21:4 na ini paragraaf 6. Efoe a sma handri boen, pristeri a boekoe. Seti sani foe go baka na tapoe wan ten di fiti, foe go doro nanga a takimakandra.
3 Joe ben kan go baka foe taki foe a fosi takimakandra di joe ben abi foe Openbaring 21:1, 4 nanga a sjatoe pristeri disi:
◼ „Na a lasti fisiti foe mi wi ben taki foe a pramisi foe Gado foe sreka wan njoen libimakandra na grontapoe gi libisma. [Poti prakseri baka na tapoe a prenki tapoe bladzijde 302 na ini na Openbaring-boekoe.] Joe ben sa wani den famiri foe joe njanboen foe den sortoe situwâsi disi? [Gi okasi foe piki.] Na aksi de: O troe den pramisi foe Gado de? Grantangi, loekoe san ensrefi e taki.” Leisi Openbaring 21:5, 6a na ini paragraaf 8 na tapoe bladzijde 303. Poti na aksi di skrifi gi paragraaf 9 na tapoe bladzijde 304, èn leisi a piki èn so srefi a lasti lin foe a paragraaf. Taki foe a pristeri di wi e pristeri sma wan fri bijbelstudie. Seti sani foe demo disi baka ten.
4 Foe di foeroe sma e broko den ede nanga den foeroe problema di e miti a libisma famiri, joe ben sa kan taki wan sani leki disi na a fosi fisiti:
◼ „Pikinmoro ala sma e broko den ede nanga den problema di wi abi na ini wi libimakandra. [Kari wan toe.] Foeroe tintenti jari kaba politiekman pramisi foe tjari loesoe kon di e tan, èn son wan proeberi foe doe so toe. San joe denki taki na den sani di e meki a situwâsi e kon moro takroe? [Gi okasi foe piki.] Bijbel e gi wan froeklari di a moro bigi pisi foe sma noiti no prakseri. A boekoe Openbaring e taki foe wan feti di ben feni presi na hemel. Loekoe a bakapisi, soleki fa a skrifi na Openbaring 12:9.” Leisi a vers, èn drai go baka dati na bladzijde 182 na ini na Openbaring-boekoe. Gebroiki a prenki foe froeklari san Satan abi foe doe nanga den afersi na grontapoe. Efoe a sma sori opregti belangstelling, pristeri a boekoe dan. Seti sani foe go baka èn foe taki fa Gado sa loesoe den problema foe a libisma famiri.
5 Efoe joe ben pramisi foe go baka foe taki foe den loesoe foe Gado gi den problema foe a ten disi, dan joe ben sa kan proeberi foe bigin na a fasi disi:
◼ „Mi ben doe spesroetoe moeiti foe kon baka so taki wi ben kan go doro nanga a takimakandra foe wi foe a troetroe loesoe gi den problema di e miti a libisma famiri. Na a lasti fisiti foe mi, wi ben si taki bijbel e tjari kon na krin taki Satan Didibri na a sma di e kori ala libisma na grontapoe. Foe di a de wan jeje mekisani di hei moro libisma, joe prakseri taki wan fasi de foe poeroe a krakti di a abi? [Gi okasi foe piki.] Grantangi, loekoe san bijbel e taki.” Leisi èn froeklari Openbaring 20:1-3. Gebroiki a prenki na tapoe bladzijde 4 nanga 5 foe a Sabi-boekoe, foe sori fa den kondisi sa de sondro a krakti foe Satan. Pristeri wan bijbelstudie èn doe moeiti foe bigin wantewante.
6 Foe di someni sma abi belangstelling gi a libikontren, joe ben kan taki wan sani leki disi foe bigin wan takimakandra:
◼ „Wi si taki pikinmoro ala sma e broko den ede nanga a doti di sma e doti a loktoe, watra èn a njanjan foe wi. Na ini wan toe kondre a situwâsi foe a libikontren de wan kefar kaba gi a libi foe sma. Foe di Gado na a Mekiman foe grontapoe, san joe denki A o doe nanga a tori disi? [Gi okasi foe piki.] Bijbel e taki dati Gado o aksi frantiwortoe foe a fasi fa wi e gebroiki a planeiti. [Leisi Openbaring 11:18b.] Prakseri taki joe e libi na tapoe wan grontapoe di de fri foe ala doti!” Sori a pramisi foe Gado gi wan paradijs, soleki fa a skrifi na Openbaring 21:3, 4. Sori a prenki na tapoe bladzijde 302 na ini na Openbaring-boekoe. Efoe joe si taki a sma abi nofo belangstelling, pristeri a boekoe èn seti sani foe go baka.
7 Te wi e gobaka na wan sma di sori belangstelling gi wan paradijs grontapoe, joe ben sa kan taki:
◼ „Na a lasti fisiti foe mi, wi ben agri taki foe loesoe a problema foe wan doti grontapoe, Gado o abi foe kon ini a tori foe libisma. Ma na aksi de: San wi moesoe doe foe pasa libilibi go na ini a regtfardiki njoen grontapoe di Gado sa meki?” Leisi Johanes 17:3. Aksi na ososma foe meki gebroiki foe a fri bijbelstudie programa foe wi foe kisi a spesroetoe sabi disi.
8 Fa a de wan bigi grani taki Jehovah e gebroiki wi leki den disiten koti-wrokoman èn foe doe wan preikiwroko di e kibri a libi foe sma! Meki wi alamala tan abi foeroe foe doe na ini a pristeri foe a boen njoensoe na wan serjoesoe fasi sondro foe draidrai ’foe di oenoe sabi taki a wroko foe oenoe no de foe soso’.—1 Kor. 15:58.