Gi ibri sma di e dreiwatra wan kari
1 Soleki fa a profeiti Amos ben taki na fesi, dan a libisma famiri na ini a ten disi e pina foe „no wan dreiwatra foe watra, ma foe sma jere a wortoe foe Jehovah” (Amos 8:11). Foe jepi sma di de na ini a drei situwâsi disi na jejefasi, wi e froeteri den foe den sani di Gado seti foe dresi libisma di e gi jesi foe sondoe nanga dede, èn a lasti kapitel foe Openbaring e prenki den sani disi leki „wan liba foe libi watra”. Wi abi a grani foe gi ibriwan sma di e dreiwatra foe regtfardikifasi wan kari foe „teki a watra foe libi foe soso” (Openb. 22:1, 17). Fa wi kan doe disi na ini februari? Foe di wi e pristeri den wan di abi troetroe belangstelling a boekoe De Openbaring — Haar grootse climax is nabij! (Na Openbaring — En bigi heimarki de krosibei!) Kande joe ben sa wani proeberi den pristeri disi:
2 Foe di foeroe sma e broko den ede nanga gosontoe afersi, joe ben sa kan feni a fasi disi foe bigin, boen:
◼ „Foeroe sma e broko den ede nanga a hei di den kostoe foe boen sorgoe na gosontoe sei e kon moro hei. Kande joe denki pikinso foe a tori disi. [Gi okasi foe piki.] Wan loesoe di e tan, de gi a problema disi? [Wakti a piki.] Djaso wan moi howpoe de.” Leisi Openbaring 22:1, 2. Baka dati, opo na Openbaring-boekoe èn sori go na a prenki na tapoe bladzijde 308 nanga 309, èn gebroiki paragraaf 22 na tapoe bladzijde 311 foe tjari a prenki kon na krin. Tapoe foe di joe e taki: „A poeblikâsi disi e taki foe ibri vers na ini Openbaring.” Efoe na ososma e sori troetroe belangstelling, dan pristeri en a boekoe, ala di joe e taigi en san na a bijdrage. Seti sani foe go baka.
3 Te joe e go baka, joe kan go doro nanga joe takimakandra foe di joe e taki:
◼ „A lasti leisi di mi ben de djaso, wi ben taki foe wan loesoe di e tan gi problema na gosontoe sei. Joe denki taki oiti wan ten sa kon pe no wan sma sa siki? [Gi okasi foe piki.] Loekoe a froeklari disi di e hari sma prakseri.” Leisi Jesaja 33:24. Dan go na lès 5 na ini a San Gado e aksi-brochure, èn taki foe paragraaf 5 nanga 6, ala di joe e gebroiki den aksi na a bigin foe a lès di e kroederi nanga dati èn e soekoe wan toe foe den tekst di kari drape. Taki dati a poeroe di Gado sa poeroe siki nanga dede, de wan pisi foe a kontroe foe a prakseri di a ben abi nanga grontapoe biginbigin. Seti sani foe go baka foe taki makandra foe paragraaf 1-4 nanga 7 na ini a srefi lès.
4 Efoe wan njoensoe tori di e taki foe wan sma di dede toemoesi froekoe de na a prakseri foe sma, joe ben sa kan proeberi a fasi disi foe bigin:
◼ „Kande joe jere foe [taki foe a njoensoe tori.] Te sma e lasi den libi toemoesi froekoe na wan sari fasi, dan foeroe sma e aksi densrefi sortoe trowstoe den kan gi na den famiri foe den wan di lasi den libi. San joe e prakseri?” Gi okasi foe piki. Baka dati, go na bladzijde 299 na ini na Openbaring-boekoe, èn sori a prenki foe na opobaka. Go doro foe di joe e taki: „Foeroe sma e froewondroe te den e kon sabi taki regtfardiki nanga onregtfardiki sma sa kisi wan opobaka na ini wan paradijs na grontapoe. [Leisi Tori foe den Apostel 24:15 soleki fa a teki skrifi na ini paragraaf 9 tapoe bladzijde 297, èn tjari kon na krin san dati wani taki, soleki fa joe kan feni dati na ini paragraaf 10.] A boekoe disi e taki foe foeroe tra moi èn finifini tori foe a prakseri di Gado abi gi a ten di e kon. Efoe joe ben sa wani leri moro foe disi, joe kan kisi na eksemplaar disi.” Seti sani foe go baka, ala di joe e poti prakseri na tapoe den spesroetoe sani di e hari a prakseri foe a sma èn den sani di a e broko en ede nanga den.
5 Te joe e go baka, dan fiti joe pristeri na a ososma. Kande joe ben kan taki:
◼ „A lasti leisi di wi ben taki, mi ben warderi a sani di joe ben taki foe a prakseri di Gado abi nanga grontapoe. [Taki baka san a sma ben taki.] Mi feni wan toe sani di skrifi dja di mi denki taki joe sa feni den moi.” Opo a San Gado e aksi-brochure na lès 5. Leisi èn taki foe ala den paragraaf na ini a lès dati di na ososma e sori belangstelling gi. Baka di joe seti wan ten foe go baka foe kan go doro nanga a lès, gi na ososma wan strooibiljet di e sori den ten tapoe san a gemeente abi konmakandra. Froeteri en foe a poebliki konmakandra, èn gi en wan kari foe fisiti dati.
6 Efoe joe wani wan moro makriki pristeri di e poti spesroetoe prakseri na tapoe wan traktaat, joe ben kan taki wan sani leki disi:
◼ „Mi ben sa wani foe gi joe a traktaat disi di abi a nen: Libi na ini wan njoen grontapoe pe vrede de.” Gi na ososma a traktaat, èn aksi en foe leisi makandra nanga joe te joe e leisi a fosi paragraaf. Gi en okasi foe piki na tapoe na aksi di poti na ini a lasti zin. Leisi a di foe toe paragraaf, èn baka dati, go na a prenki na tapoe bladzijde 302 na ini na Openbaring-boekoe. Go doro foe di joe e taki: „A boekoe disi e gi moro moi bijbel pramisi gi a ten di e kon. Efoe joe sa wani leisi en, joe kan kisi na eksemplaar disi.” Seti sani gi wan gobaka.
7 A gi di wi e gi trawan wan kari di e hari a prakseri foe den, kan meki taki den e kon foe teki den libi watra, di de foe kisi now na Jehovah. Foe dati ede, meki wi taigi ibri sma di e dreiwatra: „Kon!” — Openb. 22:17.