Blesi Jehovah „a heri dei”
1 Psalm 145:2 abi wan pramisi na ini di Kownoe David ben gi Jehovah: „A heri dei mi sa blesi joe, èn mi sa prèise joe nen te ten di no skotoe, srefi foe têgo.” Wi srefi, abi reide foe blesi èn prèise wi hemel Tata! Ma, fa wi kan waka na baka na eksempre foe David foe hori a soevereiniteit foe Jehovah hei „a heri dei”?
2 Foeroe wi ati nanga warderi gi Jehovah: Te wi e studeri a Wortoe foe Gado doronomo, dan dati e meki a tangi foe wi kon moro bigi foe san Jehovah doe, e doe, èn sa doe gi wi ete. A gro di wi e gro na ini warderi foe den toemoesi boen sani di a doe, e meki wi e si taki wi de fajafaja foe taki foe a boen fasi foe en (Ps. 145:7). Wi sa prèise Jehovah fajafaja na tapoe ala okasi di fiti.
3 Prèise Jehovah na ini takimakandra di joe abi ala dei: Te wi e taki nanga birtisma, skoromati, wrokokompe èn tra sma di wi e kontakti ala dei, dan wi kan feni okasi foe prati a howpoe foe wi nanga den. Wan birtisma kan taki foe a broko-ede di a abi nanga na ogridoe na ini a libimakandra; wan skoromati kan broko en ede foe a fowtoe fasi fa sma e gebroiki drug noso foe soetadoe; wan wrokokompe kan taki fa a e denki foe wan politiek tori. Wi kan sori go tapoe den gronprakseri èn den pramisi na ini a Wortoe foe Gado di e sori a joisti pasi di wi moesoe teki now èn a loesoe gi den problema disi te foe kaba. Den sortoe wortoe disi di taki na a „joisti ten” kan de wan blesi! — Odo 15:23.
4 Taki foe Jehovah alaten: A sma nanga dipi warderi gi Jehovah wani foe prati a boen njoensoe nanga someni sma leki a kan (Ps. 40:8-10). Nanga disi ini prakseri wi moesoe aksi wisrefi: ’Mi e doe ala san den situwâsi di mi de na ini sa gi mi pasi foe doe?’ Foeroe sma ondrofeni taki nanga wan toe kenki di de reidelijk, den man tron gewoon pionier. Efoe a situwâsi san wi de na ini now no e gi pasi foe dati, wi kan gi wi nen leki jepi-pionier? Foe di a ten foe a Memrefesa di e doro now, na wan ten foe moro aktiviteit, dan den moen maart nanga april ben sa de moi ten foe doe moro ini a diniwroko foe wi, foe di wi e dini leki jepi-pionier.
5 Jepi den njoenwan foe moksi densrefi nanga wi foe blesi Jehovah: A hori di wi e hori a Memrefesa foe a dede foe Jesus, e memre wi ala ten foe den reide foe de Jehovah tangi èn foe prèise En nen. Disi spesroetoe na wan boen ten foe gi den bijbelstudenti foe wi deki-ati foe moksi nanga wi foe taki na poebliki foe a de di Jehovah de Kownoe. Gi den tranga foe poti na ini begi a sani di skrifi na ini paragraaf 9-11 tapoe bladzijde 252-253 na ini a boekoe Joe kan libi foe tego na ini wan paradijs na grontapoe. Efoe den doro den markitiki, den no abi reide foe no bigin nanga preiki, nomo foe di den no abi nofo ondrofeni. Bekwaam preikiman de foe sori den fa wi e doe a Kownoekondre-preikiwroko. Efoe den njoenwan kan teki deki-ati foe taki sondro frede foe a boen njoensoe, dan den kan abi a froetrow taki Gado sa jepi den. — Tori. 4:31; 1 Tes. 2:2.
6 Wi e tjari têgo winimarki gi wisrefi èn so srefi gi trawan te wi e soekoe foe blesi Jehovah a heri dei.