Taki nanga trawan fu „a leti fu grontapu”

1. Fu sortu bigi leti Gado Wortu ben taki na fesi, èn sortu okasi e poti spesrutu prakseri na a leti dati?

¹ Yehovah ben taki na fesi nanga yepi fu a profeiti Yesaya: „A pipel di ben e waka na ini dungru, si wan bigi leti. Fu a sei fu den wan di ben e libi na ini a kondre fu hebi dungru, leti srefi skèin na den tapu” (Yes. 9:2). Sma ben si a „bigi leti” dati na ini a fasi fa Gado en eigi manpikin, Yesus Krestes, ben e tyari ensrefi. A preikiwroko di a ben du na grontapu èn den wini di na ofrandi fu en tyari kon, meki taki sma komoto na ini dungru na yeye fasi. Na ini den dungru ten disi, sma abi a leti disi fanowdu. A Memrefesa e gi wi wan spesrutu okasi fu taki nanga trawan fu „a leti fu grontapu” (Yoh. 8:12). A yari di pasa, milyunmilyun sma ben sori taki den abi bribi, fu di den kon makandra nanga wi fu gi yesi na Yesus, di ben komanderi: „Tan du disi fu memre mi” (Luk. 22:19). Heri esi wi sa hori a Memrefesa fu a yari disi. Fa wi kan meki sma poti moro prakseri na a bigi leti di Yehovah skèin?—Fil. 2:15.

2. Fa wi kan kisi moro warderi gi a lusu-paiman, èn san sa de a bakapisi fu dati?

² Kisi moro warderi: A ten fu a Memrefesa na wan yoisti ten fu prakseri dipi fu a bigi lobi di Yehovah nanga Yesus sori gi wi di den pai a lusu-paiman gi a libisma famiri (Yoh. 3:16; 2 Kor. 5:14, 15). A no de fu taki, dati te wi e prakseri dipi fu a sani disi, dan wi sa kisi moro warderi gi a santa okasi disi. A heri pipel fu Gado musu teki ten fu leisi èn fu prakseri dipi fu den spesrutu Bijbel leisipisi gi a Memrefesa, di skrifi na ini Ondrosuku den Buku fu Bijbel ala dei. Den tumusi moi fasi fu Yehovah de krin fu si na a seti di A seti sani gi a lusu-paiman. Te wi e prakseri den fasi fu en, dan wi e prisiri srefisrefi taki wi abi en leki wi Gado. Te wi e prakseri dipi san a lusu-paiman wani taki gi wisrefi, dan wi e kon lobi Gado nanga en Manpikin moro, èn disi e pusu wi fu du ala san wi man fu du a wani fu Gado.—Gal. 2:20.

3. Fa wi kan sori taki wi abi warderi gi a Memrefesa?

³ Efu wi e kisi moro warderi gi a sani di Yehovah seti fu wi kan kisi frulusu, dan a faya di wi abi gi a Memrefesa sa gi deki-ati na bijbelstudenti, gobaka, famiriman, birtisma, skoromati, sma na wrokope, èn tra sma di wi sa gi wan kari fu kon na a spesrutu fesa disi (Luk. 6:45). Fu dati ede, du muiti spesrutu fu gi ala den sma disi wan kari nanga yepi fu a papira di de fu memre den na a Memrefesa. Furu brada nanga sisa feni taki a de wan yepi fu abi wan papira nanga den nen fu sma di den e kari kon na a Memrefesa ala yari, èn ibri yari den e skrifi moro nen na tapu a papira disi. Efu wi e orga sani bun èn efu wi e du ala san wi man fu gi sma di wani sabi moro, wan kari gi a Memrefesa, dan dati na wan tumusi moi fasi fa wi kan sori taki wi de nanga tangi taki Yehovah Gado gi wi „a fri presenti fu en di bigi pasa marki”.—2 Kor. 9:15.

4. San kan yepi wi fu du moro na ini a preikiwroko na ini maart nanga april?

⁴ Du moro na ini a preikiwroko: Yu kan du moro na ini a preikiwroko na ini maart nanga april? Te wi e du muiti fu prati „a tumusi moi bun nyunsu fu Krestes” gi trawan, dan Gado sa blesi wi trutru. Yehovah, a Sma di e meki wi kon frustan ala sani fu Bijbel moro krin, gi a komando disi: „Meki a leti skèin komoto na ini a dungru” (2 Kor. 4:4-6). Efu a de fanowdu, dan den owruman sa seti moro preikiwroko konmakandra na difrenti ten èn na difrenti presi, èn den sa teki fesi fu yepi den preikiman di wani preiki moro langa. Kande den kan seti sani fu du stratiwroko fruku mamanten, noso fu preiki na ini kontren pe furu bisnis presi de, èn fu preiki nanga yepi fu telefon te bakadina, noso na mofoneti. Wan sani di kan yepi yu fu du moro na ini a preikiwroko, na fu bosroiti na fesi omeni yuru yu sa man doro èn fu du muiti fu doro den yuru dati. Wan fasi fa furu sma e gi Yehovah a moro bun sani di den abi, na fu du a yepi-pionierwroko.—Kol. 3:23, 24.

5. Fa furu sma e kisi wini fu di den yuru di wan yepipionier musu doro, kon moro mendri?

⁵ Yu kan dini leki yepipionier? Seibi yari pasa kaba sensi den yuru di wan yepipionier musu doro, kon moro mendri. Fu di a kenki disi kon, meki furu sma kisi na okasi fu ondrofeni a prisiri nanga den wini di a yepi-pionierwroko e gi. Oiti yu du a wroko dati? Son sma gwenti fu du a wroko disi ibri yari. Na ini furu gemeente, wan lo preikiman e du a diniwroko disi makandra, èn disi e tron wan moi heimarki gi a gemeente na ini a yari dati. Yu kan dini wan mun leki yepipionier na a pisi ten fu a Memrefesa? A mun april na wan bun mun fu du dati, fu di a abi feifi satra nanga feifi sonde.

6. San na wan tu moi sani di seti gi unu?

⁶ A de so taki a kring-opziener o kon na yu gemeente na ini a mun maart noso april? Efu dati de so, dan ete wan moi okasi e opo gi yu. Soleki fa a ben meki bekènti no so langa pasa, dan na ini a dienstyari 2006, ala sma di e dini leki yepipionier na ini a mun te a kring-opziener e kon na a gemeente fu den, sa kisi wan kari fu go na a fosi pisi fu a konmakandra di a kring-opziener sa abi nanga den pionier a wiki dati. A no de fu taki, dati den leri na a konmakandra disi di o gi den pionier deki-ati gi a diniwroko fu den, sa yepi furu yepipionier fu pruberi fu tron gewoon pionier. Boiti dati, na ini maart wi sa abi a prisiri fu yepi sma fu frustan sani fu Bijbel moro krin nanga yepi fu a nyun buku San Bijbel e leri wi trutru? Fu san ede yu no e poti en leki marki fu bigin wan bijbelstudie nanga a buku disi?

7, 8. (a) San kan yepi wi fu meki wan schema fu du a yepi-pionierwroko? (b) Fa a kan de wan yepi te wan osofamiri e wroko makandra, èn fa a heri osofamiri kan kisi wini fu dati?

⁷ Te yu e prakseri taki yepipionier musu wroko 50 yuru wan mun, dan yu kan luku sortu schema sa yepi yu fu skèin a leti fu waarheid sowan 12 yuru ibri wiki. Taki nanga sma di du disi kaba nanga bun bakapisi, ma taki nanga trawan sosrefi. Disi kan gi den a deki-ati fu du a diniwroko disi makandra nanga yu. Yongu nanga owru preikiman di dopu kaba, kon si taki a no de wan muilek sani fu doro a moi marki disi efu yu e sreka sani bun na fesi. Begi Gado. Dan baka dati, efu yu man, seti sani na fesi, èn nyan bun fu a yepi-pionierwroko!—Mal. 3:10.

⁸ Furu osofamiri kon si taki efu den e wroko makandra, dan den kan sorgu taki wan memre fu na osofamiri, awinsi na wán sma nomo, e kisi na okasi fu du a yepi-pionierwroko. Wan osofamiri ben teki a bosroiti taki den feifi sma di dopu kaba, ben o du a yepi-pionierwroko. Tu tra pikin di no teki dopu ete ben du muiti fu du moro na ini a preikiwroko. Sortu wini na osofamiri disi kisi fu di den ben meki so furu muiti? Den skrifi: „A ben de so wan moi mun gi wi, èn wi ben firi taki a famiri-banti kon moro tranga. Wi e taigi Yehovah tangi gi a tumusi moi blesi disi!”

9. Fa wi kan skèin wi leti na a ten fu a Memrefesa?

⁹ A spesrutu wroko di wi sa du na ini maart nanga april sa gi wi deki-ati? A sa tyari wi go moro krosibei na wi hemel Tata? We, dati abi fu du nanga a muiti di wisrefi o meki fu tranga a lobi di wi abi gi Gado nanga en Manpikin, èn nanga a muiti di wi o du fu du moro na ini a preikiwroko. Meki wi teki a srefi bosroiti leki a psalm skrifiman, di ben singi: „Trutru mi sa prèise Yehovah nanga mi mofo, èn na mindri furu sma mi sa gi en biginen” (Ps. 109:30). Yehovah sa blesi a wroko di wi sa du fayafaya na a ten fu a Memrefesa. Sobun, kon meki wi skèin wan bigi leti, so taki moro furu sma kan komoto na ini dungru èn kan kon „abi a leti di e gi libi”.—Yoh. 8:12.