Kisi winimarki foe a theokrâsia diniwroko-skoro foe 1996 — Pisi 3
1 Na apostel Paulus ben wani den brada foe en begi gi en, so taki a ben sa man taki foe a boen njoensoe sondro frede (Ef. 6:18-20). Wisrefi wani foe kweki a srefi fasi foe man foe taki sondro frede toe. Foe man doro dati, wi e warderi a jepi di a theokrâsia diniwroko-skoro e gi, wan skoro pe sma di e fisiti den konmakandra èn di doro den markitiki, e kisi deki-ati foe gi den nen.
2 Leki studenti, wi e kisi persoonlijk rai foe jepi wi foe man taki moro boen nanga trawan èn foe gi den leri na wan moro betre fasi (Odo 9:9). So srefi wi kan kisi winimarki te wi e arki na a rai di tra studenti e kisi foe di wi e fiti a sani di wi e leri na tapoe wisrefi. Te wi e sreka wisrefi tapoe wan toewijzing, wi moesoe studeri a pisi pe a materiaal teki poeroe finifini, foe de seiker taki a sani di wi e sori de soifri. Den edeprakseri nanga den tekst di wi e gebroiki moesoe fiti na ini a fasi fa wi e tjari a moro prenspari thema kon na krin. Efoe joe abi a toewijzing nanga wan tra sma, joe moesoe oefen en boen na fesi bifo joe pristeri en na tapoe a skoro. Ala di wi e go na fesi, wi moesoe meki moeiti foe taki sondro foe leisi tapoe wan papira foe di wi e gebroiki notisi na presi foe wan manuscript.
3 Ala sma di abi toewijzing na tapoe a skoro moesoe doro drape froekoe, gi a skoro-opziener a raadgevingsformulier foe den èn sidon fesisei foe a zaal. Den sisa moesoe meki a skoro-opziener sabi na fesi san na a setting foe den èn efoe den sa sidon noso tanapoe te den e hori a pisi foe den. A wroko di wi e wroko makandra tapoe den fasi disi, e jepi taki a programa e waka sondro draidrai èn e jepi den sma di e sorgoe gi a podium foe sreka ala sani boen na fesi.
4 A sreka foe toewijzing no. 2: Wan marki foe a bijbel-leisipisi na foe jepi a studenti foe man leisi moro boen. Fa a kan doe dati tapoe a moro boen fasi? A leisi di a e leisi a materiaal foeroe tron taki sma kan jere, na a moro boen fasi foe leisi en boen. Foe leri san iniwan foe den freimde wortoe wani taki èn a joisti fasi fa a moesoe leisi den, dan a studenti moesoe soekoe den na ini a wortoeboekoe.
5 Te wi e leisi, dan a de wan boen sani foe leisi tapoe wan krin èn grati fasi. Wi moesoe poti waran nanga firi na ini wi sten te wi e leisi, foe di wi e hari den wortoe kon na wan; foe eksempre ’Wi e go na inisei.’ Foe di a letter di e waka baka, wi, na wan oposten (e), dan wi e hari den wortoe disi kon na wan. So boen, wi e leisi w’e go na in’sei. So srefi, wi moesoe poti krakti tapoe a joisti wortoepisi. Ini Sranantongo den e poti moro foeroe krakti tapoe a wortoepisi fosi a kriboiwan; foe eksempre anbegi, boekoe, èn Gado. Disi no de so alaten, soleki fa a wortoe fadon e sori. A ben sa boen foe arki na bekwaam takiman èn leisiman foe jere fa den e doe disi. Gebroiki so srefi den poeblikâsi foe a Waktitoren Genootschap.
6 Papa nanga mama kan jepi den jongoe pikin foe den foe sreka densrefi tapoe a toewijzing foe den foe leisi bijbel. Disi kan abi na ini toe foe arki te a pikin e oefen èn foe gi bodoi di sa jepi en foe doe en moro boen. A ten di wan sma kisi, de nofo foe hori wan sjatoe inleiding èn wan bosroiti di fiti èn e sori fa wi kan gebroiki den edeprakseri. Na so wan fasi, a studenti e kweki a fasi foe man taki tapoe wan frifasi.
7 A psalm singiman ben aksi na ondro begi: „O Jehovah, meki joe opo den mofoboeba disi foe mi, foe mi eigi mofo kan froeteri foe a blesi foe joe” (Ps. 51:15). Meki na abi di wi abi prati na tapoe a theokrâsia diniwroko-skoro jepi wi foe meki a srefi winsi disi kon troe!