Joe e bow nanga materiaal di kan pasa faja?
1 Petrus ben warskow den fosten kristen: „Joe gensman, Didibri, e waka lontoe leki wan krasi lew, e soekoe foe njan wan sma” (1 Petr. 5:8). Didibri ben meki en aanval kon moro pikinso ini wi ten? Nono a meki den kon moro foeroe foe di a sabi dati en ten kon moro sjatoe (Openb. 12:12). Foe dat’ede meki wi kan froewakti dati ini na ten di de na wi fesi den tesi tapoe wi bribi sa kon moro bigi. Fa wi kan kibri wisrefi èn wi osofamiri moro boen, sodati wi alamala kan psa libilibi den faja tesi disi? Te wi go overtoigi wisrefi taki wi bribi ben sidon na tapoe na joisti fundamenti èn ben bow nanga sani di e psa faja. — 1 Kor. 3:10-15.
2 Den diri metaal nanga ston nanga san wi e bow, de den wet, komando, gronprakseri nanga voorschrift di wi e kisi leri foe den ini Gado Wortoe èn di Jezus ben waka na den baka leki wan eksempre gi wi. Wi ben leri sabi den nanga gemeente studie èn wi ben bewijsi na waarde foe den foe di wi ben poti den ini wi libi.
„NA WACHTTOREN” — WAN JEPI
3 Joe bribi no bow kon tranga nanga materiaal foe hé kwaliteit nanga jepi foe joe studie foe na Wachttoren? Loekoe pikinso baka na wan toe tijdschrift foe 1982/1983 nanga den artikel foe loyaliteit (1 juni, 1 september), na opobaka howpoe (15 juni), fa na Kownoekondre e kon (15 juli), na konsensi (15 oktober), tiri gi den jongoewan (15 januari 1983), hori doro (1 maart) èn lobi (15 maart), foe wi kari wan toe nomo. Joe no ben feni en wan switi sani foe leri, ofoe foe loekoe njoen baka, san na bijbel e taki foe den tori disi èn foe si eksempre foe a ten di psa èn foe a ten foe now foe sma di ben kibri a bribi foe den awansi tesi ben kon? Kande joe ben kisi na firi: ’Efoe den ben kan, dan mi kan toe.’ Ija, Na Wachttoren ben de èn de wan makti jepi foe tranga wi bribi.
4 Aladi a moro bigi pisi foe den brada nanga sisa ben meki a moeiti foe den foe kisi wan tranga bribi èn fertrow ini Jehovah pramisi ben kon moro bigi ete, tokoe a de krin dati sonwan de di no ben bow nanga materiaal di e psa faja. Disi e kon na krin ini pikinso ofoe no wan activiteit ini na dienst, a tan gwe foe komakandra, ofoe foe di den e firi taki den kon ini ogridoe, san e meki wan piri-ai ofoe uitsluiting kon. Den wan di de tranga, e firi dati foe lobi ede den abi a frantwortoe a fesi Jehovah foe „tjari den swakifasi foe den di no tranga” (Rom. 15:1; 13:8; Tori. 20:35; Gal. 6:10). A switi lobi moeiti foe den de foe prijse èn Jehovah ben blesi den. Ma wi alamala moe si na fanowdoe foe kweki kristen égifasi di kan meki wi bribi tron sowan bribi di e psa faja.
5 Na programma foe meki wi bribi psa faja, e bigin nanga persoonlek studie. Disi de toemsi prenspari. Leri sabi Jehovah moro boen foe di joe o lési foe en égifasi, en doe, en fasi foe si sani èn en prakseri. Go stoeka na libi èn den leri foe Jezus èn waka baka en foe di joe o meki joe libi kon ondro na tiri foe den prakseri foe Gado (Joh. 14:9-11). Go sondro weri ini begi na Jehovah (1 Thess. 5:17). Handri ini akroederi nanga joe begi èn teki en piki dan nanga respeki èn poti den dan ini joe libi. Joe sa si dati joe bribi, te ini na ten di e kon tesi sa kon na joe pasi, na presi foe a sa bron gwe joisti sa kon moro dipi èn sa kon krin.
JEPI JONGOESMA, INACTIEF NANGA NJOEN WAN
6 A gebroiki foe a Wortoe foe Gado foe kweki wi pikin èn foe jepi den sma di abi belangstelling foe kenki den égifasi foe den, de wan toemsi prenspari pisi foe wi diniwroko. Na ini den laatste ten foeroe wroko ben doe di warti foe wi prijse den ini a tori foe na bow kon tranga baka na bribi foe inactief wan foe di bijbel studie ben hori nanga den. Ala den di wi e studeri nanga den, nanga ala prisiri wi sa leri den, lei den op, èn train den ini na koni foe hemel èn jeje koni foe kan si sani. Jepi den foe kweki égifasi foe frede Gado, soleki loyaliteit nanga toewijding na bijbelgronprakseri. Den moe tron troe discipel foe Kristus. Jepi den foe si fa Na Wachttoren de wan jepi gi joe. O moro den kristen égifasi foe den e gro nanga jepi foe studie nanga opleiding o moro den sa si dati nanga foeroe winimarki den sa kaka foetoe gi faja tesi. Fa a de wan prisiri sani foe sabi dati nanga jepi foe Gado wi kan asisteri trawan ini na bow foe égifasi di kan psa faja!
7 Wi e feni en wan moi sani dati ini na moen mei wi ben kan presteri na abonnement tapoe Na Wachttoren foe Sf 6,00 wan jari. Foe di wi e erken na bigi waarde foe en èn a boen krakti di a ben abi tapoe wi, meki wi moe gebroiki faja ibri okasi foe gi trawan dek’ati foe meki wan bigin foe na lési foe na tijdschrift.
8 Soleki Paulus skrifi ini 1 Korintesma 3:9, dan wi de a „gron foe Gado, di e bow, a oso foe Gado”. Soboen wi e opo wisrefi dati Jehovah bow wan wroko ini wi foe di wi e poti boen prakseri na den seti di a ben seti sani nanga jepi foe en organisaatsi. O moro wi e kon krosbé foe na kaba wi kan firi fa na druk e kon moro tranga. Dati no e tjari wi, so fara foe libi ala sani ofoe foe fadon na ondro na faja di Satan e poti so krosbé foe wi. Na a tra sé, wi kan meki den verdediging wroko foe wi kon moro tranga foe di wi e go overtoigi wisrefi dati wi e bow nanga materiaal di kan psa faja. — Gal. 6:9, 10.