Bow nanga materiaal di man nanga faja
„Te son sma e bow den sa gebroiki gowtoe noso solfroe noso diri ston na tapoe na fundamenti; tra sma sa gebroiki oedoe noso grasi noso stro.” — 1 KORINTESMA 3:12, Today’s English Version.
1, 2. (a) San ben sa de wan sani di moro hati leki si joe oso bron te na gron? (b) Sortoe srefi teleurstelling kristen bedinari e ondrofeni sontron?
A DE foe troe wan sari sani foe si te wan oso bron te na gron. Ma a ben sa de moro sari srefi efoe joe ben bow en! Foe si ala joe ten nanga moeiti go ini smoko, ben sa de wan toemsi hati sani. Èn tokoe a pen disi no de noti te joe teki en gersi nanga na ten di kristen papa nanga mama e firi te den oema ofoe den manpikin noso oemapikin gwe libi na waarheid èn drai go na den sani foe na grontapoe. Pikinso sani kan de wan moro hati sani leki na pen foe papa nanga mama di e si fa a pikin foe den e brokosaka te na gron na jejefasi.
2 Den firi gi na ati foe den sortoe papa nanga mama dati kan akroederi nanga na teleurstelling di joe leki kristen bedinari e ondrofeni sontron. Kande joe ben go studeri na bijbel nanga wan sma èn joe ben gi someni moen noso srefi jari foe jepi en foe kisi wan sabi foe na waarheid. Joe e si fa ai go fisiti komakandra èn e bigin srefi nanga na velddienst. Ma dan wantewante so ai kon swaki na jejefasi èn ai kon de inactief. Kande ai fadon go baka srefi na fosten takroe gwenti. Fa dati de wan teleurstelling.
3. Sortoe aksi e kon na fesi logischerwijs te wi e kon tanapoe na fesi den sortoe situwasi disi, èn foe san na piki e anga?
3 A wan sari sani foe taki dati disi e psa ten a ten. A de foe dat’ede wan logis sani dati wan sma e aksi ensrefi: Foe san-ede sowan sani e psa? Wi kan doe wan sani na en? Ala di na ati foe na sma srefi kan de wan factor, tokoe na piki tapoe den aksi disi e anga foe wan bigi pisi foe na piki tapoe wan tra aksi: Te joe e leri tra sma, joe e bow nanga materiaal di man nanga faja tapoe wan joisti fundamenti? Wan krin ferstan foe san disi wani taki èn fa wi moesoe doe disi, de wan prenspari sani ini na jepi di wi e gi wi bijbelstudie nanga wi pikin foe de stanfaste na ini na waarheid.
Soema na a sma di e bow?
4. Nanga san Paulus e agersi na kristen bedinari foe na evangelie ini 1 Korintesma 3:10, 11 èn fa a e doe disi?
4 Foe na piki tapoe na aksi disi wi e go na 1 Korintesma kapitel 3, pe Paulus e teki na kristen bedinari agersi nanga wan bowman. Wi e lési drape: „Akroederi na no-ferdini boenfasi foe Gado, di wi ben kisi, mi ben poti leki wan koni tiriman foe wroko wan fundamenti, ma wan tra sma e bow a tapoe. Ma meki ibri sma tan loekoe a tapoe fa ai bow a tapoe. Bika no wan sma kan poti wan tra fundamenti leki san ben poti kaba, san de Jezus Kristus.” — Vers 10, 11.
5. (a) Foe sortoe bowwroko Paulus e taki soleki na kontekst sori? (b) Na sortoe fasi wan sma kan taki dati na kristen bedinari e bow ’sma’?
5 Foe sortoe bowwroko Paulus e taki dja? We, loekoe plkinso na na kontekst: „Oenoe de a oso foe Gado.” „Oenoe [de] a tempel foe Gado” (1 Korintesma 3:9, 16). Soboen, a de agersi-bowwroko, a ben e go foe libisma. Dati wani taki dati na kristen bedinari ’e bow sma’ na a fasi disi dati ai proberi foe bow na ini sma di abi belangstelling wan kristensma di a moe de èn foe meki den tron discipel. — Mattéus 28:19, 20.
6, 7. (a) Paulus abi en moro foeroe foe na frantwortoe foe soema na ini 1 Korintesma 3:9-15? (b) Foe san-ede a de wan gemeenschappelek bowprojekt? (c) San te wi e loekoe den wortoe foe Paulus moro fara wi sa kon ferstan?
6 Nanga disi wi e taki dati na kristen lepiman de na enkri wan di de frantwortoe foe na fasi fa na studenti o kon gro? Kwet’kweti. Na ini na fosi presi wi de „kompewrokoman foe Gado”. Ala di Paulus e taki moro foeroe foe na frantwortoe foe na bowmannoso leriman na ini 1 Korintesma 3:15, tokoe a de te joe loekoe en boen wan gemeenschappelek bowprojekt pe na studenti de ini a tori toe. Joe kan teki disi gersi nanga na sreka foe wan sroedati gi feti. Tra sma sa gi en leri èn sorgoe dati a kisi den fetisani, ma te a de so fara dati a de tapoe a fetigron, dan ensrefi moe feti èn tjari san a leri kon na ini praktijk. En libi e anga foe dati! Na a srefi fasi a sma di e gi leri e proeberi foe bow wan troetroe kristen, wan sma di man tége druk èn kan kakafoetoe gi den tesi foe na seti disi. Ma na a srefi ten wan frantwortoe de ooktoe tapoe na studenti; a moe poti na ini en libi san a e leri. — Mattéus 7:24-27; Filipisma 2:1, 12, 13.
7 Ma tokoe ete a sani disi e tan, dati wan hebi frantwortoe de tapoe a sma di e gi leri. Te wi e go loekoe moro fara den wortoe foe Paulus dan wi sa si o prenspari a de foe gi leri foe a wortoe foe Gado na wan boenfasi foe bow na ini tra sma warderi gi wi hemel Tata.
Poti na joisti fundamenti
8. San de na fundamenti na den agersi bowwroko disi?
8 Bifo joe kan bow wan oso joe moe poti fosi wan fundamenti. San de na den bowwroko pe a e go foe a meki foe discipel na fundamenti dan? Paulus e piki „no wan sma kan poti wan tra fundamenti leki san ben poti kaba, san de Jezus Kristus” (1 Korintesma 3:11). Ija, na joisti fundamenti tapoe san wi moe bow, na Jezus Kristus. — Teki gersi Efesesma 2:20-22 nanga 1 Petrus 2:4-6.
9. (a) San a wani taki na ini a leri foe trawan foe poti Kristus leki fundamenti? (b) Foe san-ede a de gi wi bijbelstudie dati den ferstan na heri waarheid di e go foe Jezus?
9 Fa wi kan poti Kristus leki fundamenti te wi e leri tra sma? Ini a fosi presi wi moe leri sma na waarheid di e go foe Jezus èn jepi tra sma foe bow den libi lontoe a waarheid dati. Disi wani taki dati wi moe jepi den foe poti bribi na ini Jezus leki wi jepiman èn na sma nanga jepi foe soema Jehovah e sorgoe ini na loesoepaiman (Mattéus 20:28; 1 Johannes 2:1, 2). Ma dati a no ala sani. Jezus Kristus de na edeman foe na kristen gemeente di Gado poti (Kolossesma 1:18). A de ooktoe na reti kownoe foe na grontapoe èn na ini a wroko dati a sa tjari es’esi na Armageddon „en wini kon na wan kaba” (Openbaring 6:1, 2). Poti Kristus leki fundamenti, wani taki soboen dati wi leri na heri waarheid di e go foe en èn jepi trawan foe ferstan a rol foe Jezus na ini a meki kon troe foe na prakseri foe Gado. Foe san-ede disi de so prenspari? Efoe wi studenti e poti bribi na ini Jezus leki na kownoe foe Gado di e tiri dan den no sa lasi makriki ati nanga den grontapoe toestand foe den problema foe den aladé libi. — Jesaja 28:16; 1 Petrus 2:6-8.
10. (a) Leki fa Efesesma 3:17-19 e taki, san de moro ini a tori te wi wani poti Kristus leki fundamenti? (b) Fa wi e meki Kristus libi na ini wi ati?
10 Ma na a poti foe Kristus leki fundamenti moro de ini a tori. Wi moe abi na srefi marki na wi fesi leki na apostel Paulus. Gi den Efesesma a ben begi dati „Kristus nanga jepi foe joe bribi libi ini joe ati nanga lobi; dati joe abi joe roetoe èn poti stéfi tapoe na fundamenti, sodati joe sa man dorodoro foe ferstan nanga ala santawan na jejefasi san de na bradi nanga langa nanga hé nanga dipi, èn foe sabi na lobi foe Kristus, san de psa na sabi, sodati na ini ala sani joe kan kon foeroe nanga ala volheid di Gado e gi” (Efesesma 3:17-19). Loekoe pikinso dati ’abi en roetoe èn poti stéfi na tapoe na fundamenti’ wani taki dati Kristus ’de dipi ini wi ati’. San disi wani taki? We, Kristus ’e libi ini wi ati’ te en eksempre nanga leri abi krakti tapoe wi firi nanga doe.
11, 12. (a) Fa wi kan jepi tra sma foe Kristus ’libi na ini den ati’? (b) San de moro na ini a tori boiti na teki na ini wi foe sabi foe Jezus?
11 Fa wi kan jepi den sma di wi e leri meki Kristus ’libi ini den ati’? A de toemsi prenspari dati wi gi sabi abra na tra sma, bikasi den moe ferstan na jejefasi san de na bradi nanga na langa nanga, na dipi foe na waarheid foe a Wortoe foe Gado, spesroetoe ini a tori foe na libi nanga na leri foe Jezus Kristus. Nanga ala prisiri wi wani si dati wi studenti kisi ’na pasi foe Kristus’, dati den leri sabi en finifini leki wan sma di e gi libi èn di abi faja (1 Korintesma 2:16). Disi sa seki na ati foe den.
12 Loekoe pikinso dati Paulus e taki ooktoe: „Èn foe sabi na lobi foe Kristus [Griki: gnonai’, „ini praktijk, sabi nanga jepi foe ondrofeni”], san e psa na sabi.” Wi kan sabi na lobi foe Kristus efoe wi sabi san a bijbel e ferteri wi foe en libifasi èn a fasi fa a ben tjari ensrefi nanga trawan. Ma te wi waka baka na sortoe foe sma di Jezus de, dan wi kan ferstan troetroe den firi foe en. Tapoe a fasi dati wi e leri nanga jepi foe ondrofeni foe „sabi na lobi foe Kristus di e psa na sabi”.
13, 14. (a) Fa wi kan jepi wi studenti foe proeberi foe sori den égifasi foe Jezus na ini den libifasi? (b) Foe san-ede den studenti foe wi sa kisi jepi foe meki wan boen matifasi foe Jehovah gro te den proebri foe de leki Jezus? (c) Boiti na poti foe na joisti fundamenti, tapoe san wi moe poti prakseri moro toe?
13 Soboen te joe e poti a fundamenti foe dat’ede poti prakseri na tapoe den égifasi foe Jezus — en lobi (Johannes 15:13, 14), en waran nanga a firi di a ben firi gi tra sma (Mattéus 11:28-30), a sakafasi foe en (Johannes 13:1-15) èn na sari-ati foe en (Markus 6:30-34), foe kari wantoe nomo. Gi joe studenti tranga foe sori na ini en libi den égifasi disi. Na so fasi wan toemsi moi fundamenti e kon di a tapoe foe san tra prenspari égifasi kan bow a tapoe. Te wanwantron kande, joe e taki foe bijbeltori di e go foe Jezus, joe moe stop pikinso èn aksi: ’Sortoe égifasi joe e si Jezus e sori dja? Fa joe kan sori na égifasi disi moro boen?’ Leg uit dati a waka baka a sma di Jezus de sa jepi na bijbelstudenti foe kweki wan tranga krosbé matifasi nanga Jehovah. Fa so? Foe di Jezus ben sori a sma di en Tata ben de so volmaakti, dan wi, te joe loekoe en boen, e waka baka Jehovah srefi te wi e proberi foe waka baka Jezus. — Johannes 14:19.
14 Abi na joisti fundamenti de prenspari. Ma a de nofo? Paulus e piki: „Ma meki ibri wan sma tan loekoe fa a e bow a tapoe.” Ija, fa a de nanga den materiaal di wi e gebroiki foe opo na bow wroko, di e kon rostoe na tapoe na fundamenti.
Materiaal di man nanga faja
15, 16. (a) Sortoe sani di tanapoe abrasé foe makandra Paulus e sori na ini 1 Korintesma 3:12? (b) Sortoe aksi e kon na fesi efoe wi tjari na agersi prenki foe Paulus tapoe wisrefi?
15 Disi e tjari wi kon na vers 12 foe 1 Korintesma 3, pe Paulus e taki foe difrenti materiaal: „Efoe wan sma e bow now na tapoe na fundamenti gowtoe, solfroe, diri ston, oedoe sortoe, grasi, stro.” Fa disi de materiaal di kenki foe makandra! Paulus e gi wi djaso na rai foe bow na ini wi studenti wan sani foe ibriwan foe den materiaal dati? A de krin foe no. Loekoe fa wantoe tra vertaling e poti en: „Son sma sa gebroiki te den e bow tapoe a fundamenti gowtoe noso solfroe noso diri ston; tra sma sa gebroiki oedoe noso grasi noso stro” (TEV). „Efoe wan sma e go moro fara now tapoe na stonfoetoe disi nanga gowtoe, solfroe, diri ston, noso oedoe, grasi nanga stro” (Willibrordvertaling). A ben de krin dus, dati Paulus e poti toe sortoe oso abrasé foe makandra. Na a wan sé a ben taki foe wan moi paleisi di meki moi nanga gowtoe, solfroe, nanga diri ston, èn kontrari foe dati joe abi wan kampoe di tapoe nanga wiwiri èn di meki foe oedoe planga noso postoe foe hori den skotoe foe dré grasi di moksi nanga tokotoko.
16 Te wi o gebroiki na eksempre foe Paulus dan na aksi e kon: „Joe e bow paleisi noso kampoe te joe e leri tra sma?” Na réde foe san-ede son jongoesma nanga njoensma e fadon komoto foe bribi kan de taki a no alamala e bow foe den srefi materiaal. San na a difrenti? Na situwasi na ini na owroe gemeente ini Korinte e sori na difrenti na mindri na bow nanga materiaal di man nanga faja èn na bow nanga materiaal di faja e bron.
17, 18. a) Sortoe ernstig problema ben de na ini na gemeente na ini na owroe Korinte, èn fa Paulus ben poti na afersi reti? (b) Soboen san de wan beslissende faktor foe bepaal efoe wi e bow nanga gowtoe noso oedoe?
17 Paulus ben abi en prati na ini a poti foe na joisti fundamenti, ma a de krin dati son sma na ini Korinte ben bow tapoe na fundamenti dati nanga ’oedoe, grasi nanga stro’ — materiaal di no ben de so boen èn di de wan agersifasi foe égifasi di no e tan (1 Korintesma 3:12). Foe dat’ede Paulus ben moesoe skrifi gi den brada drape: „Kesekese de a mindri oenoe . . . mi e bedoel disi, taki ibriwan foe oenoe e taki: ’Mi na foe Paulus’, ’Ma mi na foe Apóllos’, ’Ma mi na foe Céfas’, ’Ma mi na foe Kristus.’ Kristus de prati na pispisi dan?” (1 Korintesma 1:11-13) Den sma foe na gemeente ben prati soboen na ini difrenti parij. Foe san-ede? Foe di den ben feni bepaalde man toemsi prenspari. Paulus ben poti den a pasi, di a ben taki. „San na Apóllos dan? San na Paulus dan? Dinari nanga jepi foe soema oenoe ben tron bribiman . . . Mi ben prani, Apóllos ben nati, ma Gado ben meki a gro.” — 1 Korintesma 3:5-7.
18 Efoe joe taki en sjatoe dan a problema ben de a tori dis: Foe di den ben poti toemsi foeroe waarde na a waka baka libisma, meki wantoe sma foe na gemeente ini Korinte no ben abi wan tranga, krosbé matifasi nanga Jehovah. Disi ben de wan beslissende faktor ini na bepaal efoe wi de e bow nanga „gowtoe” noso „grasi”, efoe wi de e bow te joe loekoe en boen „paleisi” noso „kampoe”.
19. (a) Fa na sma di e gi leri, sondro foe espresi kan poti toemsi prakseri na tapoe ensrefi noso na tapoe wan tra sma? (b) San wi moe proeberi foe doe efoe wi wani bow nanga ’gowtoe, solfroe nanga diri ston’?
19 Wi kan leri wan warti les foe disi. Kande wan sma e taki: „Ma mi e leri trawan no foe waka baka wan libisma.” Ma disi kan psa makriki, awinsi a no de a prakseri foe wi. Foe eksempre, efoe wi ben sa piki den aksi foe wan studenti alaten: ’Brada (noso Sisa) Dati èn dati e taki: . . . ’, wi no ben sa poti no foe espresi toemsi foeroe krakti na tapoe wan onvolmaakti man noso oema? Noso efoe wi ben sa piki tapoe aksi di kon na fesi èn taki: ’Dati mi no sabi séker, ma mi ben sa taki dati . . . ’, wi no ben sa poti toemsi foeroe prakseri na tapoe wisrefi? Hori na ini prakseri taki wan studenti makriki e si en leriman toemsi hé. (Teki gersi Tori foe den Apostel 10:25, 26 nanga Openbaring 19:10.) Efoe wi wani bow wan „paleisi”, dan wi moe loekoe boen dati wi no e bow sma di e waka baka libisma. Na presi foe dati wi moe jepi wi studenti foe kisi wan krosbé matifasi nanga Jehovah. Foe doro a marki dati, dan wi moe bow nanga ’gowtoe, solfroe nanga diri ston’. San disi e agersi?
20. Na ’gowtoe, nanga solfroe nanga diri ston’ de wan agersi fasi foe san? (Odo 3:13-15)
20 Te wi teki tekst soleki Psalm 19:7-11, Odo 2:1-6 nanga 1 Petrus 1:6, 7 gersi nanga makandra dan e kon na krin, dati gowtoe, solfroe nanga diri ston wawantron e gebroiki na agersifasi foe prenki égifasi, soleki wan tranga bribi, koni foe Gado, na makti foe si boen nanga ogri na jejefasi, loyaliteit, èn lobi-ati warderi gi Jehovah nanga en wet. Den sortoe ègifasi disi de fanowdoe efoe wan sma wani foe de na ini wan tranga, krosbé matifasi nanga Jehovah Gado. Den égifasi disi de a fasi foe a bow foe a sma di wi sa de èn di wi moe proeberi foe bow na ini den sma di wi e leri. Wi e bow na a fasi dati?
Wi sa man nanga na „faja”?
21. (a) Foe san-ede a de so prenspari dati wi bow na ini den sma di wi e gi leri égifasi di sa tan? (b) Foe san na „faja” de wan agersi prenki?
21 Foe san-ede a de prenspari dati wi jepi bow den sortoe égifasi disi di e tan na ini sma di wi e leri? Na apostel Paulus e go moro fara foe taki: „Ibri wan sma wroko sa kon na publiki, dan na dé sa meki a de foe si, bikasi a sa tjari kon na krin nanga jepi foe faja, èn na faja srefi sa sori o fa ibriwan sma wroko de” (1 Korintesma 3:13). Na „faja” soboen sa „sori” tapoe sortoe fasi wi e bow precies. San a „faja” e agersi dja? Ogri ferfolgoe na skinfasi? A gersi dati disi no de so. Loekoe pikinso dati ibriwan sma „wroko” sa tjari kon na doro nanga jepi foe na „faja”. A no ala kristen den e ferfolgoe na wan ogri-atifasi. Soboen na „faja” de wan agersifasi foe ala druk noso tesi di ben sa kan pori a jejefasi foe wan sma.
22. San de wantoe foe den faja tesi di kan kon tapoe son sma?
22 Gi son sma na „faja” kan kon na ini na vorm foe na neutraliteitafersi. A de mogelek foe eksempre dati son druk e kon foe tjari den go so fara foe teki prati na politiek activiteit noso go a doengr’oso na a tra sé (Johannes 15:19). Sontron na „faja” kan de na tapoe wan moro bigi fasi. Kande a de na tesi foe go na film noso loekoe TV-programma pe seks nanga ogridoe de a moro prenspari sani na ini. Gi kristen jongoeman na „faja” de kande na ini disi dati den de opo-opo gi sekskori noso den e kisi kari foe gebroiki durgs, noso druk e kon na tapoe den foe teki prati na pori amusement a grontapoe. Na natuurlek lostoe foe tra sma feni joe boen, kan poti kristen jongoewan ondro wan bigi druk foe wani de net soleki den. — 1 Johannes 2:16.
23. (a) Sortoe aksi kan kon na fesi ini a tori foe den sortoe tesi disi, èn foe san na piki e anga? (b) San wi sa go loekoe na ini a tra artikel?
23 Moro foeroe foe troe kristensma ben psa nanga boen bakapisi den sortoe faja tesi disi. Ma na wan sari sani foe taki dati disi no de so gi ala sma. Foe dat’ede meki wi moe aksi wisrefi: Te den sma di wi ben leri kon tanapoe na fesi foe a „faja”, fa a sa waka nanga den dan? Den sa de leki na moi paleisi dati di meki moi nanga gowtoe, solfroe, nanga diri ston di man nanga faja, èn tan tannapoe? Noso den sa de leki na kampoe dati di meki foe oedoe, grasi, nanga stro èn di faja e bron? Natuurlek a de so dati foeroe sani e anga foe na studenti srefi. Ma na a srefi ten foeroe sani e anga toe foe wi leki leriman — fa wisrefi e bow. Foe dat’ede meki na aksi disi e tan ete: Fa joe e bow den sortoe égifasi disi na ini den sma di joe e gi leri? Disi wi sa go taki foe en na ini na tra artikel.
Joe kan leg uit:
◻ Foe san-ede na leri foe tra sma de wan gemeenschappelek projekt?
◻ Fa joe e poti Kristus leki fundamenti?
◻ San wi kan leri foe san ben e psa na ini na gemeente na ini na owroe Korinte?
◻ San de na „faja” èn fa nanga dati na prensparifasi e kisi krakti foe na bow foe égifasi di sa tan na ini trawan?
[Prenki na tapoe bladzijde 3]
Te joe e leri tra sma, joe e bow dan nanga materiaal di faja no man bron noso nanga den di faja kan bron?