Joe wroko sa pasa a faja?

„Meki ibriwan sma tan loekoe fa a e bow na tapoe [a fondamenti].” — 1 KORENTESMA 3:10.

1. Sortoe howpoe getrow kresten abi ini a tori foe sma di kan tron disipel?

NANGA froewondroe wan kresten trowpaar e loekoe a pikin foe den di gebore didjonsrode. Wan Kownoekondre preikiman e si na tapoe a fesi foe wan bijbelstudenti taki a studenti abi wan fajafaja belangstelling. Wan kresten owroeman di e gi leri komoto foe a podium e si na mindri den arkiman wan njoen sma di abi belangstelling, di fajafaja e soekoe den tekst na ini en bijbel. Den getrow foetoeboi disi foe Jehovah abi ati di foeroe nanga howpoe. A no de foe taki, dati den e aksi densrefi: ’A sma disi sa lobi Jehovah èn dini en — èn tan getrow?’ A no de foe taki, dati disi a no wan sani di e kon foe ensrefi. Wroko de fanowdoe.

2. Fa na apostel Paulus ben memre den Hebrew kresten o prenspari a wroko foe gi leri de, èn sortoe ondrosoekoe disi kan meki wi go doe na wisrefi?

² Na apostel Paulus di ben de wan meester leriman, ben poti krakti na tapoe o prenspari a wroko foe gi leri èn meki disipel de, di a ben skrifi: „Oenoe ben moesoe de leriman nanga a ten na prakseri” (Hebrewsma 5:12). Den kresten di Paulus ben skrifi, ben go na fesi pikinso nomo, efoe wi e hori na prakseri o langa den ben de bribiman kaba. No wawan de no ben de klariklari foe gi trawan leri, ma a ben de fanowdoe taki trawan ben moesoe memre den baka foe den gronprakseri foe waarheid. Nojaso, wi alamala e doe boen foe ondrosoekoe ten na ten o boen wi e gi leri èn foe loekoe fa wi kan doe dati moro boen. Libi foe sma de ini a tori. San wi kan doe?

3. (a) Nanga san na apostel Paulus ben agersi a wroko foe meki kresten disipel? (b) Leki kresten di e bow, sortoe bigi grani wi abi?

³ Nanga wan eksempre pe Paulus ben loekoe sani moro fini, a ben agersi a meki di wi e meki disipel nanga a meki di sma e meki oso. Paulus ben bigin foe taki: „Wi na kompe wrokoman foe Gado. Oenoe na Gado en gron di wi e wroko, na oso foe Gado” (1 Korentesma 3:9). So boen wi e teki prati na wan bow-wroko di abi foe doe nanga libisma; wi e jepi meki den kon tron disipel foe Krestes. Wi e doe dati leki kompe wrokoman foe a Wan di „ben meki ala sani” (Hebrewsma 3:4). Dati na wan grani srefisrefi! Meki wi go loekoe fa Paulus en rai di a skrifi nanga jepi foe Gado en santa jeje èn di a ben gi na den Korentesma, kan jepi wi foe doe wi wroko moro boen. Wi sa poti spesroetoe prakseri na tapoe wi „koni foe gi sma leri”. — 2 Timoteus 4:2.

Poti a joisti fondamenti

4. (a) Sortoe ròl Paulus ben abi na ini a kresten bow-wroko? (b) Foe san ede wi kan taki dati Jesus èn so srefi den arkiman foe en ben sabi o prenspari boen fondamenti de?

⁴ Efoe wan oso moesoe de steifi èn efoe a moesoe tan langa, dan na oso dati abi wan boen fondamenti fanowdoe. Dati meki Paulus ben skrifi: „Akroederi a no-froedini boen-ati foe Gado, di mi ben kisi, dan mi ben poti wan fondamenti leki wan koni edeman foe wroko” (1 Korentesma 3:10). Jesus Krestes ben gebroiki wan srefi sortoe eksempre. A ben froeteri foe wan oso di, baka di wan bigi winti wai, ben tan tanapoe foe di a sma di ben meki na oso dati ben froekisi wan steifi fondamenti (Lukas 6:47-49). Jesus ben sabi heri boen o prenspari fondamenti de. Di Jehovah ben seti grontapoe, Jesus ben drape (Odo 8:29-31).a Den sma di ben arki Jesus, ben froestan toe o prenspari boen fondamenti de. Soso den oso di ben meki tapoe boen steifi fondamenti ben sa man tanapoe kánkan te wan hebi alen ben o soengoe a presi èn te a gron ben o seki, soleki fa dati ben e pasa sontron na Palestina. Ma san ben de a fondamenti di Paulus ben abi na prakseri?

5. Soema na a fondamenti foe a kresten gemeente, èn fa disi ben taki na fesi?

⁵ Paulus ben skrifi: „No wan sma kan poti wan tra fondamenti leki a fondamenti di poti kaba, dati na Jesus Krestes” (1 Korentesma 3:11). Disi no ben de a fositron taki wan sma ben agersi Jesus nanga wan fondamenti. Foe taki en leti, Jesaja 28:16 ben taki na fesi: „Disi na san a Soeverein Masra Jehovah taki: ’Loekoe, mi e poti wan fondamenti na ini Sion, wan ston, wan ston di kisi tesi, a warti oekoe foe wan tranga fondamenti.’ ” Langa ten na fesi kaba, Jehovah ben abi na prakseri foe meki a Manpikin foe en tron a fondamenti foe a kresten gemeente. — Psalm 118:22; Efeisesma 2:19-22; 1 Petrus 2:4-6.

6. Fa Paulus ben poti a joisti fondamenti na ini den kresten na Korente?

⁶ San na a fondamenti gi iniwan kresten? Soleki fa Paulus ben taki, no wan fondamenti no de gi wan troe kresten leki a wán di poti na ini Gado Wortoe — Jesus Krestes. Seiker, Paulus ben poti so wan fondamenti. Na Korente, pe sma ben si filosofia leki wan hei sani, Paulus no ben gebroiki grontapoe koni foe sori sma o boen a ben de. Na presi foe dati, Paulus ben preiki „Krestes di spikri na wan postoe”, wan sani di den nâsi ben weigri foe teki èn ben si leki „don sani” srefisrefi (1 Korentesma 1:23). Paulus ben leri sma taki Jesus na a moro prenspari sma na ini den sani di Jehovah abi na prakseri. — 2 Korentesma 1:20; Kolosesma 2:2, 3.

7. San wi kan leri foe den wortoe foe Paulus di a ben kari ensrefi „wan koni edeman foe wroko”?

⁷ Paulus ben taki dati a ben gi den sortoe leri disi „leki wan koni edeman foe wroko”. Nanga a froeklari disi, Paulus no ben meki ensrefi de prenspari. A froeklari disi ben de na erken di Paulus ben erken nomo taki Jehovah gi en wan kefalek moi presenti — dati na foe orga èn foe tiri a wroko (1 Korentesma 12:28). A troe, taki na ini a ten disi wi no abi den wondroe presenti disi di den fosi jarihondro kresten ben kisi. Èn wi no kan prakseri foe wisrefi taki wi na leriman di kisi a presenti foe gi leri. Ma na wan prenspari fasi, wi kisi presenti. Prakseri foe disi: Jehovah e gi wi en santa jeje foe jepi wi. (Teki gersi Lukas 12:11, 12.) Èn wi abi wan lobi foe Jehovah èn wan sabi foe den gron leri foe a Wortoe foe en. Den sani disi na troetroe kefalek moi presenti di wi kan gebroiki foe gi trawan leri. Meki wi teki a bosroiti foe gebroiki den sani disi, so taki wi kan poti a joisti fondamenti.

8. Fa wi e poti Krestes leki fondamenti na ini sma di kan tron disipel?

⁸ Te wi e poti Krestes leki wan fondamenti, dan wi no e pristeri en leki wan beibi di no man jepi ensrefi èn di de na ini wan njanjanbaki foe den meti, èn wi no e pristeri en toe leki wan sma di de a srefi leki Jehovah na ini wan Dri-wánfasi. Nôno, den sortoe denki disi di no de na ini bijbel, na wan fondamenti gi falsi kresten. Na presi foe dati, wi e leri sma taki Jesus ben de a moro bigi man di oiti ben libi, taki a ben gi en volmaakti libi foe a boen foe wi, èn taki now Jesus na a Kownoe di Jehovah poti èn di e tiri na hemel (Romesma 5:8; Openbaring 11:15). Wi e soekoe toe foe boeweigi den studenti foe wi foe waka na ini den foetoestap foe Jesus èn foe waka baka den eigifasi foe en (1 Petrus 2:21). A faja di Jesus ben sori gi a diniwroko, a sari-ati di a ben abi gi den sakafasi sma nanga den sma di e kisi kwinsi, a sari di a ben firi gi sondari di a fowtoe di densrefi ben abi ben masi den, a boen foeroe deki-ati di a ben sori te a ben kisi foe doe nanga tesi, wi wani taki den sani disi moesoe naki na ati foe den studenti. Foe troe, Jesus na wan kefalek boen fondamenti. Ma san e kon baka dati?

Bow nanga den joisti materiaal

9. Ala di na a fosi presi Paulus ben de wan sma di ben e poti fondamenti, tokoe sortoe broko-ede a ben abi gi den wan di ben teki a waarheid foe den sani di a ben leri den?

⁹ Paulus ben skrifi: „Now efoe wan sma e bow na tapoe a fondamenti gowtoe, solfroe, diriston, difrenti sortoe oedoe, drei grasi, grasistompoe, a wroko foe ibriwan sma sa kon de foe si, bika a dei sa meki a kon na krin, bika a sa tjari kon na krin nanga jepi foe faja; èn a faja srefi sa sori fa a wroko foe ibriwan sma de” (1 Korentesma 3:12, 13). San Paulus ben wani taki nanga dati? Prakseri san ben pasa nanga Paulus na ini a ten dati. Na a fosi presi, Paulus ben de wan sma di ben poti fondamenti. Na den zendingwaka foe en, a ben waka foe foto go na foto, èn a ben e preiki gi foeroe sma di noiti ete ben jere foe Krestes (Romesma 15:20). Te den sma ben teki a waarheid di Paulus ben leri den, dan gemeente ben opo. Paulus ben broko en ede foeroe nanga den sortoe getrow sma dati (2 Korentesma 11:28, 29). Ma a wroko di a ben doe ben aksi foe en taki a ben moesoe tan teki waka go na tra presi. So boen, baka di Paulus ben teki 18 moen foe poti wan fondamenti na Korente, a ben gowe libi a presi foe go preiki na tra foto. Tokoe ete, a ben abi foeroe belangstelling gi a fasi fa trawan ben go doro nanga a wroko di en ben doe drape. — Tori foe den Apostel 18:8-11; 1 Korentesma 3:6.

10, 11. (a) Fa Paulus ben poti difrenti materiaal foe bow, kontrari makandra? (b) Sortoe oso ben de troetroe na Korente foe owroeten soleki fa a sori? (c) Sortoe oso sa man tan te faja e bron, èn sortoe lès dati e leri kresten di e meki disipel?

¹⁰ A gersi taki wan toe sma di ben bow tapoe a fondamenti di Paulus ben poti na Korente, no ben doe wan kefalek boen wroko. Foe tjari a problema kon na krin, Paulus ben taki foe toe difrenti sortoe materiaal foe bow: gowtoe, solfroe, nanga diriston, na a wán sei; nanga difrenti sortoe oedoe, drei grasi, nanga grasistompoe. Wan sma kan meki wan oso foe boen materiaal, di e tan langa èn di faja no man bron; noso wan sma kan meki wan oso gaw-gaw, e bow nanga materiaal di kan pori gowe, di de foe wan pisi ten nomo, èn di faja kan bron. So wan bigi foto leki Korente, sondro tweifri ben foeroe nanga ala den toe sortoe oso dati. Drape kefalek tempel ben de di ben meki foe hebi, diri blòk ston, kande den ston disi ben meki kon ini pisi nanga gowtoe èn solfroe na den tapoe.b Den oso disi di e hori langa, pikinmoro seiker, ben de foe si leki majesteiti oso na mindri den krosibei kampoe, den broko-oso, nanga den wowojo presi di ben meki foe grofoe oedoe èn di ben tapoe nanga drei grasi.

¹¹ San ben sa pasa nanga den oso disi te den ben o teki faja? A piki tapoe na aksi dati de krin na ini a ten foe wi neleki fa a ben de krin na ini a ten foe Paulus. Foe taki en leti, Mummius, a Generaal foe Rome, ben feti nanga a foto Korente, èn a ben wini en, èn a ben poti faja gi a foto dati na ini 146 b.G.T. Foeroe foe den sani di ben meki foe oedoe, drei grasi, noso grasistompoe, sondro degedege ben pori gowe srefisrefi. San wi kan taki foe den tranga oso di ben meki foe ston, èn di ben moi nanga solfroe nanga gowtoe? Sondro tweifri, den oso disi ben tan. A kan srefi taki den sma na Korente di Paulus ben studeri nanga den, ben pasa den sortoe oso dati ala dei — rampoe no ben pori den bigi ston oso dati, ma langa ten pasa kaba rampoe ben pori den tra oso drape di ben meki foe materiaal di no ben tan so langa. So boen na wan libilibi fasi, Paulus ben poti krakti na tapoe san a ben wani taki! Te wi e gi leri, dan wi moesoe si wisrefi leki sma di e bow. Efoe a kan, dan wi wani wroko nanga den moro boen materiaal di e hori moro langa leki tra materiaal. Na a fasi dati, a kans moro bigi taki a wroko foe wi e tan. San na den materiaal dati di e hori langa, èn foe san ede a de prenspari taki wi e gebroiki den?

Joe wroko sa pasa a faja?

12. Na sortoe fasi wan toe kresten na Korente ben bow na wan fasi di no ben de so boen?

¹² A de krin, taki Paulus ben feni taki wan toe kresten na Korente no ben bow so boen. San ben fowtoe? Soleki fa den wortoe lontoe den tekst e sori, dan a gemeente ben abi problema nanga pratifasi, den ben e hei libisma ala di dati ben tjari a wánfasi foe a gemeente ini kefar. Wan toe foe den kresten na Korente ben e taki: „Mi na foe Paulus”, ala di trawan ben hori nomonomo taki: „Mi [na] foe Apollos.” Soleki fa a sori, dan wan toe foe den ben denki toemoesi foeroe foe den eigi koni. A no e froewondroe wi taki a bakapisi ben de wan jeje foe denki na skin sei, pikin-nengre na jejefasi, èn na ala sei „djaroesoe nanga strei” (1 Korentesma 1:12; 3:1-4, 18). Sondro tweifri, den fasi disi ben de foe si na ini a leri di ben gi na ini a gemeente èn na ini a diniwroko. A bakapisi ben de taki a wroko foe meki disipel di den ben doe, no ben de so boen, neleki wan sma di e bow nanga materiaal di no boen so kefalek. A no ben sa tan te a „faja” ben o kisi en. Foe sortoe faja Paulus ben e taki?

13. Na tapoe san a faja na ini na eksempre foe Paulus e sori go, èn gi san ala kresten moesoe de na ai?

¹³ Wan faja de di wi alamala e kisi foe doe nanga dati na ini a libi — den tesi di e kon tapoe a bribi foe wi (Johanes 15:20; Jakobus 1:2, 3). Den kresten na Korente ben moesoe sabi, neleki fa wi moesoe sabi na ini a ten disi, taki iniwan sma di e leri waarheid foe wi, sa kisi tesi. Efoe wi no e gi so boen leri na trawan, dan dati kan abi sari bakapisi. Paulus ben warskow: „Efoe a wroko foe iniwan sma di a bow na en tapoe, e tan, dan a sa kisi pai; efoe wan sma en wroko bron, dan a sa lasi den sani foe en, ma ensrefi sa kisi froeloesoe; ma, efoe a de so, a sa de leki a pasa na ini faja.”c — 1 Korentesma 3:14, 15.

14. (a) Fa kresten di e meki disipel kan „lasi sani”, tokoe fa den kan kisi froeloesoe leki den pasa na ini faja? (b) Fa wi kan sorgoe taki wi no lasi so foeroe sani?

¹⁴ Dati na serjoesoe wortoe! A kan hati srefisrefi foe wroko tranga foe jepi wan sma tron wan disipel, nomo foe si taki a sma dati e lasi gowe na ondro tesi nanga froefolgoe èn te foe kaba e gowe libi a pasi foe waarheid. Paulus e erken dati te a e taki dati wi e lasi sani na ini den kefal dati. A sani dati kan de so wan hati sani, taki Paulus e taki foe a froeloesoe foe wi „leki a [e] pasa na ini faja” — neleki wan man di ben lasi ala sani na ini wan faja èn a ben kan froeloesoe ensrefi nomo nanga boen foeroe moeiti. Wi foe wi sei, fa wi kan sorgoe taki wi no e lasi so foeroe? Bow nanga materiaal di e hori langa! Efoe wi e gi den studenti foe wi leri foe doro na ati foe den, foe boeweigi den foe si den sortoe kresten eigifasi leki koni, a koni foe man si sani krin, frede gi Jehovah, nanga opregti bribi, leki sani di warti foeroe, dan wi e bow nanga materiaal di e hori langa èn di faja no man bron (Psalm 19:9, 10; Odo 3:13-15; 1 Petrus 1:6, 7). Den wan di e kisi den sortoe eigifasi disi, sa go doro foe doe a wani foe Gado; den abi a seiker howpoe foe tan na libi foe têgo (1 Johanes 2:17). Ma fa wi kan gebroiki na eksempre foe Paulus na ini wi aladei libi? Poti prakseri na tapoe wan toe eksempre.

15. Na sortoe fasi wi kan sorgoe taki wi no e doe bow-wroko di no de so boen ini a tori foe wi bijbel studenti?

¹⁵ Te wi e gi leri na bijbel studenti, dan noiti wi moesoe horibaka gi libisma moro leki Jehovah. A marki foe wi no de foe leri den foe si wi leki a moro prenspari fonten foe koni. Wi wani taki den moesoe loekoe go na Jehovah, en Wortoe, nanga en organisâsi foe kisi tiri. Foe dati ede, te den e aksi wi sani, dan wi no e taigi den nomo san wi e denki foe a tori. Na presi foe dati, wi e leri den foe feni piki tapoe den aksi, foe di den e gebroiki bijbel nanga den poeblikâsi di „a getrow èn koni srafoe” gi (Mateus 24:45-47). Foe dati ede toe, wi e loekoe boen foe no si den bijbel studenti leki sma di de foe wi. Na presi foe tapoe a pasi gi trawan di wani kon leri sabi den studenti, wi moesoe gi den studenti foe wi deki-ati foe ’bradi densrefi’ na ini a lobi foe den, foe leri sabi so foeroe sma leki den kan na ini a gemeente èn warderi den sma dati toe. — 2 Korentesma 6:12, 13.

16. Fa owroeman kan bow nanga materiaal di faja no man bron?

¹⁶ Kresten owroeman e prei wan prenspari ròl toe foe bow disipel. Te den e gi leri na fesi a gemeente, dan den e soekoe foe bow nanga materiaal di faja no man bron. Den owroeman kan difrenti foeroe na ini bekwaamfasi fa den e gi leri, na ondrofeni di den abi, èn a fasi fa den de, ma den no e soekoe winimarki gi densrefi foe den sani disi so taki den kan hari sma foe waka na den baka. (Teki gersi Tori foe den Apostel 20:29, 30.) Wi no sabi soifri foe san ede wan toe kresten na Korente ben e taki: „Mi na foe Paulus”, noso, „Mi foe Apollos.” Ma pikinmoro wi kan de seiker taki no wan foe den getrow owroeman disi ben horibaka gi a denki disi di e tjari pratifasi kon. Den sani disi no ben bigi na ede foe Paulus; na wan krakti fasi a ben sori krinkrin taki den denki disi fowtoe srefisrefi (1 Korentesma 3:5-7). Na so a de toe na ini a ten disi, den owroeman e hori na prakseri taki den e wèi „na ipi foe Gado” (1 Petrus 5:2). Na ipi no de foe no wan libisma. So boen, owroeman tanapoe kánkan teige iniwan sani di e sori taki wán man wani basi na ipi noso a skin foe owroeman. So langa sakafasi e boeweigi den owroeman foe dini a gemeente, foe doro na ati foe trawan, èn foe jepi den skapoe foe dini Jehovah nanga den heri ati, dan den owroeman e bow nanga materiaal di faja no man bron.

17. Fa kresten papa nanga mama e meki moeiti foe bow nanga materiaal di faja no man bron?

¹⁷ So srefi kresten papa nanga mama e broko den ede foeroe nanga na afersi disi. Fa den e angri srefisrefi foe si taki den pikin foe den e libi foe têgo! Dati meki den e wroko so tranga foe „poti” den gronprakseri foe Gado Wortoe „go dipi” na ini den ati foe den pikin foe den (Deuteronomium 6:6, 7). Den wani taki den pikin foe den moesoe sabi waarheid, no wawan leki wan ipi tirilin noso leki wan lo sani di troe, ma leki wan sani di e gi pai dorodoro èn di e gi sma kolokoe libi dorodoro (1 Timoteus 1:11). Foe man bow den pikin foe den kon tron getrow disipel foe Krestes, dan lobi-ati papa nanga mama e meki moeiti foe gebroiki materiaal di faja no man bron. Nanga pasensi den e wroko nanga den pikin foe den, e jepi den koti ala den eigifasi poeroe di Jehovah no wani si na ai, èn foe kweki den eigifasi di Gado lobi. — Galasiasma 5:22, 23.

Soema abi a frantiwortoe?

18. Te wan disipel no wani teki gosontoe leri, dan foe san ede a no abi foe de so taki den sma di ben meki moeiti foe leri en, abi a fowtoe?

¹⁸ A takimakandra disi e tjari wan prenspari aksi kon na fesi. Efoe wan sma di wi e meki moeiti nanga en foe jepi en e fadon gowe libi waarheid, dan dati wani taki dati wi abi fowtoe leki leriman — taki a moesoe foe de so dati wi ben bow nanga materiaal di no ben de so boen? Dati no abi foe de so. Foe troe, den wortoe foe Paulus e memre wi taki a de wan bigi frantiwortoe foe teki prati na a bow, foe meki sma tron disipel. Wi wani doe ala sani di wi man, foe bow boen. Ma Gado Wortoe no e taigi wi foe poti ala frantiwortoe na wi tapoe èn foe hebi wisrefi nanga a denki taki wi abi fowtoe te wan sma di wi ben soekoe foe jepi e drai gowe libi waarheid. Tra sani de na ini a tori toe, boiti taki wisrefi na sma di e bow. Foe eksempre, loekoe san Paulus e taki ini a tori foe a leriman srefi di no ben doe so wan boen wroko foe bow: „A sa lasi sani, ma ensrefi sa kisi froeloesoe” (1 Korentesma 3:15). Efoe a leriman disi kan kisi froeloesoe te foe kaba — ala di a kresten fasi di a leriman ben meki moeiti foe bow na ini en studenti, e „bron” na ini wan faja tesi — dan san wi moesoe denki te foe kaba? Taki troetroe, Jehovah e poti a fosi frantiwortoe na tapoe a studenti foe den bosroiti di a e teki, efoe a wani waka èn libi na wan getrow fasi, noso efoe a no wani doe dati.

19. Na tapoe san wi sa poti prakseri na ini a tra artikel?

¹⁹ Taki wan sma srefi abi en eigi frantiwortoe, na wan afersi di de kefalek prenspari. A abi krakti tapoe ibriwan foe wi. Sortoe sani spesroetoe, bijbel e leri wi foe na afersi? A tra artikel sa poti prakseri na tapoe disi.

[Foetoewortoe]

Fa joe ben sa piki?

◻ San na a „fondamenti” na ini wan troe kresten, èn fa disi e poti?

◻ San wi kan leri foe den difrenti sortoe materiaal di de foe bow oso?

◻ Na tapoe sortoe sani a „faja” e sori, èn fa a kan meki taki wan toe sma e „lasi sani”?

◻ Fa bijbel leriman, owroeman, nanga papa nanga mama kan bow nanga materiaal di faja no man bron?

[Prenki na tapoe bladzijde 9]

Na ini foeroe owroeten foto, ston-oso di faja no ben man bron ben de makandra nanga oso di no meki foe boen materiaal