Yepi Sma fu Kon Krosibei na Yehovah

„No wan sma e kon na a Tata sondro a yepi fu mi.”—YOHANES 14:6.

1. Sortu komando Yesus, di ben kisi wan opobaka, ben gi den disipel fu en, èn san ben de a bakapisi fu di den Kotoigi fu Yehovah gi yesi na dati?

YESUS KRESTES ben gi den bakaman fu en a komando fu „meki disipel fu sma fu ala nâsi, èn dopu den na ini a nen fu a Tata èn fu a Manpikin èn fu a santa yeye” (Mateus 28:19). Na ini den tin yari di pasa, Yehovah Kotoigi yepi moro leki dri milyun sma fu kon na Gado, èn baka wan pisi ten den ben dopu den leki wan simbôl taki den gi densrefi abra na en fu du a wani fu en. ¡Wi breiti srefisrefi taki wi kan yepi den fu kon krosibei na Gado!—Yakobus 4:8.

2. San pasa ala di furu nyun sma e teki dopu?

² Ma na son kondre pe furu nyun disipel teki dopu, a nomru fu Kownukondre preikiman no gro na a srefi fasi. A no de fu taki dati sma dede tu, dati de so wan 1 procent ibri yari. Ma ini den yari di pasa, sani meki taki wan lo sma fadon gowe. Fu san ede? Na ini na artikel disi èn a wan di e kon wi sa ondrosuku fa sma e kon krosibei na Yehovah èn sortu sani kan meki taki son sma e fadon gowe.

Fu San Ede Wi E Preiki

3. (a) Fa a wroko di den disipel fu Yesus kisi fu du de a srefi leki a wroko fu na engel di kari na Openbaring 14:6? (b) Sortu sani sori fu de wan bun fasi fu meki sma kisi belangstelling gi a Kownukondre boskopu, ma sortu problema de?

³ Na ini a ’ten disi fu a kaba’, den disipel fu Yesus abi a wroko fu panya a „tru sabi” fu „a bun nyunsu disi fu a kownukondre” (Danièl 12:4; Mateus 24:14). A wroko fu den na a srefi leki di fu na engel di „ben abi têgo bun nyunsu fu meki bekènti leki prisiri nyunsu gi den sma di e libi na grontapu, èn gi ibri nâsi nanga lo nanga tongo nanga pipel” (Openbaring 14:6). Na ini a grontapu disi pe sma e furu den ede nomo nanga grontapu sani, a moro bun fasi fu meki sma kisi belangstelling gi a Kownukondre fu Gado èn fu yepi den fu kon krosibei na Yehovah na te yu e taigi den fu a howpu di de taki sma kan libi fu têgo na ini wan paradijs na grontapu. Ala di wi kan frustan disi, toku den sma di moksi densrefi nanga a pipel fu Gado soso fu kan go na ini a Paradijs, no de kánkan te den e waka na tapu a smara pasi di e tyari sma go na libi.—Mateus 7:13, 14.

4. San na a marki fu a preikiwroko fu wi, soleki fa Yesus nanga na engel di e frei na mindrisei fu hemel ben taki?

⁴ Yesus ben taki: „Disi wani taki têgo libi, fu den e teki sabi na ini den fu yu, a wan-enkri tru Gado, èn fu en di yu seni kon, Yesus Krestes” (Yohanes 17:3). Na engel di e frei na mindrisei fu hemel e meki „têgo bun nyunsu” bekènti èn a e taigi den sma di e tan na grontapu: „Frede Gado èn gi en glori, bika a yuru doro te a sa tyari krutu kon, èn fu dati ede, anbegi a Sma di ben meki hemel nanga grontapu nanga se nanga den watra fonten” (Openbaring 14:7). Dati meki a moro prenspari marki di wi abi na prakseri te wi e preiki a bun nyunsu na fu yepi sma fu kon krosibei na Yehovah nanga yepi fu Krestes Yesus.

A Rol fu Wi na ini a Wroko fu Yehovah

5. Sortu sani di Paulus nanga Yesus ben taki e sori taki wi e du a wroko fu Yehovah, èn no a wroko fu wi?

⁵ Te na apostel Paulus e skrifi salfu kompekresten, dan a e taki fu „a diniwroko fu meki sani kon bun baka” èn a e taki dati Gado e meki sma kon bun baka nanga en fu a frulusu-ofrandi fu Yesus Krestes ede. Paulus e taki dati a de ’neleki Gado ben aksi wan sani na wan seryusu fasi nanga yepi fu wi’ èn taki „leki sma di de ini a presi fu Krestes wi e begi: ’Kon bun baka nanga Gado.’” ¡Dati na wan prakseri di e gi wi trowstu trutru! Awansi wi na salfu „sma di e teki presi gi Krestes” noso wi na en boskopuman di abi a howpu fu libi na grontapu, toku wi no musu frigiti noiti taki disi na a wroko fu Yehovah, èn no a wroko fu wi (2 Korentesma 5:18-20). Na Gado e hari sma kon na en èn a e leri den sma di e kon na Krestes. Yesus ben taki: „No wan sma kan kon na mi, boiti efu a Tata, di ben seni mi kon, e hari en kon; èn mi sa gi en wan opobaka na tapu a lasti dei. A skrifi na ini den Profeiti: ’En den alamala sa kisi leri fu Yehovah.’ Ibriwan sma di yere fu a Tata èn kisi leri fu en, e kon na mi.”—Yohanes 6:44, 45.

6. Fa Yehovah e seki den nâsi bun, èn suma na den sma di na a srefi ten e feni kibri na ini en „oso” fu anbegi?

⁶ Fa Yehovah e hari sma kon na en na ini den lasti dei disi èn e opo a „doro fu bribi” gi den? (Tori fu den Apostel 14:27, futuwortu; 2 Timoteus 3:1) Wan prenspari fasi na fu di den Kotoigi fu en e meki den boskopu fu en di e taki fu frulusu èn fu a krutu di a godelowsu seti fu sani disi sa kisi, bekènti (Yesaya 43:12; 61:1, 2). A bariwroko disi di e du na heri grontapu e seki den nâsi bun — èn disi e sori taki a ten fu tyari wan krutu kon di wani taki pori, de krosibei. Na a srefi ten, den sma di de „warti sani” na ini Gado ai e hari komoto na ini a seti disi èn den kan go kibri na ini en „oso” fu tru anbegi. Na so Yehovah e meki den profeiti wortu fu en kon tru di Hagai ben skrifi: „Mi wani seki ala den nâsi, èn den warti sani fu ala den nâsi musu kon na ini; èn mi wani furu na oso disi nanga glori.”—Hagai 2:6, 7, futuwortu; Openbaring 7:9, 15.

7. Fa Yehovah e opo na ati fu sma èn e hari sma kon na en èn na en Manpikin?

⁷ Yehovah e opo na ati fu den sma di frede Gado — „den moro bun sani fu ala den nâsi” — so taki den kan „poti prakseri na den sani di [den Kotoigi fu en] e taki” (Hagai 2:7, Jewish Publication Society; Tori fu den Apostel 16:14). Neleki fa a ben de na ini a fosi yarihondro, na so Yehovah e gebroiki den engel fu en son leisi fu tyari den Kotoigi fu en go na opregti sma di bari kari en fu gi den yepi (Tori fu den Apostel 8:26-31). Te sma e leri den moi sani di Gado du gi den nanga yepi fu en Manpikin Yesus Krestes, dan a lobi fu Yehovah e hari den kon na En (1 Yohanes 4:9, 10). Iya, Gado e hari sma kon na en èn na en Manpikin nanga yepi fu En „lobi bun-atifasi”, noso „loyaal lobi”.—Yeremia 31:3, futuwortu.

Suma Yehovah E Hari Kon na En?

8. Sortu sma Yehovah e hari kon na en?

⁸ Yehovah e hari den sma di e suku en kon na en èn na en Manpikin (Tori fu den Apostel 17:27). Dati na den sma di „e soktu èn e geme fu ala den tegu sani di e pasa” na ini Krestenhèit èn, te yu luku en bun, na heri grontapu (Esekièl 9:4). Den „sabi den yeye nowtu” (Mateus 5:3). Iya, den na den „safri-ati [„sakafasi”, futuwortu] sma fu grontapu”, di sa tan na ini a paradijs na grontapu fu têgo.—Sefanya 2:3.

9. Fa Yehovah kan si efu sma abi „a yoisti yeye gi a têgo libi”, èn fa a e hari den sma disi kon na en?

⁹ Yehovah kan leisi na ati fu wan sma. Kownu David ben taigi en manpikin Salomo: „Yehovah e ondrosuku ala ati, èn a sabi ibri firi fu den prakseri. Efu yu e suku en, dan a sa meki taki yu feni en” (1 Kroniki 28:9). Na a fasi fa wan sma en ati nanga en yeye tan, noso a fasi fa a e handri moro furu, Yehovah kan si efu a man noso na uma dati sa handri na tapu den sani di Gado seti so taki sma kan kisi pardon fu sondu èn abi a howpu fu libi fu têgo na ini a regtfardiki nyun seti fu en (2 Petrus 3:13). Yehovah e gebroiki en Wortu, di den Kotoigi fu en e preiki èn e leri sma, fu hari ’ala den sma di abi a yoisti yeye gi a têgo libi’ kon na en èn na en Manpikin, èn den sma disi e „tron bribiman”.—Tori fu den Apostel 13:48.

10. San e sori taki te Yehovah e hari son sma kon na en èn a no e hari trawan kon na en, dan a no bosroiti disi na fesi kaba?

¹⁰ ¿Na bosroiti Yehovah bosroiti na fesi kaba taki a e hari son sma kon na en, ma trawan a no e hari kon na en? ¡Kwetikweti! Te Gado e hari sma kon na en, dan dati e anga fu den sani di densrefi wani trutru. A e lespeki a fri wani fu den. Yehovah e gi den sma di e libi na grontapu na ini a ten disi a srefi okasi di a ben gi den Israèlsma moro leki 3000 pasa kaba, di Moses ben taki: „Tide mi e poti trutru na yu fesi libi nanga bun, èn dede nanga ogri. . . . Mi e teki hemel nanga grontapu leki kotoigi teige yu tide, taki mi poti libi nanga dede na yu fesi, blesi nanga fluku; èn yu musu frukisi libi so taki yu kan tan na libi, yu nanga yu bakapikin, fu di yu lobi Yehovah, yu Gado, fu di yu e arki en sten èn fu di yu e tan hori na en; bika en na yu libi nanga a langa fu den dei fu yu.”—Deuteronomium 30:15-20.

11. Fa den Israèlsma ben musu frukisi a libi?

¹¹ Luku taki den Israèlsma ben musu frukisi a libi ’fu di den ben o lobi Yehovah, fu di den ben o arki en sten, èn fu di den ben o tan na en’. Di den wortu disi ben taki, dan a pipel fu Israèl no ben teki a Pramisi Kondre abra ete. Den ben wakti na tapu a Lagipresi fu Moab, e sreka densrefi fu abra Yordanliba èn fu go na ini Kanan. Ala di a ben de wan gewoon sani taki den ben o prakseri a kondre di ben „bun èn bigi” èn pe ’merki nanga oni ben lon’ èn di den ben o kisi dyonsro, toku den dren fu den ben kan kon tru te den ben o lobi Yehovah, te den ben o arki en sten, èn te den ben o tan na en (Exodus 3:8). Moses ben tyari disi kon na krin di a ben taki: „Efu yu sa arki den komando fu Yehovah, yu Gado, di mi e gi yu tide, so taki yu kan lobi Yehovah, yu Gado, waka na tapu den pasi fu en èn e hori den komando fu en èn den frumane fu en èn den krutu bosroiti fu en, dan yu sa tan na libi trutru èn yu sa kon furu, èn Yehovah, yu Gado, musu blesi yu na ini a kondre di yu sa teki kisi.”—Deuteronomium 30:16.

12. San na eksempre fu den Israèlsma musu leri wi fu a preikiwroko fu wi èn a wroko fu gi sma leri?

¹² ¿A sani di wi taki didyonsro no musu leri wi wan sani fu a preikiwroko di wi e du na ini a ten disi fu a kaba èn a leri di wi e gi sma? Wi e denki fu a Paradijs grontapu di sa kon èn wi e taki fu en na ini a diniwroko fu wi. Ma wi èn so srefi den disipel di wi e meki no sa si fa a pramisi sa kon tru, efu wi noso den e dini Gado soifri fu di wi e prakseri wisrefi nomo. Wi nanga den sma di wi e gi leri, musu leri fu ’lobi Yehovah, fu arki en sten èn fu tan na en’, neleki den Israèlsma. Efu wi e hori disi na prakseri te wi e du a diniwroko fu wi, dan te yu luku en bun, wi sa wroko makandra nanga Gado te a e hari sma kon na en.

Kompe-wrokoman fu Gado

13, 14. (a) Fa wi e tron kompe-wrokoman fu Gado, soleki fa 1 Korentesma 3:5-9 e sori? (b) Suma musu kisi a grani gi a gro, èn fu san ede?

¹³ Paulus ben agersi fa wi kan wroko makandra nanga Gado di a ben taki fu a wroko di wan sma e wroko wan gron. A ben skrifi: „Dan san na Apolos? Iya, san na Paulus? Dinari di ben yepi unu fu tron bribiman, soleki fa Masra gi ibriwan sma. Mi ben prani, Apolos ben nati a gron, ma Gado ben tan meki a gro; so taki no a sma di e prani na wan sani, efu noso a sma di e nati a gron, ma Gado, di e meki a gro. Now, a sma di e prani èn a sma di e nati a gron na wán, ma ibri sma sa kisi en eigi pai akruderi en eigi wroko. Bika wi na kompe-wrokoman fu Gado. Unu na Gado en gron di wi e wroko, na oso fu Gado.”—1 Korentesma 3:5-9.

¹⁴ Wi, leki kompe-wrokoman fu Gado, musu prani „a wortu fu a kownukondre” na ini na ati fu sma na wan getrow fasi, èn baka dati nati ibri belangstelling di sma abi, fu di wi e tyari gobaka èn e hori bijbelstudie di sreka bun. Efu a gron, na ati, bun dan Yehovah sa du san en musu du te a sa meki a siri fu Bijbel waarheid gro kon tron wan bon di e tyari froktu (Mateus 13:19, 23). A sa hari a sma kon na en èn na en Manpikin. Dan te fu kaba, ala fasi fa a nomru fu Kownukondre preikiman e kren na fu di Yehovah e wroko na den ati fu sma, a e meki a waarheid siri gro èn a e hari den sma dati kon na en èn na en Manpikin.

Bow-wroko Di Sa Tan

15. Sortu agersitori Paulus ben gebroiki fu sori fa wi kan yepi tra sma fu kisi moro bribi?

¹⁵ Ala di wi breiti taki moro sma e kon, wi wani si trutru taki sma tan lobi Yehovah, tan arki en sten, èn e tan na en. Wi e sari te wi e si taki son sma e kon kowru èn e fadon gowe. ¿Wi kan du wan sani fu disi no pasa? Na ini wan tra agersitori, Paulus e sori fa wi kan yepi tra sma fu kisi moro bribi. A e skrifi: „No wan sma kan poti wan tra fondamenti leki a wan di ben poti kaba, dati na Yesus Krestes. Now, efu wan sma e bow na tapu a fondamenti gowtu, solfru, diriston, udu sani, drei grasi, stro, dan a wroko fu ibriwan sma sa kon de fu si, bika a dei sa meki a kon na krin, bika a sa tyari kon na krin nanga yepi fu faya; èn a faya srefi sa sori fa a wroko fu ibriwan sma de.”—1 Korentesma 3:11-13.

16. (a) Fa a marki fu den tu agersitori di Paulus ben gebroiki, e difrenti? (b) Fa a kan kon taki a bow-wroko fu wi no bun èn taki a no man kakafutu gi faya?

¹⁶ Na ini Paulus en agersitori fu a gron, sani kan gro te a prani bun, te a e kisi watra doronomo, èn te Gado e blesi en. A tra agersitori fu na apostel e tyari kon na fesi san na a frantiwortu fu a Kresten dinari ini a tori fu a fasi fa sani e waka nanga a bow-wroko fu en. ¿A bow na tapu wan bun fondamenti nanga bun bow sani? Paulus e warskow: „Meki ibri sma tan luku fa a e bow” (1 Korentesma 3:10). ¿A de so, taki te wi meki wan man noso wan uma kisi belangstelling nanga den sani di wi taigi en taki wan howpu de taki sma kan libi fu têgo na ini wan Paradijs, dan wi e leri en soso a fondamenti sabi fu Bijbel. ¿A de so, taki baka dati wi e poti prakseri nomo na san a sma musu du fu kisi têgo libi? ¿A kan, taki a leri fu wi na soso a sani disi: ’Efu yu wani libi na ini a Paradijs fu têgo, dan yu musu studeri, go na den konmakandra èn teki prati na a preikiwroko’? Efu dati de so, dan wi no e bow a bribi fu a sma na tapu wan tranga fondamenti, èn san wi e bow no sa man kakafutu gi a faya fu den tesi di sa kon noso sa man tan fu wan langa pisi ten. Te wi e pruberi fu hari sma kon na Yehovah soso fu di wi e gi den a howpu taki den kan libi na ini a Paradijs te den e dini en wan tu yari, dan dati de neleki te wi e bow nanga „udu sani, drei grasi, stro”.

Bow Lobi gi Gado èn gi Krestes

17, 18. (a) Sortu sani de tumusi prenspari efu wan sma wani tan abi wan tranga bribi? (b) Fa wi kan yepi wan man noso wan uma fu meki Krestes e libi na ini en ati?

¹⁷ Efu wi wani tan abi wan tranga bribi, dan a musu abi en gron na tapu wan banti di wisrefi abi nanga Yehovah Gado nanga yepi fu Yesus Krestes. Wi leki onvolmaakti libisma, kan kisi so wan bun banti nanga Gado soso nanga yepi fu en Manpikin (Romesma 5:10). Memre taki Yesus ben taki: „No wan sma e kon na a Tata sondro a yepi fu mi.” Efu wi wani yepi tra sma fu bow a bribi fu den, dan „no wan sma kan poti wan tra fondamenti leki a wan di ben poti kaba, dati na Yesus Krestes”. San disi wani taki?—Yohanes 14:6; 1 Korentesma 3:11.

¹⁸ Fu bow na tapu Krestes leki a fondamenti, wani taki fu gi leri na so wan fasi taki a Bijbel studenti e leri fu lobi Yesus trutru fu di a kon sabi dorodoro san A du leki Frulusuman, Edeman fu a gemeente, wan lobi-ati Granpriester, èn Kownu di e tiri (Danièl 7:13, 14; Mateus 20:28; Kolosesma 1:18-20; Hebrewsma 4:14-16). A wani taki dati wi e meki Yesus tron wan trutru sma gi den, taki a gersi leki A e libi na ini na ati fu den. A begi di wi e begi gi den musu de leki a begi di Paulus ben begi gi den Kresten fu Efeise. A ben skrifi: „Mi e boigi mi kindi gi a Tata, . . . so taki a kan gi unu . . . fu meki Krestes libi na ini un ati nanga lobi; so taki unu kan meki rutu èn kan kon stanfaste na tapu a fondamenti.”—Efeisesma 3:14-17.

19. San musu de a bakapisi te wi e bow lobi gi Krestes na ini na ati fu den Bijbel studenti fu wi, ma san wi musu leri den?

¹⁹ Efu wi e bow na so wan fasi taki lobi gi Krestes e gro na ini na ati fu den studenti fu wi, dan a de seiker taki den sa leri lobi Yehovah Gado tu. A lobi di Yesus abi, den firi fu en èn a sari-ati fu en na wan soifri eksempre di e sori wi den eigifasi fu Yehovah (Mateus 11:28-30; Markus 6:30-34; Yohanes 15:13, 14; Kolosesma 1:15; Hebrewsma 1:3). So bun, efu sma e kon sabi Yesus èn lobi en, dan den sa kon sabi Yehovah èn lobi en (1 Yohanes 4:14, 16, 19).a Wi musu leri den Bijbel studenti taki Yehovah e horibaka gi ala sani di Krestes du gi a libisma famiri èn taki fu dati ede wi musu taigi En tangi, wi musu prèise En, èn anbegi En leki a „Gado fu wi frulusu.”—Psalm 68:19, 20; Yesaya 12:2-5; Yohanes 3:16; 5:19.

20. (a) Fa wi kan yepi sma fu kon krosibei na Gado èn na en Manpikin? (b) Sortu sani wi sa taki na ini na artikel di e kon?

²⁰ Meki wi leki kompe-wrokoman fu Gado, yepi sma fu kon krosibei na en èn na en Manpikin, fu di wi e yepi den fu meki lobi nanga bribi gro na ini na ati fu den. Na so fasi Yehovah sa tron wan trutru sma gi den (Yohanes 7:28). Nanga yepi fu Krestes den sa man kisi wan tranga banti nanga Gado, èn den sa lobi en èn tan na en. A dini di den e dini en fu lobi ede no sa anga fu ten, ma den e sori taki den e bribi taki den moi pramisi fu Yehovah sa kon tru na en ten (Kragisingi 3:24-26; Hebrewsma 11:6). Ma te wi e yepi trawan fu kisi bribi, howpu nanga lobi, dan wi musu bow wi eigi bribi so taki a de leki wan tranga sipi di man kakafutu gi bigi winti. Disi wi sa taki na ini na artikel di e kon.

[Futuwortu]

Fu Luku Sani Syatu Baka

◻ Fa wi e meki sma kisi belangstelling gi a Kownukondre boskopu moro furu, ma san na a kefar?

◻ Sortu sma Yehovah e hari kon na en èn na en Manpikin?

◻ Sortu sani ben o meki taki Israèl ben kan go na ini a Pramisi Kondre, èn san wi kan leri fu disi?

◻ San na a rol fu wi na ini a wroko di wi e du fu yepi sma kon krosibei na Yehovah èn na en Manpikin?

[Prenki na tapu bladzijde 10]

Ala di wi e leri sma a howpu fu kisi têgo libi na ini a Paradijs, toku a moro prenspari marki fu wi na fu meki den kon krosibei na Yehovah

[Prenki na tapu bladzijde 13]

Den gobaka fu wi sa waka bun trutru efu wi e sreka wisrefi bun