Jepi inactiefwan foe kon tranga ini na bribi
1 Na ini februari 1982 wan bigin ben meki nanga wan spesroetoe moeiti foe gi tranga na inactiefwan èn jepi den. San ben de den bakapisi? Wi kan doe moro foe asisteri den swakiwan ofoe inactiefwan? Fa wi kan gi tranga na wi brada nanga sisa?
2 Wi e prisiri srefsrefi foe meki oen sabi dati foeroe foe den di a fesi ben de inactief, e dini nanga wi makandra skowroe na skowroe. Den ben de leki na Psalmsingiman: „Mi ben waka lontoe leki wan lasi skapoe. O soekoe joe knegti, bikasi joe komando mi no ben frigiti” (Psalm 119:176). Wan sisa di ben erken na lasi foe en krosbé matifasi, ben begi na en foe kisi tiri èn a tamara foe en wan owroeman ben go fisiti en foe gi en wan bijbelstudie. A sisa ben taki: „Fa mi ben sa moe tan foe libi na dini foe en na baka?” Wan toemsi ongolokoe osofamiri, di ben kon de inactief leki wan bakapisi foe na feti baka goedoe na skinfasi, ben kisi fisiti foe toe owroeman di ben moe pristeri wan bijbelstudie. Den ben taki: „Na tapoe dati wi ben wakti now precies.” Now na heri osofamiri e teki prati nanga foeroe prisiri ini a dienst, aladi den e proberi foe doe moro mendri grontapoe wroko.
3 Foe troe, Jehovah, na bigi Herder, ben blesi den lobi moeiti foe den owroeman nanga ala den di ben wroko nanga den makandra (1 Petr. 2:25). Wan opziener di e reis na ini den Verenigde Staten e ferteri dati na ini wan bepaalde gebied den brada ben abi na prisiri foe si 75 sma kon de actief baka, sodati a ben de fanowdoe foe opo wan njoen gemeente. Foeroe kring e ferteri dati na ini den kring sowan 25 te kan miti 100 sma ben kon de actief baka. Ete hondrohondro trawan ben bigin foe fisiti den komakandra èn e gro na ini bribi foe di den seti bijbelstudie gi den.
4 Foeroe den wortoe foe tangi de foe den fosten „lasi skapoe”. Di den owroeman go fisiti wan osofamiri na trowlibi foe den ben de tapoe na punt foe panja. Den pikin ben kon broeja èn ben aksi densrefi efoe den ben de ete Jehovah Kotoigi. Ma na osofamiri ben teki wan bijbelstudie èn ben bigin foe de makandra baka nanga na gemeente foe den. Na brada ben taki: „Now Jehovah ben blesi wi moeiti foe di a ben meki wi kon moro tranga na jejefasi nanga wi trowlibi a e go toemsi boen èn wi e stoederi leki osofamiri; wi e go na ala komakandra èn na ini na dienst now. Wi de toemsi grantangi foe na pasensi foe den Jehovah èn na jepi foe den brada”. Wan tra sisa di ben kon de actief baka, ben taki nanga wan lafoe tapoe en fesi: „A moen di psa mi ben gi mi fosi dienstbericht na ini 10 jari. Èn nanga jepi foe Jehovah no-ferdini boenfasi mi no sa meki wan moen psa sondro foe préki tapoe na wan ofoe trafasi.” Wan man nanga oema ben taki gi wan owroeman di ben kon loekoe den: „Den toe moen di psa, pe wi ben kisi stoedie èn ben go na den komakandra ben de den moro prisiri wan na ini den twarfoe jari foe wi trowlibi.”
5 Fa wi kan tan jepi den inactiefwan? Go doro foe doe moeiti foe gi tranga èn jepi na den di verdwaal. Taki na wan positief fasi èn sori dati joe e ferstan na situwasi foe na sma. Begi makandra nanga den. Gi den réden foe de nanga howpoe foe firi dati den de warti na ini na ai foe Gado.
6 Efoe joe e studeri nanga wan sma di de inactief, prakseri dan dati na kon boen baka na jejefasi de wan proces di foeroetron e go safrisafri èn stap foe stap. Pasensi nanga lankmoedigheid de fanowdoe. Di den ben aksi wan sisa san ben jepi en foe drai kon baka, a ben taki dati na sma di ben studeri nanga en „no ben wani libi a tori kwetkweti”. Jepi den foe si na waarde foe „tan hori wan pasi di ben poti faste”, foe di den e kweki boen studie nanga dienstgwenti (Ps. 50:23). Ala sma na ini na gemeente kan jepi foe di den e go teki den sma disi na ini na lobi demakandra foe den. Wan sma di ben kon actief baka ben taki a ben kisi jepi foe di „den mati ben sori mi wan toemsi bigi switifasi nanga lobi di mi ben go baka na den komakandra. Wi de troetroe wan bigi famiri”.
7 Meki wi no frigiti noiti den sma di na a momenti disi de nanga wi èn abi wi jepi fanowdoe, ala di wi e proberi foe jepi den inactiefwan (Tori. 20:35). Wi kan jepi foeroe sma foe no fadon go na ini inactiviteit te wi e sori belangstelling na ini na jejefasi foe wi brada nanga sisa. Wan sma de na joe boekoestudie-groepoe di e doe en pikinso safrisafri ini a tori foe na dienst ofoe di e djompo konmakandra? Tapoe wan ofoe tra fasi a abi dek’ati fanowdoe? Joe ben kan gi en wan kari foe de na joe oso- ofoe persoonlek studie? Joe ben sa kan wroko nanga en makandra na ini na diniwroko? Meki wi gi makandra ibri dé dek’ati, na presi foe wi hari wisrefi poeroe foe Jehovah leki wan bakapisi foe mankeri foe bribi. — Hebr. 3:12.