Yepi inactiefwan
1 Wan fu den agersitori fu Yesus e go fu wan herder di e libi 99 skapu a baka èn di e go suku na wan di laspasi. Yu kan memre ete san Yesus ben taki san ben sa psa efu a ben sa feni na wan skapu di ben laspasi? „Èn efu a ben feni en, futru, mi e taigi yu dati a sa prisiri moro fu na wan dati leki fu den 99 di no ben laspasi” (Matt. 18:13). Sowan prisiri furu gemeente ben ondrofeni di inactiefwan ben drai kon baka na a ipi fu Gado.
2 Ini den yari di ben psa spesrutu prakseri ben poti tapu na yepi fu den sma di ben kon de inactief. Opziener abi na frantwortu fu poti prakseri na a heri ipi (Tori 20:28). Fu dat’ede meki den ben teki fesi ini na fisiti fu inactiefwan. Leki wan bakapisi fu dati meki furu sma ben opo du wan sani tapu na muiti disi fu lobi èn den kon tron baka actief kownukondre preikiman. Wantu de ete ini yu gemeente di den yari di psa ben kon de inactief? San kan du fu yepi den?
SAN KAN DU
3 Na dienstopziener nanga na sekretarsi e teki fesi ini na tyari konmakandra fu den muiti fu sorgu gi inactiefwan. Den owruman mu seti den afersi so dati den tyari a fosi fisiti. Ini wantu geval a kan de dati na inactiefwan e feni en bun efu wan sma ben sa hori wan bijbelstudie na en. Ini a geval dati dan na dienstopziener sa bepaal suma sa kisi na wroko fu hori na studie. Kande na sma di biginbigin ben studeer nanga en, ofu wan sma di a ben sabi èn ai respeki, de na sma fu pristeri en yepi. Efu wan heri osofamiri de ini a tori, dan wan owruman ofu wan bekwaam dinari ini na diniwroko ben kan aksi fu studeri nanga den. Wan inactief sisa ben sa kan kisi yepi fu wan sisa nanga ondrofeni. Wan yonguwan kande e teki sani moro fu wan bekwaam pionier. Na dienstopziener kan rikomanderi fu studeri bepaalde tori ofu wan heri publikatie. Na marki de fu gi na yepi di de fanowdu. Na dienstopziener kan gebroiki suma ooktu di de a sma di de moro bun fu du a wroko dati.
4 Son owruman ben feni en wan bun sani na a fosi fisiti fu taki fu na artikel ’Drai go baka na a Herder fu yu sili’ fu Na Wachttoren fu 1 september 1982. Yehovah sar’ati kan tyari kon na krin èn ondrofenitori di e bow a bribi fu den sma di ben drai baka kon na Yehovah kan ferteri. Ini a geval fu na yonguwan di de inactief, na artikel di nen „Meki yu ati drai kon na Yehovah”, di ben kon ini Na Wachttoren fu 1 januari 1983, kan de wan bun sani. Bakadati sani kan seti gi wan geregelde bijbelstudie.
5 Preikiman di kisi na frantwortu èn na grani fu lei den sortu studie disi, mu sori persoonlijk belangstelling gi den sma disi. Kweki matifasi nanga den. Poti krakti tapu na prensparifasi fu na kisi baka fu yeye krakti. Yepi den fu si dati Yehovah fu en lobi èn en sorgu ede gi den nanga yepi fu en organisatie ben seti sani gi na persoonlek yepi disi.
6 Aladi den e aksi bepaalde preikiman fu yepi inactiefwan, dan disi no wani taki dati trawan no kan gi yepi ooktu. Ala sma kan teki fesi fu taki den sma disi odi te den e kon na a kownukondrezaal èn kan hori takmakandra nanga den di e bow den bribi. Sori dati wi e feni en wan switi sani dati den de drape èn e howpu dati den sa go doro fu go a fesi. Na belangstelling disi fu lobi alaten mu sori aladi den e go a fesi na yeyefasi. Positief bakapisi du kon nanga den muiti disi di ben bondru kon na wan. — Ef. 4:16.
7 Iya, wi e prisiri seiker fu si dati fosten inactiefwan kon moksi densrefi baka nanga wi. Disi de spesrutu gi den di man fu gi persoonlijk yepi. A de a begi fu wi dati Yehovah blesi den muiti fu wi fu „du san bun” na den inactiefwan di „abi asrefi bribi leki wi”. — Gal. 6:10.