No frigiti den preikiman di tapu nanga a diniwroko fu den
1. Fu san ede wi musu yepi den sma di tapu nanga a diniwroko fu den?
1 Yu sabi wan preikiman di tapu nanga a diniwroko fu en? Kande a no abi demakandra moro nanga a gemeente èn kande a drifi gowe fu a gemeente. Kande yu miti so wan sma di yu ben e du na oso-fu-oso diniwroko. Wi no musu frigiti taki a sma disi na wan Kresten brada noso sisa fu wi ete. Wi wani sori en taki wi lobi en ete, èn wi musu yepi en fu drai kon baka na a gemeente èn ’na a sma di de wi skapuman èn di e luku taki sani e waka bun nanga wi’.—1 Petr. 2:25.
2. Fa wi kan gi deki-ati na wan sma di tapu nanga a diniwroko fu en?
2 Sori taki yu e broko yu ede nanga den: Te wi bel wan preikiman di tapu nanga a diniwroko fu en, noso te wi e go luku en wan leisi, dan a sa si taki wi no frigiti en. San wi kan taigi so wan sma? Wi kan gi en deki-ati te wi e sori en taki wi abi en na prakseri. Taki nanga en na wan switi fasi, èn gi en deki-ati (Fil. 4:8). Kande wi kan taki fu wan sani di wi ben feni moi na wan fu den lasti konmakandra. Wi kan gi en wan kari tu fu kon na wan fu den gemeente konmakandra, noso na wan fu den bigi konmakandra di de fu kon. Wi kan hori wan sidonpresi gi en, noso wi kan go teki en fu go na a konmakandra nanga wi.
3. Fa wan sisa bigin du en diniwroko baka?
3 Wan preikiman ben miti wan sisa na ini a preikiwroko di ben tapu nanga en diniwroko pasa 20 yari kaba. Aladi a sisa disi no ben wani studeri Bijbel, toku a preikiman tan go na en doronomo fu tyari den nyun tijdschrift gi en. Baka a distrikt kongres, a preikiman go na a sisa di ben tapu nanga a diniwroko fu en, dan a fruteri a sisa wan tu prenspari sani di ben taki na a kongres. Bakaten a sisa disi bigin du en diniwroko baka.
4. Fa wi musu handri nanga wan sma di e kon baka na den konmakandra?
4 Te wan sma e kon baka na a gemeente: Fa wi musu handri nanga wan brada di ben tapu nanga a diniwroko fu en, te a e bigin kon baka na den konmakandra? We, fa Yesus ben handri nanga den disipel fu en di ben gowe libi en wan pisi ten? Na wan lobi-ati fasi, Yesus ben kari den en „brada”, èn a ben sori taki a ben e frutrow den. A ben gi den wan prenspari wroko srefi (Mat. 28:10, 18, 19). Syatu baka dati, den ben e meki a bun nyunsu bekènti èn den ben „tan” du a wroko disi go doro.—Tori. 5:42.
5. Na ini sortu situwâsi wi musu taki nanga den owruman fu sma di tapu nanga a diniwroko fu den?
5 Fosi wi aksi wan sma di tapu nanga a diniwroko, fu studeri Bijbel baka, noso fu go nanga wi na ini a preikiwroko, dan wi musu taki nanga den owruman fosi. Te wi miti wan preikiman di tapu nanga en diniwroko na ini a kontren pe wi e preiki, dan wi musu fruteri den owruman, so taki den kan gi a sma a yepi di a abi fanowdu.
6. Sortu sani kan gi wi prisiri te wi e yepi den sma di tapu nanga a diniwroko fu den?
6 Soleki fa Bijbel e sori krinkrin, dan na soso den sma di e lon a streilon te na a kaba, sa kisi frulusu (Mat. 24:13). Fu dati ede, wi musu poti prakseri na den sma di naki futu kande, noso den wan di drifi gowe fu a gemeente. Te wi poti prakseri na den sma disi fu di wi e broko wi ede nanga den trutru, dan wi e sori lobi nanga pasensi, neleki fa Yehovah e du dati. Kande wi sa prisiri bakaten te wi e si taki den sma disi bigin du a santa diniwroko fu den baka makandra nanga wi.—Luk. 15:4-10.